Spencer W. Kimball: O Se Tagata o Faatinoga

Saunia E Garrett H. Garff

Matagaluega o Mataupu Aoaoina

Na soifua Peresitene Kimball i mea na ia aoao atu: “E le faapea o le tele o mea tatou te iloa e taua, nai lo mea tatou te faia ma ituaiga tagata e i ai i tatou.”

I le 1981 na saunoa ai Elder Robert D. Hales, a o avea lena ma se sui o le Korama Muamua a Fitugafulu, o Peresitene Spencer W. Kimball, “O ia o se tagata o faatinoga, na faaalia lena i le faaupuga faigofie sa i luga o lana kesi, e faapea, ‘Ia Fai Loa.’”¹

I le avea ai ma Peresitene lona sefululua o le Ekalesia, mai ia Tesema 1973 e oo ia Novema 1985, o lenei “tagata o faatinoga” na uunaia le Au Paia o Aso e Gata Ai ina ia aloese mai le faafia amiotonu ae aapa atu mo tulaga e sili atu ona maualuluga o le galulue i le talalelei. “E tatau ona faalautetele a tatou laa,” sa ia saunoa ai.² Sa fautua mai foi: “Ia tatou manatua, e le faapea o le tele o mea tatou te iloa e taua, nai lo mea tatou te faia ma ituaiga tagata e i ai i tatou. O le fuafuaga a le Matai o se polokalama o le faia, o le ola ai, ae le na o le iloa. O le malamalama lava ia e le o le sini lena. Ae o le ala o loo tatou ola amiotonu ai ma faatatau lena malamalama i o tatou lava olaga ma le auala o loo tatou faaaogaina e fesoasoani atu ai i isi e faamatalaina ai o tatou tagata.”³

I lona soifuaga atoa, sa faaalia e Peresitene Kimball lana tautinoga e ola i le talalelei. O ana aoaoga, e aumai ai fautuaga lelei ma le musuia e mafai ona fesoasoani ia i tatou taitoatasi e ola atoatoa ai i le talalelei. O faataitaiga ua ta’ua i lalo ua aumaia mai Aoaoga a Peresitene o le Ekalesia: Spencer W. Kimball, o le mataupu aoaoina lea a le Au Perisitua Mekisateko ma le Aualofa mo le 2007 i ni gagana e 26, e aofia ai le Igilisi Patupatu [English Braille] mo i latou e po le vaai.

Tatalo

O se tasi o aafiaga aupito faigata i le olaga o Spencer W. Kimball o le maliu lea o lona tina, o lē na maliu a o 11 ona tausaga. Na ia taua, na oo mai le tala “e pei o le pa o se faititili. Sa ou tamoe ese mai le fale agai i tua o le fanua e nana ai o’u loimata. Sa ou tagi masusu e aunoa ma le lagona pe iloa mai e tagata uma… . Na foliga mai o le a pa lo’u fatu ua sefulutasi tausaga le matua.”

Ae peitai, e ui lava i lona laitiiti, na iloa e Spencer le mafanafana ma le filemu e mafai ona aumaia e le tatalo. I lenei taimi faanoanoa, na tusia ai e se uo a le aiga, “Na matou fetagisi ma la’u fanau [ma’ua ma lo’u toalua] ina ua matou faalogo i tatalo a Spencer laitiiti ma sa mamafa lava i si ona tamai fatu le maliu o lona tina, ae peitai sa ia taualo pea ma le lototoa ma le faanoanoa ma saili atu le faamafanafanaga mai si punavai lava e tasi [o le Atua ia].”⁴

Sa aoao mai Peresitene Kimball e uiga i le tatalo: “O le tatalo o se avanoa lelei—e le gata ina talanoa atu ai i lo tatou Tama o i le Lagi, ae ia maua mai ai foi le alofa ma musumusuga mai ia te ia. I le faaiuga o a tatou tatalo, e ao ona tatou faalogologo ma le naunautai—mo ni nai minute. Sa tatou tatalo mo se fautuaga ma se fesoasoani. O lenei e tatau ona tatou ‘[fifilemu], ma iloa [o ia] lava o le Atua.’ (Salamo. 46:10.)”⁵

