Tumau Mausali

Peresitene James E. Faust

Fesoasoani Lua i le Au Peresitene Sili

O le tumau mausali e faaalia e i latou o e tumau pea pe a faigata le ala, o e le fiu pe a faapea mai isi, “E le mafai ona faia.”

Ou te fia faafeiloai atu i na Uso o e na valaauina ma lagolagoina i lenei aoauli e avea ma sui o le Korama Muamua ma le Lua a Fitugafulu. O i latou uma o ni alii o le faatuatua ma le gafatia ma tautinoga, ma e matou te faamaonia atu ia te outou faapea ua agavaa i latou i soo se tulaga e umiaina nei tofi.

O’u uso pele o le usoga tele o le perisitua i le lalolagi atoa, matou te faamalo atu ia te outou mo lo outou faamaoni ma lo outou maelega i le galuega a le Alii. Matou te faafetai atu mo la outou tautua filiga ma le naunautai. Ua tele le malosi ua outou ofoina atu i le Ekalesia.

Ua matagofie tele le tatou mafutaga i lenei sauniga ma outou uma lava o uso o le Perisitua Arona. A o pei lo’u matua o outou sa masani ona ou manatu, “Pe o le a lo’u tulaga o le a i ai i lenei lalolagi, ae faapefea ona ou mauaina?” E na o le pau la’u sini sa i ai i lena taimi o le auauna atu lea i se misiona. Ina ua taunuu mai lo’u valaauga faamisiona, sa ou auauna atu, ma sa avea la’u misiona e pei o le Fetu i Matu sa taialaina au i isi laasaga o lo’u olaga. O se tasi o mea taua na ou aoaoina afai ou te tumau mausali faamaoni i o’u valaauga o le Ekalesia, o le a tatalaina e le Alii le ala ma taialaina au i isi avanoa ma faamanuiaga, e sili atu nai lo mea na ou moemiti i ai.

O le auauna atu i se misiona e mafai ona faia lenei mea mo outou alii talavou uma. Na faasoa mai talu ai nei e se alii talavou ia te au le auala na aoaoina ai o ia mai le tumau mausali i le avea ai ma se faifeautalai. Sa ou aoaoina mai lona aafiaga nisi o mea e mafai ona outou aoaoina lea o le a aumaia ai avanoa ma faamanuiaga ia te outou:

O le auala e faatulaga ma faaaoga tatau ai le taimi.
O le taua o le galue malosi—o le mea e te lulu e te selesele.
Tomai faaletaitai.
Tomai o tagata.
O le taua o le suesueina o le talalelei.
Faaaloalo i e taitai.
O le taua o le tatalo.
Lotomaualalo ma le faalagolago i le Alii.¹

Ina ua ou aoga i le Aoga Maualuga a Granite i le Aai o Sate Leki i le vaitau o le 1930, sa i ai nisi o au uo sa matuai lelei lava i afeleti, tala faatino, musika, ma lauga. O nisi o i latou sa faaauau pea ma faamanuiaina ai i le olaga, ae o le toatele o na talavou talenia ma atamamai sa le tumau mausali, ma sa toilalo ai i le le ausiaina o mea latou te mafaia. I le faatusatusa atu i ai, o nisi o alii ma tamaitai talavou e tau leiloa i lena lava aoga e tasi o e sa galulue maelega, tumau mausali, ma faaauau ai pea a latou aoaoga ina ia avea ma ni fomai, enisinia, faiaoga, loia, saienitisi, tagata fai pisinisi, faiva alofilima, fai eletise, palama, ma faioloa maoae.

