O Tautaliga
O le aso na leiloa ai le tautaliga auro a lo’u toalua, na ou iloa ai, ua leiloa se mea sa sili atu ona taua ia te i ma’ua.
O se tasi taimi mo le aso fanau o lou toalua, sa ou tuuina atu ai ia te ia se pea tautaliga auro matagofie lava. Sa fetaui lelei lava ma ia aua e faasasao ma manaia lona ua, ma o tautaliga na gaosia e foliga o ni li’o e eseese le lapopoa e fusi faatasi ina ia luelue solo ma iila i le la. E tulagaese le lalelei o lou toalua o Yelena, i taimi uma lava na te faaaogaina ai. Na fiafia tele o ia i nei tautaliga.
Ona oo mai lea o le aso faamanatu e aupito sili ona manaia i aso faamanatu uma, o le pati a le matou paranesi i le Kerisimasi. Sa ou taitai i le gaoioiga mo le matou paranesi i Penza, Rusia, o lea sa ou faanatinati ai, i lo’u fia vave oo atu iina ia mautinoa ua sauni mea uma o le gaoioiga. Sa le faanatinati Yelena ae sa faaauau pea ona sauni ma le totoa. Ina ua uma lo’u onosai, sa ou fai atu i ai, e tuu ana vali, ma sa ou finau atu e aulelei lava pe a leai ni ana vali. O la’u mea sese lena. Sa fai mai o ia, o le a le alu, ae ou alu na o au i le pati.
O lenei mea na ma oo atu ai i se feupuaiga le manuia, ma sa lafo ai e le tasi ni upu le lelei i le isi. Mulimuli ane, sa le’i oo lana taufaamatau, ae na ma o i le gaoioiga, ma sa leai se upu na fai e le tasi i le isi, na pei lava ma te le masani.
Sa fai le matou pati Kerisimai i se falefaafiafia tele lava a se aoga lata ane. Na fesoasoani mai uo ma tagata o le paranesi i le teuina o le potu i fugalaau ma ata o le soifuaga ma le maliu o lo tatou Alii. Ina ua ma taunuu, sa ma saofafai i o ma nofoaga, ma iloa ai e lou toalua sa na o le tasi lona tautaliga na fai. O se tulaga le lelei lea na faateia ai i ma’ua, ma sa matuai galo lava ia i maua le ma finauga. Sa ma autilo solo i o ma autafa, ae le’i maua ai—sa leiloa po o fea a sue i ai le tautaliga. Sa ma manatu e sili ai le faagalo mo se taimi ae matamata le konaseti manaia na saunia e a matou uo.
E ui lava ina sa matuai matagofie le konaseti, ae sa le mafai ona ma fiafia atoa i ai. Sa faaleagaina lo ma aso, ma na ma foi atu i le fale ma le faanoanoa. Sa ma faanoanoa i le leiloa o le tautaliga, aua e le gata ona sa taugata ma manaia, ae o le mea na sili atu le taua ona o se meaalofa o le alofa mo lou toalua.
Ina ua ou ala ae i le aso na sosoo ai, na ou iloa ai ua leiloa foi se isi mea e sili atu le taua nai lo se tautaliga auro: o lo ma lotogatasi lea. Sa ou faliu atu ia Yelena ma faapea atu, “Vaai foi i le isi tautaliga lenei. Vaai i lona manaia, ma le ilaila i le la. Mafaufau pe fia ni auro ma ni taumafaiga na manaomia e fai ai, ae vaai foi i lona taatia toatasi mai i luga o lau laulau. O le taimi lava na leiloa ai le isi, na liua ai i se mea ua leai se aoga nai lo le taimi na avea ai o se pea. E faapena foi i ta’ua. A ta lotogatasi, e avea i taua ma se malosiaga matagofie, mamana ma le taulamua mo le lelei. Ae a ta le lotogatasi, ta te le maua lena lava malosiaga, mana, po o le matagofie.”
Sa maligi loimata o lo’u toalua. Sa sau ma fusi atu au. Sa gatete lona leo ao tautala, ae na ootia lo’u tagata atoa i ana upu: “E le tatau ona ta feupuai. E tatau ona ta pei o le Tama Faalelagi ma Lona Alo o Iesu Keriso. E alofa le tasi i le isi, ma sa faamauina le ta faaipoipoga i le malumalu paia mo le faavavau. E manao le tiapolo e faaleaga aiga uma i luga o le fogaeleele, ae e le mafai ona ia faia pe afai ta te lotogatasi. Ua atili ai lo’u alofa ia te oe ina ua mavae lenei mea na tupu. Ua faaali mai e le Atua ia i taua le mea tonu e ta’u o le aiga.”
Sa ou opoina o ia, ma le maligi o ou loimata na tafe ifo i o’u alafau. O lenei ua ou iloa o loo ou opoina lo’u faamanuiaga silisili.