អំណាចនៃសន្ទុះខាងវិញ្ញាណ
ថ្ងៃនេះ ខ្ញុំសូមឲ្យយោបល់អំពីសកម្មភាពជាក់លាក់ប្រាំយ៉ាង ដែលយើងអាចធ្វើបាន ដើម្បីជួយយើងឲ្យរក្សាសន្ទុះវិជ្ជមានខាងវិញ្ញាណនោះ ។
បងប្អូនប្រុសស្រីជាទីស្រឡាញ់ ខ្ញុំស្រឡាញ់បងប្អូន ។ ខ្ញុំពេញចិត្តឱកាសដែលបាននៅជាមួយបងប្អូននាថ្ងៃនេះ ។ ខ្ញុំអធិស្ឋានរាល់ថ្ងៃសូមឲ្យបងប្អូននឹងបានការការពារពីការវាយប្រហារដ៏សាហាវរបស់ពួកមារសត្រូវ ហើយសូមឲ្យមានកម្លាំងដើម្បីបន្ដឆ្ពោះទៅមុខ មិនថាបងប្អូនមានឧបសគ្គអ្វីនោះទេ ។
ការសាកល្បងខ្លះគឺជាបន្ទុកដ៏ធំក្នុងខ្លួន ដែលគ្មាននរណាម្នាក់អាចមើលឃើញនោះទេ ។ ឯខ្លះទៀតបង្ហាញលើឆាកពិភពលោកតែម្ដង ។ ការប្រយុទ្ធប្រដាប់អាវុធនៅអឺរ៉ុបខាងកើតគឺជាការសាកល្បងប្រភេទមួយនេះ ។ ខ្ញុំបានទៅប្រទេសអ៊ុយក្រែន និងរុស្ស៊ីជាច្រើនដង ។ ខ្ញុំស្រឡាញ់ប្រជាជន ភាសា និងប្រទេសនេះ ។ ខ្ញុំយំ ហើយអធិស្ឋានសម្រាប់អស់អ្នកដែលរងទុក្ខដោយសារជម្លោះនេះ ។ ក្នុងនាមជាសាសនាចក្រ យើងកំពុងខំអស់ពីសមត្ថភាពដើម្បីជួយដល់អស់អ្នកដែលកំពុងរងទុក្ខ និងខំតស៊ូរស់រានមានជីវិត ។ យើងសូមអញ្ជើញគ្រប់គ្នាឲ្យបន្ដតមអាហារ និងអធិស្ឋានសម្រាប់អស់អ្នកដែលកំពុងរងទុក្ខដោយសារគ្រោះមហន្ដរាយនេះ ។ សង្គ្រាមណាមួយគឺជាការបំពានដ៏រន្ធត់មួយលើអ្វីៗដែលព្រះអម្ចាស់ព្រះយេស៊ូវគ្រីស្ទបង្រៀន និងតាំងជំហរ ។
គ្មានពួកយើងណាម្នាក់ អាចគ្រប់គ្រងលើជាតិសាសន៍ ឬសកម្មភាពរបស់អ្នកដទៃបានទេ សូម្បីតែសមាជិកក្រុមគ្រួសារយើងផ្ទាល់ ។ ប៉ុន្តែយើងអាចគ្រប់គ្រងខ្លួនឯងបាន ។ បងប្អូនប្រុសស្រីជាទីស្រឡាញ់ ខ្ញុំសូមអំពាវនាវនៅថ្ងៃនេះថា សូមបញ្ចប់ជម្លោះដែលដុតរោលនៅក្នុងដួងចិត្ត របស់បងប្អូនគេហដ្ឋាន របស់បងប្អូននិងជីវិត របស់បងប្អូន សូមកប់ចោលទំនោរចិត្តណាមួយ និងទំនោរចិត្តទាំងអស់ណាដែលធ្វើឲ្យអ្នកដទៃឈឺចាប់—មិនថាទំនោរចិត្តទាំងនោះ ជាកំហឹង ការនិយាយអាក្រក់ ឬការថ្នាំងថ្នាក់ចំពោះអ្នកដែលធ្វើឲ្យបងប្អូនឈឺចាប់នោះទេ ។ ព្រះអង្គសង្គ្រោះត្រាស់បង្គាប់យើងឲ្យបែរទៅថ្ពាល់ម្ខាងទៀត១ឲ្យស្រឡាញ់ពួកខ្មាំងសត្រូវ និងអធិស្ឋានឲ្យអ្នកណាដែលធ្វើទុក្ខបៀតបៀនដល់យើងវិញ ។២
