Talisapaiaina o Fautuaga a i Latou O E Ua Loa o Latou Soifua

Elder Stephen B. Oveson

O Le Au Fitugafulu

Ia tatou maua se malamalamaaga faaopoopo, ma talisapaia atili ai le mana o molimau, aemaise lava a o tuuina mai e i latou ua maoae lo [latou] poto ma ua loa lo latou soifua.

Ou uso e ma tuafafine pele, a o tatou sauniuni atu e faalogologo i le saunoaga faaiu a Peresitene Gordon B. Hinckley i le faaiuga o lenei konafesi aoao ofoofogia, o le faamoemoe maualuga ia te au, ia mafai e i tatou taitoatasi ona lagonaina le faamanuiaina o i tatou, i le maua mai i o tatou perofeta ma aposetolo a le Alii, o le poto ma apoapoaiga, afai tatou te faalogo ma mulimuli ai, o le a fesoasoani e taitaiina i tatou ia latalata atili atu i lo tatou Faaola. E tatau ona faapitoa lo tatou agaga faafetai ona o le [tatou] ola ai i se vaitaimi o loo faaauau pea ona maua e o tatou taitai o le Ekalesia, e ui o le toatele ua loa o latou soifua, ia faaaliga ma musumusuga lea e tulei ai i luma le malo [o le Atua] mai lea aso i lea aso.

A o ou talavou, sa tuuina mai ia te au se apoapoaiga tusitusia malosi ina ia ou faamaonia o au o se atalii faamaoni ma usiusitai, ma a faasolo ina ou matua, soo se taimi lava ou te manaomia ai se lapataiga ma se fautuaga, e tatau ona ou alu atu i ou matua, e ui ina “matutua”, ina ia maua mai ia i la’ua le poto, faamafanafanaga, ma le taitaiga. Ua 20 tausaga ua mavae talu ona maliu lo’u tama, ua avea ma puna o faataitaiga sili o le poto mo au i aso uma o lou olaga, ma o le Aso Gafua faatoa mavae atu na matou falelauasi ai lo’u tina ua 101 tausaga o lona soifua, i tafatafa o lana soa e faavavau. O le lona 100 o tausaga o lona soifua, sa ia faamauina ai lana molimau o le olaga atoa i upu nei: “O le talalelei o se ituaiga sitaili o le olaga; o le vaega o le fuafuaga e fesoasoani ai ia i tatou e aloese ai mai mea tiga. Aemaise lava, ou te talitonu o lenei olaga e lelei, ae o le olaga a sau o le a sili atu” (“Growing Old Graciously: Lessons from a Centenarian,” Religious Educator 5, no. 1 [2004]: 11).

E masani ona ta’u mai e lo’u tina ia te au, e tatalo lava i aso uma mo au ma le matou aiga. Ina ua lata ina maliu o ia, o ana tatalo sa faapitoa ona faatauanau ma aoga ia te au. O o’u matua faapea foi ma matua pele o lo’u toalua, sa tumau pe o loo tumau seia oo i le iuga i ala amiotonu, ua tuua ai se talatuu o le tautinoga faamaoni mo a latou fanau e mulimuli ai.

O le saunoaga a Peresitene Ezra Taft Benson, na sii mai i le Liahona o Ianuari 1990, e faapenei: “Ua silafia ma alofa le Alii i tagata matutua o Lona nuu. Sa faapea lava, ma ua Ia tuuina mai ia i latou le tele o Ana tiute tetele. I tisipenisione eseese, sa Ia taitaia Lona nuu e ala i perofeta ua pulapula lagoto le soifua. Sa Ia manaomia le atamai ma le poto masani o tagata matutua, le taitaiga musuia mai ia i latou, o e e tele tausaga na faamaonia ai lo latou faamaoni i Lana talalelei” (“To the Elderly in the Church,” 4).

O nei manatu na mafua ai ona ou tomanatu i aoaoga, faamanuiaga, molimau ma apoapoaiga maoae na tuua e perofeta ma Aposetolo i le tele o tausaga, aemaise lava lo latou lagonaina o lo latou “matutua” pe ua sauniuni foi e “o ifo i le eleele.” O nisi o nei upu mulimuli ua i ai faatasi ma a tatou mau matagofie e ta’ua soo. Mo se faataitaiga: i le Mose 6:57 o loo faamanino mai ai e Enoka, “O lea, ia e aoao atu i lau fanau, e ao ina salamo, tagata uma lava, a le o lea, e le mafai ona latou maua le malo o le Atua, aua e le mafai ona i ai se mea le mama … i lona malo.” Sa aoaoina nei mataupu faavae autu o le talalelei mai le taimi o Atamu ma Eva, sa tuufaasolo mai i lea tupulaga i lea tupulaga, e pei ona faamaonia ma saga faamaonia mai e tusitusiga paia.

