E Molimau Mea Uma ia te Ia
O Ia o le Ala, o le Upumoni, o le Areto o le Ola, o le Vaiola, o le Maa Tulimanu Autu. I Lana galuega atoa i le Feagaiga Fou, sa faailoa atu ai e le Faaola Lana matafaioi paia ma aoaoga i mataupu e mafai ona malamalama ai tagata.
Ua aoaoina foi e nei talavou matutua i Siamani “e molimau mea uma ia [Iesu Keriso]” (Mose 6:63). Ua latou faasoa mai iinei a latou molimau e uiga ia te Ia.
O Le Ala
“Ua fai mai Toma ia te ia, Le Alii e, matou te le iloa le mea e te maliu atu i ai; matou te mafai faapefea ona iloa o le ala?
“Ua fetalai atu Iesu ia te ia, O au nei le ala, ma le upumoni, ma le ola: e le alu atu lava se tasi i le Tama pe a le ui mai ia te au” (Ioane 14:5–6).
René Cyron:
“Na ou ola ae i se aiga na o se vaega e auai i le ekalesia. Na tatau ona ou vave filifili po o fea le itu ou te mulimuli ai. Sa ou fiafia lava i tala o le Tusi Paia na faamatala e lou tina ia te au. Na ou vaai i le olaga na ola ai lou tina. Na ou vaai i le olaga na ola ai le aiga o lou tama. Na ou vaai i le olaga na ola ai tagata sa ou faamemelo i ai i le lotu. Na ou iloa sa latou mulimuli i le ala o le Faaola, ma o lea sa tonu ai ia te au ou te papatiso.
“O le taimi nei, pe a ou faia ni filifiliga, ou te mafaufau i mea ua ou aoaoina e uiga ia te Ia, ma ou taumafai e faataitai ia te Ia. Ua ia faaali mai ia te au se ala e sili atu ona atoatoa. E fesoasoani o Ia ina ia tatou atiina ae ma faailoa atu o tatou uiga lelei o i ai. Semanu ou te matuai faanoanoa pe ana fai e le mafai ona ou suia, ae na ou iloa, e mafai ona suia ona o Ia.”
“Ou te Tu Atu i le Puipui, ma Tu’itu’i Atu”
“Faauta, ou te tu atu i le puipui ma tu’itu’i atu: ai se tasi e faalogo mai i lou leo ma tatala mai le puipui, ou te ulufale atu ia te ia, ma te tali sua foi ma ia, o ia foi ma a’u” (Faaaliga 3:20).
René Cyron:
“O loo tu’itu’i mai le Faaola aua e alofa o Ia ia i tatou. E tele mea na te ofoina mai, ae ua Ia tuuina mai ia te au le saolotoga e filifili ai pe tatala le faitotoa ia te Ia pe leai. O le a ia aoaoina au, fesoasoani i ou malosiaga ma vaivaiga.
“E mafai ona ou tatalaina le faitotoa e ala i le agamalu ma talia e mafai ona Ia aoaoina au. E mafai ona ou tatalaina le faitotoa e ala i le taliaina o mea ua aoaoina, ma le iloa e i ai mea e ao ona ou suia.
“Ou te faamoemoe ia ou iloa pea o Ia i le puipui, aua o loo tu’itu’i mai foi isi. Ma ua faatonuina a’u ia ou faia foi lena mea, e saili isi ma valaaulia i latou e o mai ia te Ia. E ala atu ia i tatou, e mafai ai ona latou iloa teisi atu o Ia.”
O Le Papa o lo Tatou Togiola
“O lenei ai se faalogo i au upu nei ma faia e ia, ou te faatusaina o ia i le tagata poto, ua na faia lona fale i luga o le papa:
“Ona to mai lea o uaga ua oo mai foi tafega, ua agi mai foi o matagi, ua pesi mai i lea fale, ae le’i pau lava ia: aua ua faavaeina i luga o le papa” (Mataio 7:24–25).
“Ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua; … o le faavae mau lea, o le faavae foi lea afai e ati ae tagata i ona luga, e le mafai lava ona pauu i latou” (Helamana 5:12).
Maike Adler:
“Na ou ola ae o se tagata o le ekalesia, ae e oo ae i le taimi ua 14 ou tausaga, na tatau ona ou filifili pe o le a lou malosi na i ai—o le fea le itu o le a agai i ai lou olaga. Pe matou te o ma au uo i pati sa latou valaauliaina ai au, pe ou te alu i le seminare? Sa ou talanoa i ou matua, ma sa ou tatalo. Sa ou maua se molimau, ma na ou iloa e tatau ona ou alu i le seminare.
