Faamalosi i Lou Uso

Elder Robert J. Whetten

O Le Au Fitugafulu

I le tali atu i le fesili, “Le aoao e, o le fea poloaiga o i le tulafono ua sili,” na tali atu Iesu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i le lua te tuaoi, ia pei o oe lava ia te oe. O na poloaiga e lua ua autu ai le tulafono uma ma le au perofeta.”¹

Ia Isaraelu anamua e oo mai lava i augatupulaga o taimi, sa aoao atu ai e Ana perofeta o anamua ma aso nei, lenei upumoni aoao e faavavau—e faapea, ina ia maua le ola e faavavau, e tatau ona i ai le alofa i o tatou agaga: alofa mo le Atua lo tatou Tama e Faavavau ma o tatou uso a tagata.

I itula faaiu o Lana galuega i le lalolagi, na fetalai atu ai Iesu ia Peteru: “A ua ou faatoga mo oe, ina nei mavae lou faatuatua: a o oe foi, pe a liua mai oe, ona e faamalosi ai lea i ou uso.”²

Sa ia Peteru se molimau na maua mai le Agaga e uiga i le paia o Iesu Keriso. Sa iloa e Peteru, ma na maua mai lona malamalama e ala i faaaliga. Ae o lona liuaina, le suia atoa o lona olaga, ma lona tagata atoa, sa sili atu ona faamaonia ina ua mavae le aso o le Penetekoso, ina ua mavae ona mauaina le meaalofa e liua ai loto ma le molimau a le Agaga Paia.

Ioe uso e, ma tuafafine, e pei o Peteru i le Feagaiga Fou, o loo i ai foi ni a tatou molimau, ae pe o avea ea le liuaina o se faagasologa faifai pea i lou olaga? Pe le o i tatou ea o se galuega alualu i luma i aao o lo tatou Foafoa? Pe o faamanuiaina ea e le Atua isi [tagata] e ala atu ia te oe? Pe o e tatalo ea ma fesili atu pe o ai o finagalo le Alii e te faamanuiaina, e ala i lou sui atu i lana avega? Pe e te alofa atu ea i isi e pei ona e alofa ia te oe lava?

Ina ua ta’u atu e Iesu i le aoao tulafono, ina ia maua le ola e faavavau, e tatau ona alofa atu i lona tuaoi e pei o ia lava ia te ia, sa faapea atu le aoao tulafono ia Iesu: “O ai foi le tagata ma te tuaoi?” Na tali atu Iesu i Lana faataoto i le Samaria agalelei, ona fesili atu lea: “Pe ni a fa oe, o ai so latou nei o le toatolu ua fai ma tagata la te tuaoi ma le na maua e tagata fao mea? Ua fai mai ia, O le na alofa atu ia te ia.”³ O lenei faataoto, na aoao mai ai Iesu, e tatau ia i tatou taitoatasi ona faaali atu se alofa e le faatuaoia ma le agalelei i soo se tagata lava o le fanau a Lona Tama.

Sa aoao atu e le Tupu o Peniamina i le Au Paia o ona aso: “Ona o le taofi o le faamagaloina o a outou agasala i lea aso ma lea aso … ou te manao ai ina ia outou foai ni o outou oa i e matitiva, ia taitasi le tagata e tusa ma mea ua ia te ia. E pei o le fafagaina o e fiaaai, ma le faaofuina o e le lavalava, atoa ma le asiasi i e mamai, ma le tausiga o i latou i le faaleagaga atoa ma le faaletino.”⁴ Pe o e tuuina atu ea le fesoasoani faaleagaga po o le faaletino ia i latou o loo manaomiaina? Pe o e aapa atu ma faamalosia faatuatua o i latou o e o mai i le ekalesia e pei ona talosagaina ai e perofeta o o tatou aso?