វាអាចជាការពិបាកយ៉ាងខ្លាំង ដែលត្រូវរំសាយកំហឹងពេលយើងមានអារម្មណ៍ថាយើងត្រូវនោះ ។ វាអាចមើលទៅដូចជាមិនអាចធ្វើទៅរួចទេ ដើម្បីអភ័យទោសឲ្យអ្នកដែលបំផ្លិចបំផ្លាញដល់មនុស្សស្លូតត្រង់ ។ ប៉ុន្ដែព្រះអម្ចាស់ដាស់តឿនយើងឲ្យ « អត់ទោសដល់មនុស្សទាំងអស់ » ។៣
យើងគឺជាអ្នកដើរតាមម្ចាស់នៃមេត្រីភាព ។ យើងត្រូវការភាពសុខសាន្ដនាពេលនេះជាងពេលណាៗទាំងអស់ មានតែទ្រង់ប៉ុណ្ណោះអាចប្រទានដល់យើងបាន ។ តើយើងអាចរំពឹងថា មានភាពសុខសាន្ដក្នុងពិភពលោកនេះដោយរបៀបណា បើយើងម្នាក់ៗមិនស្វែងរកភាពសុខសាន្ដ និងភាពសុខដុមផងនោះ ? បងប្អូនប្រុសស្រី ខ្ញុំដឹងថា អ្វីដែលខ្ញុំស្នើសុំនេះមិនងាយស្រួលនោះទេ ។ ប៉ុន្ដែអ្នកដើរតាមព្រះយេស៊ូវគ្រីស្ទ គួរតែធ្វើជាគំរូឲ្យមនុស្សទាំងអស់ក្នុងពិភពលោកនេះធ្វើតាម ។ ខ្ញុំសូមអង្វរបងប្អូនឲ្យធ្វើអ្វីគ្រប់យ៉ាង ដើម្បីបញ្ចប់ជម្លោះផ្ទាល់ខ្លួនដែលកំពុងដុតរោលនៅក្នុងដួងចិត្ត និងជីវិតរបស់បងប្អូនបច្ចុប្បន្ននេះ ។
ខ្ញុំសូមគូសបញ្ជាក់ពីការអំពាវនាវនេះ ដោយពិភាក្សាអំពីគោលគំនិតមួយដែលរំឮកខ្ញុំថ្មីៗនេះ ពេលខ្ញុំមើលគេលេងកីឡាបាល់បោះ ។
នៅក្នុងការលេងនោះ នៅតង់ទីមួយគឺជាការប្រយុទ្ធចុះឡើងៗរវាងក្រុមទាំងពីរ ។ បន្ទាប់មក អំឡុងប្រាំវិនាទីចុងក្រោយនៃតង់ទីមួយនោះ ខ្សែប្រយុទ្ធខាងក្រុមមួយបានបោះបាល់ចូលទី ទទួលបានបីពិន្ទុពេញ ។ តែមួយវិនាទីចុងក្រោយ សមាជិកក្រុមគាត់នោះ ក៏ចាប់បានបាល់ម្ដងទៀត ហើយបោះចូលទីចំពេលកណ្ដឹងរោទិ៍បញ្ចប់តង់ទីមួយ ! ដូច្នេះ ក្រុមនេះបានទៅកាន់បន្ទប់សម្រាក ដោយទទួលបានបួនពិន្ទុនាំមុខគេ ទាំងមានសន្ទុះយ៉ាងខ្លាំង ។ ពួកគេបន្ដមានសន្ទុះចិត្តទៅលេងក្នុងតង់ទីពីរ ហើយទទួលបានជ័យជម្នះ ។