Sa tuua e Iosefa sa faatauina i Aikupito ia lapataiga nei i le fanauga a Isaraelu: “[Ou te] oti: a o le Atua e asiasi mai lava o ia ia te outou, ma aveina ae outou ai le nuu nei i le nuu na tauto ai o ia ia Aperaamo, ma Isaako, atoa ma Iakopo” (Kenese 50:24).

O tupulaga mulimuli ane, ina ua latalata ina faataunuuina le valoaga a Iosefa, na tuua ai e Mose lana faamanuiaga i ituaiga uma o Isaraelu ma tuufaasolo atu le matafaioi o le avea ma taitai ia Iosua, o le na taitaiina atu le nuu i le nuu o le folafolaga. Ina ua lata ina maliu o ia, na tuua e Iosua ana upu e faavavau ina ia “filifili ia o outou i le aso nei po o ai tou te auauna i ai; … a o au nei ma lo’u aiga, matou te auauna ia Ieova” (Iosua 24:15).

O perofeta mulimuli ane, e pei o Ieremia, Isaia, ma Malaki, sa [latou] tuua foi ni molimau e tutusa lava le le faagaloina, i le taimi o a latou galuega, i le valoiaina o le afio mai o le Mesia ma Lana Togiola e le iu.

Tatou te maua foi se mamanu faapena i le Tusi Mamona atoa, i le faamamafaga na tuuina atu i lauga faaiu a Nifae, Iakopo, ma le Tupu o Peniamina—o a latou aoaoga mamana na liua ai loto o le nuu atoa—ae le ta’ua ai upu matagofie a Apinati, o le na tautala atu ma le toa ma le iloaina lelei e le toe umi ni aso e ola ai, “Ia aoao atu ia te i latou e oo mai le togiola ona o Keriso le Alii; o ia lava o le Tama Faavavau” (Mosaea 16:15). E faaauau le lisi ia Alema ma lona atalii o Alema, faapea foi Helamana, le atalii o Helamana, o le na tuuina atu ni fautuaga taua i ona atalii: “O lenei ou atalii e, ia manatua, ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua … o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou” (Helamana 5:12).

O i latou nei ma isi perofeta o le Tusi a Mamona, e aofia ai Mamona lava ia, sa tusia mo o tatou aso, i le silafiaina o le a tatou manaomia lo latou poto ma le atamai, e fesoasoani ai ia i tatou i nei taimi faigata. O le Tusi a Mamona lava ia, e faaiuina i le poloaiga e le mafaatusalia a Moronae, le atalii o Mamona, ao ia ta’u mai ia i tatou: “Ioe, o mai ia ia Keriso, ina ia faaatoatoaina outou e ia, ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea o lona alofa tunoa mo outou” (Moronae 10:32).

Tatou te maua foi ni “molimau faaiu” faapena i le Feagaiga Tuai, e pei o upu maoae a Paulo: “Ua ou tau le taua lelei, ua iu ia te au le tausinioga, ua ou taofi i le upu o le faatuatua” (2 Timoteo 4:7) ua faamaonia ai lona tumau e oo i le iuga.

Ua tatou maua ni aoaoga se tele i le tuputupu ae o le Aposetolo sinia ma le malosi o Peteru, i ana upu, “… ia oofu outou i le loto maulalo: aua e tetee atu le Atua i e faamaualuga, ae foaiina mai le alofa tunoa i e faamaulalo. O le mea lea, ia faamaulalo ai outou i lalo o le aao malosi o le Atua, ina ia faamaualuga outou e ia i ona po e tatau ai” (1 Peteru 5:5–6).

Ma o le mea moni, o le tagata aupito sili o taimi uma lava e aoao mai ai, o le Alii toetu lava Ia, e pei ona ia poloaiina Ana Aposetolo ma e na mulimuli ia te [Ia] ina “ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia: ia outou aoao atu ia te i latou, ia tausi i mea uma ua ou fai atu ai ia te outou: faauta foi, ou te ia te outou i aso uma lava, e oo lava i le gataaga o le lalolagi” (Mataio 28:19–20).

