Ua Tuuina Atu e le Ekalesia [Auala] o Feoaiga, Saoloto i Palau

O tausaga taitasi e foai atu ai e le Ekalesia le 40,000 o nofoa faataavalevale i atunuu e 70 o se vaega o se taumafaiga faifaipea ina ia mafai ona feoai tagata taitoatasi i le lalolagi. O Aokuso 2006 na foai atu ai e le Ekalesia ni nofoa faataavalevale fou se 250 i Palau, o se atumotu pe tusa ma le selau ni nai maila i sautesasae o Filipaina. Ua faamanuiaina e le polokalama ia le faitau afe o tagata, ma o tala ma manaoga a tagata taitoatasi o na tagata e faitau afe lea e faaosofia ai pea le polokalama o nofoa faataavalevale.

O le taunuuga o se faavalevale, na pe atoa ai le tino o Junior Senardo, o se tagata o se isi ekalesia, mai se fana i lona ua i le 14 tausaga ua mavae. O lenei manuaga na faataotolia ai o ia i le fale ma faalagolago atu i isi e faia ana galuega masani o le olaga. Na suia na mea uma i le aso 16 o Aokuso, 2006, ina ua tuuina atu ia Junior e le Matagaluega o le Soifua Maloloina i Palau se tasi o nofoa faataavalevale fou na foai atu e le Ekalesia. Ua tulimatai atu nei Junior i le mafai ona auai atu i ana sauniga lotu i Aso Sa ma se taaloga lakapi i le lumanai.

E faafetai foi Jonathan Remengesau mo le faamanuiaga o se nofoa faataavalevale fou. O le ma’i suka na mafua ai ona tipi lona vae i le 2002. Ina ua le toe aoga lona nofoa faataavalevale tuai, sa vaavaai solo o ia mo se isi nofoa faataavalevale fou. Sa faanoanoa o ia i le taugata o se nofoa faataavalevale fou—e masani ona sili atu i le $700 Amerika—o se tau sa ia iloa na te le gafatia i lona totogi laitiiti. O le laupapa sa i luga o lona nofoa tuai, sa mafoefoe ai ona vae ma mafua ai ni manua tiga. Sa iu lava ina lafoai lona faamoemoe ma tonu ai i lona manatu o le a le toe alu ese mai le fale. Sa fiafia o ia ina ua faalogo sa agavaa o ia mo le mauaina o se nofoa faataavalevale maua fua.

“O le taimi muamua lenei ua fesoasoani mai ai se tasi ia te au faapenei,” o lana tala lea a o saofai i lona nofoa fou.

O le nofoa faataavalevale muamua lava o Diraingas Edeyaoch e sefulu tausaga, na maua mai le foai talu ai nei a le Ekalesia. A o le’i oo mai le foai, sa fafa lava o ia i mea uma e alu i ai. A o faasolo ina matua, ua atili ai le faigata i tagata ona fafa o ia. O lenei ua fuafua lona tama e ave o ia e faamatamata i mataaga e fiafia tele i ai.

Na o le toatolu lenei mai le toatele o tagata i Palau na tuuina atu i ai lenei saolotoga fou ina ua latou mauaina ni nofoa faataavalevale mai le Ekalesia.

Na saunoa le alii Minisita o le Soifua Maloloina o Victor Yano, o le foai atu o nofoa faataavalevale e 250 o se faamanuiaga silisili lea mo tagata o Palau. Sa ia faafetaia le Ekalesia mo le avanoa ua mafai ai e tagata e utiuti tupe maua ma [tagata e i ai] manaoga faapitoa tumau ona maua se nofoa faataavalevale maua fua. Sa ia faafetaia sui o le Ekaelsia o Rebluud Kesolei, o le peresitene o le Paranesi a Koror Topside, ma Bill Davis, pule o le Ofisa o Auaunaga i Guam, mo le faatautaiga o lenei foai mo tagata o Palau.

O polokalama o nofoa faataavalevale ua na o se tasi lea o le tele o auaunaga o fesoasoaniga alofa ma gaoioiga atiina ae o loo auai malosi ai le Ekalesia i le lalolagi atoa. O foai mai tagata o le Ekalesia ma isi, o loo faatupeina ai polokalama o auaunaga o fesoasoaniga alofa a le Ekalesia. E taulai atu le polokalama i le fesoasoani atu i tamaiti ma aiga o soo se atunuu ma soo se tapuaiga e ala i le tuumamaina o mafatiaga, fesoasoani i tagata e fesoasoani ia i latou lava, ma tuuina atu avanoa mo auaunaga.