O le liuaina o lona uiga o le faapaiaina o lou olaga i le tausiga, ma le auauna atu i isi o e o manaomia lau fesoasoani, ma le fetufaai atu o au meaalofa ma faamanuiaga. E lei fetalai mai le Alii, ia tausi i au mamoe pe a talafeagai ai, tausi a’u mamoe pe a e le pisi. Sa Ia fetalai mai, “Fafaga a’u mamoe ma a’u tamai mamoe; fesoasoani ina ia ola manuia i lenei lalolagi, ma faalatalata atu ia te oe. Taitai atu i latou i le saogalemu—o le saogalemu o filifiliga amiotonu o le a faapea ona saunia ai i latou mo le ola e faavavau.”⁵

O gaoioiga le faatuaoia uma o le agalelei ma le auauna atu, e faatuputeleina ai lou faaleagaga. O le a faaaoga oe e le Atua e faamanuia ai isi. O lou tuputupu ae faaleagaga ma le alualu i luma e faavavau e faatatau lelei lava i au sootaga—i le auala e te faia ai isi tagata. Pe o e alofa moni ea i isi ma avea [i tatou] ma faamanuiaga i o latou olaga? Pe o le auala o loo e faia ai isi, ua faaalia ai le tulaga o lou liuaina? O le tagata na te faia na mea i totonu o le Ekalesia mo na o ia lava, o le a le mafai ona ausia le sini o le atoatoa. O le auauna atu i isi o le mea lena e faatatau i ai le talalelei ma le olaga faaeaina.

I lau faigamalaga o le olaga, e tatau ona e aapa atu ma faamanuia ai olaga o o ou uso a tagata, o le tuuina atu o oe lava ia i latou o loo manaomia oe. Ua fetalai mai ai le Matai, “Aua ai se fia faasaogalemuina lona ola, e maumau ai ia te ia, a o le faamaumau lona ola ona o a’u ma le talalelei, e faasaoina e ia.”⁶

Sa tusi atu e Iakopo lana tusi “i ituaiga e sefulu ma le lua ua faasalalauina.”⁷ O Ana aoaoga e ono faatatau foi ia i tatou, le nuu o le Alii, o e o le a taliaina i se aso e gata ai le talalelei toefuataiina. Sa ia aoao mai mataupu faavae e tatau ona taitaiina ai au fegalegaleaiga ma isi tagata o le Ekalesia. Sa manatu o ia, o le poloaiga o le alofa i lou tuaoi e pei o oe lava ia te oe, o le “tulafono silisili.”⁸ Ia Iakopo, e le lava le i ai na o le molimau lava ia. E tatau ona avea le talalelei ma se mea e te ola ai i aso taitasi o lou olaga. “Ou te faaali foi ia te oe lo’u faatuatua i a’u galuega.”⁹ “A ia fai outou ma e anaana i le upu, ae aua le na ona faalogologo i ai.”¹⁰ O le faauigaina e Iakopo o le [tagata] ua liuaina o le: “O lenei lava le amio Atua e lelei ma le faamaoni i luma o le Atua o le Tama lea, ina ia tauasiasi atu i e matua oti ma fafine ua oti a latou tane i o latou tiga, ia leoleo foi o ia ia te ia, ina nei pisia mai o ia i le lalolagi.”¹¹ Sa ia faaiuina lana tusi puupuu ia i tatou i upu nei: “Le au uso e, ai se tasi o ia te outou ua sese i le upumoni, a ua faafoi mai se tasi ia te ia; Ia iloa e ia, o le faafoi mai le tagata agasala nai lona ala sese, e faaolaina e ia le agaga … e ufiufi foi e ia le vao agasala.”¹² E ala i le fesoasoani atu e toe faafoi mai se uso i le Ekalesia, ua e faaolaina ai o ia ma oe lava. E ufitia pe tuuitiitia au agasala aua sa e fesoasoani atu i le faaolataga o le isi [tagata].

Sa ou maua se faamanuiaga sili o lo’u ola ai i Amerika Latina, ma ou molimauina ai e au lava le faataunuuina o valoaga ma folafolaga na faia e Ana perofeta ma le Alii lava Ia.

