Mekreos el Chedaol Tekoi
Mesel molasem ra klaumerang er kau er a Rubak me a klisichel a priesthood er Ngii, e a teletelem el melai aikal mekreos el chedaol tekoi el Rubak a mla kudmokl el kirem a mo chachisois.
Ko mesulang er a klebokel el chelitakl. Sera bo dedechor e dongitakl er a , “We Tnak Thee, O God, for a Prophet,” e a eru el tekoi a mle mesisiich el mei er a uldesuek. A tang a kirel a Profet Joseph Smith, el profet er chelechal taem. A beltikereng me a ultilek el kirel a di merael mo mesisiich er a bek el sils. A ongeru er a uldasou el siliseb er a uldesuek a sera kumes er a bechik, me a rengelekek el redil, rengelkir a rengelekek el redil, me a rengelekir a rengelekir a rengelekir a rengelekek el redil. A kulmelchesiu el soak el di ngoikemiu el rokui el mo chedal a telungalek er ngak
Tela el buil ra memong, ra uriul ra bol merek a ureor ra templo, e ak melekoi ra bechik er a Wendy, “A kuureng me a rodos a metebengii sel mekreos el chedaol tekoi el sengk er tir ra chelsel a templo.” Rodos, ak blechoel elmo melatk er kemiu, ma ikal mlamo merek el eru el buil el Wendy me a ngak a mlo oldingel er a Harmony, Pennsylvania.
Tiang a mle ongerung el omerolam el mong. Ngeru el taem el rutech a rengmam sel ki morael er sel chedaol chutem. Ng mlara bita er a Harmony ea Johanes el Techolb a mlo duum ra Joesph Smith e olutii a Aaronic Priesthood.
Ng mla rsei ea Apostol Petrus, Jacobus, ma Johanes a mlo duum e olutii a Melchizedek Priesthood.
Ng mlara Harmony ea Emma Hale Smith a ulengeseu er a bechil el mle kot el melchesel ra Profet Joseph er a loleiuid ra Babier ra Mormon.
Ng dirrek el ngara Harmony ea Joseph a ngiluu a ocholt el lomeketakl er a urungulel a Rubak el mora Emma. A Rubak a ulsisechakl ra Emma elmo omeketakl a chedaol llechukl, e lomeklatk ra Ikelesia, me le nguu a Chedaol Reng, e lechoit a temel el “mesuub.” A Emma a dirrek el mlo sisechakl me bol ikrii a tekingel tial beluulechad e losiik a ikel lungil, el blak a rengul el lurekodel ra ikel telbilel lobengkel a Dios. A Rubak a mlo merekui a osisecheklel lokiu a ikakid el tekoi: A ikang e ak dung el mora re bek el chad.
A rokui el tekoi el dilubech er tial basio a dmolech a belkul kirel a klengar er kemiu. A olutel a priesthood, lobengkel sel luleklatk el mora Emma el mlara Rubak, a sebechel lomekrael e omekngeltengat er kemiu. Ak meral loureng me bol sebechiu el metebengii el kmo sel lolutel a priesthood a kmal di osisiu el eko er kau el redil el di ua le kirel a sechal. Leng Melchizedek Priesthood el mla moluut, eng diul redil el mengeluolu a telbiil ma rsechal el ngarngii a llemeltir el mora “rokui el klengeltengat er a reng el ngara ikelesia” malechub, e de du el kmo, ng rokui el mekreos el chedaol tekoi a Rubak a olab el omesterir a rengelekel.
A re bek el redil ma rsechal el kutmokl a telbilir lobengkel a Dios e urekodel a ikel telbiil, e meruul e klikiid er a ikel chedaol lureor ra priesthood, a bleketakl a llemeltir el morsel klisichel a Dios. Tirkel mla mechedaol ra blil a Rubak a mla nguu a sengk er a klisichel a priesthood er a Dios el obengkel a sengk er a klaudengei el medengei el kmong mekerang a lolai er tiakid el klisiich.
