O Se Gaoiga, o se Tusi, ma se Molimau
Ou te nofo i Chile ma na avea au ma se tagata o le Ekalesia talu mai le valu o ou tausaga. Sa ou iloaina lava sa ou i ai i le Ekalesia moni, ma na ou lagona na i ai sau molimau o le Tusi a Mamona, ae o se molimau nono mai. E ui lava ina sa ou manao i ai, ae ou te le’i faitauina uma lava le Tusi a Mamona. E le’i sili atu lava ma le 1 Nifae la’u faitauga.
O se tasi po i le aso 4 o Iulai 2002, na ma auai ma lau uo i le ma vasega o le Tusi a Mamona i le inisititiuti. Sa ma faamuli ina ua uma le vasega ma ma talanoa seia oo ina ma matauina ua fai si leva o le afiafi. Sa amata ona ma savavali atu i le fale pe tusa lea o le 10:15, ma ina ua ma taunuu i le nofoaga ma te o eseese ai, sa ma tutu foi ma faaauau le talanoaga.
E toalua ni alii na pasi ane ma fesili mai pe ua ta se fia, ae sa mua ona ma talanoa ma o lea na ma tau le lagonaina ai i laua. Na faafuasei ona la toe foi mai. Na velo mai le lima o se tasi o i laua ma fusi ai au, ma tuu se naifi i lo’u ua. Ona ia faasaolotoina lea o au ae faamatau lau uo. Na fesili mai le isi alii ia i maua mo se tupe, ma ina ua ma fai atu e leai se ma tupe, na matuai le fiafia i laua. Sa la faatonu faamalosi mai e avatu o ma peleue ma ato faafafa.
Ua leva ona ou manao i lenei peleue ma na iu ina mafai ona [ou] faatauina i le tasi le masina na te’a atu. Ma ou te fiafia tele i lau ato faafafa, lea na aumai i lou tuagane matua. O lau uo sa i ai ana meaaoga i totonu o lana ato faafafa lea sa manaomia ona ave i totonu. Sa matuai ou fefe lava—na toetoe a ou malo faasasao ai. O le taimi muamua lea ua faoa ai [ni au mea].
E aunoa ma le toe faatali, sa ma tuuina atu loa a ma meatotino ia i laua. Ae na faafuasei ona ou fai atu, “Faatali! Faamolemole sei aveese mai lau Tusi a Mamona! Na o le pau lena o le mea aoga o loo ia te au.” Na ese lava le pupula mai a le gaoi ia te au ma tuu mai ou te aveeseina mai [le Tusi a Mamona]. Ona la sosola lea.
Sa ou fusiina le tusi ma ou te le’i popole lava i se isi mea. Na ou lagona le filemu aua na ou faasaoina lenei tusi taua mai ni tagata solitulafono se toalua.
O lena po, sa tonu ai ia te au, e faaali atu le agaga talisapaia tele mo lau oa faapea ma osigataulaga uma na faia e tagata o e na aumaia lenei tusi i le malamalama. Sa amata ona ou faitauina, ma amata ona ou lagona le filemu e le mafaamatalaina ma se olioli uiga ese. Na faafuasei lava ona avea ma mea sa sili atu ona taua ia te au. E lua masina na faamaeaina ai lau [faitauga], ma iu ai ina ou maua se molimau mo au lava e uiga i le tusi.
Ou te le o iloa lava po o fea na sau ai lo’u lototele e fesili atu ai e toe aumai la’u tusi, ae o le a ou le faanoanoa lava i lo’u faia o lena mea. E leai ni o’u lagona ita i na alii aua o lena aafiaga na ou maua ai le molimau sa ou manao i ai.
O lena molimau sa fesoasoani e uunaia au e fai se misiona. Ua ou foi mai nei i le fale mai Atenitina, lea na mafai ai ona ou tau atu i tagata e uiga i le Tusi a Mamona, ma faasoa atu ia i latou le ofoofogia o lenei tusi.