“O le aoaoina o le gagana o le tatalo o se fiafiaga sili lea o le olaga atoa. O nisi taimi e lolofi mai ai manatu i o tatou mafaufau a o tatou faalogologo atu pe a mavae a tatou tatalo. O nisi taimi e fetuleni mai ai lagona ia i tatou. E faamaonia mai e le agaga o le toafilemu ia i tatou o le a lelei mea uma. Peitai, e masani lava, pe afai tatou te faamaoni ma faatauanau, o le a tatou maua se faalogona lelei—o se faalogona mafanafana mo lo tatou Tama o i le Lagi ma se lagona o lona alofa mo i tatou. E lagona lava lo’u faanoanoa ona o nisi o i tatou e lei iloaina lava le uiga o lena toafilemu faaleagaga, aua o le molimau lena ia i tatou i le taliina mai o a tatou tatalo. Ma e talu ai ona o lo tatou Tama o i le Lagi e sili atu lona alofa ia i tatou nai lo lo tatou alolofa ia i tatou lava, o lona uiga e mafai ona tatou faatuatuaina lona agalelei, e mafai ona tatou faatuatuaina o ia; o lona uiga pe afai e faaauau pea ona tatou tatalo ma ola i le olaga e tatau ai, o le a taitaia i tatou e le aao o lo tatou Tama ma faamanuiaina i tatou.”⁶

Suesue i Tusitusiga Paia

A o avea ma se tamaitiiti e 14 tausaga, sa faalogo ai Spencer Kimball i se lauga lea sa fesili ai le failauga po o ai o le faapotopotoga ua uma ona faitauina le Tusi Paia atoa. Sa na o ni nai tagata sa sii o latou lima. Ona o le lē aofia ai i nai na tagata, o lea sa malosi ai le lagona o Spencer e tatau ona ia faitauina le tusi paia mai le isi faavaa e oo i le isi faavaa, lea sa amata ona ia faia i lena lava po e ala i le malamalama o se moli e ola i le suauu koale. E tusa ma le tausaga na ia faamaeaina ai lenei sini o le faitauina uma o le Tusi Paia, o se ausiaga na saofaga i lona fiafia i le olaga atoa e suesue i tusitusiga paia.⁷

Sa masani ona aoao mai Peresitene Kimball e uiga i le suesue i tusitusiga paia. “Ou te talosagaina i tatou uma ina ia iloilo ma le faamaoni a tatou taumafaiga e uiga i le suesueina o tusitusiga paia. O se mea masani le i ai o ni nai faitau o tusitusiga paia ua tatou iloa, e i ai foi i o tatou mafaufau, e pei ona sa i ai, ma o lea tatou te manatu sese ai e faapea, ua tele naua mea e uiga i le talalelei ua tatou iloa. I lea la tulaga, o le maua o sina malamalama itiiti, e mafai lava ona avea moni ma se faafitauli. Ou te talitonu e i ai lava se taimi i o tatou olaga e tatau ai ia i tatou taitoatasi ona iloa tusitusiga paia mo i tatou lava—a e le na o le iloa i se taimi e tasi, a ia toe saga saili pea ia iloa ma saga iloa atili.”⁸

“Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga. E faateleina ai lo’u alofa ia i latou e tatau ona ou alofa i ai ma lo’u loto atoa ma le mafaufau atoa ma le malosi atoa, ma o le faateleina o lo’u alofa ia i latou, e faigofie ai ona ou tumau i a latou apoapoaiga.”⁹

Migao

I sa na asiasiga i se falelotu o le Ekalesia, na matauina ai e Peresitene Kimball ni pepa sololima sa paepae i le fola o le fale le ta’ua. Sa ia tiaiina ma faamama le faatanoa fululima. Sa musuia se taitai i le lotoifale i lenei faataitaiga o le tausia ma le migao o lea na ia aoao atu ai i isi ina ia faaalia le migao sili mo fale o le Ekalesia ma isi mea paia.¹⁰

Na aoao mai Peresitene Kimball:

