O Loto Ua Fusia Faatasi
Ina ua papatisoina oe, sa vaavaai ifo ou augatama ia te oe ma lo latou faamoemoe… . Latou olioli ai lea i le vaai atu ua osia e se tasi na tupuga mai ia te i latou se feagaiga e saili i latou.
O la’u savali e mo i latou e liliu mai i le Ekalesia. E silia ma le afa o tagata o le Ekalesia i le taimi nei, ua latou filifili e papatiso pe a mavae le valu tausaga le matutua. O le mea lea, e le o outou o se vaega toaitiiti o le faitau aofai o le Ekalesia. Ou te fia fai atu ia te outou, e alofa tele ma faatuatuaina outou e le Alii. E le gata i lena, ae ou te fia ta’u atu foi, o loo matua faalagolago mai o Ia ia te outou.
Sa outou lagonaina sina vaega o lona alofa ina ua outou papatiso. I le tele o tausaga ua mavae, sa ou papatisoina ai se taulealea e 20 tausaga le matua. Sa ma aoaoina ma la’u soa o ia i le talalelei. O ia le tagata muamua o lona aiga ua faalogo i le savali o le talalelei toefuataiina. Sa talosaga mai e fia papatiso. O le molimau a le Agaga na mafua ai ona ia manao e mulimuli i le faataitaiga a le Faaola, lea sa papatisoina e Ioane le Papatiso e ui lava ina sa leai Sana agasala.
Ina ua ou faatuina a’e le taulealea mai le vai o le papatisoga, sa ia faateia a’u ina ua ia fusi atu lo’u ua ma musumusu mai i lo’u taliga, a o tafe ifo ona loimata i ona alafau, “Ua ou mama, ua ou mama.” O lena lava taulealea, ina ua mae’a ona tuu o malima i luga o lona ulu, i le pule o le Perisitua Mekisateko ma faaee atu ia te ia le Agaga Paia, sa ia fai mai ia te au, “Ina ua e tautala mai i na upu, sa ou lagonaina se mea e pei o se afi o aga’i mai lo’u tumua’i i lo’u tino, seia tau i o’u vae.”
E ono tulaga ese foi lou lava aafiaga ia te oe, ae sa e lagonaina le maoae o faamanuiaga na oo atu ia te oe. Mai i lena taimi, sa e lagonaina le moni o folafolaga sa faia ia te oe ma folafolaga foi sa e faia. Sa e lagonaina le mama mai lou papatisoga, ona o le Togiola a Iesu Keriso. Sa e lagonaina foi le suiga i lou loto ina ua avea le Agaga Paia ma au soa. Ua amata ona suia ou mana’o.
A ta’u mai e se tagata ia te au o ia o se tagata liliu mai i le Ekalesia, ou te fesili lava, “Ua talia e se isi tagata o lo outou aiga le talalelei?” Afai o le tali o le “Ioe,” ona sosoo mai ai lea ma se faamatalaga fiafia o le vavega i le olaga o se tasi o matua po o se uso po o se tuafafine foi, po o se tasi o matua matutua. E i ai le olioli pe a iloa o i ai se tasi o le aiga o lena tagata ua maua foi le faamanuiaga ma le fiafia. Afai o le tali o le “Leai, e na o a’u le tagata lotu,” e toetoe lava e na o matua e talanoa mai ai, i le fai mai o se faaupuga faapea, “Leai, e lei i ai lava. Ae o loo ou taumafai pea lava.” Ma e mafai ona e iloa mai le leo, o le a le tuu ai lava le taumafai a le tagata liliu mai, e leai.
Sa silafia lava e le Alii o le a i ai ia te oe na lagona, ina ua Ia faatagaina oe e te maua feagaiga ia ua avea ma faamanuiaga i lou olaga. Sa Ia silafia o le a e maua se manao ia maua foi e lou aiga faamanuiaga sa e maua ina ua e auai i le Ekalesia. E le gata i lena, ae sa Ia silafia foi o le a faateleina lena manao pe a e iloa le olioli e maua i folafolaga Na te tuuina mai ia te i tatou i malumalu paia. O iina, o i latou ua agavaa, tatou te osi feagaiga ai ma Ia. Tatou te folafola atu e usiusitai i Ana poloaiga. Ae folafola mai e Ia ia te i tatou, afai tatou te faamaoni, e mafai ona tatou nonofo faatasi ma Ia i le mamalu, ma aiga e faavavau i le olaga atali.
