2007
Saunia e le Matagaluega ia Meafaigaluega mo le Pulea Lelei o Tupe
Ianuari 2007

Saunia e le Matagaluega ia Meafaigaluega mo le Pulea Lelei o Tupe

Ua atulasi ona fautua mai Peresitene Gordon B. Hinckley ma isi taitai o le Ekalesia e faatatau i le faalagolago o le tagata ia te ia lava, aitalafu, ma le puleaina lelei o tupe, ma o lea ua saunia ai e le Matagaluega o le Tautua Faauelefea a le Ekalesia ni meafaigaluega ua fuafuaina e fesoasoani ai i tagata o le Ekalesia e mulimuli ai i lena fautuaga.

“E toatele naua tagata o loo tetele ni aitalafu i mea e le tatau ona manaomia,” o le saunoaga lea a Peresitene Hinckley ia Oketopa 2001. “Ou te uunaia outou o ni tagata o lenei Ekalesia ina ia saoloto mai le aitalafu o mea le talafeagai, ma tuu ese sina seleni e teu mo aso leaga” (“O Taimi o Loo Tatou Ola Ai,” Liahona, Ian. 2002, 84–85; Ensign, Nov. 2001, 72).

O le tamaitusi ua toe fuafuaina, One for the Money: Guide to Family Finance, o se meafaigaluega o loo i ai mo tagata o le ekalesia e fesoasoani ia i latou ia malamalama i aitalafu ma le puleaina tatau o a latou tupe.

“E le o puipuia tagata o le Ekalesia mai faigata tautupe,” o le faamatalaga lea a Dennis Lifferth, o le pule faatonu o le Matagaluega o le Tautua Faauelefea. “Mai lava i le popofou o le Ekalesia, na fautuaina ai i tatou ina ia faalagolago le tagata ia te ia lava ma ia ola i mea ua tatou maua.”

O aoaoga o loo i le One for the Money: Guide to Family Finance ua aumaia mai se saunoaga na tuuina mai e Elder Marvin J. Ashton (1915–94) o le Korama a Aposetolo e Toasefululua i se fonotaga a le Tautua Faauelefea ia Aperila o le 1975. O le taimi mulimuli na lolomi ai o se tamaitusi o le 1992. O le fuafuaga fou ua faaopoopoina i ai ata, o se faataatiaga lata mai nei, ma ua fuafuaina ia faia ai le savali a Elder Ashton ia sili atu ona malamalama i ai le tagata faitau. O loo faamamafaina i le fuafuaga lenei mataupu faavae tumau e 12 na otootoina e Elder Ashton:

  1. Ia totogi ma le faamaoni le sefuluai.

  2. Ia aoao e te pulea tupe ao le’i puleaina oe e tupe.

  3. Aoao le puleaina o le tagata lava ia ma faasa ia lava mai le faaaogaina le tatau o tupe.

  4. Ia faaaoga se paketi.

  5. Ia vave aoaoina tagata o le aiga a o talavou i le taua o le galue mo le mauaina o le totogi po o le taui.

  6. Ia aoao tamaiti ia faia ni faaiuga i tupe ma ia iloa ona malamalama i mea e oo mai e tusa ai ma a latou faaiuga.

  7. Ia aoao tagata taitasi o le aiga ia tuuina atu sona sao mo le lelei lautele o le aiga atoa.

  8. Ia faaauau pea aoaoga.

  9. Ia galue agai i le faatauina o sou lava fale.

  10. Ia e auai i se polokalama inisiua e talafeagai.

  11. Ia malamalama i le aafiaga e oo mai i mea tautupe a le aiga ona o fesuisuiaiga o le tamaoaiga o le atunuu.

  12. Ia teuina meaai ma mea e manaomia e saunia ai mo faalavelave e tutupu faafuasei.

O loo faagasolo nei e le Ekalesia le faiga o le tamaitusi ina ia maua i gagana e 10: Faa-Saina, Peretania, Farani, Siamani, Italia, Sapani, Korea, Potukale, Rusia, ma le faaSipaniolo.

O le tamaitusi ua toe fuafuaina o le a maua fua atu i faletusi o le Ekalesia po o le meli uila i le I.S. ma Kanata i le ldscatalog.com. O se lomiga faaeletonika o le tamaitusi ua toe fuafuaina ma isi punaoa o le puleaina o tupe o le a maua foi i le meli uila i le providentliving.org.

Ua tuuina mai e Peresitene Hinckley le folafolaga lenei: “Afai ua totogi a outou aitalafu, afai foi o i ai ni a outou tupe faaagaga, tusa lava pe itiiti, po o le a lava le feagiai solo o matagi malolosi i le mea tou te i ai, ae o le a i ai pea le malutaga mo o outou taitoalua ma fanau, ma le filemu i o outou loto. Na o le pau lena o le mea o le a ou talanoa atu ai e uiga i lena tulaga, ae ou te matuai faamamafaina atu e tusa ai ma le mea ou te mafaia” (“Mo Tama Talavou ma Tama,” Liahona, Ian. 1999, 66; Ensign, Nov. 1998, 51).