Ia Faaeteete i le Tiapolo o Loo i tua o Mata Ataata
A o tatou faateleina lo tatou malamalama ma le alofa mo le Faaola, o le a susulu mai Lona malamalama i mea uma o siomia ai i tatou. Ona mafai ai lea ona tatou iloa moni atu le leaga.
O le afiafi nei, ou te talanoa atu ai ia te outou alii talavou, o outou o e ua faamatalaina e Peresitene Gordon B. Hinckley o “se tupulaga ua sili ona lelei.”1 Ua matou vaaia lo outou lelei i le lalolagi atoa. Ou te tatalo ia outou lagonaina o au upu e mo oe lava ia, o se atalii o le Atua, o loo galue malosi e fai le mea tonu.
Ou te fia faamatala atu ia te outou se mea na oo i ai se tasi faamaoni o le Au Paia o Aso e Aata Ai, o sa’u uo lelei lava. O le a ou ta’ua o ia o “la’u uo” ona o mafuaaga o le a outou malamalama i ai.
A o faigaluega o ia o se leoleo faapitoa mo Leoleo Nanā [FBI], na suesueina e la’u uo se vaega solitulafono sa fela’ua’ia fualaau faasaina i totonu o le Iunaite Setete.
I se tasi aso, sa la o atu ai ma se isi leoleo i se fale sa la talitonu sa i ai se alii sa tufatufaina atu fualaau faasaina o le kokeini. Na faamatalaina e la’u uo le mea na tupu:
“Sa ma tu’itu’i i le faitotoa o le alii ua masalomia i fualaau faasaina. Sa tatala mai e le alii ua masalomia le faitotoa, ma ina ua vaai mai ia i ma’ua, sa taumafai loa ia pupuni i ma’ua ina ia aua nei o ma iloa atu totonu o le potu. Ae sa tuai; sa mafai ona ma iloaina atu kokeini i luga o lana laulau.
“Sa faatopetope ona tapena ese e se alii ma se tamaitai sa i ai i le laulau ia kokeini. E tatau ona ma taofia mai i la’ua mai le faaleagaina o faamaoniga, o lea sa vave ai ona ou tuleieseina le alii na masalomia lea sa taofiofia le faitotoa. A o ou tuleia o ia, sa maua lelei ona mata i la’u vaai. O le mea uiga ese sa i ai, sa leai sona foliga ita pe fefe foi. Sa ataata mai o ia ia te au.
“O ona mata ma lana ataata e faaleano i ai, na ou maua ai se lagona e le leaga o ia, o lea na ou tuua ai o ia ae ou savali atu i le laulau. O le taimi lea ua tu ai le alii solitulafono i o’u tua. Ma o le taimi lava lena, na oo mai ai se lagona mautinoa ma le malosi i lo’u mafaufau: ‘Faaeteete i le tiapolo o loo i tua o mata ataata.’
“Sa vave ona ou toe faliu atu i le alii solitulafono. O lona lima o loo i totonu o lana taga pito i luma. Na vave ona ou mau i lona lima ma toso mai i fafo o lana taga. O le taimi lena na faatoa ou vaai ai, o uu i lona lima se tamai fana otometi ua sauni o le a faapa. Na sosoo ai ma ni gaoioiga faavavave lea na ou aveesea mai ai le fana mai le alii.”2
Mulimuli ane, i se isi soligatulafono, sa molia ai le alii lava lea e fe’avea’ia fualaau faasaina i le fasioti tagata, ma i lona fia faaalialia na fai mai ai, semanu na te fasiotia la’u uo, pe a na le faliu atu i le taimi lava lena.
E masani lava ona ou mafaufau i le fesootaiga lea na oo atu i lona mafaufau: “Faaeteete i le tiapolo o loo i tua o mata ataata.” O le mea lenei ou te fia talanoa atu ai ia te outou i le po nei.
Tatou amata i le mea ua tatou iloa. O le lelei e mai le Atua; o le leaga e mai le tiapolo.3 Ae peitai, e le tutusa le malolosi o ‘au o loo fetaua’i i le lalolagi. Ua i le faaao o mea uma e lelei le Keriso—O Ia o Le Toatasi Na Fanaua a le Tama, o le na foafoaina lo tatou lalolagi ma le tele o isi lalolagi. O lo tatou Togiola o se tagata toetu ma atoatoa.4 Ou te iloa o loo soifua o Ia.
Ae i le isi itu, o le tiapolo, “e faaoleole i tagata ia faia le amioleaga.”5 “[Ua] pau ifo o Ia ai le lagi, …[ua] malaia e faavavau,”6 ma ua galue nei “ia malaia tagata uma e pei o ia lava.”7 O ia o le pepelo ma le toilalo.8
E le mafai ona faatusalia le mana o le Faaola ma le mana o le tiapolo.9 Ae peitai, i luga o lenei fogaeleele, ua maua ai le avanoa mo faatosinaga a le tiapolo, e tuu mai ai le avanoa e filifili ai i le va o le lelei ma le leaga. Fai mai le mau: “Na foai mai e le Alii le Atua le faitalia i le tagata. [Ma] e le mafai ai ona filifili le tagata … [sei iloga] ua faaosoina … e se tasi po o se isi.”10
O le filifiliga i le va o le lelei ma le leaga, e taua i lo tatou aafiaga i luga o le fogaeleele. I le iloiloga faaiu o o tatou olaga, o le a le afaina pe na tatou mauoa pe matitiva, pe na tatou lelei i taaloga pe leai, pe na i ai ni a tatou uo pe na masani ona faagaloina i tatou.
