Tasi le Misiona Ua Lava Lea e Suia ai Olaga, Ae Le Faamalieina ai le Naunau e Tautua
Ina ua faaipoipo Rose ma Ron Harvey i le 1950, la te lei mafaufauina o le a la faaaluina ni tausaga se 16 o la laua mafutaga e tautua ai i le galuega faamisiona.
“Ou te lei moemiti lava i lena mea,” o le tala lea a Sister Harvey.
Talu mai le 1992, ua iva misiona mo le Ekalesia na tautua ai lea ulugalii Kanata, e talai atu ai i le salafa o le Iunaite Setete, Kanata, ma Atumotu o le Pasefika.
E faagaeetia loto o la’ua aafiaga. “E te foi mai ua matua maualuga lou faaleagaga,” o le tala lea a Sister Harvey. Peitai o le suia o le loto sa la mauaina, e le teuina mo na o i latou e auauna atu i ni tausaga e 16. “E te le tau auauna atu i ni misiona se iva. Ina ua maea la ma misiona muamua, na ma foi mai o ni tagata ua suia.”
Na faamanuiaina Brother ma Sister Harvey, ua faateleina le silafia i le talalelei, sa onosai i tofotofoga, ma ua faatoilaloina lagona o le le gafatia. O le taimi nei, ua sili atu ona vavalalata la la’ua mafutaga nai lo se isi taimi, ma e vave lava ona la faamatalaina le malosi ua la mauaina ma faamanuiaga ua tuuina atu e le Alii ia i la’ua ma lo la’ua aiga.
Tofia e Auauna Atu—Toe Fai ma Toe Fai
O le misiona muamua a Brother ma Sister Harvey i le Misiona a Minnesota Minneapolis i le 1992, o se aafiaga matagofie tele, aemaise lava mo Sister Harvey, o le sa manao e auauna atu faamisiona i le taimi sa sauniuni ai lana fanau e o i a latou misiona. Sa olioli i la’ua ma lona toalua i le faatoaagaina mai o tagata ma vaavaai atu o faatulaga se paranesi.
Mulimuli ane sa toe auauna atu i la’ua i se isi misiona tala’i i le Misiona a South Dakota Rapid City, ma sosoo atu ai ma misiona mo talafaasolopito o aiga i le Faletusi o Talafaasolopito o aiga i le Aai o Sate Leki ma le To’ese i Iuta [Utah Correctional Institute]. O le misiona lena na aumaia ai ni luitau tulaga ese, ma sa lagona ai e Brother ma Sister Harvey le loto faavauvau tele mo o la’ua uso ma tuafafine o i ai i le to’ese.
Sa la auauna atu i se isi misiona tala’i i le Misiona a Kanata Vancouver, ona sosoo ai lea ma ni misiona se lua i le tautua fesoasoani mo tagata i Amerika Samoa ma Sacramento, Kalefonia, ISA. E lei pine ae toe tofia foi i laua ina ua mae’a, e auauna atu i se isi misiona mo talafaasolopito o aiga, ma o le taimi lea i le Misiona a Kanata Calgary.
Ina ua mavae se tausaga ma le afa i Calgary, ua i ai nei i la’ua i se isi misiona mo talafaasolopito o aiga i totonu o le misiona a Calgary i Golden, British Columbia, ma Cardston, Alberta.
Feagai ma Luitau Masani
O tausaga o le tautua a Brother ma Sister Harvey, e le faapea na aunoa ma ni luitau. Sa la taumafai foi e fo’ia nisi o maatui ma maagao e pei lava ona feagai ai foi ma tagata uma o le a o e faafaifeautalai, e pei o fuafuaga tautupe, o le atuatuvale, sailia o avanoa sa’o, ma atugaluga faaleaiga.
Mea Tautupe: O le ola i tulaga faigofie ma le fuafua tatau, na mafai ai e Brother ma Sister Harvey ona auauna atu. Sa la faafaigofieina a la’ua mea tautupe i le taofia o pili ma mea e le tatau ona faaalu ai tupe, ae teu sa’o a la’ua tupe litaea ma penisione mai le malo i se teugatupe. E ui e le matua tele naua, ae sa lava lelei a la tupe. “E le faapea na tele ni a ma’ua tupe; sa na o lo ma’ua faatuatua sa tele,” o le tala lea a Sister Harvey.
Atuatuvale: I lana tusi talaaga (sa la taufai tusia uma ni tusi talaaga talu mai la la’ua uluai misiona i Minneapolis), sa tusia ai e Brother Harvey sa na lagonaina lona le gafatia ona folafola atu le upu, ma sa faapena foi lagona o Sister Harvey i nisi taimi. O lo la’ua atugaluga o le, “Pe ua lava ea lo’u iloa?” o lana tala lea. “Ma te lei aooga … ae o lea ua ma o atu i le lalolagi, ma taumafai e faaliliu mai tagata… . O se tiutetauave tele le avea ma sui o le Alii.” O o la’ua aafiaga, na la iloa ai e tausia lava e le Alii i latou o e auauna atu ia te Ia.