សន្ទុះ គឺមានអានុភាពណាស់ ។ យើងទាំងអស់គ្នាធ្លាប់មានបទពិសោធន៍អំពីវាតាមរបៀបផ្សេងៗ—ឧទាហរណ៍ ពេលឡានបង្កើនល្បឿន ឬការយល់ខុសគ្នាប្រែទៅជាការប្រកែកគ្នាភ្លាមៗ ។
ដូច្នេះ ខ្ញុំសុំសួរថា « តើមានអ្វីដែលនាំឲ្យមាន សន្ទុះខាងវិញ្ញាណ ? » យើងបានឃើញគំរូនៃសន្ទុះវិជ្ជមាន និងអវិជ្ជមាន ។ យើងស្គាល់អ្នកដើរតាមព្រះយេស៊ូវគ្រីស្ទ ដែលបានប្រែចិត្តជឿ ហើយរីកចម្រើនសេចក្ដីជំនឿរបស់ពួកគេ ។ ប៉ុន្ដែយើងក៏ស្គាល់អ្នកជឿដែលធ្លាប់តាំងចិត្តមុតមាំ ត្រូវវង្វេងចេញផងដែរ ។ សន្ទុះអាចប្រែប្រួល ។
យើងពុំធ្លាប់ត្រូវការសន្ទុះ វិជ្ជមាន ខាងវិញ្ញាណដូចជាពេលនេះ ដើម្បីទប់ទល់នឹងល្បឿនដ៏ខ្លាំងរបស់អារក្ស និងសញ្ញាកាន់តែអាក្រក់នៃសម័យនេះដូច្នេះទេ ។ សន្ទុះវិជ្ជមានខាងវិញ្ញាណនឹងរក្សាឲ្យយើងឆ្ពោះទៅមុខ ទោះជាមានជំងឺរាតត្បាត រលកស៊ូណាមី ការផ្ទុះភ្នំភ្លើង និងការប្រយុទ្ធប្រដាប់អាវុធដ៏ភ័យខ្លាច និងមិនប្រក្រតីក្ដី ។ សន្ទុះខាងវិញ្ញាណអាចជួយយើងឲ្យតទល់នឹងការវាយប្រហារដ៏ទុច្ចរិត និងឥតឈប់ឈររបស់ពួកមារសត្រូវ ដែលវាខំបំផ្លាញគ្រឹះខាងវិញ្ញាណរបស់យើងម្ដងបន្ដិចៗ ។
សកម្មភាពជាច្រើនអាចបង្កើតឲ្យមានសន្ទុះវិជ្ជមានខាងវិញ្ញាណ ។ ការគោរពប្រតិបត្តិ សេចក្ដីស្រឡាញ់ ការបន្ទាបខ្លួន ការបម្រើ និងការដឹងគុណ៤ គឺគ្រាន់តែជាចំណុចមួយចំនួនប៉ុណ្ណោះ ។
ថ្ងៃនេះ ខ្ញុំសូមឲ្យយោបល់អំពីសកម្មភាពជាក់លាក់ប្រាំយ៉ាង ដែលយើងអាចធ្វើដើម្បីជួយយើងឲ្យបន្ដមានសន្ទុះវិជ្ជមានខាងវិញ្ញាណ ។
ទីមួយ ៖ ដើរនៅលើផ្លូវនៃសេចក្ដីសញ្ញា ហើយបន្ដនៅលើផ្លូវនោះ ។
មិនយូរប៉ុន្មានកន្លងទៅនេះ ខ្ញុំមានសុបិនយ៉ាងច្បាស់មួយថា ខ្ញុំបានជួបនឹងក្រុមមនុស្សដ៏ធំមួយ ។ ពួកគេបានសួរសំណួរជាច្រើនដល់ខ្ញុំ ភាគច្រើនគឺសួរអំពីផ្លូវនៃសេចក្ដីសញ្ញា ហើយហេតុអ្វីវាសំខាន់ខ្លាំងដូច្នេះ ។
