O Mea Sili Ua Faaalia Mai e le Atua
O luga o le faavae mautu o le valaauga paia o le Perofeta o Iosefa ma faaaliga mai le Atua, ia na aumai e ala mai ia te ia, tatou te agai ai i luma.
O’u uso e ma tuafafine, e pei ona faamanatu mai ia te i tatou, o le a faamanatuina ia Tesema a sau nei le lona 200 o tausaga o le soifua mai o le Perofeta o Iosefa Samita. O le taimi nei, e tele mea o le a tula’i mai i le faamanatuga o lenei aso taua.
O le a lolomiina tusi, o le a faia mafutaga e fefaasoaai ai manatu o le au atamamai, o faaaliga, o se ata gaoioi fou, ma le anoanoai o isi mea.
O lea faamoemoe, ua ou lagona ai, i le avea ai ma le lona 15 [o peresitene o le Ekalesia], mai le tumutumuga o mea ua ia faataunuuina, e tuuina atu la’u molimau o lona valaauga paia.
O loo ou uuina se tusi laitiiti taua lava. Sa lolomiina i Livapulu, i Egelani, e Orson Pratt i le 1853, ua 152 nei tausaga talu ai. O le faamatalaga a Lucy Mack Samita o le olaga a lana tama.
O loo auiliiliina ai talanoaga eseese a Iosefa ma le agelu o Moronae ma le oo mai o le Tusi a Mamona.
O loo faamatala mai e le tusi, ina ua latou faalogo i feiloaiga a Iosefa ma le agelu, sa fautuaina loa e lona uso o Alavina ia faapotopoto faatasi le aiga, ae faalogologo atu ia te ia [Iosefa] ao ia auliiliina mai “mea sili ua faaalia mai e le Atua ia te oe” (Biographical Sketches of Joseph Smith the Prophet and His Progenitors of Many Generations [1853], 84).
Ua ou faaaogaina lena faaupuga e fai ma autu o la’u lauga—o mea sili ua faaalia mai e le Atua e ala mai ia Iosefa le Perofeta. O le a ou ta’ua na o ni nai aoaoga faavae o le anoano ma faiga e ese ai i tatou mai isi ekalesia uma, ma o nei mea uma na oo mai i faaaliga i le Perofeta taulealea. Ua outou masani ai, ae e aoga le toe ta’u atu ma mafaufau i ai.
O le mea muamua, o le faailoa mai o le Atua lava Ia ma Lona Alo Pele, le Alii toetu o Iesu Keriso. O lenei faaali mai o le Atua, i la’u lava faamasinoga, o le mea aupito sili lea ua tupu talu le fanau mai, soifua, maliu ma le Toetu o lo tatou Alii i le vaeluaga o taimi.
E leai ni a tatou faamaumauga o se isi lava mea e tusa ma lena mea.
E tele seneturi sa faapotopoto ai tagata ma finau i le natura o le Atua. Sa faapotopoto e Kosetatino ni tagata atamamai o vaega toalaiti eseese i Nicaea i le tausaga e 325. Ina ua mae’a masina e lua o felafolafoa’iga malolosi, sa latou fetuutuuna’ia ai se faaiuga, lea ua augatupulagā o avea ma faamatalaga faavae i le au Kerisiano e faatatau i le Aigaatua.
Ou te valaaulia outou e faitau i lena faauigaga ma faatusatusa i le faamatalaga a le taulealea o Iosefa. Sa na ona ia fai mai sa tu atu le Atua i ona luma ma talanoa atu ia te ia. Sa mafai ona vaai Iosefa ia te Ia ma faalogo atu ia te Ia. O Ona foliga e pei lava o se tagata, o se tagata o aano ma ivi. Sa i Ona autafa le Alii toetu, e ese foi lona tagata, lea sa Ia faailoa mai o Lona Alo Pele lea sa talanoa ai foi Iosefa.
Ou te talitonu i lena taimi puupuu o le faaaliga vaaia ofoofogia, e tele atu mea sa aoaoina ai e Iosefa e faatatau i le Atua nai lo isi sikola uma ma faifeau o aso anamua.
I lenei faaaliga vaaia paia, sa toe faamautinoa ai le moni o le Toetu o le Alii o Iesu Keriso.
O lenei malamalama e uiga i le Atua, sa natia mai le lalolagi mo le tele o seneturi, o le uluai mea lea ma le silisili sa faaalia e le Atua i Lana auauna filifilia.
