E Goso di e Santunan
Goso ta bini for di warda Cristu su mandamentunan, for di vense desafionan, i for di sirbi meskos ku Jesus a sirbi.
E profeta di e Buki di Mormon Enos, Lehi su ñetu, a skibi un eksperiensia singular ku a sosodé anteriormente den su bida. Mientras e ta di kaseria den mondi su so, Enos a kuminsa skrudiñá e enseñansanan di su tata, Jakob. El a relatá, “E palabranan ku hopi biaha mi a tende mi tata bisa tokante bida eterno, i e goso di e santunan, a penetrá profundamente den mi kurason” Den e hamber spiritual di su alma, Enos a bai na rudia den orashon, un orashon remarkabel ku a dura hinter dia i te den anochi, un orashon ku a trese revelashonnan krusial, siguransanan, i promesanan.
Tin hopi [kos] ku por wòrdu siñá for di Enos sueksperiensia, pero awe loke ta resaltá den mi mente ta Enos su rekuerdo di su tata papiando hopi bia di “e goso di e santunan.”
Den e konferensia aki tres aña pasá, Presidente Russell M. Nelson a papia di goso. Entre otro kosnan, el a bisa:
“E goso ku nos ta sinti tin masha tiki di aber ku e sirkunstansianan di nos bida i tur kos di aber ku e enfoke di nos bida.
Ora e enfoke di nos bida ta riba Dois su plan di salbashon … i JesuCristo ku Su evangelio, nos por sinti e alegria sin importá kiko ta pasando – òf kiko no ta pasando – den nos bida. Goso ta bin di i dor di E. … Pa e Santunan di e Delaster dianan, JesuCristo ta goso!”
Santunan ta esnan ku a drenta den e konbenionan di e evangelio pa medio di e boutismo i ta esforsando pa sigui Cristu i Su disípulonan. Pues, e “goso di e santunan” ta indiká e goso di bira manera Cristu.
Mi lo ke papia di e goso ku ta bin dor di warda Su mandamentunan, e goso ku ta bin dor di surpasá duele i debilidat pa medio di E, i e goso di risibí den sirbi manera E a sirbi.
E Goso di Warda e Mandamentunan di Cristu
Nos ta biba den un era hedonistiko kaminda hopi ta kuestioná e importansia di Señor su mandamentunan òf ta simplemente ignorá nan. Frekuentemente, hende ku ta burla di guianan divino manera e lei di kastidat, e estandarte di honestidat, i e santidat di e dia di reposo, ta parse ku nan ta prosperá i disfrutá di e bon kosnan di bida, tin bia hasta mas ku esnan ku ta lucha pa ta obediente. Tin algun ku ta kuminsa pensa si e esfuerso i sakrifisio ta bale la pena. E pueblo antiguo di Israel un bia a keha:
“Ta vano sirbi Dios: i kua ganashi tin ku nos a warda su konvenio, i ku nos a kana tristemente dilanti e Señor di e ehersitonan?
“I awor nos ta yama e orguyoso felis; si, esnan ku ta kometè inikidat ta elevá; si, esnan ku ta tenta Dios ta hasta liberá.”
Djis warda, Señor a bisa, te na “e dia kaminda mi lo krea mi hoyasnan. … E ora ei abo … lo diserní entre e rekto i e inikuo, entre e ku ta sirbi Dios i e ku no ta sirbie.” E inikuo por “tin goso den su obra pa un temporada,” pero semper e ta temporal. E goso di e Santunan ta duradero.
Dios ta mira e kosnan den su perspektiva berdadero, i E ta kompartí e perspektiva ku nos pa medio di Su mandamentunan, guiando nos efektivamente rondó di trampanan i burakunan di mortalidat pa bai na goso eterno. E Profeta Jose Smith a splika: Ora Su mandamentunan ta siña nos ta den e kuadro di eternidat, pasó nos ta wòrdu mirá dor di Dios manera ku nos ta den eternidat; Dios ta mora den eternidat i no ta mira kos manera nos.”
Mi no a topa niun hende ku a haña e evangelio mas lat den bida ku no a desea di por a hañ’é mas trempan. “Oh, e eskohonan pober i erornan ku mi por a prevení,” nan ta bisa. Señor Su mandamentunan ta nos guia pa mihó eskoho i resultadonan mas felis. Kon nos mester regosihá i gradisié pa mustra nos e kaminda mas ekselente aki.
