Faamatalaga

Pulupasama Faamalolo

O le Liahona o se taiala moni lava i lo’u olaga. O se pulupasama mo ou manua ma e aumaia ai le faamoemoe pe a ou lotovaivai. O tusiga ua i ai tali i au fesili ma faasusulu mai ai le malamalama i ou masalosaloga. A o ou faitau i molimau, i saunoaga o konafesi, ma faamatalaga, e tuputupu ae lou faatuatua i Le Foafoa, ma ou lagona ai le latalata atili atu i tagata o le Ekalesia, o e o loo faasusulu mai o latou malamalama e ala i le mekasini.

Carmen Moscoso, Suitiselani

Mataupu e Faatatau i le Autu e Tasi

Ua ou matauina o nisi taimi e i ai lomiga faapitoa o le Liahona. O ni faataitaiga se lua o lomiga o tagata fou liliu mai (Oke. 2006), lea ou te matuai teufatuina lava, ma le lomiga mo i latou o loo sauniuni e o atu i ni misiona (Mat. 2007).

E mafai ona outou lolomiina se lomiga mo tagata sailiili ma aiga o tagata fou liliu mai? E faigata ia te au ona faasoa atu le talalelei i lou aiga ona latou te manatu tatou te le talitonu i le Atua po o Iesu Keriso. Ou te manao i ni tusi e faapea ona pupula ai o latou mata, aveese ai le masalosalo, ma fesoasoani ia latou faaaloalogia le filifiliga ua ou faia.

Héctor Leal Reyes, Mekisiko

Mai le au faatonu: Matou te faamoemoe o le a fesoasoani le lomiga o Mati 2008 i lou aiga ma le toatele o isi tagata ia malamalama lelei ai i mea e talitonu i ai tagata o le Ekalesia e uiga i le Faaola.

E Sili Atu le Taua Nai lo Auro

Na faatoa ou iloa le Liahona ina ua ou auai i le Ekalesia i ni nai tausaga talu ai. I le amataga, ou te lei manatu mamafa tele i ai, ae i le aluga o taimi, na avea ma se tasi o mea e sili ona matagofie i lou olaga ma o se faapogai autu o lou faamanuiaina. Ua faamalosia ai lau molimau e uiga i le talalelei toefuataiina ma ua fesoasoani ou te tumau malosi ai i le Ekalesia. Ona o lenei malosiaga, na mafai ai ona ou teteeina faaosoosoga ma faia se faataitaiga lelei i se tagata ma te faigaluega faatasi, o le na iu lava ina papatiso ma faamauina o se tasi o le ekalesia.

E ese le manaia o le suesue ma faasoa atu le Liahona. O le a fesoasoani ia te au i aso o totoe o lou ola. Ou te matuai faafetai lava i le mauaina o savali mai perofeta ma aposetolo a le Alii i masina taitasi. O le Liahona e sili atu le suamalie ia te au nai lo le hani ma e sili atu le taua nai lo auro.

Aldemir Guanacoma Ave, Polevia

Faifeautalai Talavou

O le tusiga “Mama FMT i le Ofisa o le Puleaoga” (Mat. 2007), lea o loo faamatala ai e uiga i se teineitiiti na tauina atu i lona puleaoga e uiga i le Ekalesia ina ua fesili le puleaoga i le mama FMT a le teineitiiti, na musuia ai lou atalii e lima tausaga le matua ma isi tamaiti Peraimeri o le matou paranesi e fai i taimi uma a latou mama FMT.

Na maua e lou atalii ma le isi tamaitiiti o laua aafiaga muamua faafaifeautalai ina ua fesili o laua faiaoga i le aoga e uiga i mama, ma sa mafai e tamaiti ona faamatala atu ia i laua e uiga i le Ekalesia.

Aleksey Dobrovolskyy, Iukereini

O Se Oa mo le Agaga

I le taimi na faatoa ou papatiso ai, na valaaulia ai au e se uso ou te lesitala mo le Liahona. Ou te lei faitau tele i ai i le taimi muamua, ae i le aluga o taimi, na ou iloaina ai le aoga tele o lenei mekasini. O ona savali ua faamalosia ai lou agaga ma taliina ai au tatalo. O mea muamua lava ou te faitauina o Savali a le Au Peresitene Sili ma Savali a Faiaoga Asiasi. Ou te faasoaina atu foi le vaega mo tamaiti i la’u tama tama o Ricardo. Ua matuai ou fiafia lava i le mauaina o le mekasini i le aso.

O le Liahona ua ou aoao ai ma ua ou tuputupu ae ai i le tele o itu, faalelagona ma le faaleagaga. E aunoa ma se masalosalo, o le suesue i ai e matuai aoga ai lava taumafaiga. O se oa mo le agaga ma se taiala i taimi o le pogisa, e pei lava ona i ai o tusitusiga paia. Ua lelei atu lo’u iloa i le faafeagai ai ma le lalolagi i nei aso e gata ai. Ou te faafetai lava ona o le mafai ona ou fiafia i ai mo le 14 o tausaga.

Sylvia Figueroa-Ostolaza, Puerto Rico