E Aoaoina Lau Fanau Uma Lava
E tatau ona iloa e tamaiti, o le faatuatua i le Faaola ma mulimuli ia te Ia, o le a fesoasoani ia i latou e maua ai le filemu i lenei lalolagi faigata.
O faalavelave e le’i mamao atu i le lalolagi atoa, e ootia ai o tatou loto. O fanau puapuagatia, o e ua aafia fua ae leai ni agasala, ua sili ona tatou lagona ai le faanoanoa. Ua tatou vaaia fanau ua leai ni tagata o o latou aiga e tausia, puipuia, ma alolofa i ai. Ua tatou naunau e aapa atu ma fesoasoani i se auala—soo se auala e mafai ai ona tuumamaina o latou puapuaga, ma aumaia ai le faamoemoe i o latou olaga. Matou te faafetai tele mo avanoa ua tatou maua e fesoasoani atu ai. Ua faalototeleina i matou i taumafaiga a le toatele o i latou o e o loo fesoasoani atu i nei tamaiti.
Ae ui i lea, tatou te le tau saili mamao mo ni tamaiti o nonofo i ni tulaga e ese mai, ma luitauina. Tatou te le mafaufauina, ae atonu e sopoloa la tatou vaai i fanau o loo tatou lotolotoi faatasi. Pe o tatou matuai nofouta ea i tulaga faigata o loo siomia ai a tatou lava fanau? E masani lava ona tatou iloiloina pe o ausia o latou manaoga faaletino, ae pe o faapefea foi o latou manaoga faaleagaga? Pe ua latou iloa le malamalama ma le filemu o le talalelei a Iesu Keriso? Ua aoao mai tusitusiga paia, “E aoaoina lau fanau uma lava e le Atua; e tele foi le manuia o lau fanau.”1
E manaomia e le fanau le filemu, lea e oo mai pe a iloa o loo i ai so latou Tama Faalelagi e alofa, o Le na auina mai Lona Alo, o Iesu Keriso, e aumaia le malamalama ma le faamoemoe i le lalolagi. E faamoemoe le taitaiina atu o fanau i lena filemu ma le malamalama, ia i tatou o tagata matutua.
O tulaga le manuia faaleagaga o nisi o fanau i le lalolagi i aso nei, o loo faaalia i se ata vali na saunia e se tusiata mai Take o Carl Bloch. O loo faamatalaina ma le matagofie e lenei ata vali se tala faatusipaia o loo maua i le Ioane mataupu e 5. O Keriso, o le e faia faamalologa ma faamafanafanaga, o le taulaiga lea o le ata vali. Na ia aveeseina se ufiufi mai se tagata sa ma’i talu ona fanau mai. Sa faatalitali le tagata mo le vavega o le faamalologa i le taelega i Petesa, ae na leai foi se tasi e fesoasoani atu ia te ia. A o faatalitali lea tagata, ma faamoemoe mo se vavega, sa afio atu Keriso ma le mana e faamalolo ai o ia.
O loo i ai i le ata vali ni tagata i le pito i tua, e leai se tasi o i latou na tilotilo sa’o atu ia Keriso. Sa i ai le Alii i lo latou lotolotoi, ae peitai, na o le toatasi lava le tagata na iloaina o Ia. O isi tagata uma na foliga mai sa faaauau ona fai fuafuaga a le tagata lava ia, sa latou le manatunatu i le mana maoae o Keriso ma le vavega o le a tupu i lo latou faapotopotoga. O se tamaitiiti laitiiti ma se tamaitai, atonu o lona tina, o loo la iloa atu Iesu, ae peitai, e pei foi o isi, e ese le mea o loo taulai atu i ai le la vaai. Sa le mafai ona taitai atu e lenei tamaitai le tamaitiiti i le Faaola, ae o loo i ai lava iina le Faaola. Ou te le iloa, pe o le a faapena foi i tatou, i le misia o lenei avanoa e o mai ai ia Keriso? Pe o avea mea e tutupu o le olaga ma faalavelave ia i tatou ma faanenefu ai la tatou vaai faaleagaga, lea tatou te le taulai atu ai i mea e aupito sili ona taua? Ou te le iloa, pe tatou te misia ia avanoa e aoao ai e uiga i le Alii ma lagonaina Lona alofa? Ma pe o tatou misia avanoa e fetufaai atu ai i isi—aemaise lava i fanau—ia mea e aupito sili ona taua, o le talalelei a Iesu Keriso? Ua tatou vaai uma i tamaiti ma le autalavou o tutu i le tumutumu [o tagata] ma le le mautonu ma le fia iloa po o le a le mea e aupito sili ona taua.
