O Fua o le Uluai Faaaliga Vaaia
Ou te faitaulia Iosefa Samita faatasi ma e o a latou molimau ia Keriso na fesoasoani ia te au ina ia atiina ae ai la’u lava molimau i le Faaola.
Ua ono masina talu ona lagolagoina au e outou o tagata faamaoni O Le Ekalesia a Iesu Keriso e avea ma se sui o le Korama a Aposetolo e Toasefululua. O lenei valaauga na oo mai o se mea na matuai ofo ai le toatele, aemaise lava i le fanau a le ma fanau, o e na faapea mai, “Ae o ia o lo matou Opa! Ua na o ia o se tagata e pei o isi. Matou te taaalo ma ia, ma e masani ona ia otiina o matou ulu!”
Ina ua mavae le konafesi aoao ia Oketopa, sa ma talanoa atu ma lo’u toalua i le ma fanau i luga o le telefoni, ma sa faapea mai se tasi atalii o le ma fanau, “Talu ai ona o lo tatou vavamamao ma oulua ma e le mafai ona matou faatasi ma oulua i le Aai o Sate Leki, sa tatau lava ona e talotalo mai ia i matou a o faia lau lauga o le konafesi.” Matou te lei mafuta lava ma le ma fanau ma a latou fanau talu mai lena taimi e oo mai i lenei konafesi aoao, o lea ou te talotalo atu ai i lenei aso ma le faamoemoe ia fiafia ai le atalii o le ma tama. Ou te talotalo atu foi ia te outou uma o tagata lelei o le ekalesia, ma e taua tele a outou tatalo ma alofaaga ma e ma te talisapaiaina lava ma lo’u toalua.
I tausaga o lo’u tuputupu ae i Siamani, sa ou auai atu ai i le lotu i le tele o nofoaga ma tulaga eseese—i nai tamai potu faatauvaa i le pito i tua, i ni fale taugata, faapea ma ni falelotu faaonaponei. O nei fale uma e tasi lava le mea taua na tutusa ai: sa i ai le Agaga o le Atua; sa mafai ona lagonaina ai le alofa o le Faaola a o matou potopoto o se paranesi po o se uarota faaleaiga.
O le falelotu o Zwickau sa i ai se okeni pamu tuai lava. O Aso Sa uma lava e tofi ai se alii talavou e tuleiina i luga ma lalo le vae ina ia faaaoga ai le okeni. E oo lava i le taimi ae lei avea au ma Perisitua Arona, sa ou maua lava le faamanuiaga silisili i nisi taimi e lagolago atu ai i lena galuega taua.
A o usuina e le aofia a matou viiga faapelepele o le Toefuataiga, ou te pamuina ma lo’u malosi atoa ina ia aua lava ne’i leai se ea i le okeni. E le mafai ona sese le vaaiga i mata o le ta okeni e faailoa ai pe o lelei la’u galuega pe moomia ona faatopetope a’u taumafaiga. Sa masani ona ou lagonaina le faamamaluina ona o le taua o lenei tiute ma le faatuatuaga na tuuina mai e le ta okeni ia te au. O se lagona manaia o le faataunuuina, le i ai o se tiutetauave ma le avea ma se itutino o lenei galuega tele.
Sa i ai se isi aoga faaopoopo na maua mai i lenei tofiga: o le tagata e pamuina le ea e nofo i se nofoa faapitoa e maua ai se vaaiga maoae i tioata lanu lea e faamatagofie ai le vaega i luma o le falesa. O le tioata lanu o loo i ai le ata o le Uluai Faaaliga, faatasi ai ma Iosefa Samita o loo tootuli i le Vao Paia ma vaai a’e i le lagi i se malamalama faaniutu.
