Konosiendo, Stimando, i Kresiendo
Ku nos tur por yega na komprondé nos parti den e gran obra di ministrá aki p’asina nos por bira mas manera Dje.
Na 2016 e Koro di Tabernakulo na Tempel Square a bin bishita Hulanda i Bèlgika. Dor ku mi tabata involbí den e evento eksitante ei, mi tabatin e oportunidat di disfrutá di nan presentashon dos biaha.
Durante nan presentashon mi tabata pensa tokante e esfuerso tremendo pa move un koro di e tamaño ei. Mi mente a bai na e gong grandi, ku tabata difisil i probablemente kostoso pa transportá den komparashon ku e violin, tròmpèt, òf otro instrumentonan ku bo por a karga fasilmente bou di bo brasa. Pero mirando e involvimentu di e gong aki, el a wòrdu toká solamente algun bes, miéntras ku e otro instrumentonan mas chikitu tabata involví durante kasi hinter e konsierto. Mi a reflekshoná ku sin e zonido di e gong e presentashon lo no tabata meskos i pues e esfuerso mester a wòrdu hasí pa move e gong grandi aki krusando e oséano.
Tin biaha nos por sinti ku nos ta,manera e gong, bon solamente pa toka algun parti chikitu den e presentashon. Pero laga mi bisa boso ku boso zonido ta hasi tur e diferensia.
Nos tur mester di tur instrumènt. Tin algun di nos ta siña fasilmente i ta bai bon na skol, miéntras otronan tin talentonan artístiko. Algun ta diseñá i krea kos òf nutri, protehé, òf siña otronan. Nester di nos tur pa trese koló i nifikashon den e mundu aki.
Na esnan ku ta sinti ku nan no tin nada di kontribuí òf kere ku nan no ta di importansia òf konsekuensia pa ningun hende, pa otronan ku por ta sinti ku nan ta na tòp di mundu, i ningun hende mei mei, lo mi ke dirigí e mensahe aki.
Unda ku boso ta riba e kaminda di bida, algun di boso ta sinti asina pisá ku boso no ta ni konsiderá boso mes riba e kaminda. Mi ke invitá boso pa sali for di skuridat i drenta den e lus. E lus di e evangelio ta proveé kalor i sanashon i lo yuda boso komprondé ken boso ta realmente i kiko boso propósito ta den e bida aki.
Algun di nos a desviá i bai den kamindanan prohibí, tratrando na haña felisidat.
Nos ta wòrdu invitá dor di un Tata Selestial amoroso pa kana riba e kaminda di disipulado i regresá bèk serka dj’E. E stima nos ku un amor perfekto.1
Kiko ta e kaminda? E kaminda ta pa yuda kada un di nos komprondé ken nos ta dor di ministrá na otronan.
Pa ami, ministrá ta ehersé amor divino.2 Na e manera ei nos ta krea un ambiente kaminda tantu e dunadó i esun ku ta risibí ta haña un deseo di arepentí. Den otro palabra, nos ta kambia direkshon i bin mas serka na i bira mas manera nos Salbador, JesuCristu .
Por ehèmpel, no tin nesesidat di konstantemente bisa nos kasá òf yunan kon nan por mehorá; nan sa esei kaba. E ta den krea un ambiente di amor ku nan lo wòrdu empoderá pa hasi e kambionan nesesario den nan bida i bira mihó hende.
Di e manera aki arepentimentu ta bira un proseso diario ku por inkluí pidi despensa pa un komportashon malu. Mi ta korda i ainda eksperensiá situashonnan kaminda mi por tabata muchu lihé pa husga i hopi slow pa skucha. I na final di dia, durante mi orashon personal, mi a sinti e konseho amoroso di shelu pa arepentí i bira mihó. E ambiente amoroso kreá promé pa mi mayornan, rumannan i despues dor di mi kasá, yunan, i amigunan a yuda mi bira un mihó persona.
Nos tur sa unda nos por hasi mihó. No tin nesesidat di keda kordá otro, pero tin e nesesidat di stima i ministrá na otro i hasiendo esaki, e ta proveé e klima di e disposishon pa kambia.
Den e mesun ambiente aki nos ta siña ken nos ta berdaderamente i kiko nos ròl ta den e lastu kapítulo di e historia di mundu promé ku e Segunda Binida di e Salbador.