O Lona alofa mutimutivale tele, sa Ia silafia ai o le a e manao e fusia e faavavau i ou matua ma o latou matua. Atonu sa i ai sou tamamatua e pei o lo’u tamamatua, e fiafia lava o ia pe a ou asiasi atu. Sa ou manatu lava e sili ona pele a’u i fanau a ana fanau, seia vagana ina ua ta’u mai e isi o’u tausoga e faapena uma foi o latou lagona. Ua maliu nei o ia. Ua maliliu uma matua o o’u matua ma o latou foi augatama. E toatele foi o outou augatama ua maliliu, ae latou te lei mauaina se avanoa e talia ai le talalelei ma maua faamanuiaga ma folafolaga ua outou maua. E sa’olele le Alii ma e alofa foi o Ia. O lea ua Ia saunia ai se ala mo oe ma a’u ia maua ai le mana’o i o tatou loto, e ofo atu i o tatou augatuaa faamanuiaga uma ua Ia aumai mo i tatou.
O le fuafuaga e mafai ai lena mea, sa i ai lava talu le amataga. Sa tuuina atu e le Alii ni folafolaga i Ana fanau anamua. O le tusi mulimuli o le Feagaiga Tuai o le tusi lea a le perofeta o Malaki. Ma o toe upu o i ai, o se folafolaga matagofie lea ma o se lapataiga malosi foi:
“Faauta, ou te auina atu ia te outou o Elia le perofeta, a o lei oo mai le aso o Ieova e sili, ma le matautia:
“Na te faaliliuina loto o matua i fanau, ma loto o fanau i o latou matua, ne’i ou alu atu ma ou taia le nuu i le faafanoga.”1
E matua taua tele ona malamalama i nisi o na upu. O le aso sili ma le matautia o le Alii, o le iuga lea o le lalolagi. O le a afio mai Ieova, ma le Mesia i le mamalu. O le a fano i latou uma e amioleaga. Ua tatou ola i toe aso. E ono le lava se taimi tatou te faataunuuina ai mea sa tatou folafola atu e fai.
E taua ona tatou iloa le mafuaaga na folafola mai ai e le Alii e auina mai Elia. O Elia o se perofeta maoae sa i ai le mana maoae na tuuina i ai e le Atua. Sa ia umia le mana silisili na tuuina mai e le Atua i Ana fanau: sa ia umia le mana e faamau ai, o le mana e fusifusia ai i le lalolagi ma fusifusia ai foi i le lagi. Sa tuuina atu e le Atua i le Aposetolo o Peteru. Ma sa tausia e le Alii Lana folafolaga e auina mai Elia. Sa sau Elia i le Perofeta o Iosefa Samita i le aso 3 o Aperila, 1836, ina ua faatoa uma le faapaiaga o le Malumalu o Katelani, o le uluai malumalu na fausia ina ua mae’a le Toefuataiga o le talalelei. Sa faamatala e Iosefa lena taimi paia:
“O se tasi faaaliga vaaia sili ma le matagofie ua faafuase’i ona oo mai ia i ma’ua; aua o Elia le Perofeta, o le na aveina i le lagi a e le’i tofo i le oti, ua tu mai i o ma’ua luma, ma faapea mai:
“Faauta, ua oo mai lava le aso na ta’uina e le fofoga o Malaki—ua molimau mai o le a auina mai o ia [o Elia], a o lei oo mai le aso tele ma le mata’utia o le Alii—
“E faaliliuina ai loto o tama i fanau, ma fanau i tama, ina ne’i taia le lalolagi atoa i le fetuu—
“O lea, o ki o lenei augatupulaga ua tuuina atu ia te oulua; o le mea foi lenei, lua te iloa ai ua latalata mai le aso tele ma le mata’utia o le Alii, ua i faitotoa lava.”2
Ina ua e auai i le Ekalesia, sa e lagonaina le liliu atu o lou loto i lou aiga, e le gata ia i latou o ola ae faapea foi i latou o i ai i le lalolagi o agaga. Sa saunia foi e le Alii se isi faaaliga vaaia e fesoasoani ai ia e iloa le mea e fai i na lagona.
Ina ua mavae atu Iosefa Samita, sa tofia e le Alii isi perofeta e taitai Lana Ekalesia. O se tasi [o na perofeta] o Iosefa F. Samita. Sa ia vaai i se faaaliga i le mea sa tupu i le lalolagi o agaga ina ua afio atu i ai le Faaola iina, i le va o Lona maliu ma Lona Toetu.3 Sa vaaia e Peresitene Samita le olioli o agaga ina ua latou iloa ua motusia e le Faaola ia noataga o le oti, ma o Lana Togiola ua mafai ai ona latou toetutu. Sa ia vaaia foi le Faaola o faatulaga Ana auauna sa i ai i agaga, e tala’i Lana talalelei i agaga uma lava ma avatu i ai le avanoa e filifili ai feagaiga ma faamanuiaga ia o loo tuuina atu ia te outou, o na foi ua outou mananao e maua e o outou augatama. E tatau ona maua e tagata uma lena avanoa.
