O Le Sefuluai—O se Poloaiga Foi mo ē Le Tagolima
Mai lava i le amataga, o taulaga faamaoni sa avea ma se faailoga patino o [tagata] faamaoni.
I le tusi ua leva a Charles Dickens’ o le, A Christmas Carol, sa manao ai Bob Cratchit e fia fai Kerisimasi ma lona aiga. “‘Pe afai e talafeagai, lau Susuga,’” sa ia fesili atu ai i lona pule o Mr. Scrooge.
“‘E le talafeagai,’ o le tala lea a Scrooge, ‘ma e le fetaui foi. Afai ou te taofia se vaega o lou totogi ona o lou le faigaluega, o le a e faapea mai, e leaga lo’u faiga o oe.’ …
‘Ae, e le faapea’, o le tala lea a Scrooge, ‘e leaga lo’u faiga o oe, pe a ou totogiina [oe] ae e te le’i faigaluega.’
“Sa faapea atu le failautusi, o le Kerisimasi e na o le tasi lava i le tausaga.
“‘O se ‘alofaga leaga lea mo le gaoi, mai se tagata i aso luasefulu lima uma o Tesema!’ o le tala lea a Scrooge.”1
Ia Scrooge—e pei lava foi o soo se [tagata] manatu faapito po o le “tagata o le lalolagi,” e le taitai talafeagai le taulaga.
O le tagata o le lalolagi e tele ina manatu mo na o ia lava— e le gata ina faamuamua ia lava, ae e seāseā, pe afai e mafai, ona faalona lua se isi tagata, e oo lava foi i le Atua. Mo le tagata o le lalolagi, e le te’ite’i oo mai le taulaga. E le mafai ona faamalieina lona manao i ni mea se tele. E foliga mai e tele atu mea e manao i ai nai lo ana tupe maua, ma o le “lava” e faavavau lava ona le maua, e pei ona sa i ai le [alii] faaputuputu o Scrooge.
Talu ai ona o le tagata o le lalolagi e matele ina faaputu pe faaaogaina mea uma, o lea na poloaiina ai ma le poto e le Alii ia Isaraelu anamua ina ia ositaulaga, i faapolopolo o [a latou] lafu—ae le o manu ua totoe ma leaga—o faapolopolo o fua uma lava, ae le o fua ua totoe (Teuteronome 26:2; Mosaea 2:3; Mose 5:5). Mai lava i le amataga, o taulaga faamaoni sa avea ma faailoga patino o [tagata] faamaoni.
E lua vaega tetele o i latou o e e le faia ni taulaga: tasi o le tagata mauoa ma le matapeapea e le ositaulaga, ma le isi o le tagata mativa ma le le tagolima ua talitonu na te le mafaia ona ositaulaga. Ae, e faapefea ona e fai atu i se tasi o matelaina ia faalaiti mea e ’ai? O i ai ea se tulaga matuai maualalo o le mativa, lea e le tatau ai ona faamoemoe [e faia] se ositaulaga, pe o [i ai] se aiga e matuai le tagolima lava, lea e tatau ai ona taofia le totogiina o le sefuluai?
E masani ona aoao mai le Alii i le faaaogaina o tulaga ogaoga e faailoa mai ai se mataupu faavae. O le tala i le fafine ua oti lana tane i Sarefata, o se faataitaiga o le ogaoga o le mativa na faaaogaina e aoao mai ai le mataupu faavae, e le mafai e le alofa tunoa ona faoa le taulaga, e sili atu nai lo lona faoa o le faamasinoga tonu. O le mea moni, o le fuafaatatau tonu o le ositaulaga, e le o le tele o mea e tuuina atu e se tasi e taulagaina, ae o le mea ua ositaulaga ai se tasi e tuuina atu (tagai Mareko 12:43). E le sili le tofotofoina o le faatuatua pe a tumu le kapoti, nai lo le taimi e uma ai. I nei taimi taua, e le foafoaina e le faalavelave se uiga o se tagata—[ae] na te faaaliaina. O le faalavelave o le tofotofoga lea.
Sa nofo le fafine ua oti lana tane i Sarefata i aso o le perofeta o Elia, lea na ala mai i lana upu, na aumaia ai e le Alii se lamala i le nuu mo le tolu ma le afa tausaga (tagai Luka 4:25). Sa matuai faateteleina le vevela o le oge, lea na iu lava ina toetoe a feoti ai. O le tulaga lenei lea sa tatou maua i ai le fafine ua oti lana tane.
