Kumpliendo ku Nos Promesanan i Kombenionan
Mi ta invitá bo pa konsiderá e promesanan i kombenionan ku bo hasi ku Señor, i ku otronan, ku gran integridat, sabiendo ku bo palabra ta mara bo.
Rumannan, awor ku nos ta sera e seshonnan aki, ku nos tur por tene den nos kurason e testimonio duná awe di e bèrdat di e evangelio di Jesu Cristu. Nos ta bendishoná di por tin e tempu sagrado aki huntu pa reinforsá nos promesanan na Señor Jesu Cristu ku nos ta Su sirbidónan i E ta nos Salbador.
E importansia di hasi i mantené promesanan i kombenionan ta pisa hopi den mi mente. Kon importante ta pa kumpli ku bo palabra? pa wòrdu konfiá? pa hasi tur loke bo bisa bo ta bai hasi? pa esforsá pa honrá bo kombenionan sagrado? pa tin integridat? Dor di kumpli ku nos promesanan hasí na Señor i otronan, nos ta kana e kaminda di kombenio bèk na nos Tata den Shelu i nos ta sinti Su amor den nos bida.
Nos Salbador, Jesu Cristu ta nos gran ehèmpel ora ta trata di hasi i warda promesanan i kombenionan. El a bin na mundu primintiendo ku e lo hasi e boluntat di e Tata. El a siña nos e prinsipionan di evangelio den palabra i den hecho. El a ekspiá pa nos pikánan pa nos por biba atrobe. El a honra kada un di Su promesanan.
Esei por wòrdu bisá di kada un di nos? Kiko ta e peligernan si nos faya un tiki, slep un tiki, òf no kumpli kabalmente ku nos kompromisonan? Kiko lo pasa si nos alehá for di nos kombenionan? Otronan lo “bini na Cristu” den lus di nos ehèmpel? Bo ta kumpli ku bo palabra? Kumpliendo ku promesanan no ta un habito; e ta un karakteristika di ta un disípulo di Jesu Cristu.
Sabiendo nos debilidatnan den e bida mortal Señor a primintí, “Ta di bon animo, i no tene miedu, pasó ami Señor lo ta ku bo, i lo mi ta banda di bo.”1 Mi a sinti Su presensia ora mi tabatin mester di siguransa, konsuelo, bista spiritual mas grandi òf fortalesa, i tabata ku hopi humildat p’ami i mi ta gradesido pa Su kompañerismo divino.
Señor a bisa, “Kada alma ku bandoná su pikánan i bin serka mi, i yama na mi nòmber, i obedesé mi bos, i warda mi mandamentunan, lo mira mi kara i sa ku ami ta.”2 Esaki ta kisas Su promesa mas grandi.
Mi a siña e importansia di kumpli ku mi palabra den mi hubentut. Un ehèmpel asina ei ta ora mi a para i resitá e huramentu di skout. Nos asosashon di skout amerikano pa mucha hòmber, awor ku el a kulminá, semper lo ta un legado importante pa mi i Iglesia aki. Na e organisashon di skout, na e kantidat di hòmber i muhé ku a sirbi diligentemente komo lidernan di skout, na e mamanan - einan e bèrdadero krédito ta bai - i na e hobennan ku a partisipá den skout, mi ke bisa boso, “Danki na boso.”
Den e mesun seshon aki, nos kerido profeta, Presidente Russell M. Nelson, i Elder Quentin L. Cook a anunsiá ahustenan ku lo enfoká atrobe nos atenshon riba hubentut i aliñá nos organisashonnan ku e bèrdat revelá. Adishonalmente, djis djadumingu pasá, Presidente Nelson i Presidente M. Russell Ballard a splika e programa di Muchanan i Hobennan di E Iglesia di Jesucristo di e Santunan di Delaster dianan pa hinter Iglesia. E ta un inisitativa mundial ku ta enfoká riba nos Señor i Salbador, Jesu Cristu. E Promé Presidensia i e Quorum di Diesdos Apòstelnan a unifiká den e direkshon nobo aki, i ami personalmente ta duna mi testimonio ku Señor a guia nos den kada paso di e kaminda. Mi ta eksitá pa e muchanan i e hobennan di E Iglesia di Jesu Cristu di e Santunan di Delaster dianan pa eksperensiá e enfoké integrá riba nan na kas i na iglesia - pa medio di enseñansa di e evangelio, servisio i aktividatnan, i desaroyo personal.
