E Tolu Tamaitusi Fou e Fesoasoani Ia i Latou e Aoao e uiga i le Ekalesia

O tamaitusi fou e tolu a faifeautalai, o le a maua ai nei e tagata sailiili ni tusi e faitau ma mafaufau loloto i ai i le faaiuga o a latou lesona muamua e tolu faatasi ma faifeautalai.

“I le faaiuga o le aoaoina atu o lesona taitasi e tatau ona tuuina atu i le tagata sailiili se mea na te faitauina, o le saunoaga lea a Peresitene Gordon B. Hinckley i le Uluai Fonotaga Faaleaoaoga a Taitai i le Lalolagi Atoa. “E mafai ona tofi atu i ai ni mataupu mai le Tusi a Mamona. E mafai ona tofi mai nisi tusi. Ae tatau lava ona i ai se mea mo ia e faitau ma mafaufau i ai, ia manatunatu ma mafaufau loloto i ai” (Fonotaga Faaleaoaoga a Taitai i le Lalolagi Atoa, Ian. 2003, 22).

O tamaitusi e maua ai e tagata sailiili se punaoa e mafai ona liliu atu i ai i taimi o manatunatuga faaletagata lava ia pe faalevaega. E tutusa ma lesona muamua e tolu a faifeautalai e pei ona i ai i le Talai La’u Talalelei mataupu e tolu, o loo i ai i tamaitusi ia manatu e tali ai fesili e ono mafaufauina ina ua tuumuli faifeautalai ma ia saunia ai le tagata faitau mo lesona i le lumanai.

O tamaitusi taitasi e tolu— O Le Toefuataiga, O Le Ata o le Faaolataga, ma le O Le Talalelei a Iesu Keriso—o se tamaitusi laitiiti o loo i ai le aotelega o mataupu faavae o lena lesona, faatasi ma fesili e suesue ai ma se lisi o upu e ono le masani ai. O fesili e pei o le “E Faapefea Ona Ou Iloa?” ma le “E Faapefea Ona Ou Tatalo?” o loo taliina ai, o se vaaiga aoao i sauniga o le Aso Sa o loo tau atu ai i tagata sailiili mea latou te faamoemoeina, ma se lisi o tautinoga e ofoina atu ai le taitaiga i le suesueina o tusitusiga paia ma manatu i punaoa faaopoopo.

Na maua e misiona i le lalolagi atoa ia lomiga faaPeretania o tamaitusi i le 2006. Ua uunaia faifeautalai ina ia suesue i ia tamaitusi a o sauniuni mo lesona ma faatatau atu i ai i le taimi o aoaoga. O tamaitusi taitasi o loo aofia ai ata tusi ma ata pue e mafai ona faaaoga i le aoaoga, ma o ia tamaitusi ua mafai ai e faifeautalai ona faamanatu atu i tagata sailiili ia tautinoga, valaaulia i latou i le Ekalesia, ma faasino atu i latou i le mormon.org. Ua uunaia tagata o le ekalesia ina ia faasoa atu ia tamaitusi i o latou aiga ma uo.

O tamaitusi, sa fuafuaina mai le amataga o se vaega o le taumafaiga o le Talai La’u Talalelei, o loo faaliliuina nei i gagana o loo lomiaina ai le tusi lesona Talai La’u Talalelei, lea e silia i le 50 le aofai.

E maua tamaitusi i faletusi i le I.S. ma Kanata po o le ldscatalog.com i le tau e $2.50 Amerika mo se afifi e 25 tusi.