Na fetalai atu le Alii ia Elia, “Tulai ia oe, ma e alu i Sarefata … faauta, ua ou fai atu i le fafine o i ai ua oti lana tane, na te fafaga ia te oe” (1 Tupu 17:19). E ese lava, ona e le’i tauina atu ia Elia e alu i Sarefata seia latalata ina a feoti le fafine ua oti lana tane ma lana tama. O le taimi taua lava lenei—a o feagai ma le matelaina—o le a tofotofoina ai lona faatuatua.
A o agai atu o ia i le aai sa ia vaaia o ia [le fafine ua oti lana tane] o loo fai fafie.
“Ona valaau lea o ia i a te ia, ua faapea atu, Se’i e aumai sina vai itiiti i se ipu so’u inu ai.
“Ua alu o ia e aumai, ona toe valaau ai lea o ia ia te ia, ua faapea atu, Se’i e aumai i lo’u lima se fasi areto ma’u.
“Ona tali mai lea o ia, O loo soifua Ieova lou Atua, e leai se potoi areto ia te au, ua na o le luutaga o falaoa i le kate, ma sina suauu itiiti i le fagu: faauta, ua ou fai nei ni fafie se lua, ina ia ou alu, ma ou tunu ai ma maua ma si au tama tane, ma te aai ai, ona ma oti lea” (ff.10–12).
O se luutaga o falaoa o le mea moni o se mea itiiti lava, atonu e na o le tasi lava se ipu meaai e lava ai, lea e faatupu manatu ai le tali a Elia. Faafofoga foi: “Ona fai atu lea o Elia ia te ia, Aua e te fefe; alu ia, ina e faia le mea na e fai mai ai: ae—muamua ona e fai se potoi areto itiiti ma’u” (f. 13 faamamafa faaopoopo).
Ia pe le o le manatu faapito ea lena, e le gata ina fai atu muamua mo le potoi areto, ae masalo na o le pau foi lea o le potoi? Pe le’i aoaoina ea i tatou e o tatou matua ina ia faamuamua isi tagata, aemaise lava i se alii ina ia faamuamua se tamaitai, aemaise ai o se fafine ua oti lana tane ua matelaina? O lana filifiliga—pe ai, po o le taulagaina o lana meaai mulimuli ma vave oti ai? Atonu o le a ia taulagaina lana lava meaai, ae faamata e mafai ona ia taulagaina le meaai sa faamoemoe mo lana tama matelaina?
Sa malamalama Elia i le aoaoga faavae, e oo mai faamanuiaga pe a uma ona tofotofoina lo tatou faatuatua (tagai Eteru 12:6; MFF 132:5). E le’i manatu faapito o ia. I le avea ai ma auauna a le Alii, sa i ai Elia iina ina ia avatu, ae le o le aveese mai. E faaauau le tala:
“Ae muamua ona e fai se potoi areto itiiti ma’u [o faapolopolo] ma aumai ai ia te au, e mulimuli ane ona e faia lea ma oulua ma lau tama tane.
“Aua ua faapea ona fetalai mai Ieova le Atua o Isaraelu, E le uma le kate falaoa, e le faaitiitia le suauu i le fagu, seia oo i le aso e foaiina mai ai e Ieova le ua i le laueleele.
“Ona alu lea o ia, ua ia faia e tusa ma le upu a Elia: ua latou aai ai, o ia, ma Elia, ma lona aiga, ua tele aso.
“Sa le uma le falaoa i le kate, sa le faaitiitia foi le suauu i le fagu, e tusa ma le afioga a Ieova, na fai atu ia Elia (ff. 13–16; faamamafa faaopoopo).
O le mafuaaga e tasi e faaali mai ai e le Alii ia aoaoga faavae i tulaga aupito sili ona ogaoga, ina ia aveese ai ‘alofaga. Afai ua finagalo le Alii e oo lava i le fafine mativa ua oti lana tane e totogi ana tupe iti, o fea la e tutu ai isi tagata uma o e manatu e le talafeagai pe faigofie ona ositaulaga?
E le tatau i se epikopo, i se faifeautalai ona le manao pe leai se faatuatua e aoao atu ai le tulafono o le sefuluai i e matitiva. O le manatu “Latou te le gafatia,” e tatau ona suia i le, “E le mafai ona latou le gafatia.”
