Taaloga Faitupe

Peresitene Gordon B. Hinckley

Afai e te lei auai lava i ni taaloga poka po o nisi ituaiga o taaloga faitupe, aua nei amataina. Afai o loo e aafia ai, ia tuu nei loa manū o mafai.

O’u uso pele, ua matagofie lava le tatou sauniga. Ou te fia faamaoniaina atu mea uma sa tautalagia ma tuuina atu au faamanuiaga ia te outou.

Ou te mua’i fia fai atu se upu e faatatau ia i latou sa tatou lagolagoina i lenei afiafi, o ni uso o Korama a Fitugafulu.

Ua ou talitonu, e faitau fiaselau uso agavaa ma ua gafataulimaina ona auauna atu o ni taitai aoao o le Ekalesia. Matou te vaai ia i latou i soo se mea. O i latou na lagolagoina i le aso, sa filifilia e tauaveina ni tiutetauave faapitoa. O le tele lava o tulaga, o le a aofia ai osigataulaga, ia o le a faia ma le naunauta’i.

O se tasi o i latou na lagolagoina nei, e pei ona outou silafia, o lo’u atalii ua 63 tausaga le matua. Ou te fia faamanino atu ou te lei filifiliaina o ia. O le mea lena sa faia e isi ua i ai le aia tatau e faia ai. Ou te matua ilitata lava i le tulaga o le faapito’au. E pei ona saunoa le loia, sa ou faapafala ese a’u lava mai le faatinoina o lea filifiliga. Ae peitai, ou te talitonu, ua agavaa o ia ma ua tatau ai i ona itu uma. O le mea muamua, ona sa i ai sona tina maoa’e. Ma’imau e, pe ana mafai ona ou ta’ua foi lona tama.

Na pau le mea ua ou ta’ua ai lenei mea, ona o lo’u ilitata i faiga faapito’au. Faamolemole aua nei tuua’iina o ia ona o le ma sootaga. E leai sana mea e mafai i ai.

Ia, ae se’i ou oo atu ia i le mataupu ou te fia talanoaina i lenei po. Ua ou tali atu i le tele o ni talosaga ina ia ou tali atu e faatatau i le tulaga o le Ekalesia, e uiga i se faiga ua avea nei ma a tatou masani, aemaise lava ia tatou tupulaga talavou. O le mataupu lea o taaloga faitupe i soo se ituaiga.

O se tala faapea i se tasi Aso Sa, sa foi mai ai Calvin Coolidge, o se alii sa peresitene i le Iunaite Setete i se taimi, ma o se tagata ua lauiloa i le lē tele o ni ana upu. Sa fesili atu lona faletua ia te ia pe o le a se mea sa laugaina e le faifeau. Sa ia tali atu, “Agasala.” “Fai mai e a?” sa ia fesili atu ai. “E tetee i ai,” o lana tali puupuu atu lea.

Ou te manatu e mafai ona ou taliina le fesili e faatatau i taaloga faitupe i se tali puupuu faapena. Tatou te tetee i ai.

Ua toetoe o mea uma lava ua i ai taaloga faitupe. E taaalo poka tagata. E petipeti i tuuga solofanua ma tuuga taifau. Latou te petipeti i uili ma taaalo i masini tupe. Latou te faapotopoto e taaalo i falekalapu, o fale piliati, ma kasino, ma o le tele foi o taimi, e fai ai i o latou lava fale. E toatele ua le mafai ona toe tuu. Ua ma’ivalea i ai, e faapei foi o fualaau faasaina. O le tele lava o tulaga, e oo atu ai i isi mausa ma faiga faataumaoi.

Ma o le matua toatele lava o i latou ua aofia ai, latou te le mafai ona gafataulimaina tupe e faaalu ai. O le tele o mea ua i ai, e faoa ai le tulaga malupuipuia o mea tautupe a fafine ma tamaiti.

O le taaloga o le poka, e pei ona faaigoa ai, ua avea ma mea e fiafia i ai kolisi ma aoga maualuluga.

Sei ou faitauina atu se tala mai le New York Times News Service:

“O Michael Sandberg, sa amata i ni nai tausaga talu ai i ni nai petipetiga i tupe laiti e pei o le lima sene, faatasi ma ana uo.

