O Ai o i le Itu a le Alii? O ai?
E fia silafia e le Alii po o ai e mafai ona ia faalagolago i ai.
O le afiafi nei ou te fia taulai atu ai o’u manatu i se viiga o loo faaosofia ai le valaau ina ia auauna atu, “O ai o i le itu a le Alii, o ai? / O le taimi lenei e faailoa mai ai” (Hymns, no. 260)
I lenei tisipenisione o le atoatoaga o taimi, a o tatou saunia mo le taua faaiu ma Satani i le tulimatai atu i le toe afio mai o Keriso i le lalolagi, e taua tele le iloa po o ai o i le itu a le Alii. E fia silafia e le Alii po o ai e mafai ona ia faalagolago i ai.
Atonu tou te faamoemoe ina ia mafai ona faitaulia uma i latou o loo umia le perisitua ina ia tulai atu mo le auaunaga i le autau a le Alii. I le taimi nei i totonu o le Ekalesia e tusa ma le 3 miliona i latou o loo umia le perisitua, e vaelua tutusa lelei ai lava le Perisitua Arona ma le Mekisateko.
Ae paga lea, o le toatele o nei alii, o e talavou ma i latou e le talavou tele foi, o loo misi ai, e misi e aunoa ma se faatagaga, AWOL.
Sa i ai se aso sa nonofo ai i latou a o faaee atu e alii o i ai le pule o latou lima i luga o o latou ulu ma tuuina atu le perisitua ia i latou. O lena aso sa latou osia uma ai se feagaiga o le usiusitai ma le auauna atu i le Alii.
Ina ia malamalama i le taua o nei feagaiga e moomia ona tatou fesili ifo ia i tatou lava, “O le a le perisitua?” Soo se tiakono mataala lava, ua iloaina le tali i lenei fesili: O le perisitua o le mana lea e galue ai i le suafa o le Atua.
O le a le uiga o lenei mea ia te outou tiakono, aoao ma ositaulaga? Muamua, o lona uiga ua faatagaina outou ina ia tufatufa atu, saunia ma faamanuia le faamanatuga. Pe o se matafaioi tele ea lenei? Ioe!
O ai na taulimaina le uluai sauniga faamanatuga lea ua tatou maua i ai faamaumauga? Ua mautinoa lava o le tali o le Alii o Iesu Keriso. O le afiafi a o lumanai lona puapuagatia i le Togalaau o Ketesemane, na saunia, faamanuia ma tufatufa atu ai e Keriso le faamanatuga i ona soo. A tatou faatinoina la lenei sauniga paia, o loo tatou tutu moni lava e fai ma sui o le Faaola lava Ia. E matuai faapitoa lava lena mea!
Na faaee atu e Ioane le Papatiso ona lima i luga o ulu o Iosefa Samita ma Oliva Kaotui ma faaee atu i o la’ua luga le perisitua o Arona ma folafola atu, “Ou te tuuina atu le Perisitua o Arona, o loo i ai ki o asiasiga ma galuega a agelu, ma le talalelei o le salamo, ma le papatisoga i le faatofuina mo le faamagaloina o agasala” (MFF 13:1) O se tiutetauave taua lena mo alii o soo se vaitausaga. O lena luitau ua matuai manino ai lava lo tatou i ai i le itu a le Alii.
Ae faapefea le Perisitua Mekisateko? O le vaega e 84 o le Mataupu Faavae ma Feagaiga o loo faitauina, “O lenei foi perisitua sili e taitaiina le talalelei ma taofia le ki o mea lilo a le malo, o le ki lea o le poto o le Atua” (f. 19). O le perisitua lenei o loo i ai le mana e pulea ma taitai ai, e faamanuia ma faamalolo ai, e aoao atu ma faamauina ai. O nei auaunaga a le perisitua e matuai manino ai lava le tuuina atu ai o uso o loo faatinoina, i le itu a le Alii.
O se tasi o faataitaiga sili lava o le mana o faamauga o le perisitua o le tala lea ia Nifae, le atalii o Helamana. Talu ai ona o lona atamai i le folafolaina atu o le afioga a le Atua, o lea na tuuina atu ai e le Alii le mana o faamauga ia te ia, “o se mea e te faamaufaailogaina i le lalolagi, e faamaufaailogaina foi lea i le lagi; o se mea foi e te tatala i le lalolagi, e tatalaina foi lea i le lagi” (Helamana 10:7) Semanu e avea Nifae ma se taitai maoae i le autau a le Alii i soo se tisipenisione.
E maeu lenei faatuatuaga o lo tatou Tama o i le Lagi i le faasoa mai lea ia i tatou o se vaega o Lona mana ina ia mafai ona tatou lagolago atu ai ia te Ia i Lana galuega tele, a o taavale atu seia faatumulia ai le lalolagi.
