Tatala le Malumalu Lona Sefulu i Europa

Ua faamaeaina e le Ekalesia le fausiaina o se malumalu i Helsinki, Finelani ia Aokuso 2006—o le malumalu lona 10 i Europa ae o le muamua i Finelani.

Mo le lua vaiaso mai le va o le aso 21 o Setema ma le aso 7 o Oketopa 2006, na maimoa taamilo ai tagata lautele i le malumalu i le taimi na tatala ai mo maimoaga. Ina ua maea maimoaga mo tagata lautele, sa faapaiaina le malumalu i le Aso Sa, 22 o Oketopa. E fa ni sauniga o le faapaiaga na auai ai le Au Paia o Aso e Gata Ai i le eria e tautuaina e le malumalu.

Faatasi ai ma le faapaiaga o le malumalu, sa faapea foi ona faia ai se faafiafiaga faaleaganuu o musika ma siva mo tagata o le Ekalesia i le lotoifale i le Aso Toonai, 21 o Oketopa 2006, i Helsinki.

O le malumalu e mafai ai e tagata agavaa o le ekalesia ona maua faamanuiaga o le malumalu a o latou auai i le faatinoina o feagaiga ma sauniga paia, ma ia maua mai aoaoga e faatatau i le olaga a o le’i i ai le olaga faaletino, o faamoemoega o le olaga, ma le matafaioi autu a Iesu Keriso o le Togiola mo fanau uma a le Atua.

“O malumalu taitasi o se faatusa o lo tatou faatuatua i le Atua ma o se faamaoniga o lo tatou faatuatua i le olaga pe a mavae le oti,” na taua ai e Elder Russell M. Nelson o le Korama a Aposetolo e Toasefululua. “O le malumalu o le sini o gaoioiga uma, o lesona uma, o laasaga alualu i luma uma i totonu o le Ekalesia. O a tatou taumafaiga uma i le talaiina o le talalelei, faaatoatoaina o le Au Paia, ma le faaolaina o e ua maliliu, e tau atu i le malumalu paia” (“Prepare for Blessings of the Temple,” Ensign, Mat. 2002, 17).

O faamanuiaga o le malumalu ua faigofie nei ona maua e le tusa ma le 26,000 tagata i le eria e tautuaina e le malumalu, lea e aofia ai Finelani, Esitonia, Lativia, Litunia, Pelarusi, ma Rusia.

O Finelani e nonofo ai le silia i le 4,500 tagata o le Ekalesia. Na amataina le galuega faafaifeautalai iina i le faaiuga o le vaitaimi o le 1800. Sa talai ai se auuso faifeautalai Suetena i Vaasa i le 1876. O le tausaga lena, na papatisoina ai tagata liliu mai muamua lava i Finelani, ma e oo atu i le 1886, ua 25 tagata na papatisoina o tagata Finelani e tautatala i le faaSuetena. Na faatuina le Misiona a Finelani i le 1947, i le taimi sa na o le 129 tagata o le ekalesia i Finelani. I le 7 tausaga na sosoo ai, na aloaia ai le Ekalesia e le malo ma na faaliliuina ai le Tusi a Mamona i le gagana Finelani. O le Siteki a Helsinki na faatulagaina ia Oketopa 1977 i ni tagata e 3,642.

O le aso 2 o Aperila 2000 o le taimi muamua lea na faasilasilaina ai le Malumalu o Helsinki Finelani, i le taimi o le Konafesi Aoao Faaletausaga Lona 170 a le Ekalesia. O le suatiaina o le eleele na faia i le pitonuu o Helsinki i Karakallio, Espoo, i le aso 29 o Mati, 2003. O le malumalu lona 124 lea o loo faaaogaina i le lalolagi ma o le lona 3 i atunuu Nordic. O malumalu i Stockholm, Sweden, ma Copenhagen, Tenimaka, na faamaeaina i le 1985 ma le 2004.

“E moni lava o nei malumalu e tulaga ese ai lava mai fale uma,” na saunoa ai Peresitene Gordon B. Hinckley. “O ni fale o le aoaoga. O ni fale o feagaiga ma folafolaga. I o latou fata faitaulaga tatou te tootutuli ai i luma o le Atua lo tatou Foafoa ma tuuina mai ai folafolaga o ana faamanuiaga e faavavau. I nofoaga paia o malumalu tatou te fagatua ai ma Ia ma mafaufau i Lona Alo, lo tatou Faaola ma le Togiola, le Alii o Iesu Keriso, o le na fai ma sui o i tatou uma taitoatasi i se taulaga togiola mo i tatou. O iina tatou te tuuese ai lo tatou manatu faapito ae auauna atu i isi o e ua le mafaia ona latou tautuaina i latou lava. O iina, i lalo o le mana moni o le perisitua a le Atua, ua fusia faatasi ai i tatou i sootaga sili patino paia—e avea ai ma tane ma ava, o fanau ma matua, o ni aiga i se faamauga e le mafai e le taimi nei ona faamutaina, e le mafai foi e le oti ona faalavelaveina.

“O nei fale paia na fausiaina lava i na vaitaimi o le faigata ina ua tuliesea soo ma sauaina le Au Paia o Aso e Gata Ai. Sa fausiaina ma faaleleia pea nei fale i taimi o le mativa ma le faamanuiaina. Ua oo mai nei fale paia i le moni o le faatuatua o se fuainumera faatupulaia pea o i latou o e ua tauaveina le molimau i se Atua soifua, o le Alii toetu, o perofeta ma faaaliga faalelagi, faapea ma le filemu ma le mautinoa o faamanuiaga e faavavau lea e na o totonu o le maota o le Alii e mafai ona maua ai” (“O Le A Le Faamoemoega o Nei Malumalu?” Liahona, Iuni 1992, 2; Ensign, Aok. 1974, 37).