O Le Taua o Agaga
Afai tatou te vaai i aafiaga e mafai e se tasi tagata ona tuuina atu … , atonu tatou te le maofa ai i le mea na faamanatu mai e le Alii ia i tatou, “Ia manatua e taua tele le aoga o agaga.”
O se tasi o lauga sa i ai sona aafiaga e faavavau ia te au sa tuuina mai lea i se sauniga i le afiafi o le Aso Toonai o se konafesi faalesiteki i tausaga ua mavae. O le lauga a se tina talavou. O le mea lenei na ia ta’ua: “Sa ou faia gafa o lo’u tama matua. O ia ma lona auaiga toatele e aofia ai ona atalii ma afafine o ni tagata uma o le Ekalesia.
“O lo’u tama matua,” na ia fai mai ai, “na o ese ma le lotu i se tasi Aso Sa ma e lei toe foi mai lava—e leai ma se faailoga pe aisea.”
Ona fai mai lea o ia, “I a’u sailiiliga, na ou mauaina ai e silia ma le 1,000 i latou na tutupu mai i lo’u tama matua.”
Ona ia fai mai lea, ma o le vaega lenei e le mafai ona galo ia te au, “Mai lena 1,000 o e na tutupu mai ai, e na o au lava o loo malosi i le Ekalesia i le taimi nei.”
A o ia ta’u maia nei upu, sa ou mafaufau ifo ia te au lava: “Pe na o le 1,000, pe sili atu?”
Na manino lava le tali. O aafiaga faaleagaga atonu sa tatau ona tuuina atu e lena aiga i o latou tuaoi ma uo, e lei tupu. E leai ma se tasi o ona atalii, po o se tasi o ona afafine, sa faafaifeautalai, ma o i latou o e atonu semanu e ootia i ni a latou molimau e lei papatisoina, ma o i latou e lei papatisoina e lei o i ni misiona. Ioe, atonu e tele atu ni afe o i latou e le o i ai i le Ekalesia i le taimi nei, e le o i ai foi i lenei sauniga, ona o le faaiuga a lena tamamatua.
A o o’u faalogo a o ia tautala sa ou mafaufau ai ia te au lava ia, “Matuai matautia! A na fai ou te i ai iina i lena taimi semanu e mafai lava ona ou tuuina atu se tala i le tama, i le aiga, i taitai o le perisitua, lea atonu e fesoasoani atu ai ina ia taofia se mala faapea i lo latou aiga ma le toatele o tupulaga i le lumanai o le a mulimuli mai ai.”
O le avanoa i le taimi ua te’a ua mou atu. Ae mafai ona tatou vaavaai atu i ai i le taimi nei ma le lumanai. Ou te fai atu ia i latou o e ua iloaina lo latou i ai i le tulaga lava lea e tasi sa i ai le tamamatua: Pe o e manatunatu ea i le mea e mafai ona e faia i lou aiga, ma i latou uma o e mulimuli mai ia te oe? Pe e te mafaufau loloto ea i aafiaga o ou manatu ma au mea e fai?
Afai o i ai ni atugaluga e uiga i aoaoga faavae o le Ekalesia, mafaufau i le fautuaga na tuuina mai e Peresitene Gordon B. Hinckley i se sauniga toatele lava e silia i le 2,000 tagata o le ekalesia i Pale, i Farani i le tausaga na tea nei. Na ia saunoa ai: “Ou te aioi atu ia te outou, o’u uso e ma tuafafine, afai lava o i ai soo se masalosaloga i soo se aoaoga faavae o lenei Ekalesia, ia e faataita’ia. Faataitai i ai. Ola i le mataupu faavae. Ia e alu ifo i ou tulivae ma tatalo i ai, ma o le a faamanuiaina oe e le Atua i se malamalama o le upumoni o lenei galuega.”
Afai e te lagona ua tuuaiseseina oe, ia e saunia e faamagalo atu. Afai lava e i ai, po o le a lava le mafuaaga, o i ai se tulaga le lelei o manatuaina pea, ia faagalo. I tulaga e tatau ai, ia talanoa atu i lou epikopo, talanoa atu i le peresitene o lau siteki.
Ia te outou uma lava, aemaise lava ia i latou o le a avea ma tama ma tina matutua i se aso, o o outou faamanuiaga e faavavau faapea i a outou fanau e sili mamao atu ona taua nai lo soo se mafuaaga faasausili lava o le a teenaina ai outou ma le toatele o isi faamanuiaga taua faapena. I totonu o le Tusi a Mamona o loo faamanatu mai ai e le Tupu o Peniamina ia i tatou: “Ma lea foi, o lo’u manao ia outou mafaufau i le manuia ma le fiafia o i latou o e tausi i poloaiga a le Atua. Aua faauta, ua manuia i latou i mea uma, i le faaletino atoa ma le faaleagaga, afai foi ua latou tutumau e oo i le iuga e talia i latou i le lagi, ina ia latou mau faatasi ma le Atua i le fiafia e le iu” (Mosaea 2:41).
