O Le Mana o le Talai La’u Talalelei

Elder Richard G. Scott

O Le Korama a Aposetolo e Toasefululua

Ou te uunaia outou ina ia sailiili pe faapefea ona fesoasoani lenei punaoa tulaga ese, i au taumafaiga faafaifeautalai.

Ou te matuai faafetai lava ina ua mafai ona tatou talanoaina se polokalama matagofie o le a faafaigofie ai mo i tatou taitoatasi ona faasoa atu i e tatou te alolofa i ai, ma a tatou uo, le savali fiafia o le Toefuataiga o le Ekalesia a Iesu Keriso. Ua faaolaolaina ai mafaufau ma loto o o tatou faifeautalai, aua ua faaauupegaina ai i latou e aoao atu la latou savali ma le mana ma tuuina atu ai molimau i le Alii, o Iesu Keriso ma Lana perofeta o Iosefa Samita e aunoa ma le faatuaoia i se talanoaga ua uma ona tusia. Sa amatalia mo le faaaogaina e faifeautalai faamisiona, ae ua faamaonia foi le aoga tele o lenei tusi mo matua e fia fesoasoani i a latou fanau ia saunia mo se misiona. Ua faaaoga e alii ma tamaitai talavou faapea foi nisi ulugalii e vave amata ai a o lei ulufale atu i nofoaga e aoaoina ai faifeautalai. Ua faamaonia mai foi e nisi taitai perisitua e aoga lava i le sauniaina o uso o le Perisitua Arona mo misiona. O se meafaigaluega taua tele e lagolagoina ai taumafaiga a le au perisitua ma ausilali e fesoasoani ai i uso fou ina ia malolosi atili i a latou molimau ma usiusitai. Ou te tautala e uiga i lenei taiala fou o le Talai La’u Talalelei, ma ona meafaigaluega fesoasoani e fuafua ai, e pei o le Lisi o Fuafuaga a le Faifeautalai i Aso Taitasi.

Se’i ou faasoa atu le mafuaaga ua ou matua naunau ai lava i le Talai La’u Talalelei. Ua patino ai le mea e taula’i atu i ai la tatou taumafaiga faafaifeautalai nai lo le mea sa i ai muamua. E tele tausaga sa ou fesili ai i ni faifeautalai “O le a le faamoemoega o lau misiona?” E matua eseese lava a latou tali. O le toatele lava sa leai se faamoemoega patino e faatulaga lelei a latou taumafaiga. O le itulau 1 o lenei taiala o loo matua taula’i atu ai faifeautalai i lo latou faamoemoega moni: “Valaaulia isi e o mai ia Keriso e ala i le fesoasoani atu ia te i latou ia taliaina le talalelei toefuataiina, e ala i le faatuatua ia Iesu Keriso ma Lana Togiola, salamo, papatisoga, mauaina o le mea foaifua o le Agaga Paia, ma le tumau e oo i le iuga.” O loo fautuaina mai i lona ‘anotusi le auala e faia ai a o taitaiina ai e le Agaga.

O tusi sa faaaoga muamua e faifeautalai, sa aoga foi i na vaitaimi, ae ua matua tele suiga o le lalolagi. O tulaga taua o loo fau ai le faavae o le sosaiete ua osofaia e Satani ma ana ‘au. Ua i ai le tulaga manaomia faanatinati mo se auala e sili atu, e faasoa atu ai le atoaga o le upumoni lea na toe tuu mai e le Atua i le lalolagi. E aofia ai i lena auala se malamalama i le fuafuaga o le fiafia a le Atua, ma le auala na toe faafoi mai ai i le lalolagi e ala mai i Lana perofeta maoae o Iosefa Samita. E faapena foi le Ekalesia a Iesu Keriso ma le pule o le perisitua e galulue ai i Lona suafa, lea ua toe i ai i le lalolagi i lona atoatoa.