“E masani lava, ao le’i amataina po o le tuua foi o sauniga, e faapotopoto ai tagata o le Ekalesia i le falelotu ma faatalofa ma feofoofoai. E foliga mai o nisi aga o le le migao e mafua mai i le mea moni e faapea, o i tatou o ni tagata fefaauoai, ma o le Sapati o se taimi lelei lea e talatalanoa ai, e faaaumea ai, ma feiloa ai i tagata fou. E tatau i matua ona faia se faataitaiga mo o latou aiga e ala i le faia o a latou talatalanoaga i le faapaologa po o isi vaega i fafo o le falelotu ao le’i amataina po o le tuua foi o sauniga. A maea se sauniga, e mafai e matua ona fesoasoani e aveina atu le agaga o le sauniga i le fale, e ala i le talanoaina faatasi ma le fanau i le fale o se manatu, se musika, po o se isi vaega lelei o le sauniga.”¹¹

“E tatau ona tatou manatua, o le migao e le o se amioga maualalo lē tumau tatou te taliaina i Aso Sa. O le migao moni e aofia ai le fiafia, faapea foi ma le alofa, faaaloalo, agaga faafetai, ma le mata’u faaleatua. O se uiga lelei e tatau ona avea ma se vaega o lo tatou olaga. O le mea moni, o le Au Paia o Aso e Gata Ai, e tatau ona avea ma tagata aupito sili ona migao i le lalolagi atoa.”¹²

Alofa Naunau Atu i le Faaola

I le faaiuga o le vaitaimi o le 1940, na mafatia ai Elder Spencer W. Kimball, lea sa avea ma se Aposetolo talu mai le 1943, i ni faasologa o ma’i fatu oso faafuasei. A o faatalitali ai mo lona toe mauaina o le malosi, sa nofo o ia i ni ana uo i New Mexico. Na ta’ua mulimuli ane i se mekasini a le Ekalesia se mea na tupu ao i ai iina:

“I se tasi taeao i lenei vaitaimi o le sailiili matagi mo se malosi, sa iloa ai ua le o i ai Elder Kimball i lona moega. Sa manatu o loo alu sana savalivaliga i le taeao ma e toe foi mai mo le taumafataga o le taeao, o lea sa faia ai lava tiute o i latou sa vaaia o ia. Ae ina ua ta le 10:00 i le taeao e le’i toe foi ane lava o ia, sa amata loa ona popole i latou. Sa amata loa se sailiga.

“Sa iu ina maua atu o ia i lalo o se paina e tusa ma ni nai maila e mamao ese ai. Sa taatia lana Tusi Paia i ona tafatafa, o loo susue i le mataupu mulimuli o le tusi a Ioane. Sa moeiini ona mata, ma ina ua oo atu i ai tagata na sailia o ia, sa leai ma sona minoi e pei lava o le taimi muamua na latou iloa atu ai o ia.

“Ae peitai, o o latou leo atuatuvale na te’i ai o ia, ma ina ua ea a’e i luga sa mafai ona latou iloa atu loimata i ona alafau. Na tali o ia i a latou fesili, ‘O le asō ua [lima] ai tausaga talu ona valaauina au e avea ma se Aposetolo a le Alii o Iesu Keriso, ma sa ou manao e faaalu le aso e mafuta ai ma Ia, o le o loo avea ai au ma molimau.’ ”¹³

I le avea ai ma se molimau faapitoa a Keriso, na molimau atu Peresitene Kimball ao aoao atu o ia e uiga i le Faaola:

Fai mai o ia,“Ou te alofa i le Alii o Iesu Keriso. Ou te faamoemoe e mafai ona ou faaali atu ia te ia ma faailoa atu lo’u faamaoni ma le naunautai. Ou te fia ola e latalata atu ia te ia. Ou te fia faapei o ia, ma ou te tatalo o le a fesoasoani le Alii ia i tatou uma ina ia mafai ona faapei i tatou uma o soo sa Nifae ina ua ia fetalai atu i ai, ‘O lea foi, pe faapefea la outou amio e tatau ai?’ ma sa ia toe taliina lana lava fesili i le faapea atu, ‘E pei lava o au nei.’ (3 Nifae 27:27.)”¹⁴

