Toe Tasi

Elder M. Russell Ballard

O Le Korama a Aposetolo e Toasefululua

Tatou te manaomia ni faifeautalai galulue malolosi ma loloto ni molimau ina ia mafai ona tele atu ni fanau a lo tatou Tama Faalelagi e aapa atu i ai.

Uso e ma tuafafine, i nai vaiaso ua tuanai atu sa ma fiafia ai ma Sister Ballard e lauga atu i faifeautalai i le Nofoaga Autu e Aoao ai Faifeautalai i Provo. Sa ma fiafia i le vaai atu i o latou foliga susulu ma le naunautai, ma lagonaina le faatasi ai o le Agaga o le Alii. O nei faifeautalai lelei ua saunia i latou e momoli atu le savali o le Toefuataiga o le talalelei a Iesu Keriso i le lalolagi. Matou te faafetai atu i matua, epikopo, peresitene o siteki, aemaise lava o o tatou talavou mo le tali atu i le valaau a le perofeta mo le faateleina o le saunia maeaea i le faaleagaga e auauna atu i le Alii.

A o tatou “siitia i luga le fua faatatau” mo le auaunaga faafaifeautalai, na saunoa ai Peresitene Gordon B. Hinckley: “O lenei galuega e faigata. E moomia ai le malosi ma le sogasoga. E manaomia ai le maai o le mafaufau ma le gafataulimaina. E moomia ai le faatuatua, manao, ma le faapaiaina. E moomia ai lima mama ma se loto mama.”

Na faaauau lana saunoaga i le faapea mai: “Ua oo mai le taimi e tatau ai ona tatou siitia i luga ia faatulagaga o i latou o e valaauina … e avea ma amepasa a le Alii o Iesu Keriso… . Tatou te le faatagaina i latou e le i faaagavaaina e i latou lava, ina ia o atu i le lalolagi e talai ma folafola atu le talalelei.” (Galuega Faafaifeautalai,” Fonotaga Faaleoaoga a Taitai i le Lalolagi Atoa, Ian. 11, 2003, 19).

O le taimi nei, matou te valaau atu mo nisi faifeautalai agavaa, o alii talavou o e ua saunia ina ia auauna atu e ala lea i le taliaina o le luitau a lo tatou perofeta “ina ia faaaoga le pulea o le tagata lava ia, ia ola e sili atu nai lo faatulagaga maualalalo a le lalolagi, ia aloese mai soligatulafono ma savalia le ala maualuga i mea uma latou te faia” (“Galuega Faafaifeautalai,” 19).

O le galuega a le Alii i a tatou misiona e 339 ua faalauteleina o lea e tatau ai ona tatou faateleina a tatou taumafaiga ina ia vaai atu o faauuina ma le agavaa alii talavou uma ua 12 tausaga le matutua e avea ma se tiakono; o le au 14 tausaga le matutua e avea ma aoao; ma le au 16 tausaga le matutua, e avea ma ositaulaga ma o le au 18 i le 19 tausaga le matutua ia agavaa uma e mauaina le Perisitua Mekisateko. E mafai ona tatou faia lenei mea e ala lea i le faatumuina o loto o o tatou alii talavou i le alofa mo le Alii, ia malamalama ma talisapaia Lana Togiola, ma se vaaiga manino i le ofoofogia o le Toefuataiga.

Afai e malamalama lelei a tatou talavou i le taua o le Toefuataiga o le talalelei ma iloa mo i latou lava o le Atua o lo tatou Tama Faalelagi ma e alofa o Ia i Ana fanau uma, o Iesu o le Keriso ma na La’ua asiasi uma mai ia Iosefa Samita e tatalaina lenei tisipenisione faaiu o taimi, o le a latou mananao loa e momoli atu lenei savali i le lalolagi. Afai e vaai atu a tatou talavou i le Tusi a Mamona o se faamaoniga maumaututu lea o le moni o le savali o le Toefuataiga, o le a faatumulia i latou i se manao e faia la latou vaega i le aoaoina atu o nei upumoni i fanau a lo tatou Tama Faalelagi.