Sa vaaia ai foi e Peresitene Samita ia taitai na tofia e le Faaola e aveina atu le talalelei i fanau a le Tama Faalelagi i le lalolagi o agaga. Sa ia ta’ua nisi o i latou: O le Tama o Atamu, o le Tina o Eva, o Noa, Aperaamo, Esekielu, Elia, o perofeta ua tatou iloa mai le Tusi a Mamona, ma nisi mai aso e gata ai, e aofia ai ma Iosefa Samita, ma Polika Iaga, o Ioane Teila, ma Wilford Woodruff. Manatu i le mana o na faifeautalai e aoao atu ai le talalelei ma pa’i atu ai i loto o o outou augatuaa. E le o se mea e ofo ai i le saunoaga a Wilford Woodruff a o soifua, e talitonu o ia e na o ni nai tagata toaitiiti, pe afai e i ai, o augatuaa o le Au Paia o Aso e Gata Ai i le lalolagi o agaga, latou te filifili e teena le savali o le faaolataga pe a latou faalogo i ai.4
E toatele o outou augatama ua maliliu, o le a mauaina se molimau e moni le savali a faifeautalai. Ina ua e mauaina lena molimau, sa mafai ona e talosaga i faifeautalai e papatiso oe. Ae o i latou o i ai i le lalolagi o agaga, e le mafai. O sauniga ua outou taliaina, e na o le lalolagi nei e maua ai. E tatau i se tagata o i ai i lenei lalolagi ona alu i se malumalu paia e taliaina ai feagaiga e fai ma sui o le tagata i le lalolagi o agaga. O le mafuaaga lena o la tatou matafaioi, e saili ai igoa o o tatou augatama, ma ia mautinoa ua tatou tuuina atu i ai mea e le mafai ona latou maua iina e aunoa ma la tatou fesoasoani.
Ia te a’u lava ia, o lo’u iloaina o lena mea, ua liliu atu ai lo’u loto e le gata i o’u augatama o loo faatalitali mai, ae faapena foi i faifeautalai o loo aoaoina i latou. O le a ou vaai i na faifeautalai i le lalolagi o agaga, e faapena foi outou. Mafaufau i se faifeautalai faamaoni o loo tu iina, faatasi ma i latou ua alofagia e ia, ma aoao ou augatama. Vaai faalemafaufau i le fiafia o foliga o se faifeautalai faamaoni a o e savali atu ia te ia, o i ai ma ou augatama sa ia faaliliuina mai ae le mafai ona papatiso pe faamauina foi i lona aiga sei vagana ai ina ua e sau e laveai. Ou te le iloa le faiga i lena nofoaga, ae ou te vaai faalemafaufau i ni lima ua fusimau i lou ua ma ni loimata o le faafetai.
Afai e mafai ona e manatu faalemafaufau i le fiafia o le faifeautalai ma ou augatama, manatu i le Faaola pe a oulua fetaiai ma Ia. O le a faia se lua faatalanoaga. Sa Ia totogiina le tau o au agasala ma fanau agaga uma a le Tama Faalelagi. O Ia o Ieova. Sa Ia auina mai Elia. Sa Ia faaeeina mai mana o le perisitua e faamau ai ma faamanuia ona o lona alofa mama. Sa Ia faatuatuaina foi oe i le faatagaina lea o oe e faalogo i le talalelei a o e soifua ai, ma avatu ai ia te oe le avanoa e talia ai le matafaioi e ofoina atu ai ia i latou o ou augatama latou te lei mauaina lou avanoa taua. Manatu i Lona faafetai mo i latou ua totogiina le tau e ala i lo latou galulue ai ma le faatuatua e sailia igoa o o latou augatama, ma alolofa ia te i latou faapea foi ma Ia, ua latou ofoina atu ai ia te i latou le ola e faavavau i o latou aiga, o le meaalofa sili i lo meaalofa uma a le Atua. Sa Ia ofoina atu mo i latou se taulaga e le i’u. O le a alofa o Ia ma talisapaia i latou e totogiina soo se tau latou te mafaia ina ia faatagaina ai o latou augatama e filifili Lana meaalofa o le ola e faavavau.