Ma o luga o le moni ma upumoni o lenei faaaliga vaaia, o loo taoto ai le malosiaga O Le Ekalesia a Iesu Keriso o le Au Paia o Aso e Gata Ai.
O le a ou tautala atu i le isi mea na sosoo ai lea foi sa faaalia mai e le Atua.
E talia e le lalolagi Kerisiano le Tusi Paia o le afioga a le Atua. O le toatele lava latou te le iloa pe na faapefea ona oo mai.
Faatoa uma lava ona ou faitauina se tusi fou faatoa lomia e se sikola lauiloa. E manino mai faamatalaga o loo ia tuuina mai, o tusi eseese o le Tusi Paia sa tuufaatasi i se faiga e foliga mai e lei faatulagaina lelei. O nisi mea, e le i maua ia tusitusiga sei vagana ina ua leva ona tuanai mea ia na faamatala. O lena tulaga atonu tatou te fesili ai, “Pe moni ea le Tusi Paia? Pe o se afioga moni ea a le Atua?”
Tatou te tali atu, e moni pe afai e sa’o lona faaliliuina. Sa i ai le aao o le Alii i lona faiga. Peitai, ua le o toe tu nei na o ia. O loo i ai se isi molimau o le taua o upumoni o loo maua ai.
O loo ta’u mai i tusitusiga paia “e mautu upu uma i le mau a le toalua po o le toatolu” (2 Korinito 13:1).
Ua oo mai le Tusi a Mamona i le mea foaifua ma le mana o le Atua. E tautala mai e pei o se leo mai le efuefu e molimau i le Alo o le Atua. E tautala mai e uiga i Lona soifua mai, o Lana misiona, o Lona Faasatauroga ma le Toetu, ma Lona afio atu i le au amiotonu i le laueleele o Nuumau i le konetineta o Amerika.
O se mea faitino e mafai ona taulimaina, e mafai ona faitau i ai, e mafai ona tofotofoina. O loo tauaveina i totonu o ona faavaa se folafolaga o lona amataga paia. Ua faitau miliona i latou ua tofotofoina le folafolaga [o loo aumai ai], ma ua iloa ai o se tusi moni ma le paia.
Sa ta’ua e i latou e le auai i lo tatou faatuatuaga, o se tasi lea o tusi e 20 ua lolomiina i Amerika, ua matua tele le aafia ai o i latou ua faitau i ai.
E faapei ona avea le Tusi Paia ma molimau o le Lalolagi Tuai, e faapena foi le Tusi a Mamona o le molimau o le [Lalolagi Fou]. E o faatasi lava i le tautinoina atu o Iesu o le Alo o le Tama.
I tausaga lava ia e 10 na mavae atu nei, e 51 miliona kopi na tufatufa ai. Ua 106 nei gagana ua maua ai.
O lenei tusi paia, lea na oo mai o se faaaliga o le Silisili Ese, e moni lava o se isi molimau i le paia o lo tatou Alii.
Ou te manatu ua tatau ona aapa atu le lalolagi atoa o Kerisiano ma faafeiloai ma talia e avea o se molimau olaola. O se faailoga foi lea o se sāo tele lea na oo mai, o se faaaliga i le Perofeta.
O le isi o le perisitua lea na toefuataiina mai. O le perisitua o le pule e galue ai i le suafa o le Atua. O lena pule o le maa ‘au’au lea o la tatou tapuaiga. Sa ou faitauina talu ai nei foi se isi tusi. O loo ta’ua ai le Liliuese o le Ekalesia anamua. Afai na leiloa le pule o lena Ekalesia, na faapefea la ona toefuatai mai?
O le pule o le perisitua e mai le nofoaga e tasi lea e mafai ona aumai ai, o le lagi lea. Sa faaeeina mai e aao o i latou sa umia a o soifua le Faaola i le lalolagi.
Muamua, o Ioane le Papatiso lea sa tuuina mai le perisitua Arona, po o le perisitua maualalo. Sa sosoo ai ma le asiasiga mai a Peteru, Iakopo, ma Ioane, o Aposetolo a le Alii o Iesu Keriso, ia na faaeeina atu i luga o Iosefa ma Oliva Kaotui le Perisitua Mekisateko, lea sa mauaina e nei Aposetolo mai aao o le Alii lava Ia a o soifua sa Ia fetalai ai,
“Ou te avatu ia te oe ki o le malo o le lagi; o se mea foi e te fusifusia i le lalolagi, e fusifusia foi lea i le lagi; o se mea foi e te tala i le lalolagi, e tatalaina foi lea i le lagi” (Mataio 16:19).