E mafai ona tatou galulue, suesue, talie, ma fai mea malie, sisiva, pepese, ma fiafia i le tele o aafiaga eseese. O tulaga matagofie nei o le olaga, ae le o le autu tonu lea o le mafuaaga ua tatou i ai iinei.11 O le avanoa e filifili ai le lelei nai lo le leaga o le mea tonu lava lena ua tatou i ai iinei.12
E leai se tasi o i tatou o le a faapea mai, “Ou te manao e filifili le leaga.” Tatou te mananao uma lava e filifili le mea tonu. Ae peitai, o le filifiliga o le lelei nai lo le leaga, e le faapea o taimi uma e faigofie ai, ona o le tiapolo e masani lava ona lafi i tua o mata ataata. Faafofoga i lapataiga nei:
“Ia manatua … ina ne’i faapea outou e mai le Atua le mea ua leaga.”13
“E tatau ona outou mataala ma tatalo e le aunoa, ne’i oo mai le faaosoosoga ia te outou; aua e manao Satani ia te outou.”14
“Ua saili foi Satani e faasese ia te outou, ina ia faatoilaloina outou e ia.”15
O le savali: “Ia faaeteete i le tiapolo o loo i tua o mata ataata!”
Ou te iloa nisi o alii talavou o e na amataina ia faamoemoega uma ina ia tumau mausali i lo latou faamaoni i le Faaola, ae ua see ese mai i le ala ona latou te le iloaina le tiapolo sa i tua o mata lea na foliga mai e leai se afaina. Sa latou vaaia le malie, o le fiafia, o le taliaina, ae latou te lei vaaia isi taunuuga.
E faapefea la ona tatou iloa le tiapolo i tua atu o se mea e foliga mai e le leaga?
Ua outou iloa ia tali, ae o ni nai manatu nei:
Muamua, talanoa i ou matua. Pe o se mea leaga ea lena manatu? O i matou o tama, ua matou iloa e lei taitai lava ona matou atoatoa, ae matou te alolofa ia te outou, ma, faatasi ai ma o outou tina, matou te manatu tele i lo outou filifiliaina o le mea sao.
O le isi, mulimuli i le perofeta. O nei tamalii e toa 15 ua tatou lagolagoina o ni perofeta, tagata vaai, ma tali faaaliga, ua tuuina i ai le mana paia e iloa ai mea tatou te le iloaina i nisi o taimi. Ua tuuina mai e Peresitene Hinckley ia i tatou fautuaga manino ma le patino e uiga “i le tiapolo o loo i tua o mata ataata.”16 Ma ua outou maua ni taitaiga musuia i totonu o le tamaitusi, Mo Le Malosi o le Autalavou.17 A o e faaaogaina le fautuaga a Peresitene Hinckley, ua folafola mai le Alii o le a Ia “tafieseina le malosi o le pogisa mai o outou luma.”18 O le a outou iloa atu “le tiapolo i tua o mata ataata” ma o le a tuua ai outou e ana faatosinaga.
O le mea aupito sili ona taua, ia avea le Agaga Paia ma ou taiala. Ua folafola mai e le Alii ia i tatou e faapea, a tatou ola amiotonu, o le a oo mai le leo itiiti ma le filemu i o tatou mafaufau ma o tatou loto.19 Sa outou lagonaina lenei mana. Ua outou iloa lenei leo.20
O le meaalofa o le Agaga Paia o se meaalofa faaleagaga. E maaleale ma o le a le fegalegaleai ma ni mea e le mama. E le mafai ona e faatiga i ai pe le amanaiaina i se aso, ona e faamoemoe lea na te faamalosia oe i le isi aso e sosoo ai. Ae a e usitai i ana musumusuga ma tumau i le amiotonu, o le a faateleina lona malosi i totonu ia te oe. Sa lapataiina e le Agaga Paia lau uo i tulaga matautia faaletino; o le a lapataiina foi oe e le Agaga Paia i tulaga matautia faaleagaga.
Ma le mea mulimuli, ia maua sa oe lava molimau e uiga i le Faaola. Ia tatalo faatauanau. Faitau le Tusi a Mamona pe a le tilotilo atu se isi. Ia i ai se taimi na o oe e te mafaufau ai pe o ai moni lava Iesu ma pe aisea ua taua ai Lona soifuaga ma [Lana] taulaga ia te oe.
Ia manatua le faataitaiga a le taulealea o Iosefa Samita. Sa ia tutuina le moligao e faitau ai le Tusi Paia, ona sa manao i ai o ia. Ina ua alu atu o ia i le togavao e tatalo ai, sa alu toatasi o ia.21
A o tatou faateleina lo tatou malamalama ma le alofa mo le Faaola, o le a susulu mai Lona malamalama i mea uma o siomia ai i tatou. Ona mafai ai lea ona tatou iloa moni atu le leaga.22
Ou te iloa o Iesu Keriso o lo tatou Faaola. E le mafai ona faamatalaina i upu Lona maoae ma [Lona] mamalu, Lona tulaga faatupu ma le matagofie. Sa faaali mai o Ia ma Lona Tama i le Perofeta o Iosefa Samita. O Peresitene Gordon B. Hinckley o le perofeta a le Atua i aso nei. Uso e, ua tatou umia Lana perisitua paia. Ao faatumauina lo tatou agavaa, o le a faamanuiaina i tatou e iloa atu le tiapolo o loo i tua o mata ataata. Ou te molimau atu ai i le suafa o Iesu Keriso, amene.