“Ana leai le Faaola, semanu e matuai ese lava lou olaga—au uo, ou tulaga faatauaina. Semanu ou te le iloa pe aisea ua ou i ai iinei. E toatele tagata e i ai fautuaga, peitai o tulaga faatauaina ma aoaoga a le lalolagi e fesuisuiai ma femoumouai. Afai ou te fausia i se mea e le mautu ma femoumouai, o lona uiga o taimi uma lava e toe fau ai. E tatau ona i ai se mea e le fesuisuiai e fausia ai. E le liuliu lava Keriso. O Lana amiotonu, e tumau pea lava ona tonu. E mafai ona e faalagolago ia te Ia. Na te le tuua oe e pau.”
O Le Malamalama o le Lalolagi
“Ona toe fetalai atu lea o Iesu ia te i latou, ua faapea atu, O au nei o le malamalama o le lalolagi: o le mulimuli mai ia te au, e le savali o ia i le pouliuli, ae ia te ia le malamalama o le ola” (Ioane 8:12).
Jan-David Wohlleben:
“O Lana talalelei o se malamalama e tuuina mai taitaiga manino i le olaga, o se taitaiga e mafai ona ou pipii i ai. E ala i Ana aoaoga, tatou te maua ai le malamalama i le pogai ua tatou i ai i le lalolagi. E ala i Lana Togiola, ua mafai ai ona tatou toe foi atu i le Atua e ala i le salamo. Ua sili atu i le taimi nei ona ou magafagafa i mea ou te faia, sili atu ona faaeteete i upu ou te tautala ai.
“I le avea ai ma se tasi o le Ekalesia a Keriso, e le mafai lava ona tuua na o oe. E maua i taimi uma le fesoasoani. Na te faamafanafanaina au; e fesoasonai o Ia i o’u luitau; e fesoasoani o Ia i a’u filifiliga pe a ou ole atu ma se loto faamaoni i le tatalo. O le mulimuli atu ia te Ia ua suia ai lo’u olaga.”
Vaiola
“Ua tali atu Iesu ua faapea atu ia te ia, Ana e iloa le mea foai fua a le Atua, ma le ua fai atu ia te oe, Au mai ia te au, ou te inu; po ua e ole mai ia te ia, ona foai atu lea e ia ia te oe o le vaiola… .
“A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau” (Ioane 4:10, 14).
Jasmin Zanardo:
“Ou te faafetai mo le meaalofa o le talalelei. E tele au uo i fafo atu o le Ekalesia. Latou te faapea mai: ‘Ou te le iloa mea uma e faatatau i le Atua, ae ou te vaaia i le ala e te ola ai, ma ou te faamemelo ia te oe.’ Ou te lagona ai le agaga faafetai tele ona o loo i ai se mea ou te pipii i ai, aua o i latou e leai; o loo fia feinu pea.
“E tatau ona avea i tatou ma molimau a Keriso i isi ina ia latou iloa ai o Ia, ina ia mafai ona latou o mai ma feinu i le vai o le ola faavavau.”
O Le Maatulimanu Autu
“A o ona po nei, ona o Keriso Iesu o outou sa vava mamao anamua ua faalatalataina mai ai i le toto o Keriso… .
“O lenei, e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua;
“O loo ua atiina ae i luga o le faavae o le au Aposetolo, atoa ma le au perofeta, o le maa tulimanu o Iesu Keriso lava lea;
“Ua faatatauina ia te ia le fale atoa, o loo alu ae ina ia fai ma malumalu paia i le Alii” (Efeso 2:13, 19–21).
Jasmin Zanardo:
“Ua le mautonu le lalolagi ona e le lava mea ua ofoina mai e le lalolagi. E tele tapuaiga e i ai upumoni. Ae o le talalelei ua tatou maua e atoatoa. O le faavae o loo ia i tatou e mausali.”
O Le Areto o le Ola
“Ua fetalai atu Iesu ia te i latou, o au nei le areto o le ola: o le sau ia te au e le laina lava ia; o le faatuatua foi ia te au e le toe fia inu lava ia” (Ioane 6:35).
Jasmin Zanardo:
“Sa ou fanau i totonu o le talalelei, ae o tagata uma lava e tatau ona latou sailia i se taimi mo ia lava pe moni le Ekalesia. Sa 12 ou tausaga i le taimi na ou fia iloa ai, ma na ou iloaina. O le Togiola a Iesu, ua ou ola ai. O nisi o tofotofoga faigata, sa faamafanafanaina au i le iloa po o ai le Faaola, ma o le a foi le mea na Ia faia mo i tatou. E matuai maoae lava Lona alofa ia i tatou. Sa ia ositaulagaina o Ia lava mo i tatou. O Ia o lo’u ola.”