Manatu mo afiafi faaleaiga

O nei manatu e mafai ona faaaogaina mo le aoao atu i potuaoga faapea foi i le aiga.

“E Lelei Lava le Iloa,” i. 26: Tuu atu i tagata o le aiga e toe fai mai se mea na latou taulotoina ma faasoa mai pe na faapefea ona fesoasoani lena malamalama ia i latou. Ia talanoaina pe na faapefea ona fesoasoani ia Kong Nhean Serey le taulotoina o Mataupu Faavae o le Faatuatua. Filifili se mau po o se viiga e mafai ona taulotoina faatasi e lou aiga.

“Spencer W. Kimball: O Se Tagata o Faatinoga,” i. 28: Fesili i lou aiga po o ai le perofeta ua lauiloa ona o le faaupuga, “Ia faia loa,” ma le, “E tatau ona faalautele a tatou laa.” Faaali atu se ata o Peresitene Kimball. Ia auauai i le faitauina o nisi o tala mai le tusitusiga, ma valaaulia tagata o le aiga e ta’u mai manatu autu. A maea ona faitau le tala mulimuli, ia usu le pese “O le Atua Lo’u Tama” Viiga, nu. 184). Faaiu i le faitauina atu o le folafolaga a Peresitene Kimball o loo i le parakalafa mulimuli o le tusitusiga.

“Ina Ia Faamalamalamaina ma Olioli Faatasi Ai,” i. 38: Fai atu i tagata o le aiga e tali mai i le fesili lenei: “O le a se mea e te faia pe afai ua e i ai i se tulaga ua e manatu ai e le manaia se sauniga faamanatuga?” Talanoa e uiga ia latou tali eseese. Faasoa atu le tali a Peresitene Kimball i lea lava fesili e tasi. Lu’i tagata o le aiga e mulimuli i lana faataitaiga o le avea ma se tagata mataala i le aoaoina ma le mauaina [o aoaoga] e ala i le Agaga (tagai MFF 50:13–22) pe a latou auai i sauniga lotu.

“Tama, Ou Te Mitamita Ia te Oe!” i. 46: Taaalo i se taaloga e te iloa ai po o ai e umi ona filemu. A pisa loa, talanoa e uiga i le faigata ona filemu. A o e faitauina atu le tala lenei i le aiga, fai i ai e faalogologo pe aisea e taua ai le faasoa mai pe a uunaia ai e le Agaga. Molimau atu e uiga i le faalogo ma mulimuli i uunaiga a le Agaga.

“O Le Faafeagai o le Fefe,” i. U14: Faitau parakalafa muamua e fa o le tala a Tricia e iloa ai le mafuaaga na fefe ai. Fesili atu, “O a ni mea e mafai ona tatou faia e foia ai lo tatou fefefe?” Faauma ona faitau le tala a Tricia, ma molimau atu i le mana o le tatalo ma viiga i le foiaina o lo tatou fefefe.