“Ou te faapotopotoina lo’u nuu, le aiga o Isaraelu, mai lo latou faataapeapeina loaloa, ou te toe faatuina Siona ia te i latou …

“… Ou te faatumauina la’u Ekalesia ia te i latou, e au foi i latou i le feagaiga, e faitaulia foi faatasi ma i latou nei o e totoe o Iakopo, o i latou ua ou foaiina i ai lenei laueleele e fai mo latou tofi.”¹³

O le mea moni, ua faapotopotoina mai le fia selau afe [o tagata], mai le toeitiiti o atunuu uma o Amerika Latina. Ua folafola mai e valoaga ia i tatou, o le a faaauau pea lenei tuputupu ae. O le faatupula’ia o le tatou luitau sili lea, ae o le avanoa sili foi mo i tatou taitoatasi.

Sa faapea atu le Aposetolo o Paulo i tagata fou [o le ekalesia] i ona aso, “o lenei e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua.”¹⁴

E foliga mai o atunuu o loo televave ai le faatupula’ia o le Ekalesia, e toatele lava [tagata] latou te lagonaina o i latou o tagata ese ma e ua aumau, ma ua tuulafoaiina ai i latou. Afai tatou te fia molimauina le faataunuuina o folafolaga, e tatau ona tatou faia e pei ona faamatalaina e Moronae, “Ina ua uma ona talia i latou i le papatisoga … ua faitaulia i latou faatasi ma le ekalesia a Keriso; ma ua tusia o latou igoa, ina ia manatulia i latou ma tausia … ina ia faatumauina i latou i le ala tonu.”¹⁵

O le toatele o tagata toaaga [o le ekalesia] e talitonu o tagata le toaaga ma tagata fou liliu mai ua pauu i le ala, e ese a latou amioga ona latou te le talitonu i aoaoga faavae o le Ekalesia. O suesuega na faia, e le faamaonia ai lenei manatu. Ua faaalia [i suesuega] e toetoe lava o tagata le toaaga uma sa faatalanoaina, e talitonu o loo i ai se Atua, o Iesu o le Keriso, ma o Iosefa Samita o se perofeta, ma e moni le Ekalesia.

I tele o uarota ma paranesi, o loo i ai ni alii ma ni tamaitai lelei ma faamaoni se toatele, ua latou le iloaina pe faapefea ona latou toe foi mai i le ekalesia. O loo i ai faatasi iina ma ni tina ma ni tama lelei. Sa latou o ese mai, ma e leai lava se tasi na vaaia i latou, ma tuua ai i latou faatasi ma se manatu, e leai se tasi e popole [ia i latou]. A asiasi atu alii po o tamaitai faatuatua i nei tagata ma faauo i latou, faamalosia i latou, tatalo faatasi ma i latou, ma aoao atu ia i latou le talalelei, o le a latou toe foi mai ma o latou aiga. “Aua na faia e outou i le tasi o e aupito itiiti o o’u uso nei, o a’u lea na outou faia i ai.”¹⁶ O ai le tasi “e aupito itiiti o o’u uso nei”? Faamata o faatatau le [fetalaiga a le] Alii i le tagata faatoa papatisoina i totonu o le ekalesia po o i latou o e ua le toe toaaga, ma o le a toe foi mai pe afai e faasafua atu le aao moni o le faaaumea?

Ona o le taua tele mo agaga o tagata, ua sili atu ona manino mai ia i tatou taitoatasi ia tulafono o le faataunuuina o le galuega faafaifeautalai. E tatau i tagata o le ekalesia ona i ai faatasi ma faifeautalai faamisiona a o latou aoaoina atu lesona ma faia se vaega taua i le faagasologa o le liuaina mai o isi. E tatau i faifeautalai ona “talai atu lau talalelei i le Agaga”¹⁷ faatasi ai ma upu mai o latou lava loto, o upu moni na maua mai e ala i suesuega ma tatalo e tele. O le matafaioi a o tatou faifeautalai i le faagasologa faifai pea o le liuaina o isi, e le muta i le papatisoga. E tatau ona faaauau pea ona latou aoaoina tagata fou ma isi e manaomia le fafagaina faaleagaga.