“A o le tautoulu na mavae nei, fai mai a ia, ua avea ma punavai o tupe maua ua oo i le ta’iono fuainumera [selau afe], ma o se mea e sui ai le a’oga faaloia.

“O Sandberg, e 22, ua vaeluaina lona taimi i le Princeton, lea ua tausaga faaiu ai ma o loo ave ai lana mataupu o faiga faaupufai, ma le Atlantic City, lea e tetele tupe e poka ai …

“O Sandberg o se faataitaiga maoae lea o se suiga tele o taaloga faitupe i lotoa o kolisi a le atunuu. E faaigoa e Sandberg o se mea ua pasae, o se gaoioiga ua uunaia e siamupini poka i televise ma le faateleina o Uepi saite o loo ofo mai ai le taalo poka i le Initoneti.

“Sa ta’ua e le au atamamai, o le faamaoniga o le taatele o taaloga faitupe i lotoa a le aoga, e faigata ona misi. Mo se faataitaiga, ia Tesema, sa i ai se sosaiete i le Iunivesite o Colombia sa faia sa latou uluai tauvaga poka e ta’i 80-tagata taaalo, ae $10 le ulu, o se tupe maulalo lea e tatau ona totogi e taalo ai, ae sa faia le uluai tauvaga a le Iunivesite a Karolaina i Matu e 175 tagata taaalo, i le masina o Oketopa. Sa tutumu uma nei taaloga ma sa i ai lisi faatalitali. I le Iunivesite o Pennsylvania, sa faasalalauina ai taaloga taitoatasi i po uma i se lisi o le i-meli a le lotoa” (Jonathan Cheng, “Poker is Major College Craze,” Deseret Morning News, Mar 14, 2005, A2).

O le mea foi lea o loo tupu nei i Utah.

Sa tusi mai se tina ia te au e faapea:

“O la’u tama tama e 19 tausaga le matua e poka i le Initoneti, ma e [foliga mai] e le kea lava tagata o le Initoneti pe lei atoa lou 21. Pau lava lau mea e fai o le i ai o sau teugatupe i le faletupe. Ua toeitiiti atoa le tausaga o taalo ai. Sa masani ona faigaluega ae ua faamavae, ona ua matua ma’ivalea lava i le Initoneti ma le poka tupe i le taimi nei. E alu i tauvaga poka i taimi uma, ma afai e malo, o le tupe lena na te [faaaogaina] e faatau ai mea na te manaomia. Na pau lava lana mea e fai o le saofa’i ma taalo i le Initoneti.”

Ua ou faalogo e na o Utah ma Hawaii ia setete e lua i le Iunaite Setete e lei faatagaina ai faaletulafono le [lotto] ma taaloga faitupe o soo se ituaiga. O tusi na ou maua mai tagata o le Ekalesia, ua manino mai ai o nisi o o tatou tupulaga talavou e amata i le taaalo poka. Latou te tofo ai iina i le maua fua o se mea, ona latou malaga lea i fafo atu o le setete i se mea e mafai ai ona latou taaalo tupe aloaia ai.

Fai mai se tasi sa tusi mai ia te au, “Ua ou vaai atu i lenei amioleaga ua faifai malie a’e ona pulea le tele o olaga. Ua soo ai le TV. E i ai i le ESPN se mea e ta’u o Tagata Ta’uta’ua o le Poka ma Siamupini o le Poka.”

Sa faaauau lana tala: “Sa valaaulia e se tasi o a ma’ua uo lo’u toalua e lesitala i le taaloga siamupini o le poka a le matou nuu mo se tupe e totogi ai. Fai mai lana uo, ‘e le o se taaloga faitupe. E tuu lau tupe i totonu o le ipu tele lea, ma o ai lava e malo, o ia lena e aveina tupe na.’”

Pe o se taaloga faitupe ea lena? Ioe, e faitupe. O le taalo tupe ua na o se faiga e ave ai tupe ae e le maua mai ai ni taui talafeagai o ni oloa po o ni auaunaga.