A babeluades a dirrek el blok el kirel a redil el mla mechedaol er a klisichel a priesthood er a Dios el di ua re sechal el lobang a priesthood. Nglunguchek mesel klemerang le bol moterekokl er a rengmiu el rokui le kumerang el kmo sei ea mo ngodechii a klengar er kemiu. Rudos, kemiu a ngarngii a lemeltiu el melai er sel klisichel a Osobel elmo olngeseu ra telungalek er kemiu me tirkel betik ra rengmiu el chad.
Altang, e kom kmu el kmo, “Tia ungil loderngesall, engdi ng mekerang a bo kungetmokl er ngii? Ng mekerang ak nguu sel klisichel a Osobel el mera klengar er ngak?”
Ngdiak el sebechiu el metik er tial teletael el llechukl er a ngidil babier. A Chedaol Reng a mo obengkem el olsisechakl sel kau osiik elmo medengei el ngara Rubak a soal a bo modengei e moruul. Tial teletael a diak el mereched malechub el beot, engdi ngii a ungil ra reng. Ngera lmuut el smiich el ua sel doureor lobengkel a Reng el mo medengelii a klisichel a priesthood—klisichel a Dios?
A sebechek el kmu er kemiu a kmo sel melai er a klisichel a Dios el mora klengar er kemiu a kirel mo meruul a ikel losisiu el tekoi el Rubak a ulsisechakl ra Emma me kemiu el rokui elmo meruul.
Maleuasei, e ak mengemedaol er kemiu elmo mesuub loba nglunguuch section 25 of the Doctrine and Covenants e mo mesa el kmo a Chedaol Reng a mo osisecheklau. A chedaol teletelem a mo meskau a deureng sel mngai, e modengei, e mousbech ra klisiich el kau a mla mukngelltengat el kirel.
A tebedechel tial teletael a mo kirel a mechei a rokui el tekingel a beluulechad. A lebebil eng kora di beot er kid el mesaod er a mo ikrii a beluulechad me a uldikel er ngii, betok el ngibesereng, ma cheleuid el uldasu. Engdi obo moruul er ngii eng meral kirem el di blechoel el omes e merritel ra klengar er kau. Sel moruul er tiang, ea Chedaol Reng a mo odbechau el mes aikel dikea belkul, dikea ultutelel mongoit a temem ma klisichem el kirel.
Mesel mnguu osengem el choridii er a mengesengsang el beluulechad, e a bebil er a tekoi el ual meklou a belkul rekau er chelechang e ngmanget el meriou a ultutelel. Ng mo kirem el lotngakl a bebil ra tekoi, ngii mesel le ua lak el kengaol. Mesel bocha momakes e molemolem er tial kemanget el omerael el chemedolii a klengar er kau el mora Rubak, e sel mengoded er a osengem, omomelchesiu, me a chedaol klisichem a mo mechas a rengum er ngii!
Ng di teklib el uleklatk. Te ngarngii tirkel loumededenger ra klisichem el melai er a klisichel a Dios. Te ngarngii tirkel rullau el mo dikau loumededenger er kau e mengkekerei er a omobang el ngarbab e chedaol melemalt el redil.
E merarengii, a cherarou a diak el soal obo mungil medengelii a telbiil el mrirelii er a ometecholb malechub a dmolech el klengeltengat er a klemedengei ma klisiich el blam ngai malechub e ke dirk momelai er a templo—el blil a Rubak. A Diablong a meral diak el soal kau a bo modengei el kmo sel bekl el taem em klikiid e mesiou lokiu omenguul el ngara templo, e ke merael el bleiuil ra klisichel a Dios ma re anghel er Ngii el “mengkar er” kau.