O le tasi o mea muamua lava e tatau ona faia e se epikopo e fesoasoani ai i tagata e le tagolima, o le fai atu lea ia i latou e totogi a latou sefuluai. E pei foi o le fafine ua oti lana tane, afai o le faaiuga a se aiga e le tagolima o le totogi o la latou sefuluai po o le aai, e tatau ona totogi la latou sefuluai. E mafai ona fesoasoani le epikopo i a latou meaai ma isi mea masani latou te manaomia seia oo ina mafai ona latou faalagolago ia i latou lava.
O Oketopa o le 1998, sa faatafunaina ai e le Afa o Mitch le tele o vaega o Amerika Tutotonu. Sa matuai popole lava Peresitene Gordon B. Hinckley mo i latou na aafia i lenei faalavelave, o le toatele o i latou na aveesea mea uma—meaai, lavalava, ma mea aoga i fale. Sa asiasi atu o ia i le Au Paia i aai o San Pedro Sula ma Tegucigalpa, Honduras ma Managua, Nicaragua. Ma e faapei foi o upu a le Perofeta alofa o Elia i le fafine matelaina ua oti lana tane, e faapena foi ona talitutusa ma le savali a lenei perofeta o aso nei i aai taitasi—ina ia ositaulaga ma ia usiusitai i le tulafono o le sefuluai.
Ae e faapefea ona e fai atu i se tasi ua matuai puapuagatia lava ina ia ositaulaga? Sa silafia e Peresitene Hinckley o uta meaai ma lavalava ua latou mauaina o le a fesoasoani latou te ola ai i le [taimi o le] faalavelave, ae sa sili atu lona alofa ma lona popole mo i latou nai lo lena. E ui lava i le taua o fesoasoaniga alofa, sa ia silafia o le fesoasoani aupito sili ona taua, e oo mai mai le Atua, ae le mai le tagata. Sa manao le perofeta e fesoasoani atu ia i latou i le tatalaina o pupuni o le lagi, e pei ona folafola mai e le Alii i le tusi a Malaki (tagai Malaki 3:10; Mosaea 2:24).
Sa aoao atu Peresitene Hinckley ia i latou, afai o le a totogi a latou sefuluai, o le a i ai pea lava meaai i luga o a latou laulau, o le a i ai pea lava ni lavalava i o latou tua, ma o le a i ai pea lava se malutaga i o latou ulu.
Pe a laulauina se taumafataga, e sili atu ona faigofie ona faasili se ipu se tasi i le amataga o le taumafataga, nai lo le tau sueina o se meaai mo se tagata e tuai atu, pe afai ua uma le taumafataga ma ua uma ona laulauina meaai. E faapena foi, pe le faigofie atu ai le tuuina atu i le Alii o faapolopolo po o uluai fua [o fanua], nai lo le faamoemoe o loo lava “mea ua totoe” mo Ia? Ona o Ia o le faapogai o la tatou tausamaaga, pe le tatau ea la ona avea o Ia ma malo faaaloalogia, e tatau ona laulau muamua [Lana taumafataga]?
Sa aoaoina au e lo’u tina agaalofa o Evelyn Robbins, i le tulafono o le sefuluai ina ua fa o’u tausaga. Sa ia tuuina mai ia te au se Atigiapa o Mea Faapipii ua avanoa, o le ituaiga apa e eu le tapuni. Sa ia aoao ia te au e tuu ai i totonu sene o la’u sefuluai ona ave ai lea i le epikopo. E le uma lo’u fia faafetai ia te ia, mo le Atigiapa o Mea Faapipii, atoa ai ma faamanuiaga na oo mai ona o le totogiina o le sefuluai.
I le A Christmas Carol, sa suia ai uiga o Mr. Scrooge—e le o le tagata lea sa i ai muamua o ia. E faapena foi, o le talalelei lenei o le salamo. Afai e musuia i tatou e le Agaga ina ia tatou matuai usiusitai i le tulafono o le taulaga i o tatou olaga, ia tatou amata faia lena suiga i le asō.
Ou te faafetai tele i le Faaola o le faataitaiga sili o le usiusitai e ala i le taulaga—o le na ofoina atu “o ia lava e fai ma taulaga ona o agasala,” ma avea [e tusa] ma upu a Liae, “ma faapolopolo i le Atua” (2 Nifae 2:7, 9; faamamafa faaopoopo). Ou te molimau atu ia te Ia ma nei mea, o Ana aoaoga, i le suafa o Iesu Keriso, amene.