Ia matauina le matuai aoaoina faalelei o i tatou e tusa ai ma le auala e faaee atu ai le pule o le perisitua. Ina ua 12 o’u tausaga, sa faaee mai ai lima o lo’u tama, o Charles Oaks, ma lo’u epikopo, o George Collard i luga o lo’u ulu, ma faaee mai i o’u luga le Perisitua Arona ma faauuina au o se tiakono.
I le tele o tausaga mulimuli ane, sa faaaogaina ai i le taimi lena e Elder Gordon B. Hinckley lenei lava faatulagaga faalelagi e faauu ai au o se Fitugafulu. O faauuga uma lava e atagia ai le faaopoopoina atu o le faatuatuaga faalelagi ma se avanoa fou e auauna atu ai i le itu a le Alii.
Afai e faatulagaina ia autau, e masani lava ona tauina ia taua i ni laufanua tetele. Ae o le taua lenei mo agaga e fai lava si ese mai ai. E faaauau pea feteenaiga i aso taitasi i o tatou olaga taitoatasi, ma tuuina ia autau a le Alii e faasagatau atu i auupega a Satani e i ai le faaloloto, manatu faapito ma le tuinanau.
O alii talavou masomasoa o le autau totoa e 2060 a Helamana, sa latou soosoo tauau, ua fautua mai ai le moomia o le malosiaga faaletino ina ia faapei ai o i latou. Ae o loo i ai lava le avanoa mo soo se agaga toa i lenei taumafaiga.
E i ai se atalii o se tasi o le ma fanau e 11 tausaga le matua, o Andrew, e fealuai i le nofoa faataavalevale, atonu e mo lona olaga atoa. O le a faauuina o ia e avea ma se tiakono i le tau toulu ma o le a auai i le autau o le perisitua a le Alii. O lona le atoatoa faaletino o le a le faatapulaaina ai o ia i lenei taua, aua o auupega e filifili mai ai e le o ni tao ma ni pelu e faaaogaina i se fanua o taua fevesiai.
Ae, o auupega e faavavau le aoga e atagia mai ai le ofutau atoatoa o le Atua e i ai le upumoni, amiotonu, faatuatua, tatalo ma le afioga a le Atua (Efeso 6:13–18). O nei auupega e faaaogaina i o tatou mafaufau, gutu ma gaoioiga. Soo se mafaufauga lelei ma amiotonu, upu ma galuega o se ‘ai lea mo le Alii.
O le mafuaaga lena e aunoa ai Andrew ma se le atoatoa i lenei taua. Ua aoaoina lelei o ia e ona matua. Ua saunia o ia e auai faatasi ma le usoga a le perisitua.
O taui o lenei taua e matuai taua lava. O taui, o agaga ia o atalii ma afafine o le Atua, lo latou faaolataga e faavavau. Ma o nei agaga o le a manumalo pe faiaina, e faalagolago lea i le mama ma le manino, e faalagolago i le alofa ma le auauna atu, faapea le faatuatua ma le faamoemoe.
O le a auai Andrew i le korama a tiakono i lana uarota. O le a latou aoaoina o ia i le tufaina o le faamanatuga ma le aoina o le taulaga anapogi. O le a latou vaavaaia o ia aua o le faamoemoega lena o korama a le perisitua—o le fetausiai o le tasi i le tasi. O le mea moni lava o le auala lena ua faatulagaina ai le autau o le perisitua a le Alii, e faatulaga i korama.
Sa ou faaaluina le tele o lo’u olaga i le avea ai ma se ave vaalele o le Fua Vaatau a le Iunaite Setete. O alii o la’u fuavaa o loo tumau pea, e oo mai i lenei aso, o loo fusia faatasi o se vaega, e matuai vavalalata lava ina ua mavae le 40 tausaga.
I a matou aoaoga i le avea ai ma pailate o vaalele tau, o se tasi o uluai tulafono faavae ma le taua o le, “Vaai faalelei lau vaega. Ia vaai ou tua e le aunoa ina ia mautinoa ai e le o i ai se fili o loo tolotolo mai i ona tua.”
Afai o se fautuaga lelei ina ia puipuia ai le vaega o se autau, o se fautuaga taua tele foi lo tatou vavalalata, ma puipuia tagata o a tatou korama a o tatou tauivi ina ia tutu mausali i le itu a le Alii. E tatau ona tatou naunau e o atu ma saili i latou pe a latou sese ese.
