Tutu i Mea Paia

Peresitene James E. Faust

Fesoasoani Lua i le Au Peresitene Sili

Ou te uunaia ai o tatou Au Paia uma i le lalolagi atoa i soo se mea e mafai ai, ina ia tauivi e tutu soo i mea paia.

O’u uso e ma tuafafine pele, ma uo i le lalolagi atoa, o se fiafiaga ma se tiutetauave tele le lauga atu ia te outou. E momoli atu o’u alofaaga, faaaloaloga, ma le faafetai tele mo outou taitoatasi.

Ua matuai osofaia lava i tatou mai soo se itu e le anoanoai o savali tatou te le manaomia. Ua tele faamatalaga ua gaosia i se aso e tasi nai lo le mea e mafai ona tatou taliaina i le olaga atoa. Ina ia matuai fiafia ai i le olaga, e tatau ia i tatou uma ona mauaina ni taimi toamalie ma le filemu o le mafaufau.¹ E mafai faapefea ona tatou faia lenei mea? E na o le tasi lava le tali. E tatau ona tatou tutu maualuga ae mai mea leaga o loo siomia ai i tatou. E tatau ona tatou mulimuli i fautuaga a le Alii, o le na fetalai mai, “O lo’u lava loto, o i latou uma o e valaau mai i lo’u igoa, ma tapuai mai ia te au e tusa i la’u talalelei faavavau, e ao ina potopoto faatasi, ma tutu i mea paia.”²

Tatou te tutu e aunoa ma le tau taofiofia i le tele o mea e le paia ma tatou oo atu ai i le tele o mea e mataga, inosia, ma faatafunaina ai le Agaga o le Alii lea ou te uunaia ai o tatou Au Paia uma i le lalolagi atoa, i soo se mea e mafai ai, ina ia tauivi e tutu soo i mea paia. O o tatou nofoaga sili ona paia o o tatou malumalu paia ia. O loo i ai i totonu se lagona mafanafana paia. E tatau ona tatou saili ina ia agavaa e ave o tatou aiga i le malumalu ma faamauina faatasi mo le faavavau. E tatau foi ona tatou sailia faamaumauga o o tatou tuaa ua maliliu ina ia mafai foi e i latou ona faamauina ia i tatou i totonu o se tasi o malumalu. E tatau ona tatou tauivi mo le paia e ala lea i le avea ma “faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”³ O le auala lenei e mafai ai ona tatou faatumauina ma faamalolosia o tatou lava sootaga taitoatasi ma lo tatou Atua.

O le paia o le malosiaga lea o le agaga. E oo mai e ala i le faatuatua i tulafono ma sauniga a le Atua. Ona faamamaina lea e le Atua le loto e ala i le faatuatua, ona mama ai lea o le loto mai mea leaga ma le le mama. Afai e maua le faapaiaina e ala i le gauai atu i le finagalo o le Atua, e vave ona iloa e se tasi le mea e sese ma le mea e sao i luma o le Alii. E oo mai le faapaiaina pe a i ai le toafilemu, e uunaiina ai mea e lelei pe le faamaonia ai foi mea e sese.

O le faapaiaina o se faatulagaga foi o le amiotonu. I nisi o tuleiga mai ia Peresitene Polika Iaga i le Tapeneko, i Sate Leki ia Fepuari 16, 1862, na ia faaaogaina ai le faaupuga “E Paia i le Alii.” Ona ia toe faamalamalamaina lea o le uiga ia te ia lava o le “E Paia i le Alii.” Ou te faitauina: “O le tolusefulu tausaga o le iloa ua aoaoina ai au, o taimi uma lava o lo’u olaga e tatau ona paia i le Alii, e mafua mai lea i le sa’o, faamasino tonu, alofa tunoa ma le tonu i au mea uma e fai, e na o le pau lea o le ala e mafai ai ona ou taofiofia le Agaga o le Silisiliese ia te au lava ia.”⁴

O le tausaga ua mavae na ave ai e se tasi o atalii o la’u fanau lona toalua i le Aai o Niu Ioka faatasi ma o la matua, e auai ai i le malumalu fou o Manhattan. O le vevesi ma le pisapisao o le faitauafe o tagata i fafo sa matuai lagona lelei. Ina ua tu le tamai taavale laupasese i luma o le malumalu, sa amata ona tagi ia Katherine, le toalua o le tama a lo’u afafine. E oo lava i fafo o le malumalu sa ia lagonaina lona paia. Sa la ulufale atu, ma tuua ai le pisapisao o le lalolagi i fafo, ma tapuai atu ai i totonu o le maota o le Alii. O se aafiaga paia ma le le faagaloina lea mo i laua.

