O Le Auala Na Ou Maua ai Keriso i Kapanaumi
I le sosoo ai ma tausaga o fuafuaga ma tapenaga, na iu lava ina matou o ma lo matou aiga ma ni nai uo vavalalata i le Nuu Paia. A o matou latalata atu i le Sami o Kalilaia, sa matou tulimatai lava i le vaaia o Kapanaumi.
O loo tau mai i le tusi a Mataio e faapea, ina ua uma ona teena e tagata ia Keriso i Lona lava nuu o Nasareta, sa fai e le Faaola ia Kapanaumi “o lana lava aai” (Mataio 9:1). O Kapanaumi ma luga o matafaga o le Sami o Kalilaia na valaauina ai e Keriso ia Peteru, Iakopo, Ioane, Aneterea, ma mulimuli ane o Mataio e fai ma soo (tagai Mataio 4:18–22; 9:9).
O Kapanaumi o lona uiga o le “nuu o Nauma,” po o le nuu o le faamafanafanaga po o le faamaisega. E moni sa alofa Keriso i tagata o lenei aai ma faamafanafanaina i latou e ala i le tutulieseina o temoni, faamaloloina “o i latou uma na mamai,” ma faapea foi ona faatutuina i latou na oti (tagai Mataio 8:16; Mareko 5:35–42). E ui ina sa Ia aoaiina mulimuli ane le nuu o Kapanaumi ona o le teenaina o Ia, ae masalo e tele atu vavega na faia e Keriso iinei nai lo se isi lava mea.
I Kapanaumi sa matou suesueina ai mea na faaleagaina ma matou savalivali solo i auala o le aai tuai ma le maofa i mea na molimauina e lenei nuu laitiiti (tagai Mataio 11:23). Mulimuli ane, sa ou malolo ma saofai ifo i lalo o se laau, ma mafaufau loloto ai ma vaavaai atu i le Sami o Kalilaia. O lou naunau tele ia lagona mea na tutupu i tusitusiga paia na sili atu ona manino, ae peitai, na tumau pea ona le’i faataunuuina. E ui lava i au tapenaga mo le malaga, o le manao moni e saili Keriso, ma le naunautai lea na iu ina aumaia ai i matou iinei, sa ou maua se lagona toagaogao na mamafa i lou loto.
Aisea ua le faamanuiaina ai o matou olaga e lenei nofoaga lea sa faamanuiaina ai e Keriso le toatele o tagata? A o ou tauivi ma ou lagona, sa ou manao e faitau ia tusitusiga paia. Sa ou fesili atu i tagata taitoatasi o le matou vaega, ae o le mea e faanoanoa ai, e leai se tasi na aumaia se Tusi Paia. O le mea e laki ai, o se tasi o le matou vaega sa i ai sana masini faafuainumera sa i ai i totonu se lomiga faaeletonika o tusitusiga paia. Na vave ona matou faapotopoto faatasi, ma faalogologo a o faitau e se tasi ia fuaiupu i le Mataio e 4 ma le Mareko e 5 e uiga i le Faaola i Kapanaumi.
O le taimi lava na liliu atu ai o matou manatu i tusitusiga paia, na suia ai foi le toagaogao lea na ou lagonaina i se molimau mafanafana i le alofa o le Faaola ma le moni o mea na tutupu o loo molimau mai ai tusitusiga paia. Sa matou o mai i Kapanaumi e saili ia Keriso, ae ana matou le suesue i tusitusiga paia, matou te le maua o Ia. E le o siosiomaga faaletino na molimau mai ia i matou ae o le Agaga Paia.
O le suesue i tusitusiga paia e mafai ona faaopoopo mai i ai le talafaasolopito, faamatalaga aloaia, vaaiga o suesuega i gagana, ma malaga i lea taimi ma lea taimi, ae e leai se mea e suitulaga i le aoaoina sao mai le Agaga a o matou faalilofia i matou lava i tusitusiga paia. O atalii o Mosaea o e na “suesueina tusi paia ma le filifiliga, ina ia latou iloa ai le afioga a le Atua” (Alema 17:2), o faataitaiga ia o lenei mataupu faavae.
Ia avea le suesue i tusitusiga paia i aso uma ma totonugalemu o a tatou sailiga mo Keriso, aua o tusitusiga paia e moni o le nofoaga aupito sili lea ona lelei e maua ai o Ia.