O le faamanuiaina e masani lava ona maua e ala i le tumau mausali ae le o le lotovaivai pe a fetaiai ma luitau. Na saunoa ia Paul Harvey, le tusitala lauiloa ma le faavasegaga o tala fou: “E i ai se aso ou te faamoemoe ina ia lava le olioli i le mea ua ta’ua e le lalolagi o le manuia ina ia fesili mai ai se tasi ia te au, ‘O le a se mea lilo o i ai?’ E na ona ou faapea atu lava i ai: ‘Ou te toe tu i luga pe a ou pa’u i lalo.’”²

O se faataitaiga maoae o le tumau mausali o le Tamaitai lea o Marie Curie o le sa galulue faatasi ma lona toalua o se fomai Farani, o Pierre Curie, “i totonu o se fale tuai ua lafoaiina e aunoa ma ni tupe, e aunoa ma se faamalosiau po o se fesoasoani mai fafo, a o taumafai e tuueseina le elemene o le radium mai se uamea o le ituaiga uranium e ta’ua o le pitchblende. Ina ua mavae le la faataitaiga lona 487 sa faatoilaloina ai, sa sisii i luga lima o Pierre i le faanoanoa ma faapea atu, ‘O le a le mafai lava ona faia. Atonu o se isi selau tausaga, ae le mafaia i lo’u taimi.’ Sa talanoa atu Marie ia te ia ma ni foliga mautinoa ma faapea atu, ‘Afai e alu ai se selau tausaga, o le a avea ma se luma, ae o le a ou le foi ai lava lo’u galue ai i le umi ou te ola ai.’”³ Sa iu ina faamanuiaina o ia, ma ua matuai faamanuiaina ai lava gasegase o le kanesa ona o lona tumau mausali.

O le tumau mausali e faaalia e i latou o e tumau pea pe a faigata le ala, o e le fiu pe a faapea mai isi, “E le mafai ona faia.” I le 1864, na tofia ai e le Au Peresitene Sili ia Aposetolo o Ezra T. Benson ma Lorenzo Snow, faatasi ai ma Elder Alema Samita ma Elder William W. Cluff, i se misiona i Atumotu o Hawaii. Sa latou malaga atu mai Honolulu i se tamai vaa e agai atu i le tamai uafu i Lahaina. Ina ua latou latalata atu i le aau, sa sousou le vasa, ma sa taia ai le vaa e se galu malosi, ma tafea ese atu ai pe tusa ma le 50 iata ma tuua ai le vaa i totonu o se ava i le va o ni galu tetele se lua. Na sa’e le vaa i totonu o le vasa ina ua osofaia e le galu lona lua.

Na faaauvaaina e tagata sa i le matafaga se vaa faaola ma pikiina ai le toatolu o nei uso o e sa auau ai lava e latalata i le vaa ua goto. Ae sa le vaaia ia Uso Snow. O tagata Hawaii ua masani i le faasee sa feausi solo i soo se itu e saili o ia. Na iu ina ua maua e se tasi o i latou se mea o tafetafea i le sami, ma sa latou tosoina ae loa i luga le tino o Uso Snow. Sa malo lona tino, ma na foliga mai ua maliu o ia a o latou tosoina ae lona tino i luga o le vaa.

Na faataatia e Elder Smith ma Elder Cluff le tino o Uso Snow i luga o o laua vae ma la faauuina o ia ma le filemu, ma ole atu i le Alii ina ia faasaoina lona ola ina ia mafai ona toe foi atu i lona aiga. Ina ua latou taunuu i le pa’umatu, sa la siiina atu ia Uso Snow i luga o ni paelo gaogao tetele lava sa taatitia i luga o le matafaga. Sa faafao o ia i luga o se tasi o paelo, ma tulei agai i luma ma tua e tau aveese mai ai le suasami na ia foloina.

Ina ua mavae sina taimi o faia lea galuega e alii faifeau, sa foliga mai e leai se ola na vaaia, ma sa faapea atu i latou sa tutu latalata ane e leai se isi mea e toe mafaia. Ae lei fiu ai ia nei alii faifeautalai. O lea sa la toe tatalo ai, faatasi ai ma le mautinoa o le a faafofogaina ma tali mai le Alii i a la’ua tatalo.