E tema di hubentut pa e aña benidero, 2020, ta papia di Nefi su promesa klásiko di “bai i hasi.” El a skibi, “I a sosodé ku ami, Nefi, a bisa mi tata: mi lo bai i hasi tur loke Señor a manda, pasobra mi sa ku Señor no ta duna mandamentu na e yunan di hende, sin ku e ta prepará un manera pa nan bai i kumplí ku e kosnan ku e la manda nan hasi.”3 Ounke pronunsiá hopi tempu pasá, nos den Iglesia ta para pa e promesa ei awe.
Pa “bai i hasi” ta nifika lanta riba e kaminda di mundu, risibí i aktua riba revelashon personal, biba korektamente ku speransa i fe den e futuro, hasiendo i kumpliendo ku kombenionan pa sigui Jesu Cristu, i asina halsa nos amor pa E, e Salbador di e mundu.
Un kombenio ta un promesa di dos banda entre nos i Señor. Komo miembronan di Iglesia, nos ta hasi kombenio durante boutismo pa tuma riba nos e nòmber di JesuCristu, pa biba manera E a biba. Manera esnan ku a boutisá den e awanan di Mormon, nos ta hasi kombenio pa bira Su pueblo, “pa karga ku peso di otro, pa nan por ta mas liviano; … “pa yora ku esnan ku ta yora; … konsolá esnan ku ta den nesesidat di konsuelo, i para komo testigu di Dios na tur momento i den tur kos, i den tur lugá.”4 No ministrashon na un i otro den e Iglesia ta reflehá nos kompromiso pa honra e mesun promesanan.
Ora nos partisipá di e santa sena, nos ta renobá e kombenio di tuma riba nos Su nòmber i hasi promesanan adishonal pa mehorá. Nos pensamentunan i akshonnan diario, tantu grandi komo chikí, ta reflehá nos kompromiso na E. Su promesa sagrado na nos a kambio ta, “Si boso kòrda mi semper boso lo tin mi Spiritu semper huntu ku boso.”5
Mi pregunta awe ta, nos ta kumpli ku nos promesanan i kombenionan òf tin bia nan ta kompromishonan hasí sin kurason, hasí kasualmente i p’ esei fásil pa kibra? Ora nos bisa na un hende, “lo mi hasi orashon p’abo,” nos ta hasie? Ora nos komprometé, 0ôlo mi tei pa yuda,” nos lo tei? Ora nos obligá nos mes pa paga un debe, nos ta hasie? Ora nos hisa nos man pa sostené un miembro den un yamamentu nobo, ku ta nifiká dune apoyo, nos ta hasie?
Un anochi durante mi hubentut, mi mama a sinta ku mi na pia di su kama i papia ku mi fervientemente tokante e importansia di biba e Palabra di Sabiduria. “Mi sa for di eksperiensia di otroann, di hopi aña pasa,” e la bisa, “e perdida di e spiritualidati i sensibilidat ta bini dor di no biba e Palabra di Sabiduria.” El a wak mi den mi wowonan, i mi a sinti su palabranan pentrá mi kurason: “Primintí mi, Ronnie, awe (e tabata yama mi Ronnie), ku semper lo bo biba e Palabra di Sabiduria.” Solemnemente mi a hasi e promesa ei na dje, i mi a kumpli tur e añanan aki.
E kompromiso ei a sirbi mi bon ora mi tabata den mi hubentut i añanan despues ora mi tabata den sirkulonan di negoshi kaminda supstansianan tabata pasa libremente. Mi a tuma un desishon for di adelantá pa sigui Dios su lei, i nunka mi mester a bolbe pensé. Señor a bisa, “Ami, Señor, ta obligá ora bo hasi loke mi bisa bo; pero si bo no hasi loke mi bisa, bo no tin ningun promesa.”6 Kiko E ta bisando na esnan ku ta kumpli ku e Palabra di Sabiduria? Ku nos lo tin e promesa di salú, forsa, sabiduria, konosimentu, i e angelnan lo protehé nos.7
Algun aña pasá, Hermana Rasband i ami tabata den e Tèmpel di Salt Lake pa e seyamentu di un di nos yu muhenan. Ora nos tabata para pafó di e tèmpel ku nos yu muhé mas yòn, no ku sufisiente edat pa asistí na e seremonia, nos a papia kuné di e importansia di ta seyá den e tèmpel sagrado di Dios. Manera mi mama a siña mi hopi aña atras, nos a bisa nos yu muhé, “Nos ke bo seyá sigur den tèmpel i nos ke pa bo primintí nos ku lo bo buska un kompañero eterno, lo bo pone un fecha ku n’e pa boso seya den tèmpel.” El a duna nos su palabra.
