Bo Gran Aventura
E Salbador ta invitá nos, tur dia, pone un banda nos komodidatnan i seguridatnan i uni n’E den e biahe di disipulado.
E Hobbits
Un historia di fantasia gusta pa mucha, skirbi hopi aña pasa a kuminsá ku e frase “Den un buraku den tera tabata biba un hobbit.”1
E historia di Bilbo Baggins ta tokante un hobbit hopi komun i koriente ku a haña un oportunidat hopi remarkable—e chèns maravioso pa un aventura i e promesa di un gran rekompensa.
E problema ta ku mayoria hobbitnan ku ta respetá nan mes no kier tin nada di haber ku aventura. Nan bida ta trata solamente di komonidat. Nan ta disfrutá komiendo seis kuminda pa dia ora ku nan por haña esaki i ta pasa tempu den nan hardin, interkambiando historianan ku bishitantenan, kantando, tokando instrumènt musikal i gosando di e plasernan simpel di bida.
Sinembargo, ora ku Bilbo a wòrdu konfrontá ku e oportunidat di un gran aventura algu a penetrá profundo den su kurason. El a komprondé for di komienso ku e biahe lo ta un reto. Tambe peligroso. Tin asta e posibilidat ku e lo no regresa.
I tòg, e yamada pa bai e aventura a toka e profundidat di su kurason. I asina, e hobbit no remarkabel aki a laga komonidat atras i kuminsá e kaminda pa e gran aventura ku lo hib’é hinter e kaminda “i trese bek”2
Bo Gran Aventura
Kisas un di e rasonnan ku e historia aki ta zona konosí pa hopi ta pasó e ta nos historia tambe.
Hopi, hopi, tempu pasa, asta promé ku nos a nase, den un temporada okulta pa tempu i nubianan nos tambe a wòrdu invitá pa embarka den un aventura. E la wòrdu proponé pa Dios, nos Tata Selestial. Aseptá e aventura aki lo a nifiká bandoná e komonidat i seguridat di Su presensia inmediato. E lo nifiká bin mundu pa un biahe yena ku peliger i pruebanan no konosí.
Nos tabata sa ku e lo no ta fásil.
Pero nos tabata sa tambe ku nos por gana tesoronan presioso, inkluyendo un kurpa físiko i eksperensha e alegria inmenso i penanan di mortalidat. Nos lo por siña pa esforsa, pa buska, i lucha. Nos lo a deskubrí bèrdat nan tokante Dios i nos mes.
Naturalmente, nos tabata sa ku nos lo hasi hopi eror nan durante kaminda. Pero nos tabata tin un promesa tambe; ku pa motibu di e gran sakrifisio di JesuCristu, nos lo por wòrdu limpia di nos transgreshonnan, wòrdu refiná i purifiká den nos spiritu, i un dia resusitá i reuní ku esnan ku nos stima.
Nos a siña kuantu Dios stima nos. El a duna nos bida i E ke pa nos tin éksito. P’esei, El a prepará un Salbador pa nos. Sinembargo, nos Tata ku ta den Shelu a bisa, “Bo por skohe pa bo mes, paso esaki a wòrdu konsedé na bo.”3
Mester tabata tin partinan di e aventura mortal ku ta preokupá i asta terifika yu nan di Dios, ya ku un kantidat grandi di nos rumannan spiritual a disidí kontra di esaki.4
Dor di e regalo i poder di e albedrio, nos ta determiná ku e potensial di loke nos por a siña i yega na bira eternamente tabata balapena e riesgo.5
I asina, konfiando e promesanan i poder di Dios i Su Yu Stima, nos a aseptá e reto.
Mi a hasié.
I asina bo tambe a hasi.
Nos a bai di akuerdo pa bandoná e seguridat di nos promé estado i embarka nos propio aventura di “bai i regresá bek.”
E yamada pa Aventura
I ainda, bida mortal tin su manera pa distraí nos, no t’asina? Nos tin e tendensia di pèrdè for di bista nos gran búskeda, preferiendo komonidat i fasilidat riba kresementu i progreso.
Ainda tin algu ku ta permanesé inegabel, den profundidat di nos kurason, ku ta hambriento pa un propósito mas elevá i nobel. E hamber aki ta un di e motibunan pa kual hende ta wòrdu atraé na e evangelio i Iglesia di JesuCristu. E evangelio restourá ta, den un sentido, un renobashon di e yamada pa aventura ku nos a aseptá hopi tempu pasa. E Salbador ta invitá nos, tur dia, pone un banda nos komonidatnan i seguridatnan i uni na E den e biahe di disipulado.
Tin hopi bògt den e kaminda aki. Tin seru, vaye nan i kambionan di ruta. Lo por tin arañanan metafóriko, demoñonan i tambe algun dragon. Pero si bo keda riba e kaminda i konfia den Dios, eventualmente lo bo haña e rumbo pa bo glorioso destino i regreso na bo kas selestial.