Ua i ai nei lotto a setete ma ua matuai maualuluga lava. Sa i ai se taimi na toetoe ai lava o le atunuu atoa sa faasaina ai. O le taimi nei ua faaaogaina e fai ma auala e su’e ai tupe.

I le luasefulu tausaga talu ai, a o ou lauga atu i se konafesi, sa ou fai atu ai: “Sa oso i luga talu ai nei le fiva o le Lotto ina ua faasalalau mai e le Setete o Niu Ioka e faapea o pepa e tolu e manumalo o le a vaetoluina le $41 miliona. Sa tutu tagata i laina e faatau a latou pepa. O le isi pepa na malo sa maua e tagata e 21 e faigaluega i falegaosimea, e 778 na tulua, ma le 113,000 na maua nai tupe laiti. Atonu o lena e lelei.

“Ae sa i ai foi le 35,998,956 na gau, sa totogi e tagata uma se avanoa e manumalo ai ae leai se mea na maua” (i le Conference Report, Oct. 1985, 67; or Ensign, Nov. 1985, 52).

O nisi o setete o Amerika ua latou faamamafaina lafoga i kasino e fai ma se alā tupe maua. E tatau ona maua le polofiti a le kamupani o loo faagaoioia. E faapena foi le tagata e malo lana pepa. A o isi tagata uma sa faatau a latou pepa, e leai se mea.

Ou te matua faafetai lava ina ua faavae e le Alii lenei Ekalesia, sa Ia tuuina mai ia te i tatou le tulafono o le sefuluai. Sa ma talanoa i se isi taimi ma se taitai o se isi ekalesia, ou te malamalama i ai, e faalagolago i taaloga o le Bingo mo se vaega tele o ana tupe maua. Sa ou fai atu i lenei alii, “Pe ua outou mafaufau ea i le sefuluai e faatupe ai le tou ekalesia?” Sa ia tali mai, “Ioe, maimau e, pe ana matou mulimuli i le faiga lena nai lo le faia o Bingo. Ae ou te le manatu e tupu lenei suiga a o ou ola.”

Ua tatala ia kasino i nofoaga faaleoleo o le au Initia e faamautinoa ai tupe maua a i latou e pulea na nofoaga. E toaitiiti lava e malo, ae o le toatele lava e gau. E tatau lava ona gau, pe afai e malo nisi, ma e tatau ona maua se polofiti o le fale.

Sa fai mai se tasi o o tatou alii talavou talu ai nei, “A totogi le 5 tala e matamata ai i se tifaga; pe totogi le 5 tala e poka ai, o le mea lava e tasi.”

E le tutusa. O le tasi, o lena e te maua ai se mea i le tupe sa e totogiina; a o le isi, e na o le tasi e maua le manumalo ae o le isi e fuamoa.

Ua faaalia i aafiaga, o le taalo poka e mafai ona oo atu ai i se ma’ivalea i taaloga faitupe.

Mai lava i le faatoa amata mai o lenei Ekalesia, e ta’uleagaina lava ia taaloga faitupe.

I le mamao i tua i le 1842, sa faamatalaina ai e Iosefa Samita ia tulaga a o nonofo le Au Paia i Misuri. Fai mai a ia, “Sa tetele o tatou fanua sa faatau, sa tele fua o faaeleeleaga, ma sa sapi o tatou aiga i le filemu ma le fiafia, ma sa faapena foi o tatou tuaoi; ae talu ai sa le mafai ona tatou aufaatasi ma o tatou tuaoi … i a latou pati i le vaeluapo, o le latou soli Aso Sa, o tuuga solofanua ma taaloga faitupe, o lea na amata ai ona latou tauemu, ma latou sauaina, ma i’u ai ina faapotopoto ni tagata faatupu faalavelave ma susunuina o tatou fale, valitā ma faapipii fulumanu ma sasaina le toatele o o tatou uso, ma faaiu ai ina latou tutulieseina i latou mai o latou fale” e ui ina e le ogatusa ma le tulafono, le faamasinoga tonu ma tulaga faaletagata soifua” (i le James R. Clark, comp., Messages of the First Presidency of The Church of Jesus Christ of Latter-day Saints, 6 voluma [1965–75], 1:139).