Se anoanoai o talitonuga ma le poto ua tuuina mai e nei mau uma ia i tatou. E mafai ona tatou maua ni manatu musuia iloga i nei mau taitasi? Ou te talitonu, e faigofie lava ona iloa:

• O loo soifua Keriso, o le Alo o le Atua, ma o lo tatou Togiola ma le Faaola.

• E tatau ona tatou mulimuli ia te Ia ma faaali atu lo tatou alolofa ia te Ia, e ala i le manatuaina o Ia ma tausia ma le lotomaualalo Ana poloaiga.

• E ala mai i Lana Togiola, ua mafai ai ona tatou salamo ma faamamaina.

• I tatou o Lona nuu o le feagaiga ma e tatau ona [tatou] tausia i taimi uma ia feagaiga ua tatou osia.

• E tatau ona tatou talai atu Lana talalelei i le lalolagi atoa.

• E tatau ona tatou faatuatua, salamo, ma ia papatisoina, maua le Agaga Paia, ma tumau seia oo i le iuga.

I lo tatou tisipenisione, ua faafia ona tau mai e perofeta o aso nei o le Toefuataiga ia nei lava mataupu faavae. I aoaoga a Peresitene Ioane Teila, ua tatou aoao ai “i le avea ai ma Atalii o le Tagata, na Ia onosaia mea uma e mafai ona onosaia i le tino ma le toto; o le avea ai ma Alo o le Atua, na Ia manumalo ai i mea uma, ma ua afio ai e faavavau i le itu taumatau o le Atua” (Teachings of Presidents of the Church: John Taylor [2001], 44).

O se tasi o upusii e sili ona ou fiafia i ai mai ia Peresitene Spencer W. Kimball:

“E faaopoopo atu la’u lava molimau—i molimau a nei alii maoae ma aposetolo o anamua—o o tatou uso i le galuega a le Matai e tasi. Ou te iloa o Iesu Keriso o le Alo o le Atua soifua, ma sa faasatauroina o ia ona o agasala a le lalolagi.

“O Ia o la’u uo, o lo’u Faaola, o lo’u Alii, o lo’u Atua.

Ou te tatalo ma lo’u loto atoa, ina ia mafai ona … maua e le Au Paia se tofi e faavavau faatasi ma Ia i le malo selesitila” (“An Eternal Hope in Christ,” Ensign, Nov. 1978, 73).

O loo faaauau pea e lo tatou perofeta o aso nei o Peresitene Gordon B. Hinckley, ona taitaia i tatou i ana tautinoga mamana, e pei ona ia folafola mai i [sana] saunoaga lata mai nei i se konafesi faalesiteki: “E i ai sau molimau, e moni, e mumu pea, ma e taua, i le moni o lenei galuega. Ou te iloa o loo soifua le Atua o lo tatou Tama e Faavavau, ma o Iesu o le Keriso, o lo’u Faaola ma lo’u Togiola. O Ia o le ao o lenei Ekalesia. Na o le pau le mea ou te manao ai, ia ou alualu pea i luma faatasi ma lenei galuega e pei ona Ia finagalo ai e agai i luma” (O Mafaufauga Musuia, Liahona, Oke. 2003, 5 ).

I le otootoina o molimau a Aposetolo ma perofeta uma o anamua ma aso nei, ua tatou maua ai upu e faavavau a le Perofeta o Iosefa Samita, o le na tautino mai:

“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!

“Aua na ma vaai ia te ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama” (MFF 76:22–23).

Ou te fia faaopoopo atu la’u lava tautinoga faamaulalo i le moni o molimau e pei ona ta’ua muamua. Ou te iloa o lo tatou Tama Faalelagi o le Tama moni o o tatou agaga ma o Iesu Keriso o lo tatou Faaola, o lo tatou Togiola, o lo tatou Alii, ma a tatou usitai i Ana poloaiga, o Ia o la tatou Uo (tagai Ioane 15:14). A tatou suesue i tusitusiga paia, tau ina ia tatou maua ai se malamalamaaga faaopoopo, ma talisapaia atili ai le mana o molimau, aemaise lava a o tuuina mai e i latou ua maoae lo [latou] poto ma ua loa o latou soifua, o la’u tatalo lea i le suafa o Iesu Keriso, amene.