Pues kon bo ta kuminsá?
E ta bastante simpel.
Inkliná bo kurason na Dios
Promé, bo mester skohe pa inkliná bo kurason na Dios. Esforsa tur dia pa busk’E. Siña pa stim’E. I e ora ei laga e amor ei inspirá bo pa siña, komprondé, i sigui su enseñansanan i siña pa warda Dios Su mandamentunan. E evangelio restourá di JesuCristu a wòrdu duna na nos di un manera pleno i simpel ku un mucha por komprondé. Sinembargo, e Evangelio di JesuCristu tin e kontestanan pa e preguntanan mas kompliká den bida i tin profundidat asina grandi i kompleksidat ku asta un bida kompleto di estudio i reflekshon, lo no permití nos komprondé e partinan mas chikitu.
Si bo ta totobiá den e aventura aki pasó bo ta duda den bo abilidat, kòrda ku ser un disípulo no ta trata di hasi kosnan perfekto; e ta bai pa hasi kosnan intenshonalmente. Ta bo desishonnan ta demostrá kiko bo ta en realidat, mas aleu di bo abilidatnan.6
Hasta ora ku bo faya bo por skohe pa no entrega, si no deskubrí bo kurashi, sigui pa dilanti i lanta para. Esei ta e gran prueba di e biahe.
Dios sa ku bo no ta perfekto, ku tin biaha lo bo faya. Dios no ta stima bo ménos ora ku bo ta lucha kompará ku ora bo triunfá.
Manera un mayor ku ta stima, nan ke pa bo sigui purba intenshonalmente. Ta un disípulo ta manera siña toka piano. Kisas tur loke bo por hasi e promé biaha ta toka in kantika ku apénas u lo bo ta rekonosé su interpretashon. Pero si bo sigui práktika, e melodia nan simpel lo duna sonatanan asombroso, komposishonnan instrumental i konsiertonan.
Bon, kisas e dia lo no yega den e bida aki pero e lo yega. Tur loke Dios ta pidi ta pa bo sigui purba konsientemente.
Ekstendé bo mannan ku amor na e otro nan.
Tin algu interesante, kasi “paradóksal” tokante e kaminda ku bo a skohe: E úniko manera pa bo progresá den bo aventura evangéliko ta yuda otro nan tambe progresá.
Yuda otronan ta e kaminda di disipulado. Fe, speransa, amor, kompashon i servisio ta refiná nos komo disípulonan.
Pone bo esfuersonan pa yuda e pober i e nesesitadonan, pa yega na esnan den angustia. Bo propio karakter ta wòrdu purifiká i kambia, bo espíritu ta wòrdu engrandese i lo bo ta mas sigur di bo mes.
Pero e amor aki no por bin ku espektashonnan i kontra pago. E no por ta un tipo di servisio kaminda ta spera rekonosementu,adulashon i fabor.
Disipulonan berdadero di JesuCristu ta stima Dios i Su yu nan sin ekspektashon òf algu akambio. Nos ta stima esnan ku desapuntá nos, ku no gusta nos. Hasta esnan ku ta redikulisá, abusá i trata di lástima nos.
Ora ku bo yena bo kurason ku e amor puru di JesuCristu, bo no ta laga espasio pa renkor, husgamentu i bèrgwensa. Bo ta warda Dios Su mandamentu nan paso bo ta stim’é. Den e proseso lentamente bo ta bira mas manera Kristu den bo pensamentu i aktonan.7 I kua aventura por ta mihó ku esaki?
Kompartí bo historia.
E di tres kos ku nos ta esforsa pa dominá den e biahe aki ta pa tuma riba nos e nòmber di JesuCristu i no tin bèrgwensa di ta un miembro di e Iglesia di JesuCristu.
Nos no ta skonde nos kerensha.
Nos no ta dera esaki.
Al kontrario, nos ta papia tokante nos biahe na un manera normal i natural ku otronan. Esei ta loke amigunan ta hasi—nan ta papia tokante kosnan ku ta importante pa nan. Kosnan ku ta serka di nan kurason i ta hasi diferensha pa nan.
Esei ta loke abo ta hasi. Bo ta konta bo historia i eksperenshanan komo miembro di Iglesia di JesuCristu di e santunan di edelaster dianan.
Tin bes bo historianan lo pone hende hari. Tin bes nan lo pone nan saka lágrima. Tin bes nan lo yuda hende kontinuá ku pasenshi, resistensha i kurashi pa enfrentá un otro ora i yega un tiki mas serka di Dios.
Kompartí bo eksperensha personalmente, riba medionan soshal, den grupo, tur kaminda.