Sa uunaia i la’ua e faia se mea e le masani ai i na vaitaimi. Sa tuu le fofoga o le isi o i la’ua i luga o le fofoga o Uso Snow i se taumafaiga ina ia feula atu ai le ea i ona mama, ma feauauai i le manavaina atu o le ea i totonu ma fafo, e faafoliga ai le faiga masani o le manava. Sa la feauauai, sa la tumau mausali seia oo lava ina ua mafai ona la faaputaina ona mama. E lei leva lava ae o la vaaia loa le tau ataata mai o le toe foi mai o le ola. “O sina emo o le mata, e pei e oti, ma se tau gogolo o le faai, o faailoga muamua lava ia o le toe foi mai o le malosi. Na faateleina le iloga mai o nei vaaiga, seia oo lava ina ua toe maua atoa le malamalama.” O lo la tumau mausali faapea ma le sisila mai o le fesoasoani mai le Lagi, na faasaoina uma ai auauna e toafa a le Alii ma mafai ona faamaeaina a latou misiona.⁴

Na agai atu Elder Snow ma avea ma Peresitene o le Ekalesia. A o ia auauna ai i lena tofiga, na ia faamautuina ai mea tau tupe a le Ekalesia e ala lea i le uunaiina o tagata ina ia totogi a latou sefuluai ma taulaga.

Atonu o le a sili ona fiafia outou uso i le iloaina lea o Alema Samita o loo i lenei tala o le tamaitiiti lea sa fanaina lona suilapalapa i le Fale Gaosimea o Hona, ma faaleagaina ai le sooga o lona suilapalapa. Na fusi e lona tina le manua matautia i se pulu pasama, ona musuia lea o ia ina ia faataoto o ia e fao i lalo mo le lima vaiaso. Na tupu a’e se uaua e suitulaga ai i le sooga ua leai, o lea sa le gata ina mafai ona ia ola ai i se soifuaga e masani ai, ae sa ia auauna atu foi i se misiona, ma tuuina atu se auaunaga i le olaga atoa i le Ekalesia.⁵

O o tatou perofeta o aso e gata ai o faataitaiga uma ia o le naunautai e ala i le perisitua, tatalo, ma galuega. O le tumau mausali o Iosefa Samita na mafai ai le toefuataiga o mea uma. O lona soifuaga atoa na fetaiai ma le inosia ma le tauemuina—mai lava i le taimi na ia uluai faamatalaina atu ai le tala o le Uluai Faaaliga i se failotu o se lotu lauiloa. Ae lei maluelue ai ma ia tuuina mai ai ia i tatou lana molimau mausali:

“Sa ou vaai moni lava i se malamalama, ma sa ou vaaia foi i totonu o lea malamalama ni Tagata se toalua, ma e moni lava sa la fetalai mai ia te au; ma e ui ina inosia ma sauaina au i lo’u fai atu na ou vaai i se faaaliga, ma e o se mea moni lava; … sa ou vaai lava i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia, ua ou fefe e faia lena mea.”⁶

O le soifuaga o Polika Iaga o se uiga moni lava lea o le tumau mausali. Sa faamaoni ma mausali o ia. Ina ua mavae le maliu o Iosefa Samita, sa malosi lona naunautai ina ia aumaia le 60,000 tagata mai o latou fale matagofie ma o latou laueleele tamaoaiga, i se vaomatua lea e leai ma se tasi na totoina pe na seleseleina ai se faatoaga o soo se ituaiga. O lenei malaga maoae sa le pei o isi malaga i le talafaasolopito i ona po nei. Sa latou o mai i taavale solofanua, savavali, ma toso mai taavale tosolima. O ia faatasi ma e na mulimuli mai ia te ia na faafugaina mai le toafa e pei o se rosa.