ក្នុងសុបិនខ្ញុំនោះ ខ្ញុំបានពន្យល់ថា យើងចូលក្នុងផ្លូវនៃសេចក្ដីសញ្ញាតាមការទទួលបុណ្យជ្រមុជទឹក ហើយធ្វើសេចក្ដីសញ្ញាដំបូងរបស់យើងជាមួយនឹងព្រះ ។៥ រាល់ពេលដែលយើងទទួលទានសាក្រាម៉ង់ នោះយើងសន្យា ម្ដងទៀតថានឹងលើកដាក់មកលើខ្លួននូវព្រះនាមនៃព្រះអង្គសង្គ្រោះ ចងចាំទ្រង់ ហើយរក្សាបទបញ្ញត្តិទាំងឡាយរបស់ទ្រង់ ។៦ ព្រះអះអាងតបយើងវិញថា យើងអាចមានព្រះវិញ្ញាណរបស់ព្រះអម្ចាស់គង់នៅជាមួយនឹងយើង ជាដរាប ។
ក្រោយមក យើងចុះសេចក្ដីសញ្ញាបន្ថែមទៀតនៅក្នុងព្រះវិហារបរិសុទ្ធ ជាកន្លែងដែលយើងទទួលបានការសន្យាកាន់តែអស្ចារ្យ ។ ពិធីបរិសុទ្ធ និងសេចក្តីសញ្ញាទំាងឡាយ អនុញ្ញាតឲ្យយើងទទួលបានព្រះចេស្ដានៃព្រះ ។ ផ្លូវនៃសេចក្ដីសញ្ញាគឺជាផ្លូវ តែមួយគត់ ដែលនាំទៅរកភាពលើកតម្កើង និងជីវិតដ៏អស់កល្បជានិច្ច ។
ក្នុងសុបិនរបស់ខ្ញុំ មានស្ត្រីម្នាក់សួរថា តើមនុស្សម្នាក់ដែលបានបំបាក់សេចក្ដីសញ្ញា អាចត្រឡប់មកលើផ្លូវនៃសេចក្ដីសញ្ញាវិញបានដោយរបៀបណា ។ ចម្លើយរបស់ខ្ញុំទៅសំណួរគាត់ វានាំទៅរកយោបល់ទីពីររបស់ខ្ញុំ ៖
ស្វែងរក អំណរ នៃការប្រែចិត្តជារៀងរាល់ថ្ងៃ ។
តើការប្រែចិត្តសំខាន់យ៉ាងដូចម្ដេច ? អាលម៉ាបានបង្រៀនថា យើងគួរតែ « កុំផ្សាយសាសនាពីអ្វីឡើយ ក្រៅពីការប្រែចិត្ត និងសេចក្ដីជំនឿជឿដល់ព្រះអម្ចាស់ » ។៧ ការប្រែចិត្ត គឺតម្រូវឲ្យមានពីមនុស្សដែលមានទំនួលខុសត្រូវគ្រប់រូប ដែលចង់បានសិរីល្អដ៏អស់កល្ប ។៨ គ្មានករណីលើកលែងនោះឡើយ ។ នៅក្នុងវិវរណៈមួយទៅកាន់ព្យាការី យ៉ូសែប ស្ម៊ីធ ព្រះអម្ចាស់បានវាយផ្ចាលថ្នាក់ដឹកនាំសាសនាចក្រពីមុន ដែលពុំបង្រៀនដំណឹងល្អដល់កូនចៅរបស់ពួកគេ ។៩ ការប្រែចិត្ត គឺជាគន្លឹះឆ្ពោះទៅកាន់ការរីកចម្រើន ។ សេចក្ដីជំនឿដ៏បរិសុទ្ធ រក្សាយើងឲ្យបន្ដឆ្ពោះទៅមុខនៅលើផ្លូវនៃសេចក្ដីសញ្ញានេះ ។