Si boso ta pensando riba boso parti, mi ke invitá bo pa haña un lugá kaminda bo por ta bo so i puntra Tata Selestial pa laga bo sa kua parti abo mester hunga. E kontesta probablemente lo bin gradualmente mas kla ora nos pone nos pianan mas firme den e kombenio i e kaminda di ministrá.
Nos ta eksperensiando algun di e mesun difikultatnan ku Jose Smith a konfrontá ora e tabata “meimei di e guera di palabra i tumulto di opinion.” Ora nos ta lesa den su propio registro, hopi biaha e tabata bisa su mes: “Kiko mester wòrdu hasí? Kua di tur e gruponan aki tin rason; òf, nan tur ta robes? Si algun di nan tin rason, kua [di nan] e ta, i kon lo mi por sa esaki?”3
Ku e konosimentu ku el a haña den e Espístola di Santiago, ku ta bisa, “si kualke un di boso tin falta di sabiduria, lage pidi Dios, ku ta duna tur hende liberalmente, i no ta reprendé: i e lo wòrdu duna na e,”4 Jose, “a lo largo a yega na e determinashon di ‘puntra Dios.’”5
Nos ta sigui lesa ku “tabata su promé biaha den [su] bida ku el a purba hasi algu asina ei, meimei di tur [su] ansiedatnan ku [e] nunka te ainda no a hasi e intento pa hasi orashon vokalmente.”6
I asina por ta pa nos tambe e promé biaha ku nos papia ku nos Kreador na un manera ku nunka nos a hasi.
Dor di Jose su intento, Tata Selestial i Su Yu, JesuCristu , a aparasé na dje, yamando e na su nòmber, i komo resultado nos tin awe un mihó komprondementu di ken nos ta i ku berdaderamente nos ta konta.
Nos ta sigui lesa ku den su añanan di adolesensia, Jose “a wòrdu perseguí dor di esnan ku mester tabata [su] amigunan i [ku mester a] trat’é bon.”7 I asina nos por spera algun oposishon ora nos ta biba e bida di disipulado.
Si bo ta sinti aktualmente ku bo no ta parti di e orkesta i ku e kaminda di arepentimentu ta parse difísil pa bo, por fabor sa ku si sigui lucha, e peso lo wòrdu kitá for di bo skoudernan i lo tin lus atrobe. Tata Selestial nunka lo laga nos ora nos trata na yega serka dj’E. Nos tur por kai i lanta bèk, i E lo yuda nos kita e stòf for di nos rudianan.
Algun di nos ta heridá, pero e kaha di promé ouksilio di Señor tin pleister grandi sufisiente pa kubri tur nos heridanan.
Asina ta ku amor, e amor perfecto ei ku tambe nos ta yama karidat òf “e amor puru di Cristu,”6 ku ta loke tin mester den kada hogar kaminda mayornan ta ministrá na nan yunan i yunan na nan mayornan. Pa medio di e amor ei, kurasonnan lo kambia i deseonan lo nase pa hasi Su boluntat.
Ta e amor ei ku ta loke tin mester ora nos ta atendé ku otro komo yunan di nos Tata Selestial i komo miembro di Su Iglesia i ku e lo abilitá nos pa inkluí tur instrumento musikal den nos orkestanan asina nos por presentá gloriosamente ku koronan angelikal di shelu ora e Salbador bin atrobe.
Ta e amor ei, e lus ku tin mester pa briya i iluminá nos alrededor ora nos ta den nos bida kotidiano. Hende lo ripará e lus i lo bin serka di bo. Esei ta e tipo di obra missional ku lo hiba otronan pa “bin i wak, bin i yuda, i bin i keda.”9 Por fabor, ora bo risibí bo testimonio di e obra grandi aki i nos parti den dje, laga nos refosihá huntu ku nos kerido Profeta Jose Smith, ku a deklará, “Pasó mi a mira in vishon, mi tabata sa, i mi tabata sa Ku Dios sa, i mi no por nenf’é.”10
Mi ta testifika ku mi sa ken mi ta, i ku mi sa ken bo ta. Nos tur ta yunan di un Tata Selestial ku stima nos. I E no a manda nos aki pa nos frakasá pero pa regresá gloriosamente serka dj’E. Ku nos tur por bin na komprondé nos parti den e gran obra di ministrá aki p’asina nos por bira mas manera E ora E bin atrobe ta mi orashon den nòmber di JesuCristu, amèn.