I le taimi o viiga a le potopotoga faapea ma le taimi o lauga ma molimau e faia e o matou tagata, e masani ona ou vaai atu ai i lenei ata o se taimi sili ona paia i le talafaasolopito o le lalolagi. I la’u vaaiga faalemafaufau, sa ou vaaia ai Iosefa o mauaina le malamalama, molimau, ma faatonuga paia a o avea o ia ma meafaigaluega faapaiaina i le aao o lo tatou Tama Faalelagi.
Sa ou lagonaina se agaga tulagaese a o o’u vaavaai atu i le vaaiga matagofie i lenei ata o loo i le tioata, o se taulealea ua talitonu i totonu o se togavao paia o le na faia se faaiuga lototoa e tatalo atu ma le faamaoni i lo tatou Tama Faalelagi, o le na faafofoga ma tali mai ma le alofa ia te ia.
Sa ou i ai iina, o se alii talavou—ina ua maea le Taua Lona Lua o le Lalolagi i Siamani, ma sa ou nofo i se aai ua faatafunaina, e fiaafe maila le mamao ese ma Palamaira i Amerika i Matu ma le silia ma le selau tausaga talu ona tupu lena mea. O le mana silisiliese o le Agaga Paia, na ou lagona ai i lo’u loto ma lo’u mafaufau e moni lava, na vaai Iosefa Samita i le Atua ma Iesu Keriso, ma na faalogo foi i o La siufofoga. Na faamafanafanaina e le Agaga o le Atua lo’u tagata i lea vaitau o le talavou faatasi ma se faamautinoaga i le moni o lenei taimi paia lea na mafua ai le amataga o se taumafaiga i le lalolagi atoa na fuafua ina ia “taavalevale atu seia tumu ai le lalolagi atoa” (MFF 65:2). Sa ou talitonu i le molimau a Iosefa Samita e uiga i lena aafiaga mamalu sa ia oo i ai i le Vao Paia, ma o loo o’u talitonu nei i ai. Na toe fetalai mai le Atua i le tagata!
I le toe tepa i tua, ou te faafetai ai i le tele o uo o e na fesoasoani ia te au i lo’u talavou ina ia maua se molimau i le Ekalesia toefuataiina a Iesu Keriso. Na muamua ona ou faatinoina se faatuatua faigofie i a latou molimau, ona ou mauaina ai lea o se molimau paia a le Agaga i lo’u mafaufau ma lo’u loto. Ou te faitaulia Iosefa Samita faatasi ma e o a latou molimau ia Keriso na fesoasoani ia te au ina ia atiina ae ai la’u lava molimau i le Faaola. Ae ou te lei iloaina le aoaoga a le Agaga na molimau mai ia te au e faapea o Iosefa Samita o se perofeta a le Atua, ae na lagona i lo’u loto talavou o ia o se uo a le Atua ma ona o lea tulaga, na avea ai foi o ia ma sa’u uo. Na ou iloa na mafai ona ou faatuatuaina Iosefa Samita.
O loo aoao mai e tusitusiga paia ia i tatou, o meaalofa faaleagaga e tuuina atu ia i latou o e ole atu i le Atua, o e alolofa ia te Ia, ma i latou o e tausia Ana poloaiga (tagai i le MFF 46:9). “Aua e le tuuina atu meaalofa uma ia te i latou taitoatasi, aua e i ai meaalofa e tele, ae tuuina atu e le Agaga o le Atua se meaalofa i tagata tutoatasi.
Ua tuuina atu i nisi le tasi, a o isi ua tuuina atu i ai se isi, ina ia manuia ai i latou uma” (MFF 46:11–12).