O tusi lata mai nei mai le Au Peresitene Sili, o loo faamanatu mai ai i taitai perisitua le latou matafaioi i le faamalosia ma le lagolagoina o tagata fou o le ekalesia. “E ao lava ona tuuina atu le faaaumea e tagata uma o le uarota… e mafai e faiaoga o aiga ma faiaoga asiasi ona faatino se matafaioi taua.” E ao ona tuuina atu i uso fou ia “avanoa … e auauna atu ai ma tuuina atu so latou sao i le malosi o le uarota.”¹⁸

Uso e ma tuafafine, afai e faaauau le faagasologa o le liuaina ma le suia o i tatou taitoatasi, o tagata fou faapea ma tagata tuai [o le ekalesia], e tatau ona tatou auauna atu ma tuuina atu le tausiga faaleagaga i isi, ma e tatau ona tatou fesoasoani ia maua e isi le atoatoa o faamanuiaga o le Toefuataiga, e aofia ai faamanuiaga o le malumalu.

Sa tusi atu e le Perofeta o Iosefa Samita se tusi i le Au Paia i ona aso: “Uso Pele e:—O se tiute e ao i le Au Paia uma ona faia ma le lē faatuaoia mo ona uso—ia alolofa ia i latou i taimi uma, ma fesoasoani e le aunoa ia i latou. Ina ia tauamiotonuina i luma o le Atua, e ao ona tatou fealofani; … e mafai ona tatou alolofa i o tatou tuaoi e pei o i tatou lava, ma ia faatuatua i puapuaga.”¹⁹

O lo tatou perofeta lava o Peresitene Gordon B. Hinckley na saunoa mai: “Ou te faamoemoe lava, ou te tatalo foi, o i tatou taitoatasi … o le a faia se faaiuga e saili i latou o loo manaomia le fesoasoani … ma siitia i latou i le agaga alofa i totonu o le li’o a le Ekalesia, lea o le a mafana ai i lima malolosi ma loto alolofa i latou, faamafanafana ai, lagolagoina ai, ma tuu atu ai i latou i le ala o le fiafia ma ni olaga aoga.”²⁰

O le alofa e le na o se upu po o se tautinoga, ae o le poloaiga muamua ma le sili, o se poloaiga e manaomia ai le faatinoga—“Afai tou te alofa mai ia te au, ia outou tausi mai i au poloaiga”²¹ ma “Pe e te alofa mai ea ia te au? … Fafaga i au mamoe.”²²

E tatau ona e faia mea sa aoao mai e lo tatou Faaola ma Ana perofeta, o aso ua mavae ma aso nei: o le auauna atu, faamalosia le faatuatua, ma fafaga i latou o e o loo manaomia lou alofa ma faamanuiaga. Ua tuuina mai ia oe le folafolaga a le Alii, “Ai foi se talia outou, ou te i ai foi, aua ou te muamua atu i o outou luma … a o lo’u Agaga o le a i o outou loto.”²³

Uso e ma tuafafine, a o e aapa atu i le alofa e faamanuia ai se olaga o se isi tagata, o le a faamanuiaina uma ai [oulua] i Lona Agaga. Ua aoao mai le Alii, o le a “malamalama le tasi i le tasi, ma [o le a] faamanuiaina ma olioli faatasi i laua uma.”²⁴

O la’u tatalo ina ia faamanuia mai e le Tama Faalelagi outou taitoatasi i lena alofa mo isi, “ua foaiina mai ia te i latou uma o e ua fai ma soo faamaoni o lona Alo.”²⁵Ou te molimau atu o Lona Alo o Iesu Keriso o loo soifua, ma o le talalelei o le talalelei o le alofa. I le suafa o Iesu Keriso, amene.