Ou Te Iloa E Mafai Ona Faavavau Aiga
Ou te manatua pea lena aso. Semanu o le aso sili lea ona leaga o lo’u olaga pe ana ou le maua le talalelei a Iesu Keriso. O le aso 12 o Iulai 2001, ina ua maliu lo’u tina i se ma’i na oso i le po o le Aso Sa ma maliu ai i le taeao o le Aso Tofi na sosoo ai. Sa 16 ou tausaga. Na misi au suega i le aoga ina ia matou faatasi ma lo’u aiga ma auai i sauniga maliu o lo’u tina.
Na ou alu i le fale mai le maliu ma le matuai pagatia lava. Na i ai se manua tele i lo’u loto, o se manua na matuai tele na ou faapea e le mafai ona toe foi i se lelei. Sa ou taoto i le moega, ma tagi masusu ai, ma ou fesili ifo ia te au lava, “Aisea ua vave alu ai o ia? Aisea ua ia tuua ai au?”
Na tonu ia i ma’ua ma lo’u tuagane e 10 tausaga ma te faalogologo i ni viiga malu a le Ekalesia. Sa ia te au lena lagona o le tuua toatasi, faanoanoa, ma le faavauvau, ona oo mai lea o se lagona mafanafana ia te au. Na ou lagona se filemu tele ma le toafimalie. Na mou ese ou foliga faanoanoa, na faapena foi i le lagona o le leai o se mea sa i lou loto.
Sa ou lagonaina pea lenei agaga mafanafana a o matou o atu ma lo’u aiga i le lotu, ae o loo faavauvau pea tagata o lo’u aiga. Sa matuai faanoanoa tagata uma o lo’u aiga, o nisi na fetagisi masusu. Na iloa atu i o latou foliga ni tiga loloto. Sa ese lava la latou vaai mai i lo’u aiga, e pei na mafaufau, aisea na le foliga faanoanoa tele ai i matou e pei o i latou. Ae sa tata lelei lava lo’u fatu, ma na faatumulia lo’u tagata atoa i le toafilemu. Na ou iloa, sa faatoafilemuina e le Fesoasoani, le Agaga Paia o matou tiga. Na molimau mai foi o ia, o loo soifua Iesu Keriso ma le Tama Faalelagi, ma o le Ekalesia moni lenei, ua i ai feagaiga e faavavau.
Ina ua mavae lea, sa ou tusia i la’u api o talaaga: “E le’i manao lo matou tina ina ia umi o matou fetagisi. Ou te lagona le faanoanoa, ae o loo ou lagonaina pea le filemu tele i totonu [o lou loto]. E tatau lava ona ou malosi ma ola i se olaga lelei ina ia mafai ona ou toe vaai ia te ia. Ua tuputupu ae lou faatuatua ma lau molimau, ma e faapena foi i lou naunau e auauna atu i lou Atua ma ou uso a tagata i se misiona talai. O le a i ai pea o ia iina, e fesoasoani mai ia ou tumau i le ala sao. Ou te iloa e mafai ona faavavau aiga. I se aso e pei o le aso lenei i le 15 tausaga ua mavae, na faamauina ai i matou ma lou aiga o se aiga e faavavau i le Malumalu o Lima Peru, ma o le mea lenei o loo faamafanafanaina ai au.”
O loo faaauau pea ona matou oo ma lou aiga i le tele o faigata. Ae o taimi uma lava e faavaivai ai lau molimau, ou te manatua le taimi na faamafanafanaina ai au e le Agaga Paia ma molimau mai i upumoni e faavavau o le talalelei.