E maeu le matagofie o le mamanu o le toefuataiga lea na oo atu ai i le faatulagaga o le Ekalesia i le tausaga e 1830, ua atoa i le vaiaso nei le 175 tausaga talu ai. O le igoa tonu o le Ekalesia sa oo mai i se faaaliga. O le Ekalesia a ai? Pe o Iosefa Samita ea? Pe o Oliva Kaotui? E leai, o le Ekalesia a Iesu Keriso sa toefuatai mai i le lalolagi i aso nei e gata ai.
O le isi faaaliga sili ma le uiga ese na tuuina atu i le Perofeta o le fuafuaga mo le ola e faavavau o le aiga.
O le aiga o se foafoaga a le Silisili Ese. O le faailoga vaaia o sootaga e aupito sili ona paia. O le faailoga vaaia o aafiaga aupito taua. O le faalapotopotoga faavae o sosaiete.
O faaaliga a le Atua i Lana Perofeta na oo mai ai aoaoga faavae ma le pule o loo faamauina ai faatasi aiga, e le gata mo le olaga nei ae mo le faavavau atoa foi.
Ou te manatu afai e mafai ona tatou aoao faalelei atu le aoaoga faavae lenei, o le a tosina mai i ai le faitau miliona o tane ma ava, o ē fealofani ma alolofa foi i a latou fanau, ae o a latou faaipoipoga ua na ona aoga “seia tatala e le oti.”
O le lotomama o tamaiti laiti, o se tasi lea o faaaliga na tuuina atu e le Atua e ala i le Perofeta o Iosefa. O le faiga masani, o le papatisoga o pepe e aveese ai aafiaga o le mea ua faamatalaina faapea o le agasala a Atamu ma Eva. I lalo o le aoaoga faavae o le Toefuataiga, o le papatisoga e mo le aveeseina o agasala a le tagata lava ia. E avea ma se feagaiga i le va o le Atua ma le tagata. E faia i le vaitausaga ua mafai ai ona tali atu le tagata mo ia lava, pe a lava le matutua o tagata latou te iloa ai le sa’o mai le sese. E faia i le faatofuina, o se faatusa o le maliu ma le tanuga o Iesu Keriso ma Lona Toetu mai.
O le a ou toe ta’ua se isi upumoni ua faaalia mai.
Ua tatou iloa e le faailoga tagata le Atua, ae e leai se isi ekalesia ua ou iloa e i ai se fuafuaga e faia mo i latou ua maliliu, ina ia maua faamanuiaga uma e maua e i latou o ola. O le aoaoga faavae sili o le faaolataga o e ua maliliu, e tulaga ese i lenei Ekalesia.
E mita’i e tagata ua “faaolaina” i latou, ae latou te toe tautino foi e le i mafai ona faaolaina o latou augatuaa.
O le Togiola a Iesu mo tagata uma o se faailoga vaaia lea o se taulaga sili e fai ma sui. Sa ia faatuina le mamanu lea na avea ai o Ia ma se tasi e sui i tagata uma. O le mamanu lea e mafai ai e se tagata e toatasi ona avea ma sui o se isi tagata, o loo faataunuuina lea i sauniga i le maota o le Alii. O iina tatou te auauna atu ai e fai ma sui o i latou ua maliliu e aunoa ma so latou malamalama i le talalelei. O la latou matafaioi o le talia pe teena foi le sauniga ua uma ona faia. E tuu i latou i se tulaga e tutusa lelei ai lava ma i latou o loo soifua i le lalolagi. E tuuina atu foi i e ua oti le avanoa lava e tasi e pei o e o ola. E maeu le mamalu ma le matagofie o lenei tulaga ua faia e le Silisili Ese e ala i Lana faaaliga i Lana Perofeta.
Ua faaalia mai le natura e faavavau o le tagata. O i tatou o atalii ma afafine o le Atua. O le Atua o le Tama lea o o tatou agaga. Sa tatou ola ae tatou te lei o mai iinei. Sa i ai o tatou uiga faaletagata. Sa tatou fananau mai i lenei olaga i lalo o se fuafuaga paia. Ua tatou i ai iinei e tofotofoina ai lo tatou agavaa, ma faaaoga lo tatou saolotoga sa tuuina mai e le Atua mo i tatou. A tatou oti, o le a tatou ola pea lava. E tolu vaega o lo tatou ola e faavavau: muamua, o lo tatou muai olaga; lua, o lo tatou olaga faitino; ma le tolu, o lo tatou olaga pe a mavae le oti. O le oti, tatou te oti i lenei lalolagi ma laa atu ai i le isi itu o le veli, i se lalolagi ua tatou agavaa e ulufale atu i ai. O lenei foi mea, o se aoaoga faavae taua, e tulaga ese, ma ofoofogia a lenei Ekalesia, lea na oo mai e ala mai i se faaaliga.