E toetoe lava a mafai ona ou lagonaina lenei tamaitiiti ma isi tamaiti o alalaga mai i upu o le pese ua toatele i tatou ua pesepese ai “Aoao mai ia ou savali i le malamalama.” Manatua upu:
Aoao mai ia ou iloa lona alofa;
Aoao au ia tatalo i le Tama;
Aoao ia ou iloa mea sa’o e fai;
Aoao mai au, ia ou savali ai.2
Pe o tatou aoaoina ea a tatou fanau ina ia iloa, lagona, ma olioli i le matagofie, mana, ma vavega o le talalelei a Iesu Keriso? Ua apoapoai mai Peresitene Gordon B. Hinckley: “Ia tatou faafaileleina a tatou fanau e uiga ia te Ia, o le ua tatou ta’ua o le Alii o Iesu Keriso. Ia tatou aoao a tatou fanau i mataupu faavae lavea’i o le talalelei.”3 E tatau ona iloa e tamaiti, o le faatuatua i le Faaola ma mulimuli ia te Ia, o le a fesoasoani ia i latou e maua ai le filemu i lenei lalolagi faigata.
E faapefea ona tatou aoaoina a tatou fanau? E mafai ona tatou mulimuli i le faataitaiga a le Faaola. I le Tusi a Mamona, ua tatou faitau ai i le faaali atu o le Faaola toetu ia i latou i le Itulalolagi i Sisifo. Ao [Ia] aoao atu i tagata, sa Ia faapotopoto atu tamaiti ia te Ia. Sa Ia tootuli ma tatalo faatasi ma tamaiti, ma mo i latou. Sa Ia faamanuia taitoatasi i tamaiti. Sa Ia lagonaina le olioli i le latou faatasi ai ma tatalaina le lagi ina ia mafai ona aoaoina tamaiti mai luga.
A o outou aai faatasi ma lau fanau, a o outou faaaofia ai i latou i tatalo faaleaiga ma le suesueina o tusitusiga paia i aso uma, ma afiafi faaleaiga, o loo e mulimuli i le faataitaiga a le Faaola e ala i le alofa ia i latou ma aoao. A o outou faia lenei mea, ia ta’u atu ia i latou, o loo taumafai faatasi lo outou aiga e tausi poloaiga ma ia agavaa e avea o se aiga e faavavau. Atonu o taimi e talanoa faasamasamanoa taitoatasi ai ma le fanau, o le a uunaia ai i tatou e le Agaga e fai atu ia fesili sa’o, po o le fai atu foi o le faamatalaga sa’o e fesoasoani ai i a tatou fanau e iloa ma lagona ai le malamalama o le Alii. Afai tatou te faia avanoa, o le a taitaiina i tatou e le Agaga.
O loo i ai ni tamaiti lelei ma le atamamai i lo tatou lotolotoi. E mafai ona tatou fesoasoani atu ia latou maua le filemu i lenei olaga ma le olaga a sau.