Sa aoao mai e Peresitene Hinckley: “Ua tele tausaga sa i ai a tatou lesona faafaifeautalai faatulagaina. E tele foi le aoga sa maua mai ai. … Ae paga lea, o lenei metotia, o le tele lava o ni lesona sa taulotoina, e leai se Agaga ma se talitonuga maumaututu patino. …

“E tatau i [faifeautalai] ona matauina lelei konasepi [concept] o lesona. Ae e tatau ona latou … aoao atu konasepi i a latou lava upu i lalo o le uunaiga a le Agaga Paia.”¹

O lena mataupu o se poutu faavae o le Talai La’u Talalelei. Ua i ai nei i mafaufau ma loto o faifeautalai i le lalolagi atoa le savali o le toefuataiga o le talalelei a Iesu Keriso, o le ata o le faaolataga, o poloaiga faavae, ma tulafono ma sauniga o le talalelei. Ona latou tuuina atu ai lea o nei lesona i a latou lava upu, a o taialaina e le Agaga. O lea tulaga tulimata’i ua matua faaleleia ai le mataalia o faifeautalai o loo faaaogaina.

O le Talai La’u Talalelei, o loo i ai mataupu e i ai faamatalaga e matua taua lava i le auala e iloa ai ma malamalama i le taitaiga a le Agaga Paia. O loo i ai mau i le auala e suesue lelei ai ma auala foi e faaleleia atili ai tomai patino e aoao atu ai. O le isi mataupu o loo faamalamalama ai le mafuaaga ua avea ai le Tusi a Mamona ma maa ‘au’au o la tatou tapuaiga; le auala e mafai ai ona talia fesili loloto o le agaga; ma le auala e mafai ai ona fausia le faatuatua ma fesoasoani i isi e faalatalata atili atu ai i le Atua. O loo faaalia ai foi i faatonuga faaopoopo le auala e avea ai le Tusi a Mamona ma punaoa vaaia, e mafai e se tagata ona faaaoga e faamaonia ai le moni o la tatou savali. E aoaoina se faifeautalai i le auala e sailia ai uiga faaKeriso e pei o le faamoemoe, ma le alofa, aua o le alofa o le faavae lea o galuega uma faafaifeautalai ‘anoa. O loo i ai foi fautuaga maoae mo le aoaoina o se gagana o le misiona. Ua saunia atu ai meafaigaluega manino, ma aoga e fuafua ai, e fesoasoani ai i se faifeautalai e faaaoga tatau le taimi. Ua faasoa atu ai foi metotia ua faamaonia, e iloa ai ma saunia tagata e aoaoina. O loo tuuina atu ai foi le taiala faatino, e fesoasoani ai i tagata taitoatasi e faia ma tausisia ia tautinoga e i’u ai i le papatisoga, faamauga, ma le faatumauina i le Ekalesia. O lenei taiala, ua i ai meafaigaluega e tuufaatasia ai taumafaiga a faifeautalai faamisiona, o taitai o siteki ma uarota, ma le au paia. Faatasi ai ma lena fesoasoani, o le a tele atu uso fou e mafai ona faia se suiga e sili atu ona mautu agai i le auaiga tele o le Ekalesia. Ua sili atu ona mautinoa, o i latou ua tauaveina i o latou luga le suafa o Iesu Keriso e ala i le papatisoga ma le faamauga, ma ua tautino atu e usitai i Ana poloaiga, o le a mauaina Ana faamanuiaga folafolaina i le olaga atoa.

O le faaaogaina o anotusi musuia o le Talai La’u Talalelei, ua toatele ai faifeautalai ua iloga le alualu i luma o lo latou malosi e aoao atu ai ma le talitonuga maumaututu, ma valaaulia ai le molimau faamautinoa a le Agaga Paia. Talu ai nei, sa ou fesili ai i ni fesoasoani se toalua o se peresitene o se misiona e faasoa mai le faaaliga ia Iosefa Samita, a o ou faafoliga o se tagata sailiili. Sa ou fuafuaina ou te matuai lu’iina lava i la’ua ina ia iloa ai pe o le a faapefea ona la tali mai. Peitai, o le faamaoni a’ia’i o la la’ua savali, o le mama o lo la’ua faamoemoega, o le tomai na faamatala mai ai, e ui lava ua na o se talanoaga faata’ita’i, ae sa matua mamana lava ma sa le mafai ai ona ou faia [le mea sa ou fuafua e fai]. E mafai foi ona outou vaaia lenei faiga ua sili atu.