សូមកុំខ្លាច ឬពន្យារពេលប្រែចិត្តឡើយ ។ សាតាំងវាអរសប្បាយនឹងទុក្ខវេទនារបស់បងប្អូន ។ សូមបញ្ឈប់វា ។ សូមបណ្ដេញឥទ្ធិពលរបស់វាចេញពីជីវិតបងប្អូន ! សូមចាប់ផ្ដើមនៅថ្ងៃនេះ ដើម្បីទទួលបានអំណរនៃការសម្រាតភាពខាងសាច់ឈាមចេញ ។១០ ព្រះអង្គសង្គ្រោះស្រឡាញ់យើងជានិច្ច ប៉ុន្ដែ ជាពិសេស នៅពេលយើងប្រែចិត្ត ។ ទ្រង់បានសន្យាថា ទោះជា « អស់ទាំងភ្នំធំនឹងបាត់ទៅបាន អស់ទាំងភ្នំតូចនឹងរើចេញទៅ … ប៉ុន្តែ សេចក្តីសប្បុរសរបស់យើង នឹងមិនដែលឃ្លាតបាត់ពីឯងឡើយ » ។១១
បើបងប្អូនមានអារម្មណ៍ថា បងប្អូនបានវង្វេងចេញពីផ្លូវនៃសេចក្ដីសញ្ញាទៅឆ្ងាយ ឬយូរហើយ ហើយគ្មានផ្លូវអាចត្រឡប់មកវិញនោះវាពុំត្រឹមត្រូវទេ ។១២ សូមទាក់ទងទៅប៊ីស្សព ឬប្រធានសាខារបស់បងប្អូន ។ លោកគឺជាភ្នាក់ងាររបស់ព្រះអម្ចាស់ ហើយនឹងជួយបងប្អូនឲ្យទទួលបានអំណរ និងភាពធូរស្បើយមកពីការប្រែចិត្ត ។
ឥឡូវ សូមប្រយ័ត្ន ៖ ការត្រឡប់ទៅកាន់ផ្លូវនៃសេចក្ដីសញ្ញាវិញ ពុំ មានន័យថា ជីវិតនឹងងាយស្រួលនោះទេ ។ ផ្លូវនេះពិបាក ហើយពេលខ្លះយើងមានអារម្មណ៍ថា ដូចជាឡើងភ្នំដ៏ចោតមួយដូច្នោះដែរ ។១៣ ទោះជាយ៉ាងណាការឡើងនេះ រៀបចំឡើងដើម្បីសាកល្បង និងបង្រៀនយើង ទាំងបន្សុទ្ធធម្មជាតិរបស់យើង និងជួយយើងឲ្យក្លាយជាពួកបរិសុទ្ធ ។ វាគឺជាផ្លូវតែមួយគត់ ដែលនាំទៅរកភាពលើកតម្កើង ។ ព្យាការីរបស់យើង ១៤ ពិពណ៌នាអំពី « ស្ថានភាពដ៏មានពរ និងរីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ ។ ដ្បិតមើលចុះ ពួកគេបានពរគ្រប់យ៉ាង ទាំងខាងសាច់ឈាម និងខាងវិញ្ញាណផង ហើយបើសិនជាពួកគេរក្សាការស្មោះត្រង់ដរាបដល់ចុងបំផុត នោះពួកគេនឹងត្រូវបានទទួលនៅស្ថានសួគ៌ … [ ហើយ ] រស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ » ។១៥
ដោយបូកផ្សំជាមួយនឹងការប្រែចិត្តជារៀងរាល់ថ្ងៃ នោះការដើរនៅលើផ្លូវនៃសេចក្ដីសញ្ញានឹងបង្កើនសន្ទុះវិជ្ជមានខាងវិញ្ញាណ ។
យោបល់ទីបីរបស់ខ្ញុំ ៖ រៀនអំពីព្រះ និងរបៀបដែលទ្រង់ធ្វើការ ។
