Tuleiga Faaiu
E moni ua faamanuiaina e le Alii i tatou o se nuu, ma e tatau ona tatou aapa atu ina ia manuia ai Ana fanau o loo manaomia le fesoasoani i soo se mea lava o i ai i latou.
O’u uso e ma tuafafine pele, ua tatou maua foi se konafesi matagofie. Sa mafuta le Agaga o le Alii ma i tatou. Ua tele upumoni sa aoaoina ai i tatou. Ua faamalolosia a tatou molimau, ua faaolaolaina foi lo tatou faatuatua.
E ala mai i vavega—ma o se vavega lava—o masini faaonapo nei ua faasalalauina atu ai nei taualumaga i le lalolagi atoa. Ua mafai ona tatou auai faatasi ma le ivasefulu lima pasene o le faitau aofai o le Ekalesia i le lalolagi atoa.
O se taimi e toe faafou ai lo tatou faatuatua i upumoni sili e faavavau, lea na tatou maua e ala i le Perofeta o Iosefa. Ua matua faamanuiaina lava i tatou. Ua matua manuia i tatou i lo tatou malamalama i nei upumoni maoae.
Ae ou te fia fai atu e pei ona ou fai atu muamua, o lo tatou avea ai ma tagata o lenei Ekalesia, ma lo tatou agavaa mo faamanuiaga uma e tafe mai ai, e le tatau ona avea ma se mafuaaga o le faafiaamiotonu, o le faafiasili, po o le taufaaleaga o isi, po o le vaai maualalo foi i isi. O o tatou tuaoi tagata uma. Ina ua fesili pe o le fea tulafono e sili ae fetalai mai le Alii, “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. … [Ma] e te alofa atu i le lua te tuaoi, ia pei o oe lava ia te oe” (Mataio 22:37, 39).
Pe o le a lava le lanu o o tatou pa’u, foliga o tatou mata, o le gagana tatou te faaaogaina, o i tatou uma lava o atalii ma afafine o le Atua ma e tatau ona aapa atu le tasi i le isi i le alofa ma le manatu i ai.
Pe o fea lava tatou te nonofo ai, e mafai ona avea i tatou ma ni tuaoi agalelei. E mafai ona milo faatasi a tatou fanau ma fanau a i latou e le auai i lenei Ekalesia, ma tumau pea le mausali pe afai e aoaoina faalelei i latou. E mafai foi ona avea i latou ma faifeautalai i a latou uo.
Matou te faamalo atu i o tatou talavou lelei, o ē tetee atu i le leaga o le lalolagi, ma lafoai ese nei mea leaga ae ola i ni olaga e fiafia i ai le Alii. Matou te tatalo e le aunoa ina ia faapena foi ona ola agavaa o latou matua i mea uma.
Matou te toe fai atu foi i le mea lea sa fai atu ai muamua, ia fai ma amio masani le o i le fale o le Atua. E leai se isi auala e sili atu e faamautinoa ai le ola sa’o nai lo le auai atu i le malumalu. O le a faatoilaloina ai mea leaga o tusi ma ata mataga, o le faaaoga sese o fualaau faasaina, ma le fāi ifo o le faaleagaga.
O le Ekalesia ua tatou aoao ai e galulue faatasi ma isi e sii a’e ē faanoanoa ma puapuagatia, o i latou ua matua mafatia. O a tatou galuega fesoasoani mo tagata soifua, ua matua faamanuiaina ai lava olaga o le fia afe o tagata e le auai i la tatou Ekalesia. I le faalavelave matautia o galulolo, ma isi mafatiaga e mafua mai i feseeseaiga, o faama’i, ma le matelaina i le fiaaai, ua tele naua ma ofoofogia galuega ua tatou faia e fesoasoani ai i isi, e aunoa ma le popole po o ai e ave i ai le mua.
Ia Fepuari o le tausaga nei, sa tauaaoina mai ai e le peresitene o le Koluse Mumu a Amerika i le Ekalesia le Taui o le “Circle of Humanitarians”, o le faamamaluga aloaia aupito maualuga lea ua latou tuuina mai. O se tulaga e aloa’ia ai le taumafaiga a le Ekalesia e fai ai tui e puipuia ai mai le misela le afe ma afe o tamaiti.
Sa faapena foi, ona aloaia e le Rotary International le Ekalesia mo se meaalofa tupe, ina ia faamutaina ai le ma’i pipili i atunuu tau atia’e o le lalolagi o loo tulai mai ai pea [lea faama’i].
E le mafaitaulia ola ua laveaiina, ma le tele o tiga ma faanoanoaga ua taofia i o latou olaga, ona o a latou taumafaiga.
I le mamao ua mafai ona oo i ai ona o punaoa ua maua mai i le agalelei o o tatou tagata lotu, ua tatou aapa ifo ai i lalo ma sii a’e i latou o faanoanoa.
E moni ua faamanuiaina e le Alii i tatou o se nuu, ma e tatau ona tatou aapa atu ina ia manuia ai Ana fanau o loo manaomia le fesoasoani i soo se mea lava o i ai i latou.
I le taimi nei, a tatou taape i o tatou aiga, ou te talosagaina faamanuiaga o le lagi i o outou luga. Ia outou faamaoni i poloaiga a le Alii ona Ia toina mai lea o pupuni o le lagi ma liligi ifo faamanuiaga ia te outou. Ou te tuuina atu ia te outou a’u faamanuiaga ma lo’u alofa. Ou te tuuina atu ia te outou la’u molimau o loo soifua le Atua lo tatou Tama Faavavau, e patino lava o Ia ma e moni foi, o Ia moni lava o lo tatou Tama, e faafofoga mai o Ia ma e tali mai i a tatou tatalo. Ou te tuuina atu ia te outou la’u molimau o Iesu o le Keriso, o le Togiola o le lalolagi, e na o le pau lena o le igoa i lalo o le lagi e mafai ona faaolaina ai i tatou, ma ou te tuuina atu ia te outou la’u molimau o le Atua ma le Alii o Iesu sa fetalai patino mai lava i le taulealea o Iosefa, ma tatalaina ai pupuni o le amataga o lenei tisipenisione sili faaiu.
Ia faamanuia atu le Atua ia te outou o’u uso e ma tuafafine pele. Ia ia te outou le filemu nei ma aso uma lava, o la’u tatalo lea ma le lotomaulalo i le suafa paia o Iesu Keriso, amene.