Uo i le Uo

Ia To’afilemu

Mai se faatalanoaga ma Elder Alexander A. Odume, Fitugafulu Eria i le Eria a Aferika Sisifo; e F. Onyebueze Nmeribe

“A ua aoaoina a’u ia toa filemu lo’u loto, i mea uma ua ia te au” (Filipi 4:11).

Sa ou ola ae i se nuu i Nigeria i saute. Na faigaluega lou tama o se faifaatoaga, i le totoina o ufi, sana, manioka, fa’i palatana, ma isi fua o faatoaga e faatau atu. Sa aoaoina au e ou matua e ala i a laua faataitaiga ina ia galue malosi. Sa matou galulue uma lava i le faatoaga, ma sa lava ma totoe a matou meaai. Sa talitonu lo’u tama e faapea, afai e galue malosi se tagata ma ola i se olaga lelei, o le a manuia o ia.

O ou matua sa le o ni tagata o le Ekalesia, ae sa laua talitonu i le Atua. Sa laua aoaoina au o loo soifua le Atua ma o Iesu Keriso o le Faaola.

Sa aoaoina foi au e lou tama i le mataupu faavae o le faaaloalo i tagata matutua—o le usiusitai ia i latou e taitai. O se tu masani i lo’u nuu o le ava ma faamamalu i tagata matutua.

A o ou laitiiti, na aumai e se tuaoi mo i matou ni meaai i se taimi o aso fiafia. A maua e lo matou aiga se meaalofa faapena, o le masani a le matou fale o lou tama e faia le faaiuga po o le a le taimi e ai ai e le aiga na meaai. O le taimi la lenei, sa le’i i ai lou tama i le fale. Sa ou manao lava e ai loa le meaai sa ou taulimaina ma augani atu i lou tina e aumai sa’u fasi meaai. Sa le manao lou tina e le faaaloalogia le aga masani o le tiute o lou tama, ae sa le manao foi ou te le fiafia. Sa ia vavaeina sina fasi meaai ma aumai ou te aia.

Mulimuli ane, ina ua sau lou tama i le fale, sa le fiafia o ia i le mea na ou faia. Sa ia valaau mai ou te alu atu i totonu o lona potu ma sa ia fai mai sa faanoanoa o ia ona sa ou le faaalia le lotomalie [toafilemu] mo mea ua ou maua. Sa ia aoaoina au o le filemu o le mafaufau ma se olaga lelei e mo na o i latou e malilie o latou loto i mea ua latou maua.

O tausaga mulimuli ane, na amata ai ona ou asiasi i le tele o lotu, ae ou te le’i lagonaina lava le toafimalie. I se tasi aso, na ou foi atu ai i le fale mai le galuega, ae fai mai le pule o le falemautotogi, e tatau ona ma o ese ma lo’u toalua i le aso na sosoo ai. Sa ou le manatua se mea sese po o ni faafitauli na mafua ai ona fai mai o ia ma te o ese.

Sa ou alu atu i se fale o sau uo e talsoaga i ai mo se fesoasoani i le vave sueina o se ma falemautotogi fou, ma o iina na ou feiloai ai i faifeautalai. Sa la faailoa mai i laua ma fai mai e mafai ona la taliina au fesili pe a uma le lesona. A o la aoao mai e uiga i le Perofeta o Iosefa Samita ma le Toefuataiga o le talalelei, sa ou mafaufau i lou alu mai lea lotu i lea lotu e aunoa ma le mauaina o le upumoni. Sa ou faatulagaina loa se taimi tonu matou te feiloai ai ma faifeautalai, ma sa laua aoaoina i maua ma lou toalua. E lei umi ae papatisoina ma faamauina loa i maua.

Talu mai lena taimi, ua ou umia ai ni valaauga i totonu o le Ekalesia. Na ou iloaina ai, sa faataatia e ou matua se faavae sili ona mautu mo au ou te talitonu ai i le Atua, ina ia ou lotomalie i mea ua ou maua, ma ia iloa o le Togiola a Iesu Keriso, e mafai ai ona faaolaina i tatou.

Tamaiti, faalogo i fautuaga a o outou matua, ma mulimuli i aoaoga a tou faiaoga ma taitai o le Peraimeri. Ou te iloa, afai o le a outou usiusitai, afai o le a outou faitauina le Tusi a Mamona, afai o le a outou faamamaluina a outou feagaiga o le papatisoga, o le a faamanuia outou e le Alii.