ឧបសគ្គដ៏ធំបំផុតមួយរបស់យើងនៅសព្វថ្ងៃនេះគឺ ការញែកដឹងរវាងសេចក្ដីពិតរបស់ព្រះ និងការបោកបញ្ឆោតរបស់សាតាំង ។ នោះជាហេតុដែលព្រះអម្ចាស់បានព្រមានយើងឲ្យ « អធិស្ឋានជានិច្ច … ប្រយោជន៍ឲ្យ [ យើង ] អាចយកឈ្នះលើអារក្សសាតាំងបាន ហើយ … រួចផុតពីកណ្ដាប់ដៃនៃពួកអ្នកបម្រើរបស់អារក្សសាតាំង ដែលទ្រទ្រង់កិច្ចការរបស់វានោះ » ។១៦
ម៉ូសេផ្ដល់ជាគំរូមួយអំពីរបៀបញែកដឹងរវាងព្រះ និងសាតាំង ។ នៅពេលសាតាំងមកល្បួងលោក ម៉ូសេ លោកបានដឹងពីការបោកបញ្ឆោតនេះ ព្រោះលោកទើបតែបានជួបនឹងព្រះផ្ទាល់ ។ ម៉ូសេស្គាល់ភា្លមថា សាតាំងជានរណា ហើយបានបញ្ជាវាឲ្យថយចេញ ។១៧ ពេលសាតាំងមិនព្រមចេញ នោះម៉ូសេបានដឹងពីរបៀបអំពាវនាវសូមជំនួយបន្ថែមពីព្រះ ។ ម៉ូសេបានទទួលកម្លាំងមកពីព្រះ ហើយបានស្ដីបន្ទោសឲ្យអារក្ស ម្ដងទៀត ដោយពោលថា « នែ៎សាតាំង ចូរថយចេញពីខ្ញុំទៅ ដ្បិតខ្ញុំនឹងថ្វាយបង្គំដល់ព្រះតែមួយអង្គប៉ុណ្ណោះ » ។១៨
យើងគួរតែធ្វើតាមគំរូនោះ ។ សូមបណ្ដេញឥទ្ធិពលសាតាំងចេញពីជីវិតរបស់បងប្អូន ! សូមកុំដើរតាមវាចុះទៅកាន់ « ជង្ហុកនៃសេចក្ដីវេទនា និងទុក្ខលំបាកដ៏មិនចេះចប់មិនចេះហើយ » របស់វាឡើយ ។១៩
ដោយល្បឿនដ៏គួរឲ្យភ័យខ្លាចនេះ បើមិនបីបាច់ទីបន្ទាល់ « ដោយព្រះបន្ទូលដ៏ល្អនៃព្រះ »២០ ជារៀងរាល់ថ្ងៃទេ វាអាចវិនាសបាន ។ ដូច្នេះ ថ្នាំបន្សាបគម្រោងក្បត់របស់សាតាំងគឺ ៖ យើងត្រូវការបទពិសោធន៍នៃការថ្វាយបង្គំព្រះអម្ចាស់ និងការសិក្សាដំណឹងល្អរបស់ទ្រង់ជារៀងរាល់ថ្ងៃ ។ ខ្ញុំសូមអង្វរបងប្អូនឲ្យទុកឲ្យព្រះឈ្នះនៅក្នុងជីវិតបងប្អូន ។ សូមថ្វាយពេលវេលារបស់បងប្អូនទៅទ្រង់ឲ្យបានសមរម្យ ។ កាលបងប្អូនធ្វើដូច្នោះ សូមកត់សម្គាល់អំពីអ្វីដែលនឹងកើតឡើងដល់សន្ទុះវិជ្ជមានខាងវិញ្ញាណរបស់បងប្អូន ។
យោបល់ទី ៤ ៖ ស្វែងរក និងរំពឹងថាមានអព្ភូតហេតុ ។