Na ma aoaoina mai faifeautalai i le Nofoaga Autu e Aoaoina ai Faifeautalai ia mea o le a fesoasoani ia i latou ina ia sili atu ai ona saunia mo a latou misiona. E sili atu nai lo isi mea sa latou moomoo i ai:

Sa sili atu ona latou aoaoina lelei le aoaoga faavae e ala i le taulai atu i le suesueina o tusitusiga paia.
Sa latou aoao ia iloa ona suesue ma tatalo faamaoni.
Sa sili atu ona puleaina i latou ma galulue malolosi.
Sa sili atu ona malamalama lelei i mea o loo faamoemoeina mai.
Sa tele atu avanoa e aoao atu ai.
Ma sa tele atu faatalanoaga vailiili na faia e a latou epikopo ma matua.

Uso e ma tuafafine, e mafai ona tatou aoaoina atu faatasi le talalelei a Iesu Keriso, i lona faigofie ma le mana i a tatou talavou uma i le Ekalesia. O le galulue faatasi ma matua e mafai ai ona tatou fesoasoani ia i latou ia saunia mo se misiona ma se auaunaga i le olaga atoa. Ia tatou agai i luma ma sailia a tatou talavou uma faapelepele, e tusa po o le a le tulaga o lo latou toaaga o loo i ai, ia faasusuluina atu le Malamalama o Keriso o loo i totonu ia i latou. Na saunoa Peresitene Boyd K. Packer: “O le Malamalama o Keriso e aoao lea e pei lava o le malamalama o le la. Po o fea lava e ola ai le tagata, o loo i ai foi le Agaga o Keriso. O agaga ola uma lava o loo maua ai… . O le tuumumusu lea o mea uma o le a aoga ma faamanuiaina ai tagata uma. E faaosofia ai le lelei” (“O Le Malamalama o Keriso,” Liahona, Ape. 2005, 13).

O lea la ua tatou iloa o loo i totonu o i latou uma le Malamalama o Keriso. O lo tatou tiutetauave la i le avea ai ma matua, faiaoga, ma taitai o le faamumuina lea o lena malamalama i totonu o o tatou talavou seia oo ina mumu le aloiafi o le molimau i totonu o o latou loto ma agaga ona uunaiina lea o i latou taitoatasi ina ia ave lena aloiafi e fesoasoani e faamumu ai le Malamalama o Keriso o loo i totonu o isi.

E sa’o lava, ua iloa lelei lava e le tiapolo lenei mea ma o loo galue faasoloatoa ina ia faaosoina nisi o a tatou talavou ina ia le amanaiaina aoaoga a le Ekalesia. O le mafuaaga lena e moomia ai e matua, taitai, ma faiaoga ona fefautuaai faatasi ma iloa alii talavou ma tamaitai talavou uma taitoatasi—i latou uma lava. E tusa lava pe o toaga pe leai, e tatau ona tatou iloaina i latou.

E moni ua siitia i luga le fua mo faifeautalai. O lona uiga o lenei mea ua faapea foi ona siitia ai i luga le fua mo matua ma taitai. O le a moomia ona tatou faateleina lo tatou faatuatua ma faalautele a tatou taumafaiga ina ia tuuina atu i alii talavou uma taitoatasi le avanoa e auauna atu ai.

Na faailoa mai foi e Peresitene Hinckley lenei popolega: “Tatou te manaomia nisi faifeautalai se toatele. O le savali ina ia sii i luga le fua faatatau i tulaga agavaa o faifeautalai e le o se faailoilo lea e auina atu ai na o ni nai faifeautalai ae … o se valaau mo matua ma taitai ina ia vave galulue faatasi ma alii talavou, ina ia saunia lelei i latou mo le galuega faafaifeautalai ma tausia i latou ia agavaa pea mo lea auaunaga. O alii talavou uma o e agavaa ma o loo gafatia i le faaletino ma lagona, e tatau ona saunia e auauna atu i lenei galuega taua” (“Mo Epikopo o le Ekalesia,” Fonotaga Faaleaoaoga a Taitai i le Ekalesia, Iuni 19, 2004, 27).

E faapena foi se faamatalaga i tamaitai talavou, na saunoa le Peresitene: “O loo i ai se le malamalama i le fautuaga na tuuina atu muamua e faatatau i tuafafine nofotoatasi e avea ma faifeautalai. Matou te manaomia ni tamaitai talavou. E maoae se galuega latou te faia. E mafai ona latou o atu i fale e le mafai e alii faifeautalai ona o atu i ai. Ae tatau ona teu pea i mafaufau o tuafafine talavou e le o faamalosia e o i ni misiona. E le tatau ona latou lagona faapea o loo i ai so latou tiute e tutusa ma alii talavou, ae o nisi lava o le a mananao e o” (“Mo Epikopo o le Ekalesia,” 27).

