O Se Leo Itiiti ma le Filemu ma se Loto Ootia
O se leo filemu ma le itiiti ma se loto ootia lea e molimau mai ai i le vavega o le toefuataiga.
O le 1995, na valaaulia ai au ou te tuuina atu se faafeiloaiga ma se saunoaga amata i se semina faasaienisi i le Aai o Sate Leki i le mataupu o meaai a tamaiti. E ivasefuluono saienisi mai atunuu e 24 sa auai. A o o’u vaavaai atu i le aofia i le taimi o la’u tautalaga, sa faagaeetia lava au i le tele o atunuu sa i ai o latou sui, e iloagofie lea i o latou laei, o le lanu o o latou pa’u, gagana, ma isi vaaiga sa iloagofie ai.
I le tolu po o le fa masina mulimuli ane sa ou auai atu ai i se konafesi faalesiteki i le Talafatai i Sasae o le Iunaite Setete. A o o’u nofo ai i luga o le tulaga e saunia ai mo le sauniga a taitai o le perisitua, na ulufale atu se alii Aferika i le falesa ma nofo i tafatafa o le auala. E foliga masani lava o ia, ae sa le mafai ona ou manatuaina po o fea na ou vaai ai ia te ia. Sa ou soso atu ma fesili atu i le peresitene o le siteki po o ai le tagata le la. Na tali mai le peresitene o le siteki, “Oi, e le o se tagata o le Ekalesia. O se polofesa o loo asiasi mai Aferika e faiaoga i se tasi o iunivesite lauiloa i le eria. I nai masina ua tuanai sa ia auai atu ai i se semina faasaienisi i le Aai o Sate Leki. Sa ia aveina se tamaitusi e uiga i le Ekalesia, lea na taitaiina atu ai o ia e faitauina mea uma na mafai ona ia mauaina e uiga i le Ekalesia. O loo auai mai nei o ia i sauniga uma e mafai ai.” Sa pei e talasua le peresitene o le siteki ma faapea mai, “Ou te matuai ofo lava pe afai e auai atu o ia i le fonotaga a le Aualofa.”
Ina ua maea le sauniga a taitai o le perisitua, sa ou toe faailoaina atu lo’u tagata i le polofesa. Na ia toe faamautuina lona fiafia ona o lenei punavai o le upumoni ua maua. Na ia faamatalaina faapea o lona aiga, o loo i ai pea i Aferika, sa suesue faatasi ma faifeautalai ma o le a auai faatasi ma ia i Amerika i le isi fa vaiaso, o le taimi lea o le a papatisoina uma ai i latou.
I le faaiuga o le sauniga a tagata matutua i le afiafi o le Aso Toonai, na faanatinati mai ai lenei alii i le pulelaa, ma tu’i lona fatafata, ma faailoa mai, “E faapea uma lava le tata o lo’u fatu. Ua le mafai ona ou taofiofia i totonu o lo’u tino. Ou te leiloa pe mafai ona ou faatali i le fa vaiaso ina ia papatisoina ai lo’u aiga.” Sa ou fautua atu i ai e ao ona to’a le tai i lona loto ma faatali mo lona faletua ma lana fanau, ina ia mafai ona papatisoina uma faatasi i latou.
Ina ua solaese Elia ina ia faasaoina lona ola mai le tupu tamaitai amioleaga o Iesepela, na faatonuina o ia e le Alii e alu atu i luga o se mauga lea na ia maua ai se aafiaga taua e le masani ai. A o tutu ai Elia i luga o le mauga i luma o le Alii, sa ia lagonaina “se matagi tetele foi ma le malosi … ; e lei i ai Ieova i le matagi: ua mulimuli i le matagi o le mafuie; e lei i ai Ieova i le mafuie: e mulimuli i le mafuie o le afi; ae lei i ai Ieova i le afi: e mulimuli i le afi o le leo filemu ma le itiiti” (I Tupu 19:11–12).
E masani ona fesiligia au e i latou e le tutusa o tatou talitonuga pe aisea ua saoasaoa ai le faatupulaia o la tatou ekalesia, e le gata i tagata auai ae faapea i le malosi, ae o isi ekalesia ua lipotia mai le tuuitiitia. O le tali i lena fesili ona o se leo filemu ma le itiiti ma se loto ua ootia. I lenei lalolagi pisi, malomaloa, ma le pisapisao, e le pei o se matagi, e le pei o se afi, e le pei o se mafuie; ae o se leo itiiti, ae mafai lava ona lagonaina ma e mafua ai ona ootia le loto. O se lagona filemu e mumu i totonu e faapea o le talalelei toefuataiina lenei a Iesu Keriso, faatasi ai ma ona aoaoga faavae uma, o le perisitua, ma feagaiga ia na leiloloa i le tele o auga senituri o le pogisa ma le fenumiai. Ioe, o se leo filemu ma le itiiti ma se loto ootia lea e molimau mai ai i le vavega o le toefuataiga.
