Faamatalaga

Tali i Fesili

A o ou auauna atu i Venesuela, sa ma aoaoina ai se tamaloa sa sailiili i le tele o ekalesia, ae na te le’i mauaina lava le mea sa ia sailia. Sa fiafia o ia i mea uma sa ma aoao atu ia te ia e uiga i le Ekalesia, ae na te le’i lagonaina le maua o se tali e ala i le tatalo. Sa amata ona i ai ni ona masalosaloga se tele. Ona mou ese ai lea o ona masalosaloga. Sa ia faamatala mai, sa tamoe o ia i le paka ae tau atu ai i se Liahona i luga o se nofoa umi na avanoa. Sa saofai ifo i lalo ma faitau loa, ma na taliina ai ana fesili. O lea na mafai ai ona ia faatulagaina se aso e papatiso ai. Faafetai lava mo le Liahona!

Elder Jordan Eves, Misiona a Chile Viña del Mar

O Se Asiasiga i le Malumalu

Sa ou alu i le malumalu O Le Ekalesia a Iesu Keriso o le Au Paia o Aso e Gata Ai, i Sāo Paulo, Pasila, ina ua tatalaina mo tagata lautele e asiasi i ai, ma ou te faapea atu, e ese ma le matagofie! O faamatalaga uma lava sa sili ona manaia. Sa fai faalelei ma faaaloalogia i matou. Na ou lagonaina e pei lava na i ai Iesu Keriso.

Sa matuai matagofie potu! Ma o potu taitasi sa ou lagonaina ai le filemu e le mafaamatalaina. O le potu selesitila na toeitiiti lava pei o le lagi—sa le mafai ona taofiofi lou ootia ona o le alofa mama na ou lagonaina. Faafetai mo le tuuina mai o lenei avanoa ia i matou. O au ou te auai i se isi ekalesia, ae o lenei asiasiga, na ou lagonaina ai le faafouina i le faatuatua ma le filemu o le Alii.

Marisa Pretti Ferreira, Pasila

Faamalama i le Lalolagi

Matou te auina atu o matou moomooga alofa ma le faafetai mo le galuega maoae a la outou aufaigaluega. O le Liahona o se faamalama i le lalolagi e mafai ona oo atu i tulimanu uma o le lalolagi, lea o loo i ai lo matou atunuu. E manaia foi le mafai ona maua o lomiga a le Ekalesia i le faaSipaniolo i luga o le Initoneti.

Juan C. Giménez ma le aiga, Paraguay

O Se Tagata Faitau Pea Lava Pea

I le avea ai o se tagata e faitau pea lava pea i la outou mekasini manaia, ou te faatalitali ai ma le naunautai mo le lomiga fou o le mekasini i masina taitasi. O mea o loo outou lomia ai i itulau o le Liahona—tusitusiga a taitai o le Ekalesia, o a latou saunoaga i le konafesi aoao, tala, ma tusi mai le au faitau, ma isi mea—e siitia ma aumaia ai musumusuga mo au i taimi uma lava. Latou te fafagaina lou agaga, loto ma le mafaufau. E fesoasoani ia te au ou te maua ai tali i fesili aupito faigata o le olaga, faapea foi ma tulaga eseese uma o le olaga. O le mea moni, o itulau uma lava e aumaia ai se molimau ola ma mamana. E tau le mafai e se tagata, e oo lava i le tagata faitau e sili ona le talitonu, ona tumau pea ona le ootia lona agaga.

Vyacheslav Gureev, Rusia