Komo un teenager, Hermana Kalombo Rosette Kamwanya di e Repúblika Demokrátiko di Kongo, awor aki sirbiendo na Kosta di Marfil, Mishon Abidjan West, a ayuná i hasi orashon durante tres dia pa haña e direkshon ku Dios tabata ke pa e tuma. Den un vishon nokturno remarkabel, el a mira dos edifisio, un kapia i loke awor e ta realisá tabata un tèmpel. E la kuminsa buska i pronto a haña e kapia ku el a mira den su soño. E bòrchi tabata bisa, “E Iglesia di JesuCristu di e Santunan di e Delaster Dianan.” Hermana Kamwayna a wòrdu boutisá i despues su mama i seis rumannan hòmber. Hermana Kamwanya a bisa, “Ora mi a risibí e evangelio, mi a sinti manera un para den koutiverio ku a wòrdu liberá. Mi kurason a yena ku goso. … Mi ta tin e siguransa ku Dios ta stima mi.”
Wardando Señor Su mandamentunan ta abilitá nos mas kompletu i mas fasil pa sinti Su amor. E kaminda sret i small di e mandamentunan ta kondusí na e palu di bida, i e palu i su fruta, esun mas dushi i mas deseabel riba tur kos,”( ta e representashon di e amor di Dios i yena e alma “ku un gos masha grandi.” E Salbador a bisa:
“Si boso warda Mi mandamentunan, boso lo keda den Mi amor; meskos ku Ami a warda mandamentunan di Mi Tata, i keda den Su amor.”
“E kosnan aki mi a bisa na bo, ku Mi goso por keda den bo, i ku bo goso por ta kompletu.”
E Goso di Vense pa medio di Cristu
Hasta ora nos ta kumpliendo fielmente ku e mandamentunan, tin pruebanan i tragedianan ku por interumpí nos goso. Pero ora nos ta hasi esfuerso pa surpasá e desafionan aki ku Señor Su yudansa, e ta preservá tantu e goso ku nos ta sinti i e goso ku nos ta antisipá. Cristu a sigurá Su disípulonan, “Den e mundu boso lo tin tribulashon: pero sea di bon ánimo; mi a vense e mundu.” Ta dor di bira na E, obedesé E, mara nos mes na E, ku pruebanan i dolor por bira goso. Mi ta menshoná un ehèmpel.
Na 1989, Jack Rushton tabata sirbi komo presidente di e Estaka di Irvine California na Merka. Durante un fakansi familiar na e kosta di California, Jack tabata hasi body surfing ora un ola a dale den un baranka bou di awa, kibrando su garganta i heridá severamente su wesu di lomba . Jack a bisa despues, “E instante ku mi a dal, mi tabata sa ku mi a wòrdu paralisá.” E no por a papia ni hala rosea mas pa su mes.
Famia, amigunan, i miembronan di estaka a rondoná Hermano Rushton i su kasá, Jo Anne, i entre otro, remodelá e sekshon di nan hogar pa akomodá Jack su ròlstul. Jo Anne a bira Jack su kuidadó prinsipal pa e siguiente 23 aña. Refiriendo na e relatonan di e Buki di Mormon di kon Señor a bishitá Su pueblo den nan aflikshonnan i a hasi nan karga ménos pisá, Jo Ann a bisa, “Hopi bia mi ta maraviá pa e liheresa di kurason ku mi ta sinti ora mi ta kuida mi kasá”
Un kambio na su sistema di hala rosea a restourá Jack su habilidat pa papia, i den un aña Jack a wòrdu yamá komo e maestro di Doktrina di Evangelio i patriarka di estaka. Ora e tabata duna un bendishon patriarkal, un otro posedor di saserdosio tabata pone Hermano Rushton su mannan riba kabes di e persona ku ta risibí e bendishon i apoyá su mannan i brasanan durante e bendishon. Jack a muri riba dia di Pasku 2012, despues di 22 aña di servisio deboto.
Un biaha den un entrevista, Jack a bisa; “Problemanan lo bin den nos tur su bida; e ta parti di ta aki na tera. I algun persona ta pensa ku religion òf di tin fé den Dios lo protehé bo for di kosnan malu. Mi no ta kere esei ta e punto. Mi ta kere e punto ta ku nos fé mester ta fuerte, ku ora kos malu pasa, i nan lo pasa, nos lo por atendé ku nan. … Mi fé nunka a faya, pero esei no a nifika ku mi no tabatin despreshonnan. Mi ta kere ku pa promé bia den mi bida, mi a wòrdu pushá na e limite, i literalmente no ta tin ningun kaminda pa mi bai, pues mi a bai serka Señor, mi ta sinti un spontanidat di goso.”