Sa saunoa Polika Iaga ia Oketopa i le 1844, e faatatau ia Navu, “Matou te mananao ia taofia uma fale ava malolosi, o fale o taaloga faitupe, ma isi fale le lelei uma po o gaoioiga [le lelei] o loo ia i tatou, ma ia le toe i ai ni inuga po o ni uiga eleelea” (i le Messages of the First Presidency, 1:242).

Ua faatele ona saunoa Peresitene o le Ekalesia ma fesoasoani i le Au Peresitene, e faatatau i lenei mea leaga. Sa saunoa George Q. Cannon, sa fesoasoani i Peresitene e toatolu o le Ekalesia e faapea: “E tele ituaiga foliga o lenei mea leaga i le lalolagi ma o loo manaomia ai ona puipuia mai ai tupulaga talavou. O se tasi o nei mea o taaloga faitupe. E eseese foliga o lenei mea leaga, ae e leaga uma lava ma e le tatau ona gauai atu i ai” (Gospel Truth: Discourses and Writings of President George Q. Cannon, sel. Jerreld L. Newquist, 2 voluma [1974], 2:223).

Sa ta’ua e Peresitene Iosefa F. Samita: “E le taliaina e le Ekalesia taaloga faitupe, ae e matua ta’usalaina lava aua e sese, ma ua faavasegaina foi faatasi ma nei taaloga faitupe, ia taaloga o avanoa ma lotto, o soo se ituaiga, ma e matua le faatagaina lava se tasi o ona tagata e auai” (“Editor’s Table,” Improvement Era, Aug. 1908, 807).

Sa fautua mai Peresitene Heber J. Grant: “E matua tetee lava le Ekalesia i taaloga faitupe o soo se ituaiga. E tetee i soo se taaloga o avanoa, galuega, po o pisinisi, lea e aveesea ai tupe mai le tagata e aunoa ma le toe faafoi atu i ai o mea e tusa ma le tupe. E tetee i faiga uma e faamoemoe e … ta’ufaatauvaaina ai pe faavaivaia ai le tulaga maualuga o le amio mama lea e tausisia e le aunoa e tagata o le Ekalesia, ma o tatou tagata lautele” (i le Messages of the First Presidency, 5:245).

Na saunoa Peresitene Spencer W. Kimball: “Mai lava i le amataga sa fautuaina i tatou ina ia aloese mai taaloga faitupe o soo se ituaiga. E oo mai le faaleagaina ma faatafunaga i le tagata, pe malo pe faia’ina pe gau, e sueina ia maua fua se mea, po o se mea e aunoa ma se galuega, po o se mea e aunoa ma le totogiina o le tau atoa” (i le Conference Report, Ape. 1975, 6; po o le Ensign, Me 1975, 6).

O le susuga a Elder Dallin H. Oaks, o loo tatou faatasi i le afiafi nei, na fofogaina atu i le 1987 se aoaoga matagofie e uiga i lenei mataupu i le a’oga sa ta’ua i lena taimi o Ricks College. Sa faaautuina o le “O Taaloga Faitupe o se Amioga Sese ae o se Valea [lea] i Tulaga Faaupufai” (tagai Ensign, Iuni 1987, 69).

Ou te faaopoopo atu foi i nei faamatalaga e faatatau i le tulaga o le Ekalesia. O le faia o se taaloga o avanoa e ono foliga o se mea malie e le afaina. Ae o loo pipii atu ai ma se mana e faaalia moni lava i foliga o i latou o loo taaalo ai. Ma ua tele taimi, e mafai ai e lenei faiga, lea e foliga mai e ta’umamaina, ona taitai atu ai i le ma’ivalea i ai. Ua leva ona tetee le Ekalesia ma o loo tetee pea lava i lenei faiga. Afai e te lei auai lava i ni taaloga poka po o nisi ituaiga o taaloga faitupe, aua nei amataina. Afai o loo e aafia ai, ia tuu nei loa manū o mafai.