Ou te ofoina atu lenei aotelega puupuu o le liligiina mai o le malamalama maoae ma le pule mai le Atua i luga o le ao o Lana Perofeta. Pe ana faapea e tele atu so tatou taimi, semanu ua ou ta’ua isi mea. Toe tasi lava lea e tatau ona ou ta’ua. O le mataupu faavae lea o faaaliga i ona po nei. O le mataupu faavae o le faatuatua na tusia e le Perofeta o loo ta’u mai ai,
“Matou te talitonu i mea uma lava ua faaalia mai e le Atua, ma mea uma o loo ia faaalia mai nei, ma matou te talitonu o le a ia faaalia mai le tele o isi mea silisili ma le taua tau le Malo o le Atua” (Mataupu Faavae o le Faatuatua 1:9).
O se ekalesia ola, o se ekalesia ua salalau i le lalolagi atoa i nei taimi faigata, e manaomia lava faaaliga faifai pea mai le nofoalii o le lagi e taialaina ma agai ai i luma.
Faatasi ma le tatalo ma le sailiga naunautai o le finagalo o le Alii, tatou te molimau atu ai ua maua le taitaiga, ua oo mai le faaaliga, ma e faamanuiaina e le Alii Lana Ekalesia a o agai atu i lona taunuuga.
O luga o le faavae mautu o le valaauga paia o le Perofeta o Iosefa ma faaaliga mai le Atua, ia na aumai e ala mai ia te ia, tatou te agai ai i luma. E tele mea ua faataunuuina i le aumaia o i tatou i le taimi nei. Peitai e tele atu isi mea e tatau ona fai ina ia aveina atu lenei talalelei toefuataiina i “atunuu uma, ma ituaiga, ma gagana, ma nuu” (Faaaliga 14:6).
Ua ou fiafia lava i le avanoa ua tatou aufaatasi ai a o tatou agai atu i luma i le faatuatua. E i ai taimi e mamafa ai le avega, e pei lava ona outou silafia. Ae aua nei o tatou tomumumu. Ia tatou savavali i le faatuatua, ma ia faia e le tagata lana vaega.
I lenei tausaga o le faamanatuga, i a tatou lava aga, ia tatou faamamaluina le Perofeta, o le na tele naua mea sa faaali atu i ai e le Atua.
Sa soifua mai Iosefa i se aso malulu i Vermont i le 1805. Sa faamutaina lona soifua i Ilinoi i se aoauli mafanafana i le 1844. I nai tausaga e 38 ma le afa o lona soifua, sa auala mai ai ia te ia se malamalama tele e le mafaamatalaina, o meaalofa ma aoaoga faavae. A vaavaai i ai ma le le faaituau, e leai se mea e faatusatusa i ai lea malamalama tele. Ae a vaavaai i ai ma le faapito’au, o le aano lea o molimau patino o le faitau miliona o le Au Paia o Aso e Gata ai i le lalolagi atoa. Ua faamamaluina oe ma a’u ina ua aofia ai ma i tatou.
A o ou laitiiti, ou te fiafia lava e faalogologo i se tamaloa, e i ai sona leo malu, o usuina upu nei a Ioane Teila:
Le Tagata Vaai, le Tagata Vaai, Iosefa, le Tagata Vaai! …
Ou te fiafia e manatua o ia;
Le na filifilia e le Atua, o le uo a tagata,
Na ia toefuataiina le perisitua;
Le taimi ua tuana’i na ia iloa faapea foi le lumanai, …
Ma ia faaalia mai le fuafuaga a le lagi.
(“The Seer, Joseph, the Seer,” Hymns [1948], no. 296)
O ia moni lava o se tagata vaai. O ia o se tali faaaliga. O ia o se perofeta a le Atua soifua, o le sa fetalai mai i lana tupulaga ma augatupulaga uma o le lumanai.
Ou te faaopoopo atu foi i ai ma la’u molimau faamaoni i le paia o lona valaauga, i le tamalii o lona soifua, ma le faamaufaailogaina o lana molimau i lona maliu, i le suafa paia o lo tatou Togiola, le Alii o Iesu Keriso, amene.