Ia Lototetele ma Faatuatua i [taimi] o Puapuaga

Elder Adhemar Damiani

O Le Au Fitugafulu

O le talalelei a Iesu Keriso ua tatou maua ai le malosiaga ma se vaaiga e faavavau, tatou te faafetaia’ia ai ma le lototetele mea o le a oo mai.

E faapefea ona tatou maua le filemu i lenei lalolagi? E faapefea ona tatou tumau seia oo i le iuga? E faapefea ona foia faigata ma tofotofoga tatou te fetaia’i?

Ua fetalai mai le Faaola o Iesu Keriso: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou lototetele, ua ou manumalo i le lalolagi.”¹

O se vaega o lo tatou olaga faataitai i le tino, tatou te ui atu ai i puapuaga, tiga, ma faanoanoaga. Ua na o Iesu Keriso lava tatou te maua ai le filemu. E mafai ona fesoasoani mai o Ia ina ia tatou lototetele ma ia manumalo ai i luitau uma o lenei olaga.

O le a le uiga o le, ia lototetele? O lona uiga ia i ai le faamoemoe, ia le faavaivai, o le le aveesea o le faatuatua, ma le ola fiafia i le olaga: “Ua ola tagata, ina ia latou maua le olioli.”² O lona uiga ia faafetaia’ia ma le to’a le olaga.

O le talalelei a Iesu Keriso ua tatou maua ai le malosiaga ma se vaaiga e faavavau, tatou te faafetaia’ia ai ma le lototetele mea o le a oo mai. Ae peitai, e le tatau ona tatou manatu mama i faigata ua valoiaina mo o tatou aso.

O a nisi o nei faigata? E mafai faapefea ona tatou faafetaiaia [ia faigata]?

O nisi o nei faigata, o le leai o se faamoemoe, leai o se alofa, ma le leai o se filemu.

Ua aoao mai le perofeta o Moronae, “Afai foi e le ia te outou le faamoemoe, ua faatoilaloina o outou manatu; e oo mai le faatoilaloina o le manatu ona o le amioletonu.”³ Mo le toatele [o tagata], o tausaga o le a oo mai atonu o ni tausaga o le faanoanoa. O le tele lava o le amioleaga, o le tele foi lea o le faanoanoa o le a i ai.

Ua fetalai le Faaola, “E maalili foi loto o tagata e toatele, ona ua tupu tele o le amioleaga.”⁴ O le faateteleina lava o le amioleaga, o le leai foi lea o se alofa moni. O le taunuuga, e faatupulaia ai le atuatuvale, popole, ma le faanoanoa!

Na fetalai le Alii i le Perofeta o Iosefa Samita e faapea: “Ou te … loto ina ia iloa e tagata uma e vave oo mai lava le aso … o le a aveeseina ai le filemu mai le lalolagi, ma o le a pulea e le tiapolo lona lava malo. Ma lenei foi e i ai le mana o le Alii i luga o lana au paia, ma o le a nofo tupu i le lotolotoi o i latou.”⁵ Ua tatou ola i se vaitaimi ua aveesea ai le filemu mai le lalolagi.

I se isi itu, ua tatou nonofo i se vaitaimi sili ona matagofie, o se taimi ua toefuataiina mai ai e le Alii Lana perisitua. Ua toefuataiina mai le talalelei moni. Ua toe faatuina le malo o le Alii i luga o le fogaeleele. O Le Ekalesia a Iesu Keriso o le Au Paia o Aso e Gata Ai, o le malo lea o le Atua i le fogaeleele! O loo tatou fesoasoani e saunia le lalolagi mo le taimi o le a afio mai ai le Alii o Iesu Keriso e nofotupu ai.

Aisea e tatau ai ona tatou ui atu i tofotofoga i lenei olaga?

E le o nanaina e le Alii o le a Ia suesueina lo tatou faatuatua ma lo tatou usiusitai. Na Ia fetalai, “ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”⁶

Tatou te aoao mai le tusi o Failauga, “E tutusa ona oo o mea uma i tagata uma: e tasi lava le mea e oo i le ua amiotonu ma le ua amioleaga; i le ua lelei, ma le ua mama ma le ua le mama; … e pei ona oo i le tagata amiolelei, e faapena foi ona oo i le tagata agasala… . E oo le mea e tasi i tagata uma.”⁷ E oo tofotofoga i le olaga o le tagata o lē fausia lona olaga i luga o le papa o le talalelei, e faapena foi i le olaga o le [tagata] valea o lē fausia lona olaga i mea o lenei lalolagi.⁸

E faapefea ona tatou tali atu i nei tofotofoga?

Ua fetalai mai le Alii, “A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au.”⁹ E tatau ona tatou aveina i aso taitasi o tatou satauro ma faamalosi pea i luma—ae le na o le matamata ae le auai atoatoa i le tatou malaga e faavavau.

E mafai faapefea ona tatou iloa pe o tofotofoina pe o faasalaina i tatou e le Alii?

O tofotofoga o ni avanoa mo lo tatou agai i luma. Na fetalai mai le Alii, “E ao ina tofotofoina lou nuu i mea uma, ina ia sauniuni i latou e talia le mamalu o ia te au mo i latou, o le mamalu lava o Siona; o le foi e le onosai i le aoaiga e le aoga i lou malo.”¹⁰

A tofotofoina i tatou, e tatau ona tatou mafaufau loloto ma fesili ifo, “O le a se mea e finagalo le Alii ou te faia i lenei tulaga?”