For di e tempu ei el a bisa ku nos kombersashon i su promesa a protehé i rekordé “kiko ta mas importante.” Despues el a hasi kombenionan sagrado mientras e tabata wòrdu seyá na su kasá den tèmpel.
Presidente Nelson a siña nos: “Nos … ta oumentá e poder di e Salbador den nos bida ora nos hasi kombenionan sagrado i warda e kombenionan aki ku eksaktitut. Nos komebionan ta mara nos na E i ta duna nos podernan divino.”8
Ora nos warda promesanan na un i otro, probablemente nos ta warda nos promesanan na Señor tambe. Korda e palabranan di Señor: “Na tal grado ku boso a hasié na un di e mas chikí di mi rumannan, boso a hasié na ami.”9
Reflekshoná ku mi riba e ehèmpelnan di promesanan den skrituranan. Ammon i e yunan hòmber di Mosia den e Buki di Mormon a komprometé “pa prediká e palabra di Dios.”10 Ora Ammon a wòrdu kapturá dor di e ehérsito lamanita, el a wòrdu hibá dilanti di e Rei lamanita Lamoni. El a komprometé na e rei, “Lo mi ta bo sirbidó.”11 Ora asaltantenan a bin pa hòrta e karnénan di e rei, Ammon a kòrta nan brasanan. Asina asombrá e rei tabata, ku el a skucha Ammon su mensahe di e evangelio i a wòrdu kombèrtí.
Rut, den e Tèstamènt Bieu, a primintí su suegra, “Kaminda bo bai, ami lo bai.”12 El a kumpli ku su palabra. E bon Samaritano, den e parabóla di e Tèstamènt Nobo, a primintí e doño di e posada ku si e kuida di e biahero heridá, “Loke ku bo gasta aserka, ora mi bini bèk, lo mi paga bo.”13 Zoram, den e Buki di Mormon, a primintí di bai den desierto ku Nefi i su rumannan. Nefi a konta, “Ora Zoram a hasi un huramento na nos, nos miedu a kita konserniente di dje.”14
Kiko tin di e promesa hasí na e mayornan manera deskribí den e Skrituranan ku “e kurasonnan di e yunan lo bira na nan mayornan”?15 Den e bida preterenal tempu nos a skohe e plan di Dios, nos a hasi un promesa di yuda na reuní Israel na tur dos banda di e velo. “Nos a bai den un sosiedat ku Señor,” Elder John A. Widtsoe a splika añanan pasá. “E ehekushon di e plan a bira e ora ei no solamente e Tata su obra, i e obra di e Salbador, pero tambe nos obra.”16
“[E] reunimentu ta e kos mas importante tumando lugá awendia na mundu.”Presidente Nelson a bisa miéntras el tabata biaha rònt mundu. “Ora nos ta papia di e reunimentu, simplemente nos ta bisa e bèrdat fundamental aki: kada un di e yunan di nos Tata Selestial, na ambos banda di e velo, meresé di skucha e mensahe di e evangelio restòurá di Jesu Cristu.”17
Komo un Apòstel di Señor Jesucristo, mi ta konkluí ku un invitashon i promesa. Promé, e invitashon:mi ta invitá boso pa konsiderá e promesanan i kombenionan ku boso hasi ku Señor, i na otronan, ku gran integridat, sabiendo ku boso palabra ta boso vínkulo Di dos, mi ta primintí boso, ku si boso hasi esaki, Señor lo establesé boso palabranan i sanshoná boso hechonan, miéntras boso ta esforsá ku diligensia inkansabel pa konstruí boso bida, boso famianan, i E Iglesia di Jesu Cristu di e Santunan di Delaster dianan. E lo ta ku boso, mi kerido rumannan, i boso por, ku konfiansa, spera di wòrdu “risibí den shelu, pa asina’ei [boso] por biba ku Dios den un estado di felisidat sin fin … asina Señor Dios a bisa.”18
Di esaki mi ta testifiká i ta primintí den e nòmber di Jesu Cristu , amèn.