O se leo itiiti ma le filemu ma se loto ootia lea na uunaia ai le faitau miliona o tagata ina ia faataitaia le soifuaga o Iesu i upu, faatinoga, ma galuega. O se leo itiiti ma le filemu ma se loto ootia lea na uunaia ai le faitau afe o ulugalii litaea ina ia auauna atu faamisiona mo le 18 masina po o le umi atu. Ua latou tuuese ia vaega sologa lelei o le olaga ina ia o atu i le lalolagi e auauna atu i isi i a latou lava tupe ma e manatu isi o se osigataulaga tele, e masani ona auauna atu i ni vaega taumamao o le lalolagi lea e na ona toe moemiti ai i se vaivevela e taeele ai ma ni moega lelei.
O se leo itiiti ma le filemu ma se loto ootia lea na mafua ai ona tuua e le faitau selau afe o alii ma tamaitai talavou ia galuega, tolopoina a latou aoga (o nisi taimi e tuuese ai ni taaloga po o isi sikolasipi), po o le tolopoina o le alofa faavalea ina ia auauna atu i le Alii i a latou lava tupe ina ia folafola atu le Toefuataiga o le talalelei. O se leo itiiti ma le filemu ma se loto ootia lea e tuuina atu i o tatou tagata talavou le manao ma le lototele e tutu ai mo le mama, faamaoni, ma mataupu faavae, e ui lava o nisi taimi e ulagia ma teenaina ai. O se leo itiiti ma le filemu ma se loto ootia lea e uunaia ai se tasi ina ia olioli i le tausia o poloaiga a le Atua ma fefaasoaai i le tauaveina o avega a i latou o loo puapuagatia. Ioe, e i ai le mana i se leo itiiti ma le filemu ma se loto ootia.
Sa i ai le auala a Alema e fesiligia ai le tulaga faaleagaga o o tatou loto. Na ia fesili, “Po ua fanauina ea outou faaleagaga i la le Atua?” Ma le isi, “Po ua outou maua ea ona foliga i o outou mata? Po ua outou lagonaina ea lenei liliu tele i o outou loto?” (Alema 5:14; faamamafa faaopoopo). I nisi upu, po ua ootia ea lou loto i se molimau ia Iesu Keriso?
Pe mafai ona ou ta’uina atu ni mafuaaga se tolu mai le tele o mafuaaga e ootia ai lo’u loto? Muamua, e ootia lo’u loto i le iloa lea o Iesu Keriso o lo’u lava Faaola lea ma o Lona alofa mo au ua matua lava lea, ma o lea na Ia puapuagatia ai i se tiga e le mafaatusalia ma oo ai lava ina maliu. E ootia lo’u loto ona o le taimi paganoa o o’u lagona loloto ou te iloaina ai e mafai ona faamamaina, ma togiolaina au e ala i le toto o Iesu Keriso. E ootia lo’u loto pe a ou mafaufau i le tau na totogiina—le puapuaga na oo i ai o Ia ina ia faasaoina ai au mai puapuaga faapea ona o au agasala ma soligatulafono.
Lona lua, e ootia lo’u loto i le iloaina lea o se alii talavou, e na o le 14 tausaga le matua, na alu atu i se togavao ma o se tatalo faigofie ma faamaulalo, na tatalaina ai le lagi, ma faaali mai le Atua ma Keriso, ma o ifo ai agelu. Ma o lea, na toefuataiina mai ai le atoatoaga o le talalelei a Iesu Keriso faatasi ma ona perisitua, feagaiga, ma le mama o aoaoga faavae. E ootia lo’u loto pe a ou mafaufau i faigata na onosaia e lenei perofeta talavou ina ia aumaia ai le atoatoaga o le talalelei toefuataia. A o ifoifo ai agelu mai le lagi, sa faapea foi ona galulue agelu a Satani. Sa amataina sauaga ma e pei o perofeta anamua, na faamaeaina le soifuaga o Iosefa i lona maturoina. I ona faigata ma sauaga uma lava, sa tu mausali ma le le mafaagaeetia lava le perofeta talavou.
Talu ai ona o le Perofeta o Iosefa Samita, ua ou matuai malamalama atoatoa ai i le lautele o le Togiola a Keriso. Talu ai ona o le Perofeta o Iosefa, ua ou malamalama lelei ai i le taua o le Togalaau o Ketesemane—o se nofoaga o le puapuaga tele a o tauaveina e Keriso o tatou lava puapuaga e le gata mo a tatou lava agasala, ae faapea foi i o tatou lava tiga, le atoatoa, faigata, ma faalavelave. Ua ou malamalama i le uiga e le mafuatia ma le faavavau o Lana taulaga sili e faaiu ai taulaga uma. Ua ou malamalama lelei ai i le alofa o lo tatou Faaola na faaalia i Lana togiola. O Iosefa Samita, ua faateleina ai lo’u alofa ma lo’u agaga faafetai mo le Faaola ma ua taua ai foi ia te a’u lo’u tapuai atu i ai. O loo i ai faatasi ma le tele o viiga o loo i totonu o la tatou tusi o viiga le pese masani na tusia e W. W. Phelps, “Viia le na fetaiai ma Ieova!” (“Viia le Na Fetaiai ma Ieova,” Viiga, nu. 15). E ootia lo’u loto pe a ou usuina lena pese.