A Diablong ma rechedal a di blechoel losiik a rolel el melibas er kau me lak ke bo modengei a ikel sengk er a reng el bla mngai e mo mukngeltengat el kirel. Engdi, a bebil ra olibesongel a kuk di telemeled. Ngmo mekngit a renguk sel kumdasu el kmo ngarngii er kemiu a kelel ngara mocheuekl malechub eng diak a ulumerang er kemiu el meredel ra priesthood malechub te milchelebed malechub e te milcheblad ra becherir, demerir, malechub eng sechelirir. Ak melchesuar ra tmolech el klengit el reng el kmo ngarngii er kemiu a mla mechoit, motuub, malechub e mekngit ra uldesuir a rechad. A ikang el mekngit el blekeradel a diak a rolel er a rengedel a Dios.
Engdi, ngungil a renguk sel bo kudengei el remeredel ra priesthood a blak a rengrir el lolengit ra redil mel ngara ward ma stake councils. Ngarngii ak nguu er tirkel bechiil el chad el lochotii el kmo sel kot el klou el ngerchelir el priesthood sel lomekereu ra bechil. Ak otengii ngkel chad el lungil mengull er a bechil el sebechel ngmai a ocholt e olngeseu el di tang er a chelsel a chelbechilir.
Alsekum a chad a medengelii sel klungiolel ma klisichel a melmalt, e blak a rengul el cheledaol Uriul-klebesei el Santo el redil, eng diak e luchul meng kulii sel bel siseb er a delmerab?
Sera uchelel a taem, ea redil a mlo muklengeltengat e loba tokubets el melmalt el kampas—el sebechir el medengelii a klekakerous ra ungil ma mekngit. Tial sengk a di melketek el kirir tirkel kutmokl e urkodel a telbelir. Engdi ngmo remiid er tirkel ngara rengrir el diak e loltirakl a lechul a Dios.
E bok beketeklii el kmo ngak a diak bo kulubet er a rechad ra ngidil cheldechuul el oridii ra rolel a Dios le tir el dirrek a medengelii a ungil ra mekngit. Engdi e rodos, kemiu a sebechemiu el mesang a klemerang e ra chelebirukel, e mo mengkerengel a beluu e ra ungil tekoi, er tial etiteuokel el luriul sils. E kid a ultuil er kemiu elmo olisechakl e ra re bebil el meruul osisiu el tekoi. Mei mek bok beketeklii tiang: alsekum tial beluulechad a oridii sel lungil lomekingir a redil, ea beluulechad a diak el luut el moungil.
Kid a re Santo a diak kede ngar er tial beluulechad: kid a seluk e ra telbiil ra Israel. Kid a mlo kedong elmo mengetmokl e ra rechad el kirel sel Longerung el Lomrolel a Rubak.
Chelecha, e bok beketakl a bebil ra dechelel a tekoie lokiu a omenguul elmo ra redil ma priesthood. Sel kau a mechedaol elmo mesiou e ra ngidil lokedong el mlara chad el loba kiis er a priesthood—el ua bishop malechub eg stake president—e kau a mla nguu sel klisichel a priesthood elmo ouedikel el kirel sel lokedong.
Ngosisiu, ra chelsel a chedaol el templo el kau a oba ngerachel el mo meruul e mengedmokl a chedaol ruoll er a priesthood bek el taem el kau a mong. Kau el mla mechedaol e ra templo a mla meketmokl elmo rokir a ngerechelem.
Alsekum meke cheledaol engdi ngdiak ko bechil a chad loba pristhood e a chad a kmu er kau el kmo, “Komeng el diak a priesthood er a blim,” kulengit me bomodengei el kmo tial tekoi a cheleuid. Altang diak a oba priesthood er a blim, engdi kau a mla remuul a chedaol telbiil lobengkel a Dios er a chelsel a templo. Meng ngara ikal telbiil eng omaoch a omelisiich el klengeltengat er a klisichel a preisthood er Ngii el mo er kau. E diak mobes, alsekum a bechim a mad, e kau a mo mengetikaik er a delengcheklem.
Sel de melemalt, cheledaol el Uriul-klebesei el Santo el redil, e kau a mengedecheduch e olisechakl loba klisiich me a ngerachel el mlara Dios. Lokiu a ongit malechub a cheldecheduch, e a ki ousbech ra ngerem lolisechakl a osisecheklel a Kristo. A ki ousbech a uldesuem er a telungalek, ward, ma stake council. Kau el teloi er a miting a klou a ultutelel ng diak el kora di besiich!