មរ៉ូណៃបានអះអាងនឹងយើងថា « ព្រះទ្រង់ក៏ពុំទាន់ឈប់ទៅជាព្រះនៃអព្ភូតហេតុ » ដែរ ។២១ រាល់ គម្ពីរទាំងអស់ក្នុងព្រះគម្ពីរបង្ហាញពីការស្ម័គ្រព្រះទ័យរបស់ព្រះអម្ចាស់ ក្នុងការធ្វើអន្ដរាគមន៍ដល់ជីវិតរបស់អស់អ្នកដែលជឿលើទ្រង់ ។២២ ទ្រង់បានញែកសមុទ្រក្រហមឲ្យម៉ូសេ បានជួយនីហ្វៃឲ្យយកផ្ទាំងលង្ហិន និងបានស្ដារសាសនាចក្ររបស់ទ្រង់ឡើងវិញតាមរយៈព្យាការី យ៉ូសែប ស៊្មីធ ។ អព្ភូតហេតុនីមួយៗទាំងនេះត្រូវការពេលវេលា ហើយអាចនឹងមិនដូចបេះបិទតាមសំណើ ដែលបុគ្គលទាំងនោះបានទូលសូមពីព្រះអម្ចាស់នោះទេ ។
ដូចគ្នានេះដែរ ព្រះអម្ចាស់នឹងប្រទានពរដល់ បងប្អូននូវអព្ភូតហេតុ បើបងប្អូនជឿលើទ្រង់ « ដោយឥតសង្ស័យអ្វី » នោះ ។២៣ សូមធ្វើកិច្ចការខាងវិញ្ញាណដើម្បីស្វែងរកអព្ភូតហេតុ ។ សូមអធិស្ឋានទូលសូមព្រះឲ្យជួយបងប្អូនអនុវត្តសេចក្ដីជំនឿបែបនោះ ។ ខ្ញុំសូមសន្យាថា បងប្អូនអាចដកពិសោធន៍ដោយផ្ទាល់ថា ព្រះយេស៊ូវគ្រីស្ទ « ទ្រង់រមែងចម្រើនកម្លាំងដល់អ្នកដែលល្វើយ ហើយចំណែកអ្នកដែលគ្មានកម្លាំងសោះ នោះទ្រង់ក៏ប្រទានឲ្យ » ។២៤ កិច្ចការតិចតួចនឹងបង្កើនសន្ទុះខាងវិញ្ញាណរបស់បងប្អូន ជាងការដឹងថា ព្រះអម្ចាស់កំពុងជួយបងប្អូនឲ្យរើភ្នំនៅក្នុងជីវិតរបស់បងប្អូនទៅទៀត ។
យោបល់ទី ៥ ៖ បញ្ចប់ជម្លោះនៅក្នុងជីវិតផ្ទាល់ខ្លួនរបស់បងប្អូន ។
ខ្ញុំសូមបញ្ជាក់ការអំពាវនាវរបស់ខ្ញុំម្ដងទៀត ឲ្យបញ្ចប់ជម្លោះនៅក្នុងជីវិត របស់បងប្អូន ។ សូមអនុវត្តការបន្ទាបខ្លួន ភាពក្លាហាន និងភាពរឹងមាំ ដែលតម្រូវឲ្យមាន ដើម្បីអភ័យទោសផង និងទទួលការអភ័យទោសផង ។ ព្រះអង្គសង្គ្រោះបានសន្យាថា « ដ្បិតបើ [ យើង ] អត់ទោសចំពោះការរំលងច្បាប់ ដែលមនុស្សលោកប្រព្រឹត្តធ្វើ នោះព្រះវរបិតានៃ [ យើង ] ដែលគង់នៅស្ថានសួគ៌ ទ្រង់នឹងអត់ទោសឲ្យ [ យើង ] ដែរ » ។២៥