E i ai auala e sili atu e faaalu ai le taimi o se tagata. O loo i ai gaoioiga e sili atu e faaaoga ai le malosi. E matua tele naua tusi mananaia e faitau. E le o taitai ona lava lo tatou faitautusi. O loo i ai musika e tatau ona aoao ma fiafia ai. O loo i ai taimi lelei e fiafia faatasi ai—i siva, o tietiega uila, po o nisi auala—e faatasitasi ai tama ma teine ma fiafia ai lava i latou.

Sa ou faitauina se tusi fou talu ai nei, sa lomia e le Oxford University Press, lea sa gauai atu foi i ai le toatele o i tatou. O loo i ai se suesuega sa faia e ni faiaoga o le Iunivesite o Karolaina i Matu i le Chapel Hill. O loo talanoa ai i olaga faalelotu ma faaleagaga o tupulaga Amerika. O i latou sa faia le suesuega, sa latou fesiligia le autalavou o faatuatuaga ma tu ma aga eseese. (Tagai i le Christian Smith and Melinda Lundquist Denton, Soul Searching: The Religious and Spiritual Lives of American Teenagers, 2005).

Sa latou taunuu ai i se faaiuga, o o tatou tupulaga o le Au Paia o Aso e Gata Ai, e tele atu lo latou iloa i lo latou faatuatuaga, e tele atu foi lo latou faamaoni i ai, ma e sili atu foi ona ola ai i ona aoaoga e faatatau i amioga faalevafealoai nai lo isi tupulaga.

Sa tusia e se tasi o le au suesue, “O Le Ekalesia a le Au Paia o Aso e Gata Ai, e maualuluga atu o latou faamoemoega mo o latou tupulaga talavou, ma … e tele foi taimi latou te faia ai” (i le Elaine Jarvik, “LDS Teens Rank Tops in Living Their Faith,” Deseret News, Mar. 15, 2005, A3).

Sa iloa ai o o tatou tupulaga talavou e tutusa o latou talitonuga faalelotu ma o latou matua, e auai i sauniga faalelotu taitasi i le vaiaso e fetufaai ai ma isi lo latou faatuatuaga, e anapopogi pe faia foi nisi ituaiga gaoioiga e aveesea ai lo latou manatu ifo ia i latou lava, ma tuuitiitia ai le masalosalo i o latou talitonuga faalelotu.

Sa faaalia e le au faasalalau e uiga i le suesuega le alapopo o o tatou tupulaga i le taeao e o i le seminare. “E faigata le alapo,” sa fai mai ai se tasi tamaitiiti o le seminare. “Ae e i ai faamanuiaga e maua mai ai. O se auala matagofie e amata ai le aso.”

Sa ta’ua e le au suesue e le atoatoa uma o tatou talavou, e i ai foi o latou vaivaiga, ae i lona aotelega, e matua maoae lava i latou. E tatau ona ou faaopoopo atu, e leai se taimi e taaalo poka ai nei tamaiti o aoga maualuluga.

A’u uo talavou pele, ia ou te tautala atu i ai i le po nei, e taua tele outou ia i matou. E matua taua tele outou. I le avea ai ma tagata o lenei Ekalesia ma ē umia le perisitua, e matua tele naua sa outou tiutetauave. Faamolemole aua le faamaimaua o outou taimi po o a outou taleni i gaoioiga le aoga. Afai tou te faia lena mea, o le a outou faaitiitia lo outou malosi e faia ai mea aoga. Ou te talitonu o le a faaluafesasi ai lo outou naunau i a outou aoga. O le a le fiafia ai ou matua, ma pe a mou atu tausaga ma outou toe tepa i tua, o le a outou le fiafia lava outou ia te outou.

O le perisitua o loo outou umia o ni alii talavou, o loo tauaveina ai ma le avanoa mo galuega a agelu. O lena mafutaga ma agelu, ou te tautino atu, e le mafai ai ona gauai atu i taaloga faitupe.

“Filifili tau o mea tonu” (“Filifili Tau o Mea Tonu,” Viiga, Nu. 149).

Ia i o outou luga faamanuiaga o le lagi, ou te tatalo atu ai, a o tuuina atu la’u molimau i lenei galuega ma lo’u alofa mo outou uma o loo galulue ai, i le suafa paia o Iesu Keriso, amene.