Taimi o Fetufaaiga

Aua Le Fefefe

Saunia E Elizabeth Ricks

“Afai ua ia te outou le faatuatua, tou te faamoemoe i mea e le o vaaia, a ua moni ia” (Alema 32:21).

Vaai i le ata o loo i le itu tauagavale. Mafaufau e faapea o oe lena o se tasi o tamaiti. Mata o le a e fefe e sopo i se vai tatafe? Mata e te fefe pe afai o loo e pipii i le Faaola?

O lenei ata matagofie ua faaautuina Aua Le Fefefe. E le tatau ona fefefe tamaiti o loo i le ata aua o loo fesoasoani le Faaola ia i latou ia oo atu i le isi itu.

O Uso Greg Olsen, o le tusiata na valiina lenei ata, sa na faamatala mai, o tamaiti e faatusa ia i tatou taitoatasi. “O le vaitafe e faatusa i faigata, taimi le lelei tatou te oo uma i ai,” o lana tala lea. “E tatau ona fai la tatou vaega, aapa i le maualuga e mafai ona tatou oo i ai, ma o le a taitai saogalemu atu i tatou e le Faaola i le isi itu.”

A i ai lo tatou faatuatua i le Alii o Iesu Keriso, tatou te malamalama foi e le o tuua na o i tatou i la tatou malaga i le olaga. A tatou lotomaualalo ma faatuatua, e mafai ona tatou iloa o le a taitaiina i tatou e le Alii ma tali mai ia tatou talosaga (tagai MFF 112:10). A tuu atu lo tatou faatuatua ia Iesu Keriso, o le a tatou le fefefe lava.

Gaoioiga

Faapipii le ata ma vaega o le faavaa i le itulau U4 i ni pepa malo. Oti ese ata ma vaega o le faavaa, ma faakelu pe faapipii faatasi tulimanu e fau ai le faavaa. Tuu le faavaa i le ata ma faamau i se mea faapipii po o se kelu. Faaali atu le ata Aua Le Fefefe i se tulaga e faamanatu atu ai ia te oe ia e faatuatua ia Iesu Keriso. Mafaufau e faapea o oe o le tamaitiiti lea e aapa atu i luga e uu mai Lona aao, pe o oe foi o loo uuina ma le saogalemu i Ona aao.

Faamatalaga: Afai e te le manao e aveese itulau mai le mekasini, e mafai ona kopiina, tusi lolomi, pe fai se kopi o lenei gaoioiga mai le www.lds.org. Mo le Igilisi, kiliki i le “Gospel Library.” Mo isi gagana, kiliki i le faafanua o le lalolagi.

Manatu mo Taimi o Fetufaaiga

1. 1. Ia faamatala atu a tatou faatuatua i le Alii o Iesu Keriso, ua tatou faatagaina o Ia e taitai i tatou, e ui lava e le mafai ona tatou vaaia pe malamalama i le ala o loo tatou o ai. Faaaoga ni nofoa, laulau, ma isi aitema e fau ai se auala. Filifili se tamaitiiti e savali i le auala. O le isi, ia fai atu i se isi e ofo mai, e fusi ona mata. Tuu atu ia te ia e alu atu i le auala. Fai atu i se isi e fusi ona mata, ae o le a e toe fetuunaia le auala. Fai atu ia te ia e filifili se uo o le a le fusia ona mata, e avea ma taiala. Tuu atu i tamaiti e toalua e o ese mai le potu. Toe fetuunai le auala. Tuu atu i le uo e taitai le tamaitiiti o loo fusi mata a o agai atu i le auala. E mafai ona faaaoga e le taitai ia faatonuga ma uu malie le lima o le tamaitiiti. Toe fai, ae sui le auala i taimi uma, pe a lava le taimi. Faamatala atu, a o tatou faimalaga i le olaga, tatou te manaomia se taiala e taitaia i tatou. E tatau ona tatou filifilia se taitai tatou te iloa e mafai ona tatou faatuatuaina. Tuu atu le molimau o le taitai sili lava o Iesu Keriso.

2. 2. Fesili atu i tamaiti, “O le a le mea e tupu pe a faamaulu muamua ou seevae ae mulimuli ou totini?” “O le a le mea e tupu pe afai e te alu i le kolisi i le lima o ou tausaga?” Ia talanoa i le taua o le faia o mea i le faasologa sa’o. Fesili atu i tamaiti po o le a le mataupu faavae muamua o le talalelei. Tuu atu ia i latou e sue le tali i le Mataupu Faavae o le Faatuatua. Faamatala atu o le uluai mataupu faavae o le talalelei e le na o le “faatuatua”; o le “faatuatua i le Alii o Iesu Keriso.” Fesili atu i tamaiti pe aisea ua avea ai le faatuatua ia Iesu Keriso ma mataupu faavae muamua ae le o se isi mataupu faavae taua e pei o le salamo, perisitua, po o le sefuluai. Faaali atu ata nei: Pusa Ata o le Talalelei 100 (Foafoaga—Mea Ola), 243 (Keriso o loo Savali i luga o le Vai), 318 (O Le Uso o Iareto ua Vaai i le Tamatamaiaao o le Alii), 412 (Mary Filitia ma Iosefa F. Samita o Loo Sopoia Laufanua Valevalenoa). Ia faamanatu faapupuu ia tala taitasi. A uma le tala ona fesili atu lea i tamaiti se fesili e pei “O le a le mea na manaomia e Peteru e mafai ai ona savali i luga o le vai?” Tuu atu i tamaiti e tali mai e ala i le faapea mai, “Muamua, faatuatua i le Alii o Iesu Keriso.” Ia toe fai foi mo tala taitasi.