Mo i latou o fanau i aiga o tama matutua e ono sese ese i le lumanai, e mafai ona outou faaauau pea ona tutu ma le faamaoni, e mafai ona avea outou ma faataitaiga lelei i le fale ma i latou o loo siomia outou. E mafai ona fai la outou vaega ina ia aumaia ai le filemu ma le lotogatasi i totonu o le aiga faapea i latou tou te masani. E mafai ona avea outou ma fofo o faafitauli, ae le o le faapogai. Manatua, i totonu o le Tusi a Mamona, ina ua amata ona muimui le Toeaina o Liae, o lona atalii amiotonu o Nifae na tuuina atu le faamalosiauga ma sa maua ai fofo i faafitauli. O le tele o taimi, o fanau amiotonu ia e mafai ona faatupuina le filemu i se aiga i taimi e fesouaiina ai i faafitauli.
O outou o loo avea ma epikopo ma peresitene o siteki, ou te moomoo maimau pe ana outou i ai i lena fonotaga sa ou auai i lena taimi ma ni sui risone. Sa matou faalogo ai ia Elder L. Tom Perry a o ia faatusatusaina i latou o toeaina faamoemoeina ma i latou e le o toaaga—o tama matutua i le lumanai—i se fuafiva. Na faamanatu mai ai ia i matou e toatele o na tagata taitoatasi o loo i le vaega ua sili atu nai lo le mafanafana. O le a latou foi mai pe afai e i ai se tasi e na ona uunaia ma faaali atu i ai le auala.
Ou te fia faamatala atu se konafesi faalesiteki sa tofia au ou te auai atu i ai. O se siteki sa toe faatulagaina; e faamaloloina ai le peresitene o le siteki ma ona fesoasoani ae valaauina ai se au peresitene fou. Sa talavou le peresitene o le siteki ma e lata i le 10 tausaga sa ia auauna atu ai ma le maoae. O se sauai lava i le faaleagaga, ae o se sauai foi i le taitaiga. I lo’u faatalanoaina o ia, na ia ta’u mai ai le auala na ia tuuina atu ai le tele o tiutetauave mo le faagaoioiga o le siteki i ona fesoasoani ma fautua maualuga, o lea na saoloto ai o ia e faatalanoaina i latou o loo moomia le faamalosiauga. Na valaaulia atu tagata taitoatasi ma ulugalii ina ia o atu i lona ofisa. O iina na ia iloaina ai i latou, fautuaina i latou ma valaaulia i latou ina ia faia ia sili atu, ia faatulaga lelei o latou olaga, ma maua faamanuiaga o loo avanoa mo i latou o e mulimuli i le Alii. Na ia fesoasoani ia i latou e ala lea i le tuuina atu o i latou i le vaaiga a se taitai agavaa, o se faiaoga e fesoasoani ia i latou ia malamalama ai i le matagofie o aoaoga faavae. Ona ia ta’u mai ai lea ia te au, o nei faatalanoaga e masani ona ia fesili atu ai pe latou te manaomia se faamanuiaga. “Ua tele ulu o tagata o le siteki na tuu ai o’u lima i luga,” o lana saunoaga lea.
O le aso na sosoo ai, i le sauniga aofai o le konafesi a le siteki, ou te masalo faatoa ou vaai lea i le tele o loimata maligi—e le faapea na latou lagona e le tatau ona faamaloloina le peresitene, ae ona o le loloto o le alofa o se peresitene talavou o le siteki o le na faamanuiaina o latou olaga. Na uunaia au ou te fesili atu, “E toafia outou na faaee atu i ai lima o le peresitene i luga o o outou ulu?” Sa ou ofo i le toatele o i latou o e na sii o latou lima. Sa ou faapea ifo ia te au i lena taimi, “e toafia nisi o nei tagata o le a faamanuina le igoa o lenei tagata maoae, e le gata i le taimi nei ae faapea i le faavavau.” Ioe, o i latou nei o le a avea ma tama matutua, ma e talu ai ona o lenei taitai alofa, o le a latou tuua ai se talatuu o augatupulaga e fia afe o e o le a faaamuia ia te ia.
Afai tatou te vaai i aafiaga e mafai e se tasi tagata ona tuuina atu i olaga o le toatele, atonu tatou te le maofa ai i le mea na faamanatu mai e le Alii ia i tatou. “Ia manatua e taua tele le aoga o agaga i le silafaga a le Atua” (MFF 18:10).
Ou te tatalo ina ia tatou manatu uma i mea e mafai ona taitasi i tatou ma faia e fesoasoani ai ia i latou o e o le a avea ma ni matua matutua maoae i le lumanai, e tusa lava pe o se tamaitiiti laitiiti, se talavou, po o se tagata matua, ina ia tuua uma e tagata taitoatasi se talatuu amiotonu o i latou o e na iloa ma alolofa i le Alii. I le suafa o Iesu Keriso, amene.