Tuleiga Tomua
E maoae la tatou avega mo le agai i luma. Peitai, e mamalu lo tatou avanoa.
O’u uso e ma tuafafine pele, e avea ia o a’u e fai ma sui o tagata o lenei Ekalesia i le lalolagi atoa, ou te tuuina atu ai i o tatou tuaoi ma uo Katoliko, la tatou faamaisega mai le taele o o tatou loto, i lenei taimi o se faanoanoaga tele. Sa galue punouai Pope Ioane Paulo II, ina ia faateleina le au Kerisiano, ia aveesea avega a e matitiva, ma saunoa atu ma le le fefe e uiga i le amio mama, ma le mamalu faaletagata soifua. O le a matuai misia lava o ia, aemaise o le toatele sa tulimatai atu ia te ia mo se taitaiga.
I le taimi nei, o’u uso e ma tuafafine, ou te manatu ua talafeagai i le amataga o lenei konafesi, ona ou tuuina atu ni nai upu o se tali auiliili e faatatau i la tatou tausiga o mea i le 10 tausaga ua mavae.
I le aso 12 o Mati, 1995, sa tuuina mai ai i o tatou luga le tiutetauave maualuga ma le paia o le Au Peresitene.
I le konafesi na sosoo ai sa ou faia ai le faamatalaga lenei:
“O lenei, o’u uso e ma tuafafine, ua oo mai le taimi ua tatau ai ona tatou tutu atu ma le malosi, ia vaai i le lumana’i, ma ia tatalaina o tatou mafaufau ina ia faateleina lo tatou malamalama ma le atamai i le misiona tele faameleniuma a le Ekalesia a Iesu Keriso o le Au Paia o Aso e Gata Ai. O le taimi lenei e tatau ai ona malolosi. O le taimi lenei e tatau ai ona aga’i i luma e aunoa ma le faaletonu, i le iloa lelei o le uiga, le lautele ma le taua o la tatou misiona. O le taimi e tatau ai ona faia le mea sa’o e tusa lava po o le a le taunuuga e oo mai ai. O le taimi e tatau ai ona tausia poloaiga. O le taimi e tatau ai ona aapa atu i le agalelei ma le alofa i e ua mafatia ma e ua feseseta’i i le pogisa ma le tiga. O le taimi e mafaufau ai ma faaali atu le lelei ma le faaaloalo e le tasi i le tasi ia tatou fegalegaleaiga uma. I se isi faaupuga, ia avea atili e faapei o Keriso” (Liahona, Iulai 1995, 79).
O oe o le faamasino o le mamao ua tatou oo i ai, i le iloaina lea, o le faataunuuina o lena valaaulia na tuuina mai i le 10 tausaga talu ai.
O le sefulu tausaga ua tuanai nei, o se vaitau matagofie tele lea i le talafaasolopito o le Ekalesia. Sa ofoofogia le fuga mai o le galuega. Ua tele naua mea taua ua faataunuuina.
O lea tulaga alualu i luma, e le o se galuega na o le Au Peresitene Sili, le Korama a le Toasefululua, le Au Fitugafulu, po o le Au Epikopo Pulefaamalumalu. O le taunuuga lea o le faatuatua, o tatalo, o galuega, o le tautua punoua’i a uso uma o se au peresitene o le siteki po o fautua maualuga, o au epikopo uma ma au peresitene o korama, o au peresitene uma o ausilali taitasi, ma tagata faamaoni uma ma le toaaga o lenei Ekalesia i le lalolagi atoa.
Ia te outou uma taitoatasi, pe o fea lava o e i ai, ou te ta’u atu lagona o lo’u loto ma faafetai atu mo lau tautua maoae ma le maelega. O outou o ni tagata matagofie naua.
O le mamalu ma le ofoofogia o le talalelei a Iesu Keriso na toefuatai e ala mai i le Perofeta o Iosefa Samita, ua matuai malamalama lona susulu i le asō.
A o tatou tutu nei i le faaiuga o nei tausaga ma toe tepa i tua, e le tatau ona tatou lagona se faamaualuga po o le mitamita, ae e mafai ona tatou lagona le lotomaulalo ma le faafetai ona o mea ua faataunuuina i le tele o taumafaiga.
Mo se faataitaiga, ua ola le Ekalesia i le lalolagi atoa, ma ua sili a’e ai le faitau aofai o tagata o le Ekalesia i fafo atu o Amerika i Matu nai lo Amerika i Matu. Ua avea i tatou ma se aiga tele faavaomalo, ma ua salalau i atunuu e 160.
I nei tausaga e 10 ua mavae atu nei, ua silia ma le 500 siteki ua faavaeina ma e silia ma le 4,000 uarota ma paranesi fou. E tolu miliona uso fou ua faaopoopo mai.
