O Le Suti
O le taimi tonu lea a o lumanai le Kerisimasi, ma na ou iloaina sa ia te au ni mea e mafai ona faaaoga e isi [tagata]. Sa ou alu atu mai lea potu i lea potu o le fale, ma aumai aitema e mafai ona ou foai atu i le Deseret Industries. Ina ua oo i le taimi e sue ai le ma potumoe, sa ma o atu loa i le kapoti lavalava. Sa sueina o ma lavalava.
“E leai sa’u mea o i ai,” na ou fai atu ai ia te ia. “Ae a oe?”
Na tuuese e Tavita ni ona ofutino i se faaputuga ma maua foi ni seevae sa na le toe faaaogaina.
“Ae a le suti lea?” sa ia fesili mai ai. Sa ou fesoasoani i le pikiina o lena suti i ni tausaga ua tuanai mo se faatalanoaga o se galuega. Sa tumau pea le foliga fou.
“Lau pele, o le a lou manatu? E le o toe ofi.”
“Ae o loo fou pea,” o lau tala lea.
“Ou te manatu lava e tatau ona ave le suti lenei,” O le tala lea a Tavita. Sa ia aveeseina mai le kapoti lavalava.
E ui lava i sou fiafia i le suti pe a ia ofuina, ae sa i ai foi se isi ona suti, ma ina ua uma ona ia faataitaia, sa ou vaaia ua tau le ofi. Sa ou faataatiaina ese ma le faaeteete i luga o le faaputuga lavalava e foai atu, ae sa le sa’o ou lagona. Sa i ai se mea na faalavelave mai ia te au. Sa le tatau ona i ai le suti iina, ma na ou iloaina.
Na faasolo atu Tavita i ona fusiua. Sa faalealofa o ia i le filifiliga o ona fusiua e foai atu. Sa ia aumaia i fafo ni nai fusiua ma faataatitia faatasi ma le suti, ae sa le foliga talafeagai foi ia te au.
Sa faalavelave le suti sa i le faaputuga i lau moe. Sa ou mafaufau pe o le a le mea ua tupu ia te au ua ou popole tele ai i se suti ua le toe ofi ma se faaputuga fusiua tuai.
O le taeao na sosoo ai, na ou tilotilo atu ai i le faaputuga lavalava. Sa toe oo mai foi le lagona malosi e le tatau ona i ai iina le suti. Sa ou aveesea le suti mai le faaputuga ma faataatia i luga o le moega faatasi ma nisi fusiua. Ina ua maea ona tuu isi mea uma i totonu o taga, sa ou toe tilotilo atu i le suti. “O ai a ave i ai?” Ou te le’i iloaina.
Sa ou tootuli i tafatafa o le moega ma tatalo. Sa ou alu atu i lau kesi ma taumafai e mafaufau. O i maua ma lou toalua o ni taitai i le autalavou matutua o le uarota, o lea na ma iloa ai le faifeautalai o le a sosoo ai. E fai si umi ona faatoa alu lea. Sa i ai foi sana galuega tumau, ma o le mauaina o se suti fou o le a le o se faafitauli lea. Na ou telefoni atu i lou epikopo ae tali mai le masini tali telefoni.
Ona sosoo ai lea ma se tu’itu’i mai le faitotoa. Sa matuai ou te’i i le tatalaina o le faitotoa.
“Talofa, Sister Ries,” sa foliga ataata mai faifeautalai e galulue i le matou uarota.
Na vave lava ona ou iloa le tagata e ave i ai le suti. Na pau lava lau tala, “ou te matuai le talitonu lava”. “Faamolemole faatali atu iinei. Ou te vave mai lava.”
Sa ou faatopetope atu ma le fiafia a o talie alii faifeautalai i lau faafeiloaiga na ese lava. Sa faatumulia au i lena fiafia a o ou aumaia le suti.
“O le peleue e 40 le tele,” na ou fai atu ai, “ae o ofuvae e 33–32.” Sa ou tilotilo atu i le isi alii faifeautalai, ma le faamoemoe o le a fetaui i ai.
Sa ata le faifeautalai. “Ou te ofu i le 40 ae 33–30 ia ofuvae.” Sa le gaoia ona foliga. “Sa matou tatalo ma ou matua ina ia ou maua se suti e faauma ai lau misiona. E le o toe umi lo’u taimi o totoe, ae ua toeitiiti lava a le aoga atoa le [suti] lenei.”
Na taliaina ma le agaga faafetai e le alii faifeautalai faamaoni le meaalofa a le Tama Faalelagi o le suti ma fusiua, ma ina ua tapuni lou faitotoa, sa ou toe alu atu i lou potumoe ma tootuli ma faafetai atu i le Tama Faalelagi mo Lona alofa i Lana fanau. Na te faafofogaina tatalo i taimi uma.