Ona ua liliu atu lou loto, atonu o le a le taugata tele se tau. E te amata i le faia o nai mea iti. Tusi i lalo mea ua e iloa e uiga i lou aiga. E tatau ona e tusia ia igoa o matua ma o latou matua, ma aso fanau po o aso na faaipoipo pe maliliu ai foi. A mafai, tusi ma nofoaga. O le a e manatua nisi o na mea. Ae e mafai foi ona e fesili i tagata o ou aiga. Atonu o i ai ni a latou pepa fanau, pepa faaipoipo, po o pepa maliu. Fai ni kopi ma faatulaga lelei. Afai na e faalogo i ni tala i o latou olaga, tusi foi i lalo ma teu. E le na o igoa o loo e faaputuputuina. O le a avea ma au uo e te alofa i ai, ia tagata e te lei feiloai i ai i lou olaga atoa. O le a fusia lou loto i o latou loto e faavavau.
E mafai ona e amata saili i nai augatupulaga muamua, ma faasolo atu ai i tua. O iina o le a e iloa ai le tele o ou augatama o loo manaomia lau fesoasoani. Ua i ai se tasi i la outou uarota po o le paranesi a le Ekalesia ua tofia e fesoasoani ia te oe, e saunia na igoa mo le malumalu. O iina e mafai ai ona ofoina atu ia i latou, ia feagaiga o le a faasaolotoina ai i latou mai falepuipui o agaga ma fusia ai i latou i aiga—lou aiga—e faavavau.
O ou avanoa ma matafaioi ua maua mai ai, e ofoofogia i le talafaasolopito atoa o le lalolagi. Ua tele atu malumalu i le lalolagi atoa nai lo le mea sa i ai. Ua tele atu tagata i le lalolagi atoa, ua lagonaina le Agaga o Elia ua uunaia i latou e faamaumau faasinomaga ma mea moni o olaga o o latou augatama. Ua tele atu punaoa e saili ai o outou augatama nai lo le mea sa i ai i le talafaasolopito o le lalolagi. Ua liligi mai e le Alii le malamalama i le auala e maua ai na faamatalaga i le lalolagi atoa, e ala i le poto faanei ona po, lea sa foliga o se vavega i ni nai tausaga e lei mamao atu.
Faatasi ma na avanoa, ua i ai ma se matafaioi sili atu ia tausisia lo tatou faatuatuaga i le Alii. O le ua foaiina atu i ai mea e tele, e sueina atu foi i ai mea e tele.5 A uma ona e mauaina ni nai augatupulaga muamua, o le a faigata teisi atu le auala. O le a tele atu foi le tau. A o e agai i tua atu, o le a tele ina le atoatoa ia faamaumauga. Ona o la foi e saili e isi o lou aiga ia augatama, o le a e iloa ai o tagata ua e mauaina ua uma ona maua faamanuiaga atoatoa o le malumalu. Ona i ai lea o sau filifiliga faigata ma le taua e fai. O le a tofotofoina oe e taofi, ma tuu le galuega faigata o le sailiga i isi ua sili atu lo latou atamamai, pe tuu foi e fai i se isi taimi. Ae o le a e lagonaina foi se uunaiga i lou loto e faaauau le galuega, tusa po o le a le faigata.
A o faia lau filifiliga, ia manatua o igoa o le a faigata tele ona maua, o tagata moni lava na, o loo e nofo aitalafu ai i lou ola ai i lenei lalolagi, ma o le a e toe feiloai i ai i le lalolagi o agaga. Ina ua papatisoina oe, sa vaavaai ifo ou augatama ia te oe ma lo latou faamoemoe. Atonu a mavae ni seneturi, ona latou olioli ai lea i le vaai atu ua osia e se tasi na tupuga mai ia te i latou se feagaiga, e saili i latou ma ofoina atu ia te i latou le saolotoga. I le toe tuufaatasia o outou, o le a e vaai atu ai i o latou mata, a le o le faafetai po o le matua le fiafia foi. Ua fusia o latou loto ia te oe. Ua i ou lima lo latou faamoemoe. O le a tele atu lou malosi nai lo le mea o i ai, pe a e filifili e galue i le sailia o i latou.
I ni nai po ua mavae, sa fai ai sa’u miti. Sa ou vaaia se fasi pepa paepae o i ai se igoa ou te le iloa, ma se aso sa na o sina vaega sa mafai ona ou faitauina. Sa ou nofo i luga ma savali atu i faamaumauga a lo’u aiga. O le faaiu sa i ai i le fasipepa, e mai se laina o le gafa o lo’u tina i le 300 tausaga talu ai i se nofoaga e ta’u o Eaton Bray. Ua i ai se tagata ua naunau e faamuta lenei faatali umi. Ou te lei mauaina lava lena tagata. Ae ua ou toe mauaina foi le faamautinoaga, e auina mai e se Atua alofa le fesoasoani e tali mai ai i talosaga mo lenei galuega paia o le faaolaina o o tatou aiga, o Lana galuega ma Lona mamalu, lea ua folafola atu i ai o tatou loto. Ou te molimau atu ai, i le suafa o Iesu Keriso, amene.