Valaaulia faifeautalai e tuuina atu le uluai lesona i lo outou aiga i lo outou fale. Ae sili atu i lo lena, ia valaaulia tuaoi e o ane i lo outou fale e aoao ai e faifeautalai. O le a latou faamatalaina i a latou lava upu a o taialaina ai e le Agaga, pe na faapefea ona faaaoga e le Tama i le Lagi ia perofeta i le talafaasolopito o le lalolagi, e ta’u mai ai Lana fuafuaga o le fiafia i Ana fanau. Ia lagonaina a latou molimau a o latou molimau mai i le faaaliga paia lea na faaali atu ai le Atua le Tama ma Lona Alo o Iesu Keriso ia Iosefa Samita. O le a latou tatalaina mai ma le tomai, ia mea taitasi na tutupu na toefuatai mai ai le atoaga o le talalelei faatasi ai ma le pule e toe galulue ai i le suafa o le Atua i le lalolagi. E mafai foi ona e mafuta atu ma faifeautalai a o latou aoaoina isi i nei upumoni musuia. O lou i ai, o le a matua faamalosia ai foi i latou e faalogologo i nei upumoni taua mo le uluai taimi.

O se taumafaiga maoae a le Au Peresitene Sili, o le Korama a le Toasefululua, ma isi Au Pulega Aoao ma le aufaigaluega maelega, ma le poto masani, sa gaosia ai le Talai La’u Talalelei ma ona meafaigaluega e fuafua ai. O i latou sa auai i le faatinoina o lona gaosiga, o ni molimau o le taitaiga musuia a le Alii e ala mai i le Agaga Paia i le faavaeina, faaupuina, ma le faamae’aina o le anotusi o le Talai La’u Talalelei.

Ina ua mae’a se faataitaiga tele i misiona e 14, sa toefetuunai le Talai La’u Talalelei. Sa toe iloiloina, ma suia, ma faamaonia e le Au Peresitene Sili ma le Korama a le Toasefululua ni mea sa manaomia. I le aso 15 o Oketopa, 2004 sa faia ai se faasalalauga i le satelite i le lalolagi atoa, e faailoa atu ai i peresitene o misiona ma taitai o faifeautalai le Talai La’u Talalelei. Sa tuuina atu i faifeautalai uma i le lalolagi atoa se kopi faaPeretania. E ui ina toatele e le tautatala i le faaPeretania, ae sa latou lagona o i latou o se vaega ua toe faafou o le taumafaiga faafaifeautalai. E uiga ese foi aua o nisi o faifeautalai o isi gagana, ua uunaia e aoao le faaPeretania. I le amataga o le tausaga nei, sa tufatufaina ai kopi faa-Iapani, Korea, Sipaniolo ma le Potukale o le Talai La’u Talalelei. Matou te faamoemoe e oo atu i le faaiuga o le tausaga, ua avanoa lenei taiala mo le tele o gagana e tautatala ai faifeautalai.

E le na o faifeautalai e manuia i le Talai La’u Talalelei.

Sa suesue e se faletua o se tasi o peresitene o misiona ma mafaufau loloto i upu taitasi o le Talai La’u Talalelei, e aofia ai ma mau uma o loo faasino i ai. Ona ia faia lea o se mea sa le mafai ona ia faia—sa ia valaaulia se tagata o lona aiga e suesue, ma mafaufau loloto i le Tusi a Mamona. Sa talia e lena tagata lana valaaulia ma ua matua faamanuiaina ai lava o ia.
O loo faaaoga e se tasi aiga le Talai La’u Talalelei e fesoasoani ai e sauniuni a latou fanau mo misiona. Na la faamatala maia: “O le ma tama e 17 tausaga le matua, na muamua tofi. E pei lava ona matou manatu ai, sa ia su’eina le vaega aupito puupuu i le tusi. Peitai, o lana lesona, e 20 minute o mataupu faavae, faatasi ai ma mau ma se molimau, na matua oo ifo i le loto.”
Mai i se tamā o loo sauniuni lona atalii mo le galuega faafaifeautalai: “O le Talai La’u Talalelei … ua ou maua ai se vaaiga ma se malamalama manino i le faamoemoega o le olaga, o o’u tiute ma matafaioi o se tagata o le Ekalesia, o se tamā ma se tane. Ua ou maua ai foi ni meafaigaluega patino e faataunuu ai na tiutetauave.” O le aso ananafi na valaauina ai lona atalii e avea ma se faifeautalai.

