O Le Valaau Paia e Auauna Atu
O le faataunuuina o le tiute o se tasi e aumaia ai se lagona o le fiafia ma le filemu.
Ou te fia momoli atu foi la’u faafeiloai ia i latou uma o e na valaauina i tofiga fou i lenei konafesi faapea la’u faamalo ia i latou o e na faamalolo faamamaluina mai a latou auaunaga. E agai pea i luma le galuega. Matou te alolofa ia te outou uma taitoatasi.
O’u uso e, ua faamamaluina lava au i le avanoa e lauga atu ai ia te outou i lenei afiafi. O se fiafiaga le vaai atu i lenei Nofoaga Autu o Konafesi ua faatumulia ia i latou o e talavou ma e matutua o loo tauaveina le perisitua a le Atua. I le iloaina o loo i ai foi faapotopotoga faapenei o loo potopoto i le lalolagi atoa, ua aumaia ai se lagona lofituina ia te au i le tiutetauave. Ou te tatalo ina ia taitaiina o’u manatu ma musuia a’u upu e musumusuga a le Alii.
Na tuuina mai e Peresitene Iosefa F. Samita le saunoaga lenei e faatatau i le perisitua. Na ia saunoa: “O le Perisitua Paia o le pule ua tuuina mai e le Atua i le tagata, e mafai ai ona ia ta’u atu le finagalo o le Atua… . E paia, ma e ao ona tausia i le paia e tagata. E ao ona faamamaluina ma faaaloalogia e i latou o e umiaina.”1
O le tautoga ma le feagaiga a le perisitua e faatatau ia i tatou uma lava. Ia i latou o e umia le Perisitua Mekisateko, o se tautinoga lea o le manaomia ona tatou faamaoni ma usiusitai i tulafono a le Atua ma faalauteleina valaauga e oo mai ia i tatou. Ia i latou o e umia le Perisitua Arona, o se folafolaga lea e faatatau i tiute ma matafaioi i le lumanai, ina ia saunia ai i latou lava iinei ma le taimi nei.
Na saunoa Peresitene Marion G. Romney, o le sa avea muamua ma sui o le Au Peresitene Sili: “O i latou uma e tauaveina le Perisitua Mekisateko e tatau ona faalogo atu ma le maelega ma le naunautai i tiutetauave o lenei tautoga ma le feagaiga lea ua ia mauaina. O le toilalo e tausisia ia matafaioi o loo tuuina mai ai e mautinoa lava le oo mai ai o le faanoanoa, lē fiafia, ma puapuaga.”2
Na faaopoopo mai i ai Peresitene Spencer W. Kimball: “E solia e se tasi [ana] feagaiga o le perisitua i le solia o poloaiga—e faapea foi i le le faia o ona tiute. O le mea lea, o le le faia o se mea, o le solia lea o lenei feagaiga.”3
Na faapea mai se tasi faifeau lauiloa: “E galulue malosi [tagata] mo le tupe. Ae sili atu ona galulue malolosi tagata mo isi tagata. Ae silisili atu ona galulue malolosi tagata pe a tuuina atu o latou loto i se faamoemoe… . E le mafai ona atoatoa le tiute vagana ua faia e se tasi ma le fiafia mea e sili atu, pe afai e na o ia lava na te mafaia ona faataunuu lea tiute.”4
O le faataunuuina o le tiute o se tasi e aumaia ai se lagona o le fiafia ma le filemu. Na tusia e le tusisolo:
Sa ou moe ma moomoo ia olioli lo’u loto.
Na ou ala ma vaai i le tiute o le olaga.
Na ou galue ma ou iloa—
O le tiute le fiafiaga.5
E mafai ona oo mai ma le filemu le valaau a le tiute pe afai tatou te faia tiute ua tatou maua o le perisitua ua tatou umia. Na saunoa mai Peresitene Siaosi Alapati Samita, lena taitai malosi ma le tauagafau, “O lou tiute muamua lava o le iloa lea o mea e finagalo ai le Alii ona e faalauteleina lea o lou valaauga i le mana ma le malosi o lou perisitua paia i luma o ou uso a tagata ma o le a fiafia ai i latou e mulimuli ia te oe.”6
O le a le uiga o le faalauteleina o se valaauga? O lona uiga o le faatinoina i se tulaga mamalu, ma le taua, ia tausaafia ma moomia i le vaaiga a tagata uma, o le faalautele ma faamalosia, ma ia faasusulu i ai le malamalama mai le lagi i lena valaauga i le vaaiga a isi tagata.
E faapefea la ona faalautele e se tasi se valaauga? I le faia lea o tiute e tusa ai ma lena valaauga. E faalautele e se toeaina le valaauga faauuina o se toeaina e ala lea i le aoao po o a ona tiute i le avea ai ma se toeaina ma le faia o ia tiute. E faapena foi i se tiakono, o se aoao, o se ositaulaga, o se epikopo, ma i latou uma e umia tofi i le perisitua.
Na faamanatu mai e le tusisolo ma le tusitala o Ropati Lui Sitivenisone, “Ua ou iloa le fiafia, aua na ou faia galuega lelei.”
Uso e, ia tatou manatua le fautuaga a le Tupu o Peniamina: “Pe a i ai outou i le galuega a o outou uso ua na ona i ai outou i le galuega a le Atua.”7
Ia tatou aapa atu e laveai i latou o e o loo matuai moomia la tatou fesoasoani ma sii i luga i latou i le auala sili ona amiotonu o le olaga. Ia taulai atu o tatou manatu i manaoga o i latou e umia le perisitua faapea a latou ava ma fanau o e ua see ese mai le ala o le toaaga. Ia tatou faalogo atu i savali e le o tautalagia mai o latou loto. O le a outou iloaina tou te masani i ai: “Tago mai, savali mai i o’u tafatafa, / ina ne’i o’u sese. / Aoao mai mea e ao ona ou fai / ia ou toe foi atu ai.”8
O le galuega o le toe faatoagaina mai, e le o se galuega mo tagata paie po o tagata tulemomoe. E tutupu ae fanau, e matutua matua, ma e le faatali le taimi i se tagata. Aua le tolopoina se musumusuga; ae ia gaoioi i ai, ma o le a tatalaina e le Alii le ala.
E masani lava ona moomia ai le uiga faalelagi o le onosai. A o avea au ma se epikopo sa ou lagonaina ai le musuia o au e valaau atu i se tasi alii, o lona faletua e tau le toaga, e faapea foi i le fanau. Ae peitai, e lei tali mai lava lenei alii. O se aso vevela lava o le taumafanafana ae ou tuitui atu loa i le faitotoa valavala o le fale o Harold G. Gallacher. Sa mafai ona ou iloaina atu ia Uso Gallacher o loo nofo mai i lona nofoa o loo faitau le nusipepa. “O ai?” sa ia fesili ai, e aunoa ma le vaai mai.
“O lou epikopo,” sa ou tali atu ai. “Ua ou sau e faamasani atu ma talosagaina lou auai atu ma lou aiga i a tatou sauniga.”
“Leai, o lea ou te pisi,” o le tali le migao lea na sau. E aunoa lava ma se ea a’e i luga. Sa ou faafetai ia te ia ona o lona faalogo mai ma sa ou savali ese loa ma le faitotoa.
E lei leva ae siitia atu le aiga o Gallacher i Kalefonia. Ua mavae atu tausaga. Ae, ina ua avea au ma se sui o le Korama a le Toasefululua, sa ou faigaluega i lo’u ofisa i se tasi aso ae valaau mai la’u failautusi ma faapea mai, “O se Tuagane e igoa ia Gallacher o loo iinei i lo’u ofisa, lea sa nofo muamua i lau uarota lea e fia talanoa atu ia te oe.”
Sa ou tali atu, “Fesili i ai pe o lona igoa o Harold G. Gallacher, lea sa nonofo muamua ma lona aiga i Vissing Place i le Itu i Sisifo o le Malumalu ma le Lima i Saute.
Sa tali mai o ia, “O ia tonu lava lea.”
Sa ou fai atu i le failautusi e auina mai o ia i totonu. Sa manaia le ma talanoaga e uiga i lona aiga. Sa ia ta’u mai, “Ua ou sau ou te faatoese atu i lo’u le tu i luga mai lo’u nofoa e faataga atu oe i totonu i le faitotoa i lena aso o le taumafanafana i tausaga ua leva.” Sa ou fesili atu ia te ia pe o malosi i le Ekalesia. Sa ataata o ia ma tali mai: “O lea ua ou fesoasoani lua i le au epikopo o le matou uarota. O lau valaaulia ina ia ou sau i le lotu, ma la’u tali faalelelei, sa ou popole ai lava ma o lea na ou fuafua ai loa e fai se mea e uiga i lea tulaga.”
E tele nisi taimi na ma feiloai ai ma Harold a o lei maliu o ia. E tele ni valaauga na faataunuuina e Gallacher ma le la fanau i totonu o le Ekalesia.
Na faailoa mai e Peresitene Stephen L Richards, o le sa auauna atu o se fesoasoani ia Peresitene Tavita O. MaKei, “E masani ona faamatalaina le perisitua i ni upu faigofie e faapea ‘o le mana o le Atua ua tuuina mai i le tagata.’” Na faaauau lana saunoaga: “Ou te manatu ua sa’o lenei faauigaga. Ae ou te fia faamatalaina le Perisitua i le faaaogaina i le auauna atu, ma e masani ona ou ta’ua ‘o le fuafuaga silisili ona atoatoa o le auauna atu.’ … O se auupega o le auauna atu … ma o le tagata na te le faaaogaina, o le a aveesea mai ia te ia, aua ua manino ona ta’u mai ia i tatou i faaaliga, o le e faatalale i ai, e le tauaogaina e tumau.’”9
O Ianuari na mavae atu nei, sa ou maua ai le avanoa e molimauina ai se faatinoga loloto o le auauna atu i le soifuaga o se tamaitai o le sa nofo i la’u uarota a o avea au ma se epikopo i le tele o tausaga ua mavae. O lona igoa o Adele, ma sa nonofo o ia ma lana fanau teine matutua e toalua—o le tasi o i laua e le atoatoa le malosi i le tino—i le tele o tausaga i le eria o Rose Park i le Vanu o Sate Leki. O Adele, o se tina ua maliu lona toalua, sa matuai tauivi lava i mea tau tupe, ma sa masani ona faigata lona olaga.
Sa ou maua se telefoni mai se tagata o loo aafia ai i le Gingerbread House Project, ma valaaulia au i le faaulufalega o le fale o Adele, o le toe faafouina o lea fale sa faia i totonu o le tolu aso e le toatele o tagata agalelei, sa galulue uma e aunoa ma se totogi faatasi ai ma mea faufale na foaiina atu e le tele o pisinisi i le alalafaga. I le taimi a o toe faaleleia ai lona fale ma faamaeaina, sa faamautu atu ai Adele ma lana fanau teine e toalua i se aai e le mamao ese atu lea sa matuai tausia faalelei ai i latou.
Sa ou i ai i le taimi na taunuu atu ai le taavale o loo avatu ai Adele ma lana fanau teine. Sa aofia ai i le vaega sa faatalia i latou ia aiga ma uo, ae le gata i lea o le toatele foi o kamuta o e sa galulue i le ao ma le po i le galuega. Sa manino lo latou fiafia i le taunuuga ma sa naunau e vaai i foliga faaalia o Adele ma lana fanau teine.
Na feosofi ese tamaitai mai le taavale, ua fusi uma ia mata. E maeu se taimi a faagaeetia ina ua aveeseina ie sa fusi ai mata ae faliu atu i luma ia Adele ma lana fanau teine ma vaaia lo latou fale fou. Sa matuai ofo lava i latou i le galuega maoae lea ua maea, e aofia ai se toe fuafuaina o luma, o se faalauteleina o le fale lava ia ma se taualuga fou. Na foliga mai fafo ua fou ma mama. Sa leai se isi mea na latou mafaia ae na o le fetagisi.
Sa matou o atu faatasi ma Adele ma isi i totonu o le fale ma sa matuai ofo i le mea ua faataunuuina ina ia faamanaia ma faalautele ai le fale. Ua uma ona vali puipui, ua sui le fola. Ua i ai meaafale fou, o pupuni fou, o ie fou. Ua sui kapoti i le umukuka; ua sui le pito i luga o fata faatasi ma masini fou. Na toe faafouina le fale atoa mai luga e oo i lalo, o potu uma ua matuai mama ma mananaia. Sa matuai lofituina lava Adele ma lana fanau. Ae peitai, sa faapena foi le ootia ma le faagaeetia sa vaaia i foliga o i latou o e sa galulue ma le naunautai ina ia faafouina le fale. Sa maligi o latou loimata a o latou molimauina le olioli na latou aumaia i olaga o Adele ma lana fanau. E le gata ua faamamaina le avega a se fafine ua oti lana tane, ae le mafaitaulia foi isi olaga na ootia ai i lenei mea. Na avea uma i latou ma ni tagata ua sili atu ona o le auai ai i lenei taumafaiga.
Na tuuina mai e Peresitene Harold B. Lee, o se tasi o faiaoga ta’uta’ua o le Ekalesia, lana lapataiga i ni upu e faigofie ona malamalama i ai e faatatau i le perisitua: “Tou te silafia, a umia e se tasi le perisitua, ua avea o ia ma sui o le Alii. E tatau ona ia manatu ifo i lona valaaulia e pei o loo i ai o ia i le feau a le Alii.”10
O lenei, e i ai nisi o outou ua i ai le uiga o le matamuli, pe ua outou manatu vaivai ifo ia te outou e faapea ua outou le mafaia le valaaulia. Ia outou manatua o lenei galuega ua le na o oe ma au. O le galuega a le Alii, ma pe a tatou i ai i le feau a le Alii, uso e, ua ia i tatou le aia tatou te maua ai le fesoasoani a le Alii. Ia manatua e faamalosia e le Alii le tua ina ia mafai ona tauave avega e tuu i ai.
E ui ina tau faamata’u potu o a’oga i nisi taimi, ae o nisi o aoaoga silisili atu ona lelei, e faia i isi mea e ese mai falesa po o potu o vasega. Ou te manatua lelei i le vaitau o le tautotogo i ni tausaga ua mavae, e masani ona tulimatai atu ai i latou e umia le Perisitua Arona i la’u uarota ma se uarota e sosoo ai i se tafaoga faaletausaga e faamanatuina ai le toefuataiga o le Perisitua Arona. I lenei faatasiga taua matou te malaga atu ai i le pasi pe tusa ma le ivasefulu maila i matu i le Fanuatanu o Clarkston, Utah. O iina, i le toafilemu o lena vaaiga matagofie, matou te faapotopotoina ai le autalavou i tafatafa o le tuugamau o Matini Harisi, o se tasi o le Au Molimau e Toatolu o le Tusi a Mamona. A o matou siosiomia le maa faamanatu matagofie sa faailogaina ai lona tuugamau, sa tulai ia Elder Glen L. Rudd, a o avea lena ma epikopo o le isi uarota, ma tuuina mai le faamatalaga i le soifuaga o Matini Harisi ma faitauina mai le Tusi a Mamona lana molimau, o Oliva Kaotui foi ma Tavita Uitimera. Sa matuai faalogo ma le toto’a alii talavou, i le iloaina lea o loo latou tutu i le tuugamau o se tasi sa vaai i se agelu ma vaaitino ona lava mata i papatusi. Sa latou fetagofi atu ma le migao i le maa o loo faamanatuina ai le tuugamau ma mafaufau loloto i upu sa latou faalogo i ai faapea lagona na latou mauaina.
Ona matou savavali atu lea i se vaega e le mamao tele atu i se tuugamau o se paionia. O loo tusia i le maa le igoa o John P. Malmberg ma sa aofia ai le fuaiupu lenei:
Ua mou atu se sulu mai lo matou aiga.
Ua gase se leo sa matou fiafia i ai.
Ua i ai se nofoaga avanoa i o matou loto
Ma o le a le mafai lava ona toe nofoia.
Sa matou talanoa ma tamaiti e uiga i le ositaulaga, e uiga i le naunautai faamaoni i le upumoni. O le tiute, mamalu, auauna atu ma le alofa—sa aoaoina uma mai lena maa tuugamau. Sa mafai ona ou iloaina i lo’u mafaufau le aapa ifo o tamaiti i o latou solosolo ma soloiese ia loimata. O le fogifogi isu sa lagonaina e molimau mai ai sa ootia loto ma sa faia ni tautinoga. Ou te talitonu sa naunau uma talavou taitoatasi e avea ma se paionia—o le e muamua atu, ma faaali atu i isi le auala e ui ai.
Sa matou malolo atu i se paka, lea sa matou fiafia faatasi ai i se taumafataga na saunia. A o lei toe foi atu i le fale, sa matou afea ia lotoa matagofie o le Malumalu o Logan. O se aso mafanafana. Sa ou valaaulia tamaiti e taotooto i luga o le mutia ma matou vaavaai i le lagi lanumoana, o loo togitogia i ni ao papae o loo gasolosolo ane i le agi a le savili. Sa matou maofa i le matagofie o lenei malumalu maoae o paionia. Sa matou talanoa i sauniga paia ma feagaiga faavavau. Sa aoaoina ia lesona. Sa ootia ia loto. Sa faateleina atu le taua o feagaiga ma folafolaga nai lo na o upu. O le manao ina ia agavaa e ulu atu i faitotoa o le malumalu na mautu i loto o talavou. Na liliu atu manatu i le Matai; sa latalata mai Lona faatasi ai. O Lana valaaulia, “Mulimuli mai ia te au,” sa faalogoina ma lagonaina.
Ia i latou uma o e talia ma le fiafia le valaau paia e auauna atu, e oo mai i ai le faamalo a le Alii e faapea: “O au, le Alii, ou te alofa mutimutivale ma faapalepale i e matata’u ia te au, ma fiafia lava e faamamalu i e auauna mai ia te au i le amiotonu ma le upumoni e oo i le iuga.
“E sili lava lo latou taui, e faavavau foi lo latou mamalu.”11
O la’u tatalo faamaoni ina ia agavaa i tatou uma mo lenei folafolaga paia, i le suafa o Iesu Keriso, lo tatou Faaola, amene.