I le uluai fonotaga ma le au tusitala ina ua faailoa atu le avea o Peresitene Gordon B. Hinckley ma Peresitene o le Ekalesia i le 1995, na fesiligia ai o ia po o le a le mea o le a ia taulai atu i ai. Sa ia tali, “Tauave pea. Ioe. O la matou anavatau o le a tauave pea le galuega tele lea na faalauteleina e o matou tuaa.”⁷ O se anavatau maoae lenei mo i tatou uma. E moomia ona tauave pea ma tumau e oo i le iuga.

O se tasi o vaega sili ua ausia e le taitaiga a Peresitene Hinckley o lona tumau mausali lea i le fausiaina o malumalu. Talu ona avea o ia ma Peresitene o le Ekalesia ua 87 malumalu ua faapaiaina, toe faapaiaina, pe faasilasilaina. O lenei taumafaiga maoae i le fausiaina o malumalu e le mafaatusalia i le talafaasolopito atoa o le lalolagi. E maoae se aafiaga o malumalu mo le lelei ma o loo faateleina pea ona faamanuiaina ai le lalolagi. E pei ona saunoa ia Peresitene George Q. Cannon, “O maa faavae uma e faataatitia mo se Malumalu, ma o malumalu uma e faamaeaina e tusa ai ma le faatulagaga na faaalia mai e le Alii mo Lana Perisitua paia, e tuuitiitia ai le mana o Satani i le lalolagi, ma faateleina ai le mana o le Atua ma le Amioatua, e uunaia ai le lagi i le mana silisili mo i tatou, ma aumaia ma toina ifo ai faamanuiaga o Atua Faavavau, ma i latou o e nonofo ai i lo latou afioaga.”⁸

E tatau ia i tatou taitoatasi ona auauna atu ma le faamaoni ma le maelega i o tatou valaauga o le perisitua e oo i le mutaaga o o tatou aso. Atonu e manatu se tasi faapea, “O le a le umi e avea ai au ma faiaoga o aiga?” O la’u tali o le faiaoga o aiga o se valaauga faaleperisitua. O le auauna atu i le valaauga o se faiaoga o aiga o se avanoa lea e fuafua lava i le umi e lagona ai e o tatou epikopo ma taitai perisitua o loo tatou mafai ona faia ai. E silafia e nisi o i tatou ia Uso George L. Nelson, o se loia lauiloa i le Aai o Sate Leki, o le sa auauna atu o se epikopo, peresitene o le siteki, ma se peteriaka. Sa matuai tautino atu lava o ia i le Ekalesia. Sa avea o ia ma se faiaoga o aiga i le 100 o ona tausaga. Sa ia faapea mai i lena taimi, “Ou te fiafia i le avea ma se faiaoga o aiga. Ou te faamoemoe e mafai pea ona avea au ma se faiaoga o aiga.”⁹ Na maliu o ia i le 101 o tausaga, ma sa faamaoni e oo i le iuga.

O i latou o e mananao ina ia papatisoina i le Ekalesia, e moomia e le Alii ona i ai se “naunautai e auauna atu ia te ia e oo i le iuga.”¹⁰ Na saunoa Peresitene Iosefa Filitia Samita, i le 94 o tausaga, “Sa ou saili i aso uma o lo’u ola e faalauteleina lo’u valaauga i lena perisitua ma faamoemoe e tumau e oo i le iuga i lenei olaga ma olioli ai i le faaaumeaga a le au paia faamaoni i le olaga a sau.”¹¹ E pei ona fetalai le Alii, afai e avea i tatou ma Ona soo e tatau ona tatou mulimuli i lana fetalaiga.¹² Ua faamanuiaina e le Alii le Ekalesia ma ona tagata i ni auala maoae ona o lo latou faatuatua ma le tumau mausali. Ou te molimau atu i le paia o le galuega paia a le perisitua, ma e ou te faia ai i le suafa paia o Iesu Keriso, amene.