E tatau ona iloa e tamaiti le Malamalama o Keriso, ina ia mafai ona latou filifilia le malamalama ma aloese ai mai le pogisa. Na oo ia Mose se aafiaga faavavega ina ua liua o ia ma [ia] vaaia ai le Atua i ona mata faaleagaga. Ina ua uma ona aoaoina Mose e uiga i le Atua, sa ia vaaia Lona mamalu ma [Lana] galuega, na sau Satani ia Mose i le pogisa ma le fenumiai. Talu ai ona sa vaai Mose i le malamalama ma le mamalu o le Atua, o lea sa ia iloa ai le eseesega. Sa tu malosi atu o ia e tetee ese Satani i le faapea atu, “O ai ea oe? Aua faauta o au o se atalii o le Atua.”4
E manaomia ona aoaoina tamaiti i le malamalama o le talalelei, aua a oo mai faaosoosoga, e mafai ona latou faapea atu, “Ua ou iloa a’u. O au o se atalii/afafine o le Atua. Ua ou iloa le mea e tatau ona ou faia. E tatau ona ou papatiso, maua le Agaga Paia, ma tausi poloaiga.” Ona mafai lea ona faapea mai tamaiti, “Ua ou iloa le ituaiga tagata e mafai ona avea ai au. E mafai ona avea au ma se tamaitai talavou amiotonu” po o le “E mafai ona avea au ma se alii talavou amiotonu ma maua le perisitua a le Atua.” O tamaiti ua aoaoina i lenei atamai ma le malamalama, e mafai ona latou faia le filifiliga o le teena o le pogisa ae liliu atu i le malamalama ma le filemu o le talalelei.
O fanau ua teumauina le talalelei i o latou loto, ua [latou] iloa le aao o le Alii i o latou olaga. O nisi taimi e tele atu mea ua iloa e tamaiti [e uiga i le talalelei] nai lo mea ua tatou manatu ua latou iloa. Ua ou iloa, o tamaiti ua malamalama i le talalelei, e talitonu. Latou te le masalosalo. Fai mai Samantha, e 11 tausaga, “Ou te iloa e moni le talalelei ona e mafai ona ou lagonaina.” Fai mai Peniamina e 3 tausaga, “Ou te iloa e faafofoga ma tali mai le Tama Faalelagi i a’u tatalo ona e alofa o Ia ia te au.” O tamaiti ua malamalama i le talalelei e faapea mai, “Ou te iloa o loo taitaiina lo’u olaga e le Agaga Paia ona ou te lagonaina le fiafia pe a ou filifili e mulimuli i ana musumusuga.”
Ua amata ona malamalama Samu i lagona e sau mai le Agaga Paia. Ina ua fesili lona tina, “O ai le Agaga Paia?” fai mai o ia, “O se lagona mafanafana o loo i totonu ia te au.” Ua malamalama foi Samu, ina ua ma’i lona uso laitiiti faatoa lua vaiaso le matua, o le Agaga Paia na uunaia o ia e tatalo mo le fesoasoani a le Alii. Pe mafai ea ona e lagonaina le filemu o nei tamaiti?
O le aoaoina o fanau e tele mea e manaomia ai nai lo le na o le manao. E manaomia ai le filiga i la tatou pito laau. Sa ou taua muamua le pese, “Aoao Mai Ia Ou Savali i le Malamalama,” sa tusia e Clara McMaster. Sa ta’u mai e Uso McMaster ia te au, a o galue ai i le au faatonu aoao o le Peraimeri, sa na maua ai se tofiga e tusi se pese e uiga i le aoaoina o tamaiti. Sa matuai faapopoleina lava [o ia] i lenei galuega, o lea sa tatalo ai ina ia iloa pe faapefea ona amata ma faaiuina lenei tofiga.
Ina ua mavae se taumafaiga tele, sa ia tuuina atu loa lana galuega, ae na ta’u atu ia te ia, e le’i sao lelei. E le i ta’uina atu ia te ia pe o le a le mea e sui, ae ia faaauau pea le taumafaiga seia oo lava ina sa’o. Sa matuai vaivai lava o ia faaleagaga i le le iloaina pe faapefea ona toe fai. O lea sa ia toe sailia ai le taitaiga mai le Alii, faia ni suiga, ma tuuina atu foi se isi kopi. E faatolu ona fai lenei faiga, seia oo lava ina ua tau atu ia te ia, ua atoatoa ma ia aua lava nei toe suia se isi mea.
