Savali a Faiaoga Asiasi

Ia Avea ma Tufugaaao o le Atua

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e tuafafine o loo e asia. Fetufaai atu i ai ou aafiaga ma molimau. Valaaulia i latou o loo e aoaoina ia faapena foi ona fai.

O Le A Le Uiga ia Avea ma se Tufugaaao o le Atua?

Alema 26:3: “O le manuia foi lenei ua foaiina mai ia te i tatou, aua ua faia i tatou ma tufugaaao o le Atua e faataunuu ai lenei galuega tele.”

Bonnie D. Parkin, peresitene aoao o le Aualofa: “O le a le uiga o le avea ma se tufugaaao i se faaupuga masani? Ou te manatu o lona uiga, o le faafaileleina lea o isi. Sa taua e Iosefa Samita o le galulue ‘e tusa ai ma na tigaalofa’ o loo i o tatou loto… . E le masino auala e avea ai ma tufugaaao o le Atua. Mo se faataitaiga, ia avea oe ma ituaiga o faiaoga asiasi e te manao lava i ai; fesili i se talavou nofofua pe o a mea e manao e fai ae le o le fesili pe aisea ua le faaipoipo ai; faasoa atu ae le o le faaputuputu mai [o au mea]; filifili ma le faaeteete ou ofu, upu, ma faafiafiaga; mata ataata i lau tane po o se tamaitiiti ua iloa ua latou matua’ia se faaletonu po o se lototiga; opo mai se tamaitai talavou; faiaoga ma se loto fiafia i le vasega pepe; faaali atu e ala i ou uiga faaalia o loo e maua le fiafia i la tatou faigamalaga” (“O Taimi Taua,” Liahona, Nov. 2005, 107, 109).

Kathleen H. Hughes, fesoasoani muamua i le au peresitene aoao o le Aualofa: “O loo pa’i mai pea le Alii i lou agaga i lea taimi ma lea taimi, ma o le tele lava o na taimi, e oo mai ai Lana pa’i ia te a’u e ala mai i lima o se uo… . Ae atonu o le a sili atu ona [tatou] lagonaina Lona alofa pe a [tatou] vaavaai mo Lona aao i gaoioiga a i latou o e alolofa ia i [tatou]… . Ua silafia e le Atua manaoga o Lana fanau, ma e masani lava ona galue o Ia, e ala ia i tatou, i le musuia o i tatou ina ia tatou fesoasoani atu le tasi i le isi. A tatou galulue i na uunaiga, ua tatou faia se galuega paia, ona ua mafai ona tatou maua le avanoa e avea ai o se tufugaaao o le Atua i le taliina o se tatalo” (“Se a Se Mea Lelei Silisili Tatou Te Iloa: O Uo Faapei o Keriso,” Liahona, Me 2005, 74–76).

O Le A Se Mea E Mafai Ona Ou Faia i le Avea Ai ma Tufugaao o le Atua?

Peresitene James E. Faust, Fesoasoani Lua i le Au Peresitene Sili: “E mafai ona avea outou o ni tufugaaao malolosi o le Atua e fesoasoani e faataunuu ai lenei galuega tele… . E mafai ona e faia se mea mo se isi tagata, lea e leai se tagata soifua e mafai ona faia… . O faamanuiaga ma se filemu mafanafana o le a oo atu ia te oe pe afai e mafai ona e alofa i le Atua ‘ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i le lua te tuaoi e pei o oe lava ia te oe’ [Luka 10:27]… . Afai ua e faia le mea sili e te mafaia, lea e masani lava ona e faia, o le a taliaina ma le fiafia e le Alii lau taulaga faatauvaa, e tusa lava po o le a” (“Tufugaaao o le Atua,” Liahona, Nov. 2005, 115–16).

Peresitene Gordon B. Hinckley: “E leai se mutaaga i mea lelei e mafai ona tatou faia, i le aafiaga e mafai ona tatou faia mo isi. Aua tatou te nofoa’i i faitioga po o mea e le lelei. Ia tatou tatalo mo le malosi; ia tatou tatalo mo le gafatia ma le manao e lagolago atu ai i isi. Ia tatou faasusulu atu le malamalama o le talalelei i taimi uma ma nofoaga uma, ina ia susulu atu ai le Agaga o le Togiola mai ia te i tatou. O upu a le Alii ia Iosua … , ‘ia e faamalosi ma loto tele; aua e te fefe, aua e te matau: aua o Ieova lou Atua [o le a] ia te oe i mea uma e te alu ai’ (Iosua 1:9)” (“O Le Moomia o le Agalelei Tele Atu,” Liahona, Me 2006, 61).