“Pe a tatou mafaufau atu e uiga i le taulaga sili ona maoae a lo tatou Alii o Iesu Keriso ma puapuaga na ia onosaia mo i tatou, o le a avea i tatou ma ni tagata e le loto faafetai pe afai tatou te le talisapaia lana taulaga e tusa ai ma so tatou mafaia i le malosi o loo ia i tatou. Sa puapuagatia o ia ma maliu mo i tatou, ae peitai, afai tatou te le salamo, o lona uiga o le a leai se aoga o ona tiga ma ona mafatiaga uma ona o i tatou.”¹⁵

“O le tele lava o lo tatou malamalama i le mea moni na tupu i le soifuaga o Iesu le Nasareta i Ketesemane ma luga i Kalevaria, o le a faapea foi ona sili atu ona tatou malamalama i le taua o le taulaga ma le le manatu faapito i o tatou olaga.”¹⁶

Auauna Atu i Isi

O le taofia i le malae vaalele ona o le leaga o le tau, sa faatalitali ai se tina talavou ma lana tama teine e lua tausaga i laina uumi mo ni itula se tele, e taumafai ia maua se avanoa o se vaalele e o ai i le fale. Sa le lavā ma fiaai lana tama, ae o le tina e lua masina lona maitaga sa na le siina o ia, ina nei fafano lona ma’i. Na faatonuina e le fomai e aua le siina lana tama e lua tausaga sei vagana lava ua matuai tatau ai. Na lagona atu e le tamaitai ni faitioga mai tagata na siomia o ia, ao ia faaaogaina lona vae e toso atu ai i le laina lana tama teine o loo tagi. E leai se tasi na ofo atu e fesoasoani. Na faamatala mulimuli ane e lenei tina, “sa i ai se tagata sa savali agai mai ia i maua ma faapea mai ma foliga tausaafia agagalelei, ‘E i ai se mea e mafai ona ou faia e fesoasoani atu ai ia te oe?’ Sa ou taliaina lana ofo ma le agaga faafetai tele. Sa ia siiina i luga mai le fola malulu la’u tama teine o loo tagi masusu, ma sa ia opoina o ia ma le alofa ma milimili lona papatua. Sa ia fesili i ai pe mafai ona ia lamuina se pululole. Ina ua nā o ia, sa ia siiina o ia ma alu atu ma fai atu ma le agalelei i isi tagata na i ou luma atu o le laina, o loo ou manaomia le latou fesoasoani. Na foliga mai sa latou malilie i ai, ma sa alu atu o ia i le laulau e faatau ai pepa malaga, [i le pito i luma o le laina] ma faia ai se fuafuaga ma le tagata ofisa ina ia tuu au i le vaalele lea e le o toe umi ae malaga ese. Na matou savavali faatasi atu i le nofoa, lea sa matou talatalanoa ai mo sina taimi, seia oo ina ua ia mautinoa ua lelei mea uma mo au. Na alu ese atu o ia. Pe tusa o se vaiaso mulimuli ane, na ou vaaia ai se ata o Aposetolo Spencer W. Kimball ma ou iloa ai o ia o le tagata ese lea na i ai i le malae vaalele.”¹⁷

Faatasi ai ma le tele o ana faataitaiga o le auauna atu i isi e faaalia ai le naunautai i lenei mataupu faavae, na aoao mai ai Peresitene Kimball:

“E silafia i tatou e le Atua, ma na te leoleo ia i tatou. Ae e masani ona ia taulimaina mea tatou te manaomia, e auala mai i se isi tagata. O le mea lea, e taua tele lo tatou auauna atu o le tasi i le isi i le malo. E taufai manaomia e tagata o le Ekalesia le malosi o le isi, o le lagolago, ma le taitaiga i totonu o se faapotopotoga o e talitonu e avea o se faatasiga a soo. I le Mataupu Faavae ma Feagaiga tatou te faitau ai i le taua tele o le ‘… ia fesoasoani i e vaivai, ia sii ae lima o loo tautau i lalo, ma faamalosia tulivae vaivai.’ (MFF 81:5.) E masani lava, o a tatou aga o le auauna atu e aofia ai ni nai faamalosiaga faigofie po o le tuuina atu o se fesoasoani masani i ni galuega masani, ae maeu le matagofie o taunuuga e mafai ona tafe mai nai gaoioiga e masani ai ma maua mai le faia o nai galuega faatauvaa!”¹⁸