O le taimi nei ua ou iloaina ai o la’u molimau talavou na matuai faamanuiaina lava mai le molimau a le Perofeta o Iosefa Samita ma le toatele o uo i totonu o le Ekalesia o e iloaina “e ala i le Agaga Paia … o Iesu Keriso o le Alo o le Atua, ma sa faasatauroina o ia mo agasala a le lalolagi” (MFF 46:13). O a latou faataitaiga lelei, alofa, lima fesoasoani, na faamanuiaina ai au ina ia mauaina se isi meaalofa faapitoa a le Agaga o loo ta’ua i tusitusiga paia a o o’u naunau mo se isi malamalama ma le upumoni: “ua foaiina atu i isi ia talitonu i a latou upu, ina ia latou maua foi le olaga faavavau afai latou te tumau pea i le [faatuatua]” (MFF 46:14). E maeu le manaia ma le taua o se meaalofa faapenei!
A o tatou faamaualalo faamaoni i tatou lava, o le a faamanuiaina i tatou i lenei meaalofa ina ia faatuatua ma faamoemoe mo mea e le o vaaia ae moni (tagai Alema 32:21). A o tatou fiafia ai i afioga ua tuuina mai ia i tatou i tusitusiga paia ma perofeta soifua—e tusa lava pe na ona tatou mananao ia talitonu—ma aua ne’i teenaina le Agaga o le Alii, o le a faateleina o tatou loto ma o le a faamalamalamaina o tatou mafaufau (tagai Alema 32:26–28).
Na faamalamalamaina e le Faaola lava Ia lenei mataupu faavae o le alofa mutimutivale i le lalolagi atoa i Lana tatalo maoae faapuluvaga, na tuuina atu e le gata mo Ana Aposetolo ae mo le Au Paia uma foi, e oo lava ia i tatou i aso nei, po o fea lava tatou te ola ai. Na Ia fetalai:
“E le faapito la’u tatalo mo i latou nei, a o i latou foi e faatuatua ia te au ona o la latou upu;
“Ina ia tasi i latou uma; faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua, ina ia talitonu le lalolagi ua e auina mai au” (Ioane 17:20–21; faamamafa faaopoopo).
O le auala lenei ua faamanuiaina ai o tatou lava olaga taitoatasi i le Uluai Faaaliga a Iosefa Samita, o olaga o aiga, e oo lava i le aiga atoa o tagata—ua tatou talitonu ai ia Iesu Keriso e ala i le molimau a le Perofeta o Iosefa Samita. Na maua e perofeta ma aposetolo i le talafaasolopito atoa o tagata ia faaaliga mai le lagi e pei o lea na oo ia Iosefa. Na vaai Mose i fofoga o le Atua ma sa ia aoaoina ai, o ia lava o se atalii o le Atua, “ma ua faatusa i [Lona] Atalii e Toatasi na Fanaua” (tagai i le Mose 1:1–6). Na molimau mai le Aposetolo o Paulo na faaali atu Iesu Keriso toetu ia te ia i le ala i Tamaseko ma avea ai Paulo ma se tasi o Ana faifeautalai maoae (tagai Galuega 26:9–23). Ina ua faalogo ai i le molimau a Paulo i faaaliga mai le lagi i le taimi o lona faamasinoga i Kaisareia, na tautino ai e le Tupu o Akeripa, “[Toeitiiti lava] ona e faaliliuina lea o au e fai ma Kerisiano” (Galuega 26:28).
Ma e toatele foi isi perofeta anamua o e na tuuina mai foi ni molimau malolosi e uiga ia Keriso. O nei faaaliga uma, i ona po nei ma anamua, e taitai atu ai i latou o e talitonu, i le faapogai paia o le amiotonu ma le faamoemoe uma—i le Atua, lo tatou Tama Faalelagi, ma Lona Alo, o Iesu Keriso.
Na fetalai atu le Atua ia Iosefa Samita mo le faamoemoega ina ia faamanuiaina fanau uma a le Atua i Lona alofa mutimutivale, e oo lava i taimi o le le mautonu ma le le malupuipuia, i taimi o taua ma tala o taua, o faalavelave faaletagata ma faalenatura. Ua fetalai mai le Faaola: “Faauta, ua faaloaloa atu lo’u lima alofa ia te outou, ai se sau, ou te talia o ia” (3 Nifae 9:14). Ma o i latou uma e taliaina lenei valaaulia o le a “siosiomia i latou i lona alofa tele e le mafaatusaina” (Alema 26:15).
