O Mai e Faalogo i le Siufofoga o se Perofeta
Aua Le Fiu
E pei o nisi o outou, ua ou iloa lelei le feagai ma le faanoanoa ma le maasiasi faaletalavou. A o ou laitiiti, sa ou taalo sofipolo i le aoga maualalo faapea le aoga maualuga. Sa filifili ni kapeteni se toalua, ona la filifilia lea o tagata taaalo la te mananao i ai i a la au. E mautinoa lava, o tagata taaalo sili ona lelei e filifili muamua, ona sosoo ai lea ma le lona lua, ma le tolu. E leai se mea e leaga ai pe a filifilia oe i le filifiliga lona fa po o le lona lima, ae o le filifilia mulimuli ma auina atu i se tulaga e sili ona le manaomia sa matuai mataga lava. Ua ou iloa; aua sa ou oo i ai.
Sa ou talotalo lava ia aua nei taina atu le polo i le itu lea sa ou i ai, aua e mautinoa lava e pau ia te au, ona maua ai lea o ai o le isi au, ma o le a talie tagata o le au ia te au.
E ui lava e pei o ananafi na tupu ai, ae ou te manatua lelei le taimi tonu na suia ai lena tulaga i lou olaga. Na amata le taaloga e pei ona ou faamatalaina: o au na mulimuli lava filifili. Na ou agai atu ma le faanoanoa i le tulimanu taumatau o le malae ma matamata atu a o tofu ia tulimanu ma tagata o le isi au. Ona pepe lea o isi tagata ta e toalua ina ua misi a la ta. E lei pine, ae ta loa e le isi tagata na sosoo ai se ta maoae. Sa ou lagona atu foi o fai lana tala, “O le ta faatini lenei.” O se mea maasiasi lena, aua na agai mai le polo i le itu sa ou i ai. Pe ou te au ea i ai? Sa ou tamoe i le tulaga sa ou manatu o le a pau i ai le polo, na memumemu lau tatalo a o ou tamoe, ma aapa atu i luma ou lima faaofuofu. Sa ou ofo. Na ou sapoina le polo! Na manumalo la’u au i le taaloga.
O lenei aafiaga e tasi na faamalosia ai lou lagona mautinoa, na musuia ai lou manao e faataitai, ma avatu ai au mai le tulaga o le mulimuli ona filifilia, ma avea ma se tagata na tele sona sao i le au.
E mafai ona tatou mauaina lena aafiaga o le faamalosia o le lagona mautinoa. E mafai ona tatou lagonaina lena mimita i le faatinoina. O le a fesoasoani se fuafaatatau e tolu ona upu ia i tatou: Aua le fiu.
Mai se lauga o le konafesi aoao ia Oketopa 2005.
O mea e mafaufau i ai
-
Aisea na lelei ai le taalo a Peresitene Monson ina ua uma lona sapoina o le polo? Pe na faafuasei lava ona sili atu lona talenia? E i ai se auala atonu na ia maua ai lena lava lagona e aunoa ma lena sapo mata’ina?
-
Ae faapefea pe afai e te le sapoina [le polo] pe a mulimuli ona filifilia oe, po o le, ae faapefea pe a e ulivaa i se miliga? E faapefea ona e iloa o oe o se tagata lelei ma aoga?
-
O a mea e aupito taua i le olaga lea e le tatau ona e fiu ai?
-
E faapefea ona faia e lenei tala se eseesega i mea e te faia pe afai o lou taimi lea e filifili ai se au?