Un di e último kosnan ku Hesus a kompartí ku su disípulonan ta ku nan mester bai den e mundu i kompartí e historia di e Kristu resusitá.8 Awe nos tambe gosamente ta aseptá e gran tarea aki.
Ki glorioso mensahe nos mester kompartí: dor di JesuCristu tur hòmber, hende muhé i mucha por bai bek nan kas selestial ku siguridat i aya biba den gloria i bèrdat!
Ainda tin mas bon notisia pa komparti.
Dios a aparesé na hende den nos tempu. Nos tin in profeta bibu.
Pèrmití mi rekordá bo ku Dios no mester di abo pa bende su evangelio restourá òf e Iglesia di JesuKristu.
E simplemente ta spera ku bo no ta skonde den un mondi.
I si hende skohe ku e Iglesia no ta pa nan esei ta nan desishon.
Esei no ta nifiká ku abo a faya. Bo ta sigui trata nan amabel. No ekskluí tampoko pa bolbe invitá nan.
E diferensha entre kontaktonan kasual soshal i un disipulado yena ku kompashon i kurashi ta—invitá!
Nos ta stima i respetá tur Dios Su yunan, no ta importá nan posishon den bida,no ta importá nan rasa i religion, no ta importá nan desishonnan den bida.
Di nos parti, nos lo bisa, bin i wak! Buska pa bo mes, kon kana den e kaminda di disipulado i wòrdu rekompensa i elevá.
Nos ta invitá hende pa bin i yuda, na momentu ku nos ta purba pa hasi e mundu un mihó lugá.
I nos ta bisa, “Bin i keda! Nos ta bo rumannan. Nos no ta perfekto. Nos ta konfia Dios i ta esforsa pa warda su mandamentu nan.
Uni bo mes na nos i lo bo hasi nos mihó. I den e proseso bo tambe lo bira mihó. Laga nos tuma parti di e aventura aki huntu.
Na ki momentu mi por kuminsá?
Na momentu ku nos amigu Bilbo Baggins a sinti ku e yamada pa e aventura a keda den dje, el a disidí di tuma un bon deskanso anochi, disfrutá di un desayuno amplio i sali mainta tempran.
Ora ku Bilbo a lanta e la ripara ku su kas tabata un desaster i kasi e la wòrdu distraí for di su plan noble.
Pero e ora ei su amigu Gandalf a bin i puntra, Ki ora lo bo ta bin?”9 Pa Bilbo por kontra su amigunan e mester a disidí pa su mes kiko e ta hasi.
I asina e hobbit komun i koriente a hañe ta sali na kareda for di su porta dilanti bayendo den un aventura asina lihe te ku ela lubida su sombre, stoki i serbete. E la bai asta sin kaba su di dos desayuno.
Kisas tin un lès den esaki pa nos tambe.
Si abo I ami a sinti e angustia pa uni na e gran aventura pa biba i kompartí e loke nos Tata Selestial a prepará pa nos hopi tempu pasa, ,i ta sigurá bo, awe ta e dia pa sigui e Yu di Dios nos Salbador riba Su kaminda di servisio i disipulado.
Nos por gasta hinter un bida wardando pa e momentu ei kaminda tur kos ta pas perfekto. Pero awor ta e tempu pa komprometé kompletu pa buska Dios, ministrá otro nan i kompartí nos eksperensha ku otro nan.
Laga atras bo sombré, garoti, sèrbètè i kas brua.10
Pa esnan di nos ku ta kanando den e kaminda ei kaba, tuma kurashi, ehersé kompashon, tin konfiansa i sigui!
Pa esnan ku a bandoná e kaminda, por fabor bin bek, uni bo mes na nos atrobe, hasi nos mas fuerte.
I esnan ku no a kuminsá ainda, pa kiko e retraso? Si bo ke eksperenshá e maravianan di e biahe spiritual aki, pone pia bou den bo propio gran aventura! Papia ku e misioneronan. Papia ku bo amigunan Santu di e delaster dianan. Papia ku nan tokante e obra maravioso aki.11
Ta tempu pa kuminsá!
Bin, uni bo mes na nos!
Si bo ta sinti ku bo bida por tin mas sentido, un propósito mas haltu, laso familiar mas fuerte i un konekshon mas sera ku Dios: por fabor, bin i uni bo mes na nos.
Si bo ta buskando un grupo di hende ku ta trahando pa bira e mihó vershon di nan mes, yuda esnan den nesesidat i hasi e mundu aki un mihó lugá, bin i uni bo mes na nos!
Bin i wak tokante kiko tur e biahe maravioso i aventuroso aki ta.
Durante kaminda lo bo diskubrí bo mes.
Lo bo diskubrí propósito.
Lo bo deskubrí Dios.
Lo bo deskubrí e biahe mas aventurero i glorioso di bo bida.
Di esaki mi ta testifiká den e nòmber di nos Redentor i Salbador, JesuCristu, amèn.