Uso e ma tuafafine, e maoae se aofaiga o le galuega e moomia ona faia. O loo faamalumalu le Agaga o le Alii i luga o le tele o malo o le lalolagi. O faitotoa sa lokaina muamua ua tatalaina nei ia i tatou. Tatou te manaomia ni faifeautalai galulue malolosi ma loloto ni molimau ina ia mafai ona tele atu ni fanau a lo tatou Tama Faalelagi e aapa atu i ai o e o loo i ai nei i se nofoaga o lea ua mafai nei ona tatou oo atu i ai. O o tatou uso ma tuafafine nei, ma o loo i ai so tatou tiutetauave e aoao atu ia i latou le savali o le Toefuataiga.

Ua tatou iloa e tutupu mea ofoofogia i olaga o i latou o e auauna atu ma le faamaoni i misiona talai. O le auaunaga faafaifeautalai e le faigofie, ae maoae lona aoga. O i latou o e sa auauna atu ma toe foi atu i le aiga ma le mamalu ua faavaeina se faatulagaga o le ola ma auauna atu, lea o le a faamanuiaina ai o latou lava olaga ma olaga o tupulaga e mulimuli mai ai. Ua latou taliu atu ua saunia lelei e avea ma ni taitai ma ni faiaoga malolosi i faalapotopotoga o le Ekalesia. Ua latou taliu atu ua saunia lelei e avea ma ni tama ma ni tina amiotonu ma mafai ona aoaoina atu le talalelei i a latou fanau. O le auaunaga faafaifeautalai o se faamanuiaga ia i latou uma o e na sailia ma maua e faifeautalai ma aoaoina e faapena foi i faifeautalai lava latou.

O lea, o loo i ai sa matou talosaga faapitoa mo outou epikopo ma peresitene o paranesi. Ua matou malamalama ua uma ona outou iloaina i latou o e ua faamaoniaina le ausia o le fua ma saunia e taliaina ia valaauga faamisiona i le gasologa o lenei tausaga. O le mea o loo matou talosagaina e fai e taitai i iunite uma o le feiloai faatasi lea ma matua, ma tatalo e saili ia le itiiti ifo ma le toe tasi se alii talavou, e ese mai ia i latou ua uma ona tautino, o le e mafai ona valaauina e auauna atu. Afai o le a auina atu e le 26,000 o uarota ma paranesi i le Ekalesia ia i latou uma o e ua uma ona latou fuafua e auina atu i le misiona faaoopoopo i ai ma le toe tasi [lava lea], o le a matuai faatoateleina lava a tatou faifeautalai ma o le a tatou latalata atu ai loa i lo tatou matafaioi paia o le aveina atu lea o le talalelei i atunuu uma, ituaiga, gagana ma nuu. O le mea moni lava, o nei faifeautalai e moomia ona agavaa, faamaoni, ola maloloina, ma tautino atu ma le atoatoa. Atonu o le toe tasi lenei e le o saunia i le taimi nei. O lea matou te talosaga atu ai i matua ma sui o aufono a siteki ma uarota ina ia faalagolago i le mana o le iloatinoina o le Agaga Paia, ina ia iloa ai po o ai e mafai ona outou fesoasoani i ai ina ia saunia mo se valaauga i lenei tausaga.

A o outou aapa atu ia i latou, faamolemole ia manatua se mea na oo i sa’u uo. Na te lei mauaina lava se solofanua [tulou] i lona olaga atoa seia oo ina ua faaipoipo atu i se tamaitai lalelei e fiafia tele i solofanua. I lona manao e faaofo lana manamea fou, o lea sa ia faailoa atu loa i ai i se tasi afiafi faapea o le a alu atu i le pa e aoao se tamai solofanua i le auala e taitai ai. E mamafa atu o ia nai lo le tama’i. E sili atu lona iloa nai lo le tama’i. Na manatu o ia e na o le pau lava le mea e moomia ona ia faia o le tosoina lea o le maea ma e le umi ona mulimuli atu lea o le tama’i. Na mautinoa e ia o lea faiga o le a puupuu ma faigofie.

Sa ia nonoaina le maea i le faagutu, savali i luma o le tama’i ma toso loa. Sa musu le tama’i. Sa toso malosi e la’u uo, ae sa matuai mamau vae o le tama’i i le palapala. O lea sa ia matuai toso ai lava, ma iu ai ina pa’u le tama’i i lalo. Sa faifai pea lava lenei faiga seia oo ina ua faia e la’u uo lenei faaiuga: i le na o le fa i le lima minute ae faamanuiaina o ia i le aoaoina o le tama’i ina ia pa’u i lalo. E na o le pau lava le mea na ia faia o le muamua lea i luma o le tama’i, uu i luga le maea, ma pa’u i lalo.