Sailia o avanoa tonu: E i ai avanoa e auauna atu ai e fetaui ma soo se tomai po o taleni a se ulugalii. Ua fautuaina ulugalii ina ia mafaufau i a latou taleni ma tomai tulaga ese, faapea foi lo latou soifua maloloina ma tulaga tautupe pe a oo i le taimi e o ai e vaai le epikopo po o le peresitene o le paranesi. O tulaga na auauna atu ai Brother ma Sister Harvey, e eseese e pei foi o nofoaga sa la nonofo ai. Sa fiafia lava i la’ua e auauna atu i soo se mea e tofia i ai i la’ua e le Alii, pe o ni faifeau faamisiona i le tautua fesoasoani mo tagata, faifeau faamisiona mo talafaasolopito o aiga, po o le faamisiona tala’i.
Aiga: O se tasi o atugaluga aupito tele e feagai ma faifeau faamisiona matutua, o le toesea lea mai o latou aiga. O Brother ma Sister Harvey e toa 7 le la fanau, 39 fanau a le fanau, ma fanau a fanau e 25. O le tuua o i latou mo le tele o tausaga sa faigata, ae o le taimi nei ua sili atu lo la’ua latalata i a la fanau nai lo le taimi a o le’i tuua e i laua. “E faigata lava ona ou faaalia le alofa na tupu a’e i lo ma’ua va… . Afai e te manatu e le mafai ona e alu ona o lau fanau, ia e alu ona o lau fanau,” o le tala lea a Sister Harvey.
O na taimi uma, na manatua ai e Brother ma Sister Harvey o loo i ai i la’ua i le galuega a le Alii. “O Lana galuega ma Lona mamalu. E tatau ona ia te oe le faatuatua e moni lena mea,” o lana tala lea.
Faavaeina o se Talatuu o le Faatuatua
O le auaunaga a Brother ma Sister Harvey ua matua sili mamao atu ma tuaoi o le misiona. Ua manuia ai a la’ua fanau i ni ala la te lei mafaufauina. “Ua na ona ma maofa lava i mea ua faia mo la ma’ua fanau,” o le tala lea a Sister Harvey.
E ioe uma lava i latou na tupuga mai ia Brother ma Sister Harvey e matuai tele se aafiaga o o latou olaga i a la’ua faataitaiga. “Ina ua o fanau tama ma fanau teine a le la fanau e auauna atu i le galuega tala’i, latou te mafaufau ia tamamatua ma tinamatua o faaaogaina o la’ua loto, manatu, mafaufau, ma le malosi i le pulapula lagoto o lo la’ua soifua, ma musuia ai i latou e faia foi le mea aupito sili,” o le tala lea a Teri Kearl, o se tasi o afafine o Brother ma Sister Harvey.
O le vaaia o uunaiga lelei ua la faia i lo la’ua aiga ina ua maea le la misiona muamua ma le lona lua, na musuia ai Brother ma Sister Harvey e saga auauna atu pea.
“O le mea moni lava, a oulua o atu ma auauna atu o ni matua matutua, o lena foi lua te auauna atu i lo oulua aiga,” o le tala lea a Sister Harvey.
Sa tusia e le tama a le la tama teine, o Nicole Kearl, o le o loo auauna atu i le Misiona i Idaho Pocatello, le mea lea e uiga i ona matua matutua: “O le vaaia o lo la’ua tuuto atu i le Alii na aumaia ai ia te au se naunautaiga tele e auauna atu i le Alii. Ou te talitonu, o lo’u naunau e auauna atu i se misiona sa uunaia i se isi itu i la la’ua faataitaiga sili.”
E Latalata Atili ai le Tasi i le Isi ma le Alii
Ua lagona e Brother ma Sister Harvey lo la’ua latalata atili atu ia la fanau ma a latou fanau ona o la la’ua tautua, ae ua faapena foi ona vavalalata atili ai i la’ua o se ulugalii. Sa faamatala e Sister Harvey a la’ua suesuega o tusitusiga paia i aso taitasi o se “faamanuiaga aupito sili lea.”
Sa faaopoopo mai Brother Harvey ua ia lagona lona matua latalata atu i lona faletua e ala i la la’ua auaunaga faifai pea. “O ona lagona o o’u lagona foi na. A tagi o ia, ua ou tagi. A ata o ia, ua ou ata,” o lana tala lea.
Ua faatupulaia la latou sootaga ma le Alii a o la faalagolago atu ia te Ia mo le mafanafana ma se taitaiga. “A e alu i se misiona, e te alu na o oe lava,” sa saunoa ai Sister Harvey. “E te faalagolago i le Faaola e pei e te le’i faalagolago lava ