Karga Nos Krus
Tuma riba bo mes bo krus i sigui e Salbador kermen sigui ku fe riba e kaminda di Señor i no kai den kustumbernan di mundu.
Kerido rumannan, nos a risibi siñansanan maravioso di nos lídernan urante e delaster dos dianan aki. Mi ta tèstifiká na boso ku si nos aspirá pa apliká e siñansanan inspirá i spesífiko aki den nos bida, Señor, dor di Su grasia, lo yuda kada un di nos pa karga nos krus i hasi nos karganan lihé.
Ora ku E tabata den bisindario di Caesarea Philippi, e Salbador a revelá na Su disípelnan kiko E lo sufri na man di e eldernan, saserdotenan mayó, i dòkterna di lei na Yerusalèm. El a siña nan spesífikamente di Su morto i Resurekshon glorioso. Na e momentu ei, Su disípelnan no a kompronde kompletamente Su mishon divino na tera. Pedro mes, ora ku el a tende kiko e Salbador a bisa, a hal’E un banda i a reprend’E, bisando, “Laga esei ta leu di Bo, Señor; ku e kosnan ei lo no pasa ku Bo.”
Pa yuda Su disípelnan kompronde ku deboshon na Su obra ta inkluí someté su mes i sufrimentu, e Salbador a deklará ku enfátikamente.
“Si kualke hende ke sigui Mi, lag’é nenga su mes, tuma su krus i sigui Mi.
“Pasó esun ku ke salba su bida, lo pèrdé, ma esun ku pèrdè su bida pa mi motibu, lo salbé.
“Pasó ki benefisio un hende tin, si e gana henter mundu i pèrde su mes bida òf kiko un hende lo duna komo pago pa su bida?”
Dor di e deklarashon aki e Salbador a enfatisá ku tur esnan ku ta dispuesto na siguié tin ku lubidá nan mes i kontrolá nan deseonan, apetítnan i pashonnan, sakrifikando tur kos, hasta nan bida mes si ta nesesario, someté nan mes kompletamente na e boluntat di e Tata --- meskos ku El a hasi. Esaki ta, en bèrdat e preis ku tin ku paga pa e salbashon di nos alma. Jesus a husa e símbolo di e krus ku e propósito di yuda Su disípelnan komprondé mas mihó ki sakrifisio i deboshon pa e kousa di Señor, realmente ta nifiká. E imágen di un krus ta hopi konosí entre su disípelnan i e habitantenan di e Imperio Romano pasó e Romanonan tabata obligá e víktimánan di karga nan mes krus òf parti di e krus pa poné kaminda ku e ehekushon lo tuma lugá.
Tabata solamente despues di Su resurekshon ku e disípelnan por a bin komprondé tur loke a wòrdu skirbí di Dje i kiko lo wòrdu rekerí di nan for di e momentu ei.
Di e mes manera, nos tur, rumannan, mester ta habrínos mente i nos kurason pa asina komprondé mas kompletu e relevansia di tuma riba nos mes nos kusnan u siguiE. Nos ta siña dor di e skrituranan ku esnan ku ta desea di tuma nan krus riba nan mes ta stima JesuCristu di tan forma ku nan ta ninga nan mes di tur kos ku no ta manera di Dios i di tur plaser karnal i mantené Su mandamentunan.
Nos determinashon pa no hasi nada ku ta kontrali na Dios su boluntat i pa sakrifiká tur loke nos ta wòrdu puntrá pa duna i sigui Su siñansanan lo yuda nos pa perseverá riba e kaminda di e evangelio di JesuCristu— hasta ora nos ta eksperenshá tribulashonan, debilidat di nos alma òf e opreshon sosial i filosofianan di mundu ku ta kontra di Su siñansanan.
Por ehèmpel, pa esnan ku ainda no tin un partner eterno i ku por ta sinti nan mes nan so i sin speransa òf pa esnan ku ta divorsiá i ta sinti nan mes bandoná i lubidá, mi ta sigurá boso ku aseptando e Salbador Su invitashon pa tuma riba bo mes bo krus i siguiE ta nifíka sigui ku fe den Señor Su kaminda, manteniendo Su patronchi digno i no pa konsedé den kustumbernan di mundu ku na final lo kita tur nos speransa di Dios Su amor i bondat.