Sa matamata mai lona toalua i lenei faiga, ma ia fautua atu loa i ai, nai lo le muamua i luma o le tama’i ma toso, e mafai ona ia taumafai e taai le maea faataamilo i le tama’i ma savali ai i tafatafa. Na faanoanoa la’u uo, aua na aoga le faiga lea.

E foliga mai e i ai se mea i totonu o i tatou taitoatasi lea e tetee ai pe a faatonuina pe tulei pe tosoina. Ae afai e tuu atu e se tasi se lima ma opoopo mai se alii talavou ma savavali faatasi ma ia, e ono mulimuli atu o ia faatasi ma se manao e auauna atu. Faamolemole ia manatua le mea lenei a o outou faamalosi atu i le molimau a le toe tasi o le e mafai ona auauna atu.

Pe mafai ona ou tuuina atu ni fautuaga se tolu tou te manatunatu i ai ina ia fesoasoani ai i le faavaeina o se tu ma se aga tamaoaiga o le auaunaga faafaifeautalai i lou aiga, siteki, uarota, po o le paranesi?

Muamua, ia mautinoa ua malamalama uma a tatou talavou po o ai i tatou. Mai o latou uluai taimi i le Peraimeri, e usuina ai e a tatou fanau le pese “O Au se Atalii o le Atua” (Viiga, nu. 2). Fesoasoani ia i latou ina ia iloa po o le a moni lava le uiga o le avea ma se atalii o le Atua. Ia faamanatu ia i latou ua latou i ai iinei i lenei taimi faapitoa i le talafaasolopito o le lalolagi, faatasi ai ma le atoatoaga o le talalelei i o latou lima, ona sa latou faia ni filifiliga totoa i le muai olaga. E moomia e a tatou talavou ona tutu mausali mo le amiotonu ma le upumoni. E tatau ona latou iloa atu faamanuiaga e mafai ona latou maua a o latou faaalia lo latou alolofa mo le Tama Faalelagi ma le Alii o Iesu Keriso e ala i lo latou naunautaiga e auauna atu.

Lua, aoao atu le aoaoga faavae. E ui o gaoioiga ma faatasiga faafiafia e i ai so latou nofoaga talafeagai i le polokalama atoa a le autalavou, ae o le aoaoga faavae lea e liuaina ma faatautinoina [tagata]. O loo i ai i a tatou talavou le aia tatau e faamoemoe ai i o latou matua ma taitai o le Ekalesia ma faiaoga o le a vaai ua latou iloa ma malamalama i le talalelei a Iesu Keriso. O le a faamautuina e le Agaga Paia le moni i o latou loto ma o le a faamumuina le Malamalama o Keriso i o latou agaga. Ma o le a e maua lena faifeautalai e toe tasi ua saunia atoatoa. O ananafi, na fautua mai ai Elder Richard G. Scott e faapea o le Talai La’u Talalelei, le taiala fou lea o loo faaaoga nei e a tatou faifeautalai, e mafai ona avea ma se punaoa lelei e fesoasoani ai ia te oe.

O le vaega mulimuli, ua matou iloaina atonu e le o se tulaga atamai mo nisi o o tatou alii ma tamaitai talavou le feagai ma le mamafa ma luitau o se misiona talai. Afai e faataga soo se tasi o outou e taitai perisitua ia lē auauna atu faafaifeautalai, matou te talosaga atu ia te outou ma o outou aiga ina ia taliaina le faaiuga ma agai i luma i o outou olaga. E mafai ona e saunia e auai i sauniga faaola o le malumalu ma saili auala e auauna atu ai. Ma e matou te talosagaina uma o tatou tagata ina ia lagolago ma faaali atu le alofa tele ma le malamalama i le lagolagoina o o tatou talavou faamaoni i o latou valaauga eseese o le Ekalesia.

Uso e ma tuafafine, ou te faaopoopo atu la’u molimau i le paia o le misiona a le Alii o Iesu Keriso ma tatalo ia faamanuiaina i tatou uma i a tatou taumafaiga e musuia ma uunaia atili o tatou talavou ma ulugalii e auauna atu i ni misiona. I le suafa o Iesu Keriso, amene.