Ua Atoa le 50 Tausaga o le Pese Faapelepele
O Le viiga “O Au o Se Atalii o le Atua” (Tusipese a Tamaiti,. nu. 1–2) ua logo ai le lalolagi atoa, e taina lona musika ma usuina ona upu e tagata matutua ma tamaiti o le Peraimeri i le lalolagi atoa talu mai le 1957.
A o latalata atu i lona 50 tausaga, o le pese, ua lomiaina i le silia i le 90 gagana, o loo faaauau pea ona ootia ai loto o le toatele.
O le savali a le viiga e tolu fuaiupu o loo aoaoina ai upu moni o le talalelei e faapea, o tagata uma lava o se atalii po o se afafine o le Atua, ma ua auina mai i lenei lalolagi ma ni tulaga e mafai ona latou gafatia e faavavau. Ua talosagaina matua ma faiaoga e fesoasoani i tamaiti taitoatasi ia fai filifiliga amiotonu i se aafiaga i le tino lea e mafai ona taitai atu ai i le ola faavavau ma le fiafia.
O Le viiga e faitauina faapenei:
1. O au o se atalii o le Atua,
Ua Ia auina mai a’u nei,
Ia ou nofo ai i lenei lalolagi
Ma matua agalelei.
[Tali]
Tago mai, savali mai, i ou tafatafa,
Ina nei ou sese.
Aoao mai mea e ao ona fai
Ia ou toe foi atu ai.
2. O au o se atalii o le Atua,
E tele manaoga;
E ao ai ina ou iloa
Ana afioga.
3. O au o se atalii o le Atua.
Ma a ou usitai;
Ou te faatasi ma Ia,
I Lona maota.
Na tusia e Naomi W. Randall, o le sa auauna atu o se tasi o le pulega aoao o le Peraimeri, ma o se fesoasoani i le au peresitene aoao o le Peraimeri le [pese], “O Au o se Atalii o le Atua” i se talosaga a le pulega aoao a le Peraimeri. O Mildred T. Pettit, o le foi sa auauna atu o se tasi o le pulega aoao o le Peraimeri, sa faanotaina le musika.
Sa faamatalaina e Sister Randall lana faagasologa i le tusiaina o upu o le pese:
“O lena afiafi, sa ou alu ifo ai i ou tulivae ma tatalo leotele, ma aioi atu ina ia faailoa mai e lo tatou Tama Faalelagi ia te au ia upu sao. O se taimi o le 2:00 i le vaveao, na ou ala ai ma amata ona ou toe mafaufau i le pese. Na oo mai upu i lou mafaufau… . Sa faavave ona ou nofo ae i luga ma amata ona tusi i lalo ia upu ao oo mai ia te au. E le’i umi ae maua loa fuaiupu e tolu ma se tali. Sa ou iloiloina ma le agaga faafetai le galuega, ma fiafia i le savali a upu, ma ou toe foi atu i lou potumoe ma ou tootuli ai i luma o lou Tama oi le Lagi ma faapea atu ‘Faafetai lava!’”(i le Karen Lynn Davidson, Our Latter-day Hymns (1988), 303–4).
Na tuuina atu e Sister Randall ia upu ia Sister Pettit, o le na faaaluina le tele o itula e galue ai i le musika.
O upu i se tasi o laina o le tali sa faitauina muamua e faapea, “Aoao mai mea e ao ona iloa.” Ina ua uma ona tusia le pese, na auai atu Peresitene Spencer W. Kimball i se konafesi lea sa usuina ai e se aufaipese a tamaiti Peraimeri le pese. Sa ia talosagaina mulimuli pe malie ia Sister Randall e sui le “Aoao mai mea e ao ona iloa” i le “Aoao mai mea e ao ona fai,” ma o lena ua faitauina ai i aso nei.
Na saunoa Peresitene Kimball, “E le lava le ao ona iloa. O le tiapolo e iloa ma gatete; o le tiapolo na te iloa mea uma. E ao ona tatou faia se mea” (“New Verse Is Written for Popular Song,” Church News, Ape. 1, 1978, 16).
Na tusia se fuaiupu lona fa o le pese mo se aufaipese a le Peraimeri e usuina i le konafesi aoao ia Aperila 1957. Ina ua saunia le tusi pese o loo i ai nei, na tonu ai i le Komiti Aoao o Musika ma le Matagaluega Faamaopoopo, o le fuaiupu faaopoopo e le o se vaega aloaia o le pese ma o lea na le faaaofiaina ai.
Mulimuli ane, ina ua fatuina le Tusipese a Tamaiti, na filifili ai loa le pulega aoao a le Peraimeri ina ia tuu i ai [le fuaiupu faaopoopo]. Ua faaliliuina le fuaiupu lona fa i gagana e 20 o le Tusipese a Tamaiti. E faitauina faapenei le fuaiupu.
4. O au o se atalii o le Atua.
O Ana folafolaga e moni;
Malo selesitila mo au
Pe a ou tumau ai.
O le taimi muamua na tuu ai le viiga lenei i le Pese Faatasi ma Au, o se tusipese a tamaiti na lolomiina i le 1969, sosoo ai ma le tuu i le Tusipese a Tamaiti i le 1989 ma le musika na tuufaatasia e Darwin Wolford.
O le “O Au o se Atalii o le Atua” o se tasi o viiga ma pese a tamaiti e 45 o loo maua i tusi lesona o le Gospel Fundamentals ma Mataupu Faavae o le Talalelei. O lona uiga o le taimi muamua lava e faailoa atu ai tusi ma mea e faaaoga a le Ekalesia i se gagana fou, o le “O Au o se Atalii o le Atua” o se tasi o viiga e vave maua e tagata i lea faagasologa.
O tusitusiga paia; tusi lesona; musika e leai ni upu, aufaipese, po o isi lomiga; CD; saunoaga a le Au Pulega Aoao; mea faapipii “O Au o se Atalii o le Atua”; ma isi tusi ma mea e faaaoga, o loo folafolaina uma ai le savali o loo i upu ma le musika o le viiga faapelepele, lea ua oo atu i aganuu, agaifanua, ma tu ma aga e musuia ai tagata uma i upu moni o le talalelei, o tagata uma lava o se atalii/afafine o le Atua.
O Elder Robert D. Hales o le Korama a Aposetolo e Toasefululua, a o avea ma se tasi o le au Fitugafulu, sa auiliiliina le autu o le pese i le 1978: “E matua alofa lo tatou Tama oi le Lagi ia i tatou nai lo le mea e mafai ona tatou malamalama i ai. Ua ia fetalai mai ua Ia ‘faitauina lona nuu’ (Alema 26:37) ma e taua i tatou taitoatasi ia te Ia. E finagalo o Ia ia tatou toe foi atu ma ola faatasi ma Ia ma Iesu Keriso. E finagalo ia tatou fesootai ma Ia i talosaga, tau atu ia te Ia lo tatou alofa, ma ia faaali atu lo tatou alofa ia te ia i le tausia o Ana poloaiga. E mafai ona avea i tatou e pei lava o Ia, pe a tatou usiusitai, atiina ae uiga e finagalo o Ia ina ia i ai i Lana fanau” (“O Au o se Atalii o le Atua,” Liahona, Nov. 1978, 23; Friend, Mat. 1978, 7).