Ua tele mea aoga ua faataunuuina i le fitu masina talu ona faaaoga le Talai La’u Talalelei, ae o le a tula’i mai mea silisili pe a tatou taufai maua uma le tomai e faaaoga ai lenei meafaigaluega faafaifeautalai tulaga ese.

Ou te uunaia outou ina ia faaaoga nei tusi i a outou fonotaga faale-au peresitene, komiti faapitoa a le perisitua, ma aufono a uarota ina ia mautinoa, ua maua e i latou ua osia feagaiga o le papatisoga ia faamanuiaga atoatoa i o latou olaga, o le avea ai ma tagata o le Ekalesia. O le faaaogaina o le Faamaumauga fou o le Alualu i Luma mo tagata taitoatasi e sauniuni ai mo le papatisoga, e mafai ai ona faamaopoopoina ma le mamana taumafaiga a faifeautalai ma uso o le au paia. Ou te talitonu, o le a toatele atu tagata faatoa liliu mai o le a sili atu ona faigofie ona faataunuu o latou manaoga ia tumau le toaaga mai, pe a galulue faatasi le au paia ma faifeautalai ma faaaoga ai mataupu faavae o i le Talai La’u Talalelei.

O le savali a le Au Peresitene Sili o i ai i le Talai La’u Talalelei, e maua ai se uunaiga tele mo faifeautalai. Atonu foi o le a uuna’ia ai oe i au lava taumafaiga faafaifeautalai. O loo tusia faapea: E leai se isi galuega e sili ona malosi le uunaiga nai lo lenei, … O le Talai La’u Talalelei ua faamoemoe e fesoasoani ia te oe ina ia avea ma se faifeautalai sili ona saunia lelei, ma sili atu ona matua i le faaleagaga ma sili atu ona avea ma se faiaoga e tosina [mai ai]. … Matou te tuuina atu se lu’i ia te oe ina ia e tali atu i se lagona fou o le tautinoga ina ia lagolago atu i lo tatou Tama o i le Lagi i Lana galuega mamalu. … O le a tauia ma matuai faamanuiaina oe e le Alii, a o e auauna atu ma le faamaulalo ma le agaga tatalo ia te Ia.”²

Pe ua mafai ona e pu’eina se vaaiga mamao [i lenei polokalama]? O le a e sagisagi fiafia foi e pei o a’u, pe a e amataina i lou lava olaga ona malamalama ma faaaoga lenei meafaigaluega faafaifeautalai. E le pei o risosi muamua a faifeautalai faamisiona, o le Talai La’u Talalelei e soo se taitai po o se tagata o le au paia e mafai ona maua mai [lenei taiala] mai le faletusi o le Ekalesia.

Atonu o le faamanuiaga silisili o le Talai La’u Talalelei, o le a vaaia lea i olaga o faifeautalai ua mae’a misiona, o le a avea ma matua malolosi, ma taitai e sili atu ona tomai o le Ekalesia, ma tagata faigaluega e sili atu ona o lo latou tuputupu a’e e maua mai i le malamalama ma le faaaogaina o ona anotusi musuia.

E avea a’u ma sui o o tatou faifeautalai i le lalolagi atoa, e momoli atu ai la matou faafetai tele ia i latou uma sa auai i le saunia, lolomiina ma le tufatufaina o le Talai La’u Talalelei. Matou te faafetai atu i peresitene o misiona taitasi, o e ua i ai le tomai e faaaoga lelei ai. Ae sili ai ona tatou faafetai i le Alii mo Ana musumusuga. Ou te uunaia outou ina ia sailiili pe faapefea ona fesoasoani lenei punaoa tulaga ese, i au taumafaiga faafaifeautalai i le avea ai o se matua o loo saunia se tamaitiiti mo se misiona, po o se taitai o le Ekalesia o loo fesoasoani i se tagata faatoa liliu mai, po o se tagata o le au paia o loo faasoa atu le talalelei, po o se tagata foi o sauniuni e auauna atu. Ia faamanuiaina outou e le Faaola ma musuia outou a o outou galulue ai, aua o loo soifua o Ia. I le suafa o Iesu Keriso, amene.