Esaki ta e tempu di atakenan tin bia sin miserikòrdia den retnan sosial i en persona ku ta kontra esnan ku ta buska pa mantené Señor su estandarte di bistimentu, entrentenimentu i puresa seksual. Hopi bia e hoben i e adulto hoben ta entre e Santunan, meskos ku muhénan i mamanan, ku ta karga e krus aki di bofon i persekushon. No ta fasil pa alsa bo mes riba tipo di abusunan aki, pero kòrda e palabranan di Pedro: “Si bo wòrdu reprocha pa e nòmber di Cristu, felis bo ta; pasobra e espiritu di gloria i di Dios ta deskansá riba bo: di nan parti nan a papia malu di dje, pero di bo parti e ta glorifiká.”
Den e hardin di Eden, Adan i Eva tabata den un estado di inosensia, “sin tabatin goso, pasobra nan no tabata konosé miseria.” Awor, komo sernan responsabel, nos ta enkontrá goso den vense miseria den kualkier forma, siendo ku e ta piká, prueba, debilidat, òf kualke otro opstákulo di felisidat. Esaki ta e goso di sinti progreso den nos kaminda pa disipulado; e goso di “a risibí e remishon di pikánan i risibí pas di konsenshi” e goso di sinti bo alma ekspandé i krese pa medio di e grasia di Cristu.
E Goso di Sirbi manera Cristu a Sirbi
E Salbador ta haña goso den hasi nos inmortalidat i bida eterno realidat. Papiando di e Salbador su Ekspiashon, Presidente Russel - M. Nelson a bisa:
“Meskos ku den tur kos, Jesu Cristu ta nos ehèmpel mas grandi, ‘ken ku pa e alegria ku a wòrdu pone dilanti di dje a wanta e krus.’”[Hebreonan 12:2]. Pensa riba esei! Pa E por a wanta e eksperensia mas doloroso na mundu, nos Salbador a enfoká riba goso!
“I kiko tabata e felisidat ku tabata dilanti di Dje?” Seguramente e ta inkluí e felisidat di limpiesa, sanashon, i fortalesé nos; e felisidat di paga pa e pikánan di esnan ku lo arepentí; e felisidat di hasié posibel pa abo i ami por regresá kas – limpi i digno – pa biba ku nos Mayornan Selestial i nos famianan.”
Similarmente, e goso “poné dilanti di nos” ta e goso di asistí e Salbador den Su obra di redenshon. Komo e simia i yunan di Abraham, nos ta partisipá den bendishoná tur famia na mundu “ku e bendishonnan di e Evangelio, ku ta e bendishonnan di salbashon, hasta di bida eterno.”
E palabranan di Alma ta bin na mente:
“Esaki ta mi gloria, ku kisas ami por ta instrumento den e mannan di Dios pa trese algun alma na arepentimentu; i esaki ta mi goso.
“I awor, ora mi mira kuantu di mi rumannan berdaderamente arepenti, i bin na e Señor nan Dios, e ora ei mi alma ta yena ku goso.-…
“Pero mi no ta gosa den mi propio eksito so, pero mi goso ta mas yen pa motibu di e eksito di mi rumannan, ku a bin for di e tera di Nefi.-…
“Awor, ora mi pensa di e éksito di esakinan mi rumannan mi alma ta wòrdu hibá, hasta na e separashon di e kurpa, komo si fuera, asina grandi ta mi goso.”
E frutanan di nos servisio na otro den e Iglesia ta parti di e goso “poné dilanti nos.” Hasta den tempu di deskurashamentu òf strès, nos por ministrá pasenshi si nos ta enfoká riba e goso di komplase Dios i trese lus, alivio, i felisidat na Su yunan, nos rumannan.
Ora na Haiti luna pasá durante di e dedikashon di e Tèmpel di Port-au-Prince, Elder David i Hermana Susan Bednar a topa ku un hermana hoben kual su kasá a muri algun dia promé den un aksidente trágiko. Nan a yora huntu ku n’e. Pero riba djadumingu, e kerida muhé aki tabata na su lugá komo un akomodadó na e servisio dedikatorio, ku un sonrisa suave i enkantadó na tur esnan ku a drenta e tèmpel.
Mi ta kere ku “goso mas grandi di e santunan” ta bin dor di sa ku e Señor ta lucha pa nan kousa, “i ningun hende por konsebi e goso ku [ta yena] nos alma [ora] nos [skucha Hesus] hasi orashon pa nos na e Tata.” Huntu ku Presidente Russel -M. Nelson, mi ta testifiká ku goso ta e regalo pa e Santunan fiel “ku a soportá e krusnan di e mundu” i ku ta “intenshonalmente tratando na biba e bida rekto, manera siñá dor di Jesu Cristu.” Ku boso goso por ta kompletu, ta mi orashon den e nòmber di Jesu Cristu, amèn.