Taimi o Fetufaaiga
Faalogo i Perofeta—Mulimuli i Mea O Loo Latou Fai Mai Ai
“E le faia lava se mea e le Alii o Ieova, a e faaalia lona finagalo i ana auauna o perofeta” (Amosa 3:7).
Lenei lalolagi e fenumiai. A fia talitonu vaai i talafou. E mafai ona taitai i tatou,
Pe a faalogo i perofeta.
O upu nei mai le “Mulimuli i le Perofeta” (Tusipese a Tamaiti, 58–9) ua aoao mai ai ina ia e faalogo ma mulimuli i le perofeta. O upu faalogo ma le mulimuli o lona uiga ia faalogo ma usitai. E mafai ona e mafaufau i se taimi na e faalogo ai i le perofeta? E mafai ona e mafaufau i se taimi na e filifili ai pe na filifili ai lou aiga e usitai ma fai le mea na fai atu le perofeta tou te faia? O a ni ou lagona ina ua e usitaia?
Faalogo i nisi o tamaiti o le Peraimeri a o faasoa mai le uiga o le mulimuli i le perofeta: Fai mai Austin, “A ou faia le mea o loo ia fai mai ai, ou te lagona le fiafia.” Fai mai Lindsay, “Ua fai mai le perofeta ia fai ou lavalava talafeagai, alu i le lotu, faitau au tusitusiga paia, ma tatalo. E manao o ia ina ia ou papatiso, filifili le mea tonu, ma mulimuli i faataitaiga a lou tina ma lou tama.”
Fai mai le Mataupu Faavae ma Feagaiga 21:5, “Aua o lana upu o le a outou talia, e pei lava o loo alu atu mai ia te au.” O lenei mau o loo aoao mai ia te outou e faapea, o le a saunoa mai le perofeta i taimi uma i mea ua finagalo le Tama Faalelagi ina ia outou iloa. O le a faaali atu e le perofeta ia te outou i taimi uma le ala e ola ai ina ia mafai ona outou toe foi atu i se aso i le Tama Faalelagi.
Gaoioiga
Aveese itulau U4, ma faapipii i luga o se pepa malo. Faalogologo a o saunoa mai le perofeta i le konafesi aoao, ma filifili ni mea se tolu na te talosagaina outou e fai. Tusi ia mea i luga o se pepa lautele e i ai se savali. Faatautau le pepa lautele e i ai se savali i se mea e mafai ona e iloa atu e faamanatu atu ai ia te oe e mulimuli i le perofeta.
Manatu mo Taimi o Fetufaaiga
-
Ia faamatala otooto atu le oo mai o Ioane le Papatiso ia Iosefa Samita e toefuatai mai le Perisitua Arona, ma le toefuataiina mai e Peteru, Iakopo, ma Ioane o le Perisitua Mekisateko. Ia faamatala atu e mafai e le Tama Faalelagi ona faamanuia tagata o le Ekalesia e ala i le perisitua. Ia valaaulia se taitai perisitua ua faamaonia mai e le epikopo po o le peresitene o le paranesi e talanoa atu i le Peraimeri e uiga i auala e faamanuia ai i tatou e le perisitua. Ia saunia ni pepa ma penitala, vali, po o maka. Ia valaaulia tamaiti e tusi se ata o ni faataitaiga o auala na faamanuiaina ai e le perisitua o latou olaga. Ia valaaulia se tamaitiiti e faitau le Mataupu Faavae ma Feagaiga 107:64–67. Ia fesili atu: “O ai le ‘Faitaulaga Sili Pulefaamalumalu i le Perisitua Maualuga o le Ekalesia’?” Ia aoao tamaiti e faapea, o le tatou perofeta o loo umia ki uma o le perisitua; o lona uiga, o loo ia te ia le pule e pulefaamalumalu ai i le Ekalesia atoa. Usu le pese “Ia Viia Oe le Atua, mo le Perofeta” (Viiga, nu. 10). Ia faasoa atu lau molimau e uiga i le perofeta ma le perisitua.
-
Ia faaali atu le Taga Ata o le Talalelei 520 (Gordon B. Hinckley), ma faamatala atu le tala na faamatalaina e Peresitene Hinckley (1910–2008) e uiga i se tamaitai o le na faamagaloina se alii talavou ona o le faia o se filifiliga sese na faapea ona suia ai lona olaga e faavavau (tagai “Ia Faateleina le Faamagalo Atu,” Liahona, Mat. 2007, U2–U3). Ia faamatala atu ua aoao mai lo tatou perofeta ina ia tatou faamagalo atu. Faaaoga tala faatino e faaaofia ai tamaiti i le aoaoina o tala mai tusitusiga paia e uiga i le faamagalo atu (tagai “Tala Faatino,” O Le Aoao Atu, E Leai Se Isi Valaauga E Sili Ai [1999], 174–75). Mo se faataitaiga: Kenese 42–45—Ua faamagalo e Iosefa ia ona uso; 1 Nifae 7—Ua faamagalo e Nifae ia ona uso. Ia faasoa atu lau molimau e uiga i le Togiola a le Faaola. Fesoasoani i tamaiti ia malamalama i le ala ua tatou mafaia ai ona salamo ma faamagaloina ona o Ia, ina ia mafai ai ona tatou toe foi atu e mafuta faatasi ma le Tama Faalelagi.