Ioe, aua tatou te usuina ma le naunautai ma le fiafia, “Viia le na fetaiai ma Ieova,” tatou te usuina e uiga i le Faaola ma le faaaloalo e sili atu, o lagona, ma le faafetai i upu: “E maeu le alofa, ma lona maliu tiga mo au nei! E maeu lava, maeu naua!” (“Ou te Tu ma Ofo,” Viiga, nu. 107). E ootia lo’u loto ona o le malamalama na aumaia e le Perofeta o Iosefa i lo’u olaga e tusa ai ma aafiaga faaletagata o le Togiola a lo’u Faaola.
Lona tolu, e ootia lo’u loto a o o’u suesueina ma mafaufau loloto i tusitusiga paia i totonu o le Tusi a Mamona, a o faaopoopo mai i le Tusi Paia ma saga molimau mai ai i le paia o Iesu Keriso i le avea ma Alo o le Atua, le Togiola ma le Faaola o le lalolagi. Talu ai ona o lenei soa paia i le Tusi Paia, ua faalauteleina ai lo’u malamalama i aoaoga faavae a Keriso, o lea ua matuai faamalieina ai lo’u mafaufau i le tele o fesili e le o taliina i totonu o le Tusi Paia. O le Tusi a Mamona o loo tuuina mai ai se faamaoniga mautu o Iosefa o se perofeta a le Atua, na moni lava le faaali atu o Keriso ia te ia, ma ua toefuatai mai le talalelei i lona mama ma lona atoatoa.
E ootia lo’u loto i le na o le mafaufau i le vavega o le oo mai o le Tusi a Mamona—le galuega mamafa o le vaneina o papatusi uamea, le puipuia i le tele o senituri e i latou na filifilia e le Atua, ma le faaliliuina faavavega. E moni lava ua talafeagai i ai le faauigaga o tusitusiga paia. Talu ai ona o le alofa silisili o le Atua mo i tatou, ua Ia saunia ai lenei faamaoniga lea e mafai ona tatou fetagofi i ai, e mafai ona tatou faitauina, e mafai ona tatou suesueina, ma e mafai foi ona tatou luiina. Ae, o le mea e sili ona taua, ua tele le alofa o le Atua ia te au lea o le a Ia tuuina mai ai ia te au ma soo se tasi lava e saili atu ma le faamaoni se faaaliga faaletagata i le moni o le Tusi a Mamona—le faamaoniga mausali o le Toefuataiga ma le avea o Iosefa Samita ma se perofeta moni.
I le tautalagia o lenei malamalama paia, na molimau mai ai le perofeta o Alema i le Tusi a Mamona:
“Tou te le manatu ea ua iloa nei mea e au lava? Faauta, ou te molimau atu ia te outou, ua ou iloa ua moni lava nei mea uma ua ou tautala atu ai. Pe ni a fa outou i le ala ua ou iloa ai ua moni nei mea?
“Faauta, ou te fai atu ia te outou, ua faaalia mai ai ia te au e le Agaga Paia o le Atua. Faauta, na ou anapogi ma tatalo i aso e tele ina ia ou iloa nei mea mo au lava. O lenei foi ua ou iloa mo au lava ua moni; aua ua faaalitinoina ia te au e le Alii le Atua i lona Agaga Paia, o le Agaga foi lea o le faaaliga,” (Alema 5:45–46).
E pei foi o Alema anamua, e mafai e tagata o le ekalesia ma tagata sailili faamaoni ona iloa ma le mautinoa e moni nei mea. O lo tatou avanoa sili lea ia iloaina. E sili atu nai lo se avanoa; o lo tatou tiutetauave le iloaina. O se vaega tele tatou te misia lo tatou le iloaina pe afai e tuuina mai lea avanoa. Ua fetalai mai le Alii, “Ia outou tuitui atu, ona toina ai lea ia te outou” (Mataio 7:7). Ua faapea mai le perofeta o Iakopo i le Tusi a Mamona, “Ia omai ma le loto atoa” (Iakopo 6:5). E le moomia ona tatou faalagolago atu i o tatou atamai poo o tatou tomai faaletino. Ia tatou suesue, ia tatou tatalo, ma e pei o Alema anamua, e mafai foi ona tatou anapopogi, ona oo mai ai lea o se leo itiiti ma le filemu ma le loto ootia. Mafaufau i se faaaliga faaletagata mai le Atua o nei mea e moni. O le manatu i ai faapea e mafua ai le ootia o lo’u loto. I le suafa o Iesu Keriso, amene.