Manatu Faaopoopo mo le Taimi o Fetufaaiga, Ianuari 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Ianuari 2007. Mo le lesona, faatonuga, ma le gaoioiga e o faatasi ma nei manatu, tagai i le “Aua le Fefe” i itulau U4 ma le U5 i le vaega a tamaiti o le lomiga lenei.

E faamalosia lo’u faatuatua ia Iesu Keriso pe a ou tatalo. Ia valaaulia se uso o le uarota po o le paranesi e faamaonia mai e le epikopo po o le peresitene o le paranesi, e fai ni ofu faigofie e faafoliga ia Iosefa Samita ma ia faamatala atu le tala o le Uluai Faaaliga (tagai Talafaasolopito—Iosefa Samita 2:5–20). Tuu atu ia te ia e taulai atu i le faatuatua na ia Iosefa Samita i le faitauina o le Iakopo 1:5 ma le iloaina e mafai ona ia “ole atu i le Atua.” Tuu atu ia te ia e faamatala le naunau o Iosefa Samita e alu atu i le vao ia maua ai se tali i ana fesili. A o faamatalaina e le tagata na valaaulia le tala, fai i le ta piano e tata malie mai tua le “O Le Talosaga Muamua a Iosefa Samita” (Viiga, nu. 14) po o se isi viiga e faatatau i le Perofeta. Fai atu i le tagata na valaaulia, e tuuina atu lana molimau e uiga ia Iosefa Samita faapea ma le mana o le tatalo. Tuu atu i tamaiti e faaaoga tusipese e usu ai le [pese] “O Le Talosaga Muamua a Iosefa Samita.”
Ou te faatuatua i le Alii o Iesu Keriso. O le a Ia fesoasoani mai ia te au e tausia ia poloaiga. Faaali atu i tamaiti ia se fatu sinapi. Savali solo ina ia mafai ona iloa e tamaiti le laitiiti o le fatu. (Afai e le maua ni fatu sinapi i le tou eria, filifili se isi ituaiga fatu e tupu ae ma avea o se laau tele, e pei o se fatu sana o le a ola ae o se sana umi.) Tuu atu i tamaiti e sue le Luka 17:5–6. Ia faitau faatasi. Ia toe faamatala atu le mau e ala i le ta’u atu, na mananao le au Aposetolo ia faateleina lo latou faatuatua. Na ta’u atu e Iesu ia i latou, o sina faatuatua itiiti lava e mafai ona fuli se laau tele. Na saunoa mai Elder David B. Haight (1906–2004) o le Korama a Aposetolo e Toasefululua: “E masani ona saunoa mai Peresitene Hinckley ia i tatou e uiga i le atiina ae o le faatuatua sili atu… . O lena faatuatua o se taunuuga lea o lo tatou ola ai i mataupu o le talalelei, ola ai i le auala e tatau ona tatou ola ai” (“Faatuatua o o Tatou Perofeta,” Liahona, Ian. 2002, 26). A o tatou tausia poloaiga, o le a faateleina lo tatou faatuatua. A o faateleina lo tatou faatuatua, o le a ia i tatou le naunautai sili atu e tausi ai poloaiga.

Usu le pese “Tausi Poloaiga” (Viiga, nu. 186). Tufa atu i tamaiti taitasi se fasipepa ma se penitala po o ni vali. Tuu atu i tamaiti e gaugau ia pepa i ni vaega se fa. Fai atu i ai e tusi ni ata o ni poloaiga se fa e mafai ona latou tausia (tagai “Gaoioiga Tusiata,” O Le Aoao Atu, E Leai Se Isi Valaauga Sili Ai [1999], 175–76). Ina ia tau atu i ai ni manatu o mea e tusi, fai i le ta piano e taina ni nai pese eseese o le Peraimeri e faatatau i ni poloaiga faapitoa, e pei o le papatisoga, tatalo, sefuluai, ma isi lava. Tuu atu i tamaiti e faasoa mai a latou ata na tusia. Ia faamatala atu le auala o le a fesoasoani ai le faatuatua ia i latou e tausi poloaiga. Ia faasoa atu se aafiaga patino o se taimi na fesoasoani ai lou faatuatua i le Alii e te tausia ai Ana poloaiga, ma molimau atu e uiga i Lona alofa mo oe.
Aoaoina o le pese: “O Le A Ou Mulimuli ia te Ia i le Faatuatua” (Liahona, Fep. 2003, U16; po o le O Le A Ou Mulimuli ia te Ia i le Faatuatua: 2007 Otootoga mo le Taimi o Fetufaaiga ma le Polokalama a Tamaiti o le Sauniga Faamanatuga [2006], 11). Ia faamalamalama atu o le pese “O Le A Ou Mulimuli ia te Ia i le Faatuatua” o se lisi o nisi o faamanuiaga a le Atua mo i tatou. Tusi le 1, 2, 3, ma le 4 i luga o le laupapa. (Atonu o le a e manao e a’o lenei pese i ni vaega se lua, ia aoao fuaiupu taitasi i vaiaso eseese. Tusi uma numera e fa i luga o le laupapa, ae ia aoao na o faamanuiaga muamua e lua i le vaiaso muamua.) Fai atu i tamaiti e faalogologo mo le faamanuiaga muamua. Usu le “Ua faamanuia au e le Alii i le upumoni,” ona usu lea o le “la, la” i isi laina e lua. A tali mai tamaiti, tusi le “upumoni o le Talalelei” i tua o le 1. Tuu atu i tamaiti tou te usu faatasi upu o le faamanuiaga, ona usu lea o le “la, la” i isi laina e lua, e pei ona e faia. Mulimuli i le mamanu lava lena e tasi mo le “Ua faamanuia au e le Alii i le faatuatua.” Ia faamatala atu o le vaega sa latou usuina “la, la” o loo ta’u atili mai ai e uiga i le faamanuiaga. Ta’u atu i tamaiti lou agaga faafetai mo faamanuiaga uma a le Tama Faalelagi mo oe. Molimau atu e uiga i le alofa o le Atua ma le taua o le mulimuli atu ia te Ia i le faatuatua.