Na fetalai atu e le Alii upu faamafanafana nei i le Perofeta o Iosefa Samita: “Ia e iloa ai lo’u atalii e, e tuuina atu ia te oe le poto masani ona o ia mea uma, ma avea mou lelei. Na oo ifo i lalo o mea uma le Atalii o le Tagata. Pe sili ea oe i lo ia?”¹¹ E tatau ona tatou manatu i tofotofoga taitasi o se avanoa mo le tuputupu ae. O le a i ai se aso tatou te malamalama ai i le mafuaaga.

Ua fetalai mai le Alii, “O i latou foi ou te alofa i ai ou te aoaiina ai foi ina ia faamagaloina a latou agasala, aua i le aoaiga ou te saunia le ala mo lo latou laveaiina.”¹² E alofa le Alii ia i tatou taitoatasi. E finagalo o Ia ina ia tatou fiafia. E oo mai lenei fiafia e ala i lo tatou faatuatua ia Iesu Keriso, e ala i lo tatou salamo moni ma le faamaoni, e ala i lo tatou usiusitai i Ana poloaiga, ma lo tatou tumau e oo i le iuga.

O nisi taimi atonu tatou te manatu ifo ai, e le faafofogaina pe tali mai le Alii ia tatou tatalo. I taimi faapena, e tatau ona tatou nonofo ma mafaufau loloto i mea na tatou faia i o tatou olaga. Afai e manaomia, e tatau ona ogatasi o tatou olaga ma le talalelei a Iesu Keriso. E ala mai i le Perofeta o Iosefa Samita, ua faaali mai ai e le Alii e faapea:

“O au, le Alii, na ou faatagaina le puapuaga na puapuagatia ai i latou ia oo atu ia i latou, ona o a latou solitulafono… .

“Sa faagesegese i latou ona faalogo i le leo o le Alii lo latou Atua; o lea, e faagesegese ai le Alii lo latou Atua ona faalogo i a latou tatalo, e tali atu ia te i latou i le aso o lo latou faalavelave.

“O le aso o lo latou filemu sa manatu mama i latou i lau faatonuga; a o le aso o lo latou faalavelave, e ao lava ina latou tapatapa mai ia te au.”¹³

Pe a tatou maua le manao faamaoni e faaogatasi o tatou olaga ma le finagalo o le Alii, o le a saunia lava o Ia i taimi uma e fesoasoani mai e faamama a tatou avega.

O le a le mea e faatamaiaina ai lo tatou lototetele ma o tatou faamoemoe?

Na ta’u atu e Iesu Keriso i le Au Aposetolo e Toasefululua, ia nisi o mea e mafai ona faatamaia ai o tatou faamoemoe ma tatou fiu ai: o le faatagaina o i tatou lava ina ia [tatou] pauu atu i le faaosoosoga, o le le onosai i puapuaga, o faigata, ma sauaga, o le fefe “i manao” o le lalolagi, o le sailia muamua o oa, o le fiu nai lo le tumau e oo i le iuga; ma le faatagaina o perofeta pepelo e faaseseina i tatou.¹⁴

O le a le mea tatou te maua ai le lototele ma le faamoemoe?

O le valaau a le alii ia i tatou taitoatasi o le “ia outou o mai ia te au, o outou uma o e tigaina ma mafatia i avega, o au foi e malolo ai outou.”¹⁵ O loo ia Iesu Keriso le mana e fesoasoani ai ina ia tatou maua le malologa mai tiga ma mafatiaga.

Na aoao mai le perofeta o Moronae:

“O lenei, afai ua i ai le faatuatua i se tagata, e tatau ona i ai ia te ia le faamoemoe; aua a leai se faatuatua, e le mafai ona i ai se faamoemoe.

“… Afai foi e agamalu ma lotomaulalo se tagata, ma ua ta’uta’u atu i le mana o le Agaga Paia, o Iesu o le Keriso ia, e ao ina i ai ia te ia le alofa.”¹⁶

Afai tatou te ola i aso taitasi i le faatuatua, agamalu, alofa ma le lotomaualalo, ma ta’uta’u atu o Iesu o le Keriso, ma taliaina Lana Togiola, o le a faamanuiaina i tatou i le malosi ma le faamoemoe e faafetaiaia ma foia ai tofotofoga ma mea tiga o lenei olaga.

O a nisi o folafolaga a le Alii ia i tatou taitoatasi?

“Ina fiafia ia, fanau iti e; aua ou te ia te outou, ou te le’i tuuesea foi outou.”¹⁷

“Ia fiafia pea, aua o le a ou taitaiina outou. O le malo e o outou lava ma faamanuiaga o i ai e o outou ia, o oa foi o le faavavau e a outou ia.”¹⁸

O le siiina mai o upu a le perofeta o Eteru: “O lea, ai se faatuatua i le Atua, e mafai o ia ona faamoemoe ma le faamaoni i se lalolagi e sili ona lelei, ioe, o se tofi i le itu taumatau o le Atua, e mai le faatuatua lea faamoemoega, e fai ai foi ma taula i agaga o tagata.”¹⁹

O le Atua o lo tatou Tama. O i tatou o Lana fanau. E alofa o Ia ia i tatou. E finagalo o ia ina ia tatou fiafia iinei i lenei olaga faapea foi ma le faavavau atoa. Ua taitaiina i tatou i aso nei e se perofeta moni a le Atua. O Iesu o le Keriso. O Ia, e mafai ai ona tatou maua le filemu i lenei lalolagi. I le suafa o Iesu Keriso, amene.