O lo tatou faatuatua i le molimau patino a le Perofeta o Iosefa ma le moni o le Uluai Faaaliga Vaaia, o le suesue ma le tatalo, loloto ma le faamaoni, o le a faamanuiaina ai i tatou i se talitonuga maumaututu i le Faaola o le lalolagi, o le na fetalai atu ia Iosefa “i le taeao lava o se aso matagofie ma le manino, i le amataga o le tau totogo ae o laau i le tausaga e afe valu selau lua sefulu” (Talafaasolopito—Iosefa Samita 2:14).
O le faatuatua ia Iesu Keriso ma se molimau ia te Ia ma Lana Togiola aoao e le na o se aoaoga faavae e maoae sona taua faateori. Ae o se faatuatua o se meaalofa e silisiliese, e mamalu mo ituaiga uma o lenei lalolagi, e tusa po o le a le gagana, ituaiga, lanu, tagatanuu, po o tulaga tau le tamaoaiga. E mafai ona faaaogaina mana o le faauigaina ina ia taumafai ai ia malamalama i lenei meaalofa, ae o i latou ua sili ona latou lagonaina le loloto o ona aafiaga o i latou ia o e o loo naunau e taliaina ona faamanuiaga, lea e maua mai se olaga mama ma le manino i le mulimuli ai i le ala o le salamo faamaoni ma le ola ai i poloaiga a le Atua.
A o tatou manatuaina ma faamamaluina le Perofeta o Iosefa Samita, ou te matuai faafetai lava ia te ia. O ia o se alii talavou lelei, faamaoni, lotomaualalo, atamai, ma lototele faapea ma se loto mama ma se faatuatua e le maluelue i le Atua. Sa amio sa’o o ia. I le tali atu i lana tatalo faamaualalo, na toe tatalaina ai le lagi. Na vaai lava Iosefa Samita i se faaaliga. Na ia iloa, ma na ia iloa sa silafia e le Atua, ma e le mafai ona ia teenaina (tagai Talafaasolopito—Iosefa Samita 2:25).
O lana galuega ma lana osigataulaga ua ou maua ai nei se malamalama moni i lo tatou Tama Faalelagi, o Lona Alo, lo tatou Togiola ma le Faaola o Iesu Keriso, ma e mafai ona ou lagonaina le mana o le Agaga Paia ma malamalama ai i le fuafuaga a le Tama Faalelagi mo i tatou, o Ana fanau. Ia te au lava ia, o fua moni lava nei o le Uluai Faaaliga Vaaia.
Ou te faafetai ai ona o le amataga o lo’u olaga sa faamanuiaina ai au i se faatuatua faigofie o Iosefa Samita o se perofeta a le Atua, ma na ia vaai i le Atua le Tama ma Lona Alo, o Iesu Keriso i se faaaliga. Na ia faaliliuina le Tusi a Mamona e ala i le meaalofa ma le mana o le Atua. O lena molimau ua faamautuina soo ia te au.
I le avea ai ma se tasi o e aupito itiiti ia te outou, ae i lo’u valaauga o se tasi o Aposetolo o Iesu Keriso, ou te molimau atu e moni lava o loo soifua o Ia, ma o Ia o le Mesia. O loo i ai sa’u lava molimau patino ia Iesu Keriso, le Faaola ma le Togiola o tagata uma. Na ou maua lenei malamalama e ala i le filemu e le mafaamatalaina ma le mana o le Agaga o le Atua. O le manao o lo’u loto ma lo’u mafaufau, ia ou mama ma faamaoni i le tautuaina o Ia e oo i le iuga o lo’u olaga.
Ou te molimau atu ai i le suafa o Iesu Keriso, amene.