E pei ona aoao mai i tatou e Peresitene Gordon B. Hinckley: “E manaomia le tuua o le pisapisao ma le vavao o le lalolagi i fafo, ae laa atu i totonu o puipui o se maota paia o le Atua, ina ia lagona ai Lona Agaga i se siosiomaga o le paia ma le filemu.”⁵ E moni lava, o le tatalo a Iosefa Samita i le faapaiaga o le Malumalu o Katelani na tali mai: “Ina ia lagona foi lou mana e tagata uma o le a ulufale i le faitotoa o le fale o le Alii, ma lagona le uunaiga e tautino atu … o lou lava lea, o se mea o lou paia.”⁶

I le falelauasiga o Peteriaka Iosefa Samita le Matua, na faamatalaina ona lagona e uiga i le malumalu i upu nei: “O le nofo ai i le maota o le Alii, ma faia fesili i lona malumalu, o se mea lea sa fiafia o ia e fai i aso taitasi; ma o totonu sa olioli ai o ia i faamanuiaga e tele, ma sa ia faaaluina itula e tele i ni fesootaiga malie ma lona Tama Faalelagi. Sa savalia toatasi e ia ona auala, sa saoloto ma sa na o ia lava mai le fanauga a tagata, ao lei taitai ona vaaia le oso ae o le la i tafailagi i sasae; ma sa ia taumemumemu ai ona moomooga i totonu o ona puipui, a o toafilemu mea uma. I totonu o ona puipui, sa tatala mai ai ni faaaliga i lona mafaufau, ma sa taumafa lona agaga i oa o le faavavau.”⁷

Ou te faafetai ona o loo tauaveina e o tatou malumalu ia upu, “O le Maota o le Alii, e Paia i le Alii.” O lenei faamanatu o nofoaga paia e i ai ona aa ia e tau atu lava i tua i le Feagaiga Tuai. O loo faamanatu mai e Sakaria ia i tatou o le a oo mai lena aso “e i ai i tagitagi uamea o solofanua, E PAIA IA IEOVA… . Ioe, o ulo uma foi i Ierusalema ma Iuta, e paia lava ia ia Ieova o ‘au.”⁸ E ese lo’u moomoo i ‘au o faitotoa o le Malumalu o Sate Leki. Ua matuai matagofie lava ona teuteuina, o loo tauaveina ai lena faamanatu, “E Paia i le Alii.”

I le avea ai ma se tamaitiiti i le itu i saute o Iuta i le 65 tausaga talu ai, sa masani ona ou lagona le faagaeetia pe a vaaia ia upu “E Paia i le Alii” i nisi o fale i nuu laiti. O na upu faaauro sa masani ona avea ma teuteu autu mo le tele o fale taua, e pei o le faleoloa o le sosaiete ma le fale teuoloa o le epikopo. O loo ia te au nisi o tusi faamaonia o oloa a le ZCMI, o se vaega o paionia i mea tau pisinisi. O loo i ai ia saini a Ioane Teila, Polika Iaga, Wilford Woodruff, Iosefa F. Samita, Lorenzo Snow, Heber J. Grant, Siaosi Alapati Samita, ma Tavita O. MaKei. O loo lomia i luga o tusi faamaonia taitasi ia upu “E Paia i le Alii.” Ou te manatunatu po o le a le mea ua oo i ai nei anavatau o le paia? Pe ua mou atu ea i le tele o isi faamanatu o le faatuatua ma le naunautai?

O le a matuai faamanuiaina aso o o tatou olaga a o tatou auai soo atu i malumalu e aoaoina sootaga faaleagaga o i tatou ma le Silisiliese. E moomia ona tatou taumafai malolosi ina ia maua mai o tutu i mea paia. O feagaiga o le malumalu ma le tausiaina o auala ia e fesoasoani ai e faamautuina le paia o le tagata. I lo tatou naunau ai ina ia faatupuina i o tatou tagata se naunautaiga tele i le galuega paia i o tatou malumalu, e tatau ona tatou uunaia i latou ina ia silasila totoa i le uiga faaleagaga moni e maua ai iina. E pei ona faamanatu mai e Paulo ia i tatou, “Aua e a le tusi e fasioti, ae a le Agaga e faaola.”⁹

Ua ta’u mai ia i tatou i o tatou taimi e Peresitene Gordon B. Hinckley: “Afai o alii uma i lenei ekalesia o e ua faauuina i le Perisitua Mekisateko e tatau ona faaagavaaina o ia lava e umia se pepa faataga o le malumalu, ma tatau ona alu i le fale o le Alii ma faafouina ana feagaiga i le paia i luma o le Atua ma molimau, o le a avea i tatou ma tagata sili atu ona lelei. O le a toaitiiti pe leai foi se le faamaoni ia te i tatou. O le tatalaina o faaipoipoga o le a toetoe ina mou atu. O le a faateleina le filemu ma le alofa ma le fiafia i o tatou aiga. O le a toaitiiti ava e fetagisi ma fanau foi fetagisi. O le a faateleina le agaga talisapaia ma le faaaloalo ia i tatou. Ma ua ou mautinoa o le a sili ona fiafia le Alii ma saga faamanuia mai i tatou.”¹⁰

E tatau i le Au Paia ona faia a latou sailiga faaleaiga ma auai i le malumalu aua na uunaiina i latou e le Agaga Paia ina ia faia faapea. E tatau ona tatou o atu i le malumalu, faatasi ai ma isi mafuaaga, ina ia faasaoina lo tatou lava faapaiaina faapea i o tatou aiga.