E ui lava ina sa tele taimi na manao ai Uso McMaster e tuu [le tusiaina o le pese], ae sa galue pea o ia ma le filiga i le mea na ta’u atu ia te ia e fai, ma le mea na faamoemoe o le a faamanuiaina ai olaga o tamaiti. O lana musika musuia ua peseina e tagata matutua ma tamaiti i le tele o atunuu ma i le tele o gagana. O lenei pese e faatusa i ai le manao o lo’u loto—ia iloa e fanau uma ona savavali i le malamalama o le talalelei a Iesu Keriso. E amataina lenei pese i se augani a se tamaitiiti, “Aoao mai ia ou iloa lona alofa” ae faaiu i se tautinoga, “Fiafia, fiafia, i le malamalama.”5
E fai sina umi o le taimi ma taumafaiga e aoao ai fanau, ae ia aua nei faalavelaveina pe tatou te fiu foi. E manaomia e a tatou fanau le faataunuuina o le folafolaga “e tele foi le manuia o lau fanau.”6 Ia aua lava nei tuufesili se tamaitiiti pe mata e alofaina o ia e le Tama Faalelagi ma Iesu Keriso. Ia iloa e tamaiti uma pe o ai i latou, pe o a mea e tatau ona latou faia, ma po o le a le ituaiga tagata e mafai ona avea ai i latou.
Ou te faafetai ia i latou uma o e o loo aapa atu i tamaiti, o e alolofa ia i latou ma aoaoina i latou, e tusa lava pe o a o latou tulaga faalelalolagi, e mafai ona latou lagonaina le filemu o le talalelei ma maua ia folafolaga a le Alii.
Ou te fia talanoa faapitoa atu i tamaiti i le lalolagi atoa. Ua ou feiloai atu i nisi o outou iinei, ma nisi o outou i atunuu e pei o Aferika, Filipaina, Korea, ma talu ai nei lava i Ukraine ma Rusia. Sa ou asiasi atu ia te outou i Peraimeri, faapea foi i falemai o tamaiti. Ou te faamoemoe ua outou iloa e alolofa tele o outou aiga ia te outou, o o outou faiaoga o le Peraimeri, ae faapitoa lava, o le Tama Faalelagi ma Iesu Keriso.
Ia e ola agavaa i taimi uma mo avanoa ma faamanuiaga ua ofoina mai e le Atua mo oe. O tulaga e fai ai ou lavalava, lau gagana, ma lau amio o faailoga ia e pito i fafo o lau tautinoga i totonu [o lou loto], e mulimuli i le fuafuaga a le Tama Faalelagi mo oe.
O o’u aafiaga ona o outou, e matuai maoae lava nai lo le mea ua outou iloa. Faafetai mo le fiafia ma le faamoemoe o loo outou aumaia i lo’u loto ma loto o o outou taitai Peraimeri, aemaise lava i o outou matua. Faamolemole ia manatua e faafetai atu ia i latou o e alolofa ma aoaoina outou. Ou te iloa, ma ou te manao ia outou iloa, o oe o se atalii/afafine o le Atua, e alofa le Tama Faalelagi ia te oe, ma e mafai ona e tatalo atu ia te Ia i soo se taimi, i soo se mea. Taumafai i taimi uma e manatua ma mulimuli ia Iesu Keriso ma o lenei mea o le a aumaia ai le malamalama ma le filemu i o outou olaga i le taimi nei, ma tuuina atu ia te outou le faamoemoe mo le faavavau. Ou te molimau atu ai i lenei mea i le suafa o Iesu Keriso, amene.