Rodos er ngak, ke merael mo mesisiich sel mosiou er a rebebil. A nglunguchem, olsengerenger, temem el ngara chedaol llechukl, me a omesiou er kau er a templo, me a urerel a reksi er a telungalek a mo mekengii a babeluades el mo er kau.
A kulengit me bo moba nglunguuch e mosuub a rokui el klemerang el kau a sebechem el metik el kirel a klisichel a priesthood. Ng sebechem lomuchel er a Doctrine and Covenants sections 84 me a 107. A ikal bades a ngoikau el mora kuk bebil er a bades. A chedaol llechukl me a osisecheklir a re profet, chad ra ues, me a ocholt er chelechal taem, a mui er a ikal klemerang. Sel lorael morbab a klemedengei er kau mesel molasem ra klaumerang er kau er a Rubak me a klisichel a priesthood er Ngii, e a teletelem el melai aikal mekreos el chedaol tekoi el Rubak a mla kudmokl el kirem a mo chachisois. Sel bo moruul el uaisei, e kau a sebechem el moungil lolengeseu el mekdebechii a cherechar el telungalek el di mo tang, merenged er a templo er a Rubak, e mui er a beltikelreng el mora Chedam er a Babeluades me a Jesus Kristo.
A rokui el blakelreng er kid el mo mesiou el mora tang, omerk er a ebangkelio, mengerrungel ra re Santo, e olsobel er a re mla mad a mekedmokl er a chedaol templo. Chelechang mla mo 166 el templo a ngara beluulechad, a lmuut el betok a dirke mei.
Ko medengei, a Salt Lake Temple, Temple Square, me sel basio el ngar bitara Church Office Building a mo mukbeches el ngii a mo omuchel er a ruchei ra bolmerek tial rak. Tial chedaol el templo a kirel mekeriomel e mekedmokl el mo omekellomes er a merael mei el telecheroll, el diua sera longetikaik er kid er chelechal cheroll.
Sel lorael mo betok a rechedal a ikelesia, eng mo betok a templo el modechor me a telungalek a mo sebecherir el ngmai a ikal ngarbab el klengeltengat, er a diak a ulebengelel klengar. Ke domes a ikal templo el ngii a kot el chedaol el omekedecheraol er a Ikelesia. Sel le ngarngii a uldasu el mo chouchais a teketekel a templo, e a ikang a mo meklou a ultutelel el tebedechel a reksi er kid. El uaikel bla desaod er chelechal kebesengei, el kemiu el odos a klou a ultuteliu er tial ureor er a templo, e a chelsel a templo ngii ea bomngai a ikel kot el ngarbab e mekreos el chedaol tekoi.
A kulengit me bo mungil lorrenges er chelechal bo kuchais a okedecherul a kleai el beches el templo. Alsekum a ta er ngii a klou a belkul mo er kau, e a kulengit e bom tellechekl e moureng a saul er a chelsel a rengum el kirel. Ng dmeu a rengmam louchais okedecherul a templo er a ikakid el basio: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; me a Taylorsville, Utah. Ko mesulang, e rodos. Aki kmal mereng a saul er a rengmiu me a urunguliu el kirel aikal mla medung el tekoi.
Chelecha, e ak mo mengesimer, el soak el meskemiu a klengeltengat, el kmo ko moungil medengelii tial klisichel a priesthood el bla mechedaol er ngii el mo menglou er a tial klisiich sel mousbech ra klaumerang er kau el mora Rubak me a Klisichel.
Rodos, a kuba klou el omengull me a omereng el saul, e kuchotii a beltkil a renguk leko er kemiu. A oba ngariou el reng, e kmo a Dios a ngar! A Jesus a Kristo. Tia Ikelesia er Ngii. Ak olecholt er a klaumerang er ngak loba ngklel a Jesus Kristo, amen.