O le lesitala i a tatou a’oga ua faaluaina lona faateleina i le tusa ma le 200,000. O le toatele o tatou tupulaga talavou e malolosi ma sili atu ona faamaoni.
Ua faavaeina le Tupe Faaagaga mo Aoga. Sa amata i le leai o se mea ae na o le faatuatua ma le faamoemoe. O le aso, ua toeitiiti atoa le 18,000 o tupulaga talavou ua fesoasoani atu i ai [lea tupe]. E 27 atunuu eseese e nonofo ai. Ua aooga i latou ma ua o ese mai le tulaga mativa i mea tau tupe lea sa soifua ai o latou augatama mo le tele o augatupulaga. Ua faaleleia o latou tomai ma ua faateleina ai a latou tupe maua.
Ua matua faateleina le numera o malumalu. I le 1995, sa 47. O le taimi nei, ua 119, ma le isi tolu lea e faapaia i le tausaga nei.
E 87 gagana sa faaliliuina ai le Tusi a Mamona i le 1995. O le taimi nei, ua maua i gagana e 106.
E limasefulu tasi miliona kopi o le Tusi a Mamona ua tufatufa i le 10 tausaga ua mavae.
E afe ma afe fale sa tatou fausia i vaega eseese o le lalolagi. Ua sili atu lo latou anagata ma le talafeagai lelei ma o tatou manaoga, nai lo fale sa fausia muamua.
E le gata i lea, ua tatou fauina foi lenei faleapitaga ofoofogia o loo tatou lauga atu ai i le asō, le Nofoaga Autu tulaga ese mo Konafesi, iinei i le Aai o Sate Leki.
O nei mea uma faatasi ai ma le anoanoai o isi mea, ua tatou aapa atu foi i le salafa o le lalolagi, e fesoasoani ia i latou e faanoanoa ma manaomia le fesoasoani i soo se mea o i ai i latou na. I le 10 tausaga talu ai, sa tatou auina atu tino i tupe ma oloa o le fia selau miliona tala mo fesoasoaniga ia i latou e le auai i lo tatou faatuatuaga.
Ua soo le lalolagi o matou malaga atu i ai ma molimau atu i lenei galuega a le Silisili Ese. O nei lava foi tausaga toeitiiti atoa le miliona o maila sa ou malaga ai ma asiasi i atunuu e 70. Sa ma malaga faatasi ma la’u soa faapelepele seia oo i le tausaga na te’a nei, na maliu ai i le aso 6 o Aperila. Talu mai lena taimi ua lagona ai lava le tuuatoatasi.
O lo tatou faamoemoe mo le lumanai, e tele naua ma e malosi foi lo tatou faatuatua.
Matou te iloa ua na o nai mea iti lava o mea o le a taunuu i le lumanai, ua tatou vaaia.
Ua ou i ai nei i le lona 95 o o’u tausaga. Ou te lei mafaufauina lava o le a umi faapenei ona ou ola. Ua faamanatu mai i lo’u olaga se faaupuga o loo tautau i se pine elea i se pa uaea tuai i Texas. E faitauina faapea:
Ua mu i le lamala,
Ua malemo i le lolo vai,
Ua ‘ai uma e lapiti vao,
Ua faatau e le leoleo,
O lea lava e i ai!
Ou te faamoemoe ia ou maua le avanoa tatou te mafuta ai, a’u uo pele ma paaga galulue, pe o le a lava le umi e finagalo ai le Alii. Ma ou te faamoemoe foi o le a talia lena tautua ou te tuuina atu.
O lo tatou faavae o le talalelei lea a le Alii o Iesu Keriso. O loo i ai iinei le pule a le perisitua paia, na toefuatai mai e aao o i latou sa mauaina sa’o mai lo tatou Alii. Na tatala mai le lagi, ma sa tulei mai le Atua o le lagi ma Lona Alo Pele i le perofeta taulealea o Iosefa i le tatalaina o lenei tisipenisione mulimuli.
E maoae la tatou avega mo le agai i luma. Peitai, e mamalu lo tatou avanoa.
Ou te toe fai atu i le mea sa ou fai atu ai i le 10 tausaga talu ai, ia tatou “tutu atu ma le malosi … ia vaai i le lumana’i, ma ia tatalaina o tatou mafaufau ina ia faateleina lo tatou malamalama ma le atamai i le misiona tele faameleniuma a le Ekalesia a Iesu Keriso o le Au Paia o Aso e Gata Ai.”
O la’u valaau atu lea ia te outou o’u uso e ma tuafafine i lenei taeao. Ou te ta’uina atu lo’u alofa, ma tuuina atu la’u faamanuiaga, ma la’u faafetai a o tatou amataina lenei konafesi maoae. Ia taitaiina e le Agaga o le Alii mea uma o le a faia, i le suafa paia o Iesu Keriso, amene.