O le tu mausali i le itu a le Alii e matuai faapitoa lava lona taua i aso nei. Ua faailoa soo mai e lo tatou perofeta faapea o aso mulimuli nei. Ua tatou iloa mai faailoga o taimi ua latalata mai le iuga. Ma ua iloa lelei lava e Satani. E foliga mai e le momoe o ia ma ana au.
I se fonotaga Faaleaoaoga a Taitai i le Lalolagi Atoa, na ta’ua ai e Peresitene Hinckley le maualalo o tulaga o amioga a le lalolagi, “Ou te le iloa pe sa sili atu ona leaga le taimi o Sotoma ma Komoro.”
Sa faaauau lana saunoaga, “Na faatafunaina uma nei nuu ma o latou tagata amioleaga. Ua tatou vaaia ia tulaga faapena i nei aso. Ua salalau i le lalolagi atoa. Ou te manatu ua tatau ona tutulu lo tatou Tama a o Ia silasila ifo i Ona atalii ma afafine lē usitai” (“Tu Malosi ma le Mausali,” Fonotaga Faaleaoaoga a Taitai i le Lalolagi Atoa, Ian. 10, 2004, 21).
Ou te le iloa po o a nisi mea e toe saunoa mai ai lo tatou perofeta tatou te iloa ai ua lapata’ia i tatou.
I se saunoaga talu ai o le konafesi, na ta’ua ai e Elder Dallin H. Oaks: “Ua siomia i tatou i nei faailoga o le Afio Mai Faalua, ma e foliga mai ua faateleina le saoasaoa ma le malosi… . E ui ina leai so tatou malosiaga e fetuunai ai le Afio Mai Faalua ma e le mafai ona iloa lona taimi tonu, ae e mafai ona tatou faateleina a tatou lava sauniuniga ma taumafai e uunaia sauniuniga a o tatou tuaoi. E ao ina tatou taufai faia sauniuniga faaletino ma faaleagaga, mo mea ua valoia i le taimi o le Afio Mai Faalua” (“Sauniuniga mo le Afio Mai Faalua,” Liahona, Me 2004, 7–9).
Ma o nei saunoaga o lapataiga na oo mai a o lei taitai oo i se taimi o se mafuie e le mafaatusalia, lea na faatafunaina ai le Eria i le Atu Keripiane ma le Galulolo na olopalaina ai ia Sasae o Asia.
O la tatou viiga, “O ai o i le Itu a le Alii,” o loo aoaoina ai i tatou, “O le taimi lenei e faailoa mai ai.” O le taimi lenei e tutu mausali ai i lo tatou faatuatuaga ma a tatou mataupu faavae, e pei ona faia e le Taitaiau o Moronae. O loo manaomia nei i tatou, o tiakono, aoao, ositaulaga, epikopo, toeaina, faitaulaga sili ma peteriaka. O le taimi lenei e faailoa mai ai lo tatou talisapaiaina o le taulaga togiola a lo tatou Alii o Iesu Keriso. O le taimi lenei e faailoa mai ai lo tatou faatuatua e ala i le usiusitai i poloaiga faavae e pei o tulafono o le legavia ma le sefuluai, o le Upu o le Poto ma le tausia o le Aso Sapati ia faapaiaina.
O le taimi lenei e lapataia ai o tatou tuaoi e ala i le faasoa atu i ai o le savali o le talalelei ia i latou. O le taimi lenei e tuu atu ai i le lalolagi se faataitaiga o le migao ma le tauagafau, se faataitaiga o le amio mama ma le tumama. E le tatau ona tatou faamaimauina lo tatou mana o le perisitua i le aafia ai i tusi ma ata mataga ma le eleelea.
O le taimi lenei e iloiloina ai feagaiga na tatou osia ma le Alii i le vai o le papatisoga, o feagaiga na tatou osia ina ua tatou talia le tautoga ma le feagaiga a le perisitua, ma feagaiga na tatou osia i totonu o Ona malumalu paia.
O le taimi moni lava lenei e faailoa mai ai lo tatou i ai i le itu a le Alii.
Uso e, o Lana galuega lenei. O le talalelei a Iesu Keriso ua toefuatai mai i lona atoatoaga i nei aso mulimuli e ala mai i le Perofeta o Iosefa Samita. O Keriso o loo taiulu i lenei Ekalesia, e taitaiina agai i luma e Lana perofeta soifua, o Gordon B. Hinckley. O le a toe afio mai Keriso i le lalolagi e pule ma nofotupu ai, ma o le a i ai se aso o le a tatou tutu uma ai i Ona luma ina ia faamasinoina i o tatou mafaufauga, o a tatou galuega ma manaoga o o tatou loto. O Ia o lo Tatou Faaola ma le Togiola, ma ou te molimau atu ai i Lona suafa paia, amene.