“O le auauna atu i isi o le a atili ai ona loloto ma suamalie lenei olaga a o tatou sauni atu e ola i se lalolagi e sili atu ona lelei. O le faia o le tautua po o le auauna atu tatou te iloa ai tautua ma auauna atu. Afai tatou te galulue e auauna atu i o tatou uso a tagata, e le gata i le faia o o tatou tiute ma galuega e fesoasoani ai ia i latou, ae o le a fou ai foi sa tatou vaaiga i o tatou lava faafitauli. Afai tatou te popole tele i isi tagata ma o latou olaga, o lona uiga o le a itiiti foi le taimi o le a tatou popole ai mo i tatou lava! I le totonugalemu o le vavega o le auauna atu, o loo i ai se folafolaga a Iesu e faapea o le tuuina atu o i tatou lava, tatou te maua ai i tatou lava! [Tagai Mataio 10:39.]

“E le gata ina tatou ‘mauaina’ i tatou lava i le amanaiaina o le taitaiga paia i o tatou olaga, ae o le tele lava o lo tatou auauna atu i o tatou uso a tagata i auala talafeagai, o le tele foi lena o mea taua e oo mai i o tatou agaga. O le a avea atili i tatou ma ni tagata taua a o tatou auauna atu i isi. O le mea moni—e sili atu ona faigofie ona tatou ‘maua’ i tatou lava aua foi e tele naua isi vaega o i tatou e tatau ona sailia!”¹⁹

Faasoa Atu le Talalelei

I le faleaiga o se faletalimalo i Quito, Ekuetoa, sa i ai faatasi Elder Spencer W. Kimball o le Korama a Aposetolo e Toasefululua ma se vaega na aofia ai ni faifeautalai se toafa. Ina ua uma ona okaina se falaoa ma le susu, sa fesili atu Elder Kimball i le alii na tautuaina i latou, pe i ai sana fanau. Na tali mai le alii faigaluega e toatasi lona atalii. Ona faapea atu lea o Elder Kimball, “O le falaoa ma le susu o le a ola maloloina ai o ia, ae o le a sili atu lona ola maloloina pe afai e te fafagaina o ia i meaai e mafai ona tuuina atu e alii talavou nei.” Sa foliga mai na le mautonu le alii faigaluega pe o le a le uiga o lenei faamatalaga. Ona tau atu lea e Elder Kimball o ia alii talavou sa ia fai atu ai o faifeautalai, ma latou te aoaoina atu le talalelei a Iesu Keriso. Na fai mai le alii faigaluega e fia faalogo i la latou aoaoga.²⁰

E moni lava o se alii o faatinoga pe a oo mai i le galuega faafaifeautalai, na saunoa Peresitene Kimball:

“Ou te lagona ua tuuina mai e le Alii i se auala e masani ai, i totonu o a tatou lio o uo ma e masani, ni tagata se toatele o e ua saunia e auai i lana Ekalesia. Matou te faapea atu, ia outou sailia ma le agaga tatalo na tagata, ona ole atu lea mo le fesoasoani a le Alii e fesoasoani atu ia te oe e faailoa atu ia i latou le talalelei.”²¹

“O loo i ai se sailiga fiafia faaleagaga i le faia o le galuega faafaifeautalai, i le tuuina atu o igoa o tagata e aoao, i le o atu faatasi ma faifeautalai a o latou tuuina atu lesona. O se mea fiafia ma tauia. O itula, o taumafaiga uma, o manatunatuga uma, e aoga uma lava e tusa lava pe na o se toatasi se agaga e faailoa mai le agaga salamo ma le faatuatua ma se naunautaiga ina ia papatisoina.”²²

“Uso e ma tuafafine, faamata o tatou faia mea uma e mafai ona tatou faia. Pe o tatou malilie ea i lo tatou tofiga o le aoao atu o le talalelei i isi? Pe ua tatou saunia ea e faalautetele a tatou laa? E faamamao la tatou vaai?”²³