E faaopoopo atu i malumalu, e mautinoa lava o le isi nofoaga paia i le lalolagi e ao ona i ai o o tatou fale ia. O lagona o le faapaiaina i totonu o lo’u fale e saunia ai au mo lagona o le faapaiaina i totonu o le malumalu. Ae ou te lei alu atu i la’u uluai misiona i Pasila, sa saunia ai e lo’u tina agalelei se laei o le malumalu mo au e ofu pe a ou alu atu i le malumalu. Ua tuai nei ma masaesae, ae e taua tele, o se faailoga paia o le alofa faatina mo mea e paia.

Ou te faafetai i lo’u toalua pele o Ruth, e mafai ona ou fai atu o lo ma fale o se nofoaga lea sa ma sailia i ai le mamalu o le agaga o le paia i le Alii. E lei faamanuiaina pea lava i maua. E leai. Ae sa ma taumafai. Ina ua lofituina au o se tama talavou i le tiutetauave o le tausia o lo’u aiga i le faaletino, taulimaina o o’u valaauga faaleEkalesia, ma le tele o isi tiute faalemalo, o Ruth lava e toe faafoi maia au ma le agalelei i o’u tiutetauave faamatua i lo matou fale.

Mo se faataitaiga, na te faamanatu mai ia te au pe a oo i taimi mo le afiafi faaleaiga ma na te fautua mai ma le malu se mea atonu e talafeagai ona matou aoaoina i a matou afiafi faaleaiga. Na te faamanatu mai foi ia te au mea taua e tutupu i le aiga e pei o aso fanau ma gaoioiga a le fanau pe a latou moomia ai lo’u taimi ma la’u lagolago. O loo ia faia pea lena tautua taua ma le talisapaiaina. Afai tatou te matuai mananao lava i o tatou fale ina ia avea ma nofoaga paia, o le a tatou taumafai malosi e faia na mea e uunaia ai le Agaga o le Alii.

O o tatou falelotu ua faapaiaina i le Alii e avea ma nofoaga paia. Ua ta’uina mai ia i tatou faapea e tatau ona tatou ulu atu i le fale tatalo ma avatu ai a tatou faamanatuga i Lona aso paia.¹¹ O le taumafa i le faamanatuga o se avanoa mamalu ma le paia. O totonu o o tatou falelotu e aoaoina ai i tatou i mataupu faavae o le talalelei, e faamanuia ai tamaiti, e faamauina ai tagata ma tuuina atu i ai le meaalofa o le Agaga Paia, e tuuina atu ai foi ia molimau i le moni o le talalelei. Na taua e se tamaitai liliu mai i Texas, ina ua savali atu o ia i le faitotoa o le falelotu, sa i ai iina se lagona o le paia lea na te lei mauaina muamua lava i lona olaga.

E tatau ona tatou taumafai malosi ina ia avea ma ni tagata paia. O loo tatou ola i le atoatoaga o taimi. Ua tele mea ua toefuatai mai e ala mai i le Perofeta o Iosefa Samita. O lea ua tuu atu ai i o tatou luga se sootaga faapitoa ma le Alii. O i tatou e manuia ai, o i tatou e vaavaaia, ma tausia nei tiutetauave i lalo o le faamatuuina mai, o le pule, ma le taitaiga a Peresitene Hinckley, o loo umiaina uma ia ki. I le avea ai ma fanau a le Alii e tatau ona tatou tauivi i aso uma ina ia tutu i se tulaga maualuga o le amiotonu faaletagata i mea uma tatou te faia. E moomia ona tatou puipuia e le aunoa e tetee atu ai i aafiaga uma a Satani.

E pei ona aoao mai Peresitene Polika Iaga, “O taimi uma [o o tatou olaga] e tatau ona paia i le Alii, … e na o le pau lea o le ala e mafai ona [tatou] taofiofia ai le Agaga o le Silisiliese ia i [tatou].” Ia faamanuia e le Alii i tatou uma taitoatasi i lo tatou tiutetauave ina ia maua le paia i le Alii e ala i le tutu i mea paia. O iina o le a tatou maua ai le puipuiga faaleagaga tatou te moomia mo i tatou lava ma o tatou aiga. O le puna lena o le fesoasoani e tauave atu ai i luma le afioga a le Alii i o tatou aso. O le tutu i mea paia o le a fesoasoani ia i tatou ina ia tutu maualuga ae ai i aafiaga faatiapolo o o tatou aso ma tatou faalatalata atu ai i lo tatou Faaola. Ou te molimau atu afai tatou te faia lenei mea, o le a faamanuiaina i tatou e le Alii e faavavau ma o le a faamalolosia i tatou “i le faatuatua ma galuega.”¹² I le suafa o Iesu Keriso, amene.