ចាប់ពីថ្ងៃនេះទៅរយៈពេលពីរសប្ដាហ៍ទៀត យើងនឹងប្រារព្ធធ្វើបុណ្យអ៊ីស្ទើរ ។ ទំរាំដល់ថ្ងៃនោះ ខ្ញុំសូមអញ្ជើញបងប្អូនឲ្យខិតខំបញ្ចប់ជម្លោះផ្ទាល់ខ្លួន ដែលធ្វើឲ្យបងប្អូនធ្ងន់ចិត្ត ។ តើអាចមានទង្វើដឹងគុណណាដែលកាន់តែសក្ដិសម ថ្វាយទៅព្រះយេស៊ូវគ្រីស្ទចំពោះដង្វាយធួនរបស់ទ្រង់ដែរឬទេ ? បើមិនអាចអភ័យទោសនៅពេលបច្ចុប្បន្ននេះទេ សូមទូលអង្វរសូមអំណាចនៃព្រះលោហិតដ៏ធួនរបស់ព្រះយេស៊ូវគ្រីស្ទ ឲ្យជួយដល់បងប្អូន ។ កាលបងប្អូនធ្វើដូច្នោះ ខ្ញុំសន្យាថា បងប្អូននឹងមានភាពសុខសាន្ដផ្ទាល់ខ្លួន និងមានសន្ទុះខាងវិញ្ញាណកាន់តែខ្លាំង ។
ពេលព្រះអង្គសង្គ្រោះធ្វើដង្វាយធួនសម្រាប់មនុស្សទាំងអស់ នោះទ្រង់បានបើកផ្លូវឲ្យអ្នកដែលធ្វើតាមទ្រង់ ទទួលបាននូវព្រះចេស្ដានៃការព្យាបាល ការពង្រឹង និងការប្រោសលោះរបស់ទ្រង់ ។ អភ័យឯកសិទ្ធិខាងវិញ្ញាណទាំងនេះនឹងកើតមានដល់អ្នកទាំងអស់ណា ដែលព្យាយាមស្ដាប់ និងធ្វើតាមទ្រង់ ។
បងប្អូនប្រុសស្រីជាទីស្រឡាញ់របស់ខ្ញុំអើយ ខ្ញុំសូមអង្វរបងប្អូនដោយអស់ពីចិត្ត ខ្ញុំលើកទឹកចិត្ត បងប្អូនឲ្យដើរលើផ្លូវនៃសេចក្ដីសញ្ញា ហើយនៅលើផ្លូវនោះរហូតទៅ ។ សូមដកពិសោធន៍នៃអំណរមកពីការប្រែចិត្តជារៀងរាល់ថ្ងៃ ។ រៀនអំពីព្រះ និងរបៀបដែលទ្រង់ធ្វើកិច្ចការ ។ សូមស្វែងរក និងរំពឹងថាមានអព្ភូតហេតុ ។ សូមព្យាយាមបញ្ចប់ជម្លោះនៅក្នុងជីវិតរបស់បងប្អូន ។
ពេលណាបងប្អូនធ្វើតាមអ្វីទាំងនេះ ខ្ញុំសន្យាថា បងប្អូននឹងមានលទ្ធភាពឆ្ពោះទៅមុខនៅលើផ្លូវនៃសេចក្ដីសញ្ញាដោយសន្ទុះដ៏កាន់តែខ្លាំង មិនថាបងប្អូនជួបនឹងឧបសគ្គអ្វីនោះទេ ។ ហើយខ្ញុំសន្យាថា បងប្អូននឹងមានកម្លាំងកាន់តែខ្លាំងដើម្បីទប់ទល់នឹងការល្បួង កាន់តែសុខសាន្ដក្នុងចិត្ត និងសេរីភាពពីការភ័យខ្លាច ព្រមទាំងសាមគ្គីភាពក្នុងក្រុមគ្រួសារកាន់តែខ្លាំងផងដែរ ។
ព្រះមានព្រះជន្មរស់ ! ព្រះយេស៊ូវគឺជាព្រះគ្រីស្ទ ! ទ្រង់មានព្រះជន្មរស់ ! ទ្រង់ស្រឡាញ់យើង ហើយនឹងជួយដល់យើង ។ ខ្ញុំសូមថ្លែងទីបន្ទាល់អំពីការណ៍នេះ ក្នុងព្រះនាមដ៏ពិសិដ្ឋនៃព្រះប្រោសលោះរបស់យើង គឺព្រះយេស៊ូវគ្រីស្ទ អាម៉ែន ៕