Alofa ma le Faaleagaga i totonu o le Aiga

Sa avea Peresitene Kimball ma se matua alofa. Fai mai lona atalii o Edward: “E faaalia e lou tama lona alofa i taimi uma lava. Sa ou iloaina e alofa o ia ia te au.” E manatua e Edward se taimi sa la i ai ma lona tama i se faatasiga paia i totonu o le Malumalu o Sate Leki: “Sa i ai iina le faitau afe o alii. A o faaiuina le fonotaga, sa iloa mai au [e lou tama] i le mea sa ou pese ai i se aufaipese. A o agai mai o ia i fafo, sa oo mai ma fusi au ma sogi mai.”²⁴

I le molimau na tuuina mai le taele o lona loto, na aoao mai ai Peresitene Kimball:

“O le a le umi talu ona e opoina lau fanau, e tusa lava po o le a le matutua, i ou lima ma tau atu e te alofa ia i latou, ma ua e fiafia ona e mafai ona avea pea ma au fanau e faavavau?”²⁵

“O le Atua o lo tatou Tama. E alofa ia i tatou. Sa ia faaaluina se malosi tele i le taumafaiga e aoaoina i tatou, ma e tatau ona tatou mulimuli i Lana faataitaiga ma ia alolofa faamaoni i a tatou lava fanau ma tausia i latou i le amiotonu.”²⁶

“O se aiga moni o le Au Paia o Aso e Gata Ai, o se maluapapa lea e tetee atu ai i matagi ma faigata o le olaga. O le faaleagaga e fanauina ma fafagaina e le tatalo i aso uma, suesueina o tusitusiga paia, talanoaga faaleaiga i le talalelei ma gaoioiga e faatatau i ai, afiafi faaleaiga, aufono faaleaiga, galulue ma taaalo faatasi, auauna atu o le tasi i le isi, ma le faasoaina atu o le talalelei ia i latou o siomia ai i tatou. E fafagaina foi le faaleagaga ia tatou faatinoga o le onosai, agalelei ma le fefaamagaloai o le tasi i le isi, ma lo tatou faaaogaina o aoaoga o le talalelei i le li’o faaleaiga. O le aiga o le nofoaga lea e avea ai i tatou ma ni tagata popoto ma le aoaoina i le amiotonu faaletalalelei, aoaoina ma ola faatasi i upumoni o le talalelei.”²⁷

“O Mea e Ao Ona Ou Fai”

O le soifuaga ma aoaoga a Peresitene Kimball e faamanatu mai ai ia i tatou le tatau ona faatino ia [o tatou] malamalama o le talalelei, ma tatou te maua se faamanatu atili o lenei faamamafaga i se suiga laitiiti ae taua i le pese a le Peraimeri e sili ona fiafia i ai “O Au o se Atalii o le Atua” (Viiga, nu. 184). E pei ona uluai tusia i le 1957, na faauma le pese i upu nei: “Aoao mai mea e ao ona ou iloa ia ou toe foi atu ai.” O se taimi mulimuli ane, na fautuaina ai e Elder Kimball, ao avea lena ma se tasi o le Korama a Aposetolo e Toasefululua, ina ia suia le upu e tasi i lena laina mulimuli. O lea ua faauma ai le pese, “Aoao mai mea e ao ona fai ia ou toe foi atu ai.”²⁸

O nei upu o se aotelega puupuu matagofie o le soifuaga ma aoaoga a Peresitene Kimball. Sa ia aoao mai e ala i upu ma faataitaiga, o mea e ao ona tatou faia ina ia tatou toe mafuta ai ma lo tatou Tama o i le Lagi. Afai tatou te mulimuli i lena ala o le ola ai i le talalelei—o le faia o mea uma e ao ona tatou faia—ua tatou maua lenei folafolaga faaperofeta mai ia Peresitene Kimball: “O faitotoa o le faleteuoloa o le fiafia e tatalaina mai ia te i tatou o e ola i le talalelei a Iesu Keriso i lona atoatoa ma le faigofie… . O le mautinoa o le fiafia sili, o le mautinoa o se olaga faamanuiaina iinei ma le faaeaina ma le ola faavavau atali, e oo mai ia i latou o e fiafia ina ia ola i o latou olaga ia ogatasi atoatoa ma le talalelei a Iesu Keriso—ona mulimuli ai lea e le aunoa i le alafua ua latou fuafuaina.”²⁹