E mesun prínsipio ta konta pa esnan ku ta eksperenshá atrakshon pa e mesun sekso i ta sinti nan mes deskurashá i sin speransa. Portá pa motibu di esaki, algun di boso por ta sinti ku e evangelio di JesuCristu no ta algu ku bo mester. Si bo ta sinti esaki, mi ke sigurá bo ku semper tin speransa den Dios e Tata i den Su plan di felisidat, den JesuCristu i Su sakrifisio ekspiatorio i den biba sigun Nan mandamentunan amoroso. Den su sabidoria, poder, hustisia i bondat perfekto, Señor a hasi nos di Dje, ku nos por wòrdu tresé den Su presensia i tin salbashon sin fin, si nos ta firme i inmovibel den mantené su mandamentunan i si nos bon obranan ta semper abundante.
Pa esnan ku a komenté pikánan serio, aseptá e mesun invitashon ta nifíka, entre otro kos, pa hasi nos mes humilde dilante Dios, tin konseho ku e lídernan di Iglesia apropiá i pa arepentí i laga bo pikánan atras. E proseso aki tambe lo bendishoná tur esnan ku ta bringa kontra di adikshonnan manera droga, alkohòl, i pornografia. Tuma e pasonan aki ta trese bo serka e Salbador, ku al final por librá bo di kulpa, tristesa i sklavitut spiritual i físiko. Tambe, por ta un bon kos pa buska supòrt di bo famia, amigunan, i profeshonalnan médiko kompentente.
Por fabor nunka no pèrde kurashi despues di fayonan i konsiderá bo mes ínkapabel di bandoná piká i surpasá adikshon. Lo ta mas pio si bo stòp di purba i despues sigui den debilidat i piká! Semper aspirá pa hasi bo bèst, mustrando por medio di bo áktonan bo deseo di limpia parti paden promé manera e Salbador ta instruí. Tin biaha solushonnan di sierto retonnan ta bini despues di luna tras di luna di enfòke kontinuo. E promesa ku bo ta haña den Bùki di Mormon ku “ta dor di grasia nos ta wòrdu salbá, despues di tur loke nos por hasi, por wòrdu apliká den e kaso aki. Por fabor kòrda ku e Salbador su don di grasia “no ta nesesariamente limitá te ’despues’ di tur kos ku nos por hasi. Nos por risibi Su grasia promé, durante i depues di e tempu ora ku nos hasi nos mes esfuerso.”
Mi ta tèstifika ku sigun nos ta aspirá kontinuamente pa surpasá nos retonan, Dios lo bendishoná nos ku e don di fe pa wòrdu saná i ku e don di e obra di milager. E lo hasi pa nos loke nos mes no ta kapabel di hasi pa nos mes.
Asina tambe, pa ensan ku ta sinti nan mes amargá, rabiá, ofendé òf mará na tristesa na algu ku bo ta sinti ku bo no a meresé, pa tuma nos mes krus i sigui e Salbador ta nifíka pa esforsá pa pone e sentimentunan aki na banda i yega serka Señor di moda ku E por libra nos for di e estado aki i yuda nos haña pas. Desafortunadamente, si nos keda tene na e sentimentunan aki i emoshonnan negativo, nos por haña nos mes bibando un bida sin e influensha di e Spiritu di Señor. Nos no por arepentí pa otro hende pero nos por pordoná nan — dor di ninga di ta mará na esnan ku a hasi nos daño.
Skrituranan ta siña nos ku tin un manera pa sali for di e situashonan aki — dor di invitá nos Salbador pa yuda nos reemplasá nos kurason duru pa un nobo. Pa esaki ta posibel, nos tin ku bini serka Señor ku nos debilidatnan, humiyá nos mes dilanti Dje, i supliká Su yudansa i pordon, spesialmente durante e momento sagrado ora ku nos ta partisipá di e santa sena tur djadumingu. Ku nos por skohe pa buska Su yudansa i tuma un paso importante i difisil dor di pordoná esnan ku a heridá nos di moda ku nos heridannan por kuminsa kura. Mi ta primintí boso ku ora boso hasi esaki, boso mente lo ta yen di e alivio ku ta bini ora ku boso tin pas ku Señor.
Ora ku José Smith tabata den e prisón di Liberty na 1839, el a skibi un karta pa e miembronan di Iglesia kaminda e la profetisá algun kosnan ku por apliká den e situashonnan aki. El a skibi, “Tur trononan i dominionan, prinsipadonan i podernan, lo wòrdu revelá i duná na tur esnan ku a perseverá balientemente pa e evangelio di JesuCristu. Asina ta, I kerido rumannan, ku esnan ku ta tuma riba nan mes e nòmber di e Salbador, konfiando den Su promesanan i perseverá te na final lo wòrdu salbá i lo por biba huntu ku Dios den un estado di felisidat sin fin.
Nos tur ta eksperenshá sirkunstanshanan difisil den nos bida ku ta laga nos sinti tristu, sin speransa i tin biaha hasta débil. Algun di e sentimentunan aki por hasi ku nos ta puntra Señor, “Dikon mi ta eksperenshá e situashonnan aki?’ òf “Dikon mi ekspektashonnan no ta wòrdu kumplí?” Despues di tur kos, mi ta hasiendo tur kos den mi poder pa karga mi krus i sigui e Salbador!”
Mi amigunan stimá, nos mester kòrda ku tuma nos krus riba nos mes ta inkluí ta humilde i konfia de Dios i Su sabiduria infinito. Nos tin ku rekonosé ku E ta konsiente di kada un di nos i di nos nesesidatnan Tambe ta nesesario pa nos aseptá e echo ku Señor su tempu ta diferente for di esun di nos. Tin biaha nos ta buska un bendishon i ta pone un limité di tempu pa Señor kumpli ku ne. Nos no por kondishoná nos dedikashon na Dje dor di imponé un sierto tempu den kual E por kontesta nos deseonan. Ora ku nos hasi esaki, nos ta hasi manera e Nefitanan di tempu antiguo, ku a hasi chèrchi di nan rumannan dor di bisa ku e tempu a pasa den kual e palabranan di Samuel e Lamanita por wòrdu kumplí, kreando konfushon entre esnan ku si tabata kere. Nos tin ku konfia Señor sufisientemente pa ta ketu i sa ku E ta Dios, i ku E sa tur kElder Soares ministrando hermanaos i ku E ta konsiente di kada un di nos.
Resientemente mi tabatin e oportunidat di sirbi un viuda ku ta yama Franca Calamassi, ku ta sufri di un malesa grave. Ruman Calamassi tabata e promé miembro di su famia ku a uni na e Iglesia di JesuCristu restourá. Ounke su kasá nunka a wòrdu batisá, el a duna pèrmit pa reuní ku e mishoneronan i hopi biaha tabata bini e reunionnan di Iglesia. No opstante e sirkunstanshanan aki, ruman Calamasi a keda fiel i a kria su kwater yunan ku e evangelio di JesuCristu. Un aña despues ku su kasá a fayesé, ruman Calamassi a bai ku su yunan tèmpel i nan a partisipá den ordenansanan sagrado i a wòrdu seyá huntu komo un famia. E promesanan asosiá ku e ordenansanan aki a trese hopi speransa, goso i felisdidat ku a yuda nan sigui bai dilanti den e bida aki.
Ora ku e promé síntománan di e malesa a kuminsa sali, su obispu a duné un bendishon. Na e momentu ei el a bisa su obispu ku e tabata kla pa aseptá e boluntat di Señor, ekspresando su fe pa wòrdu saná meskos ku su fe pa perseverá den su malesa te na final.
Durante di mi bishita, sigun mi tabata tene ruman Calamassi su man i mirando den su wowo, mi a mira un briyo angélikal ku tabata den su imágen — ku tabata reflehá su konvikshon den Dios Su plan i su speransa briyante den e Tata su amor i su plan pé. Mi a sinti su determinashon firme pa perseverá den su fe te na final i dor di tuma su krus riba su mes, no opstante e retonan ku e tabata eksperenshá. E ruman aki su bida ta un tèstimonio di Cristu, i un deklarashon di su fe i devoshon na Dje.
Rumannan, mi ke tèstifká na boso ku tumando nos krus riba nos mes i sigui e Salbador ta rekerí di nos pa sigui Su ehèmpel i aspirá pa bira manera Dje, enfrentá ku pasenshi e sirkunstanshanan di bida. Negando i menospresiando e apetit di hende natural i wardando riba Señor. E Salmista a skibi:
“Warda riba Señor: tin kurashi i e lo fortifiká bo kurason: warda, mi ta bisa, riba Señor.”
“E ta nos yudansa i nos eskudo.”
Mi ta tèstifika na bo ku dor di sigui e pasonan di e Maestro i warda riba Dje ku ta e sanadó apsoluto di nos bida lo proveé sosiegu pa nos alma i hasi ku nos karganan lo ta fasil i lihé. Di e kosnan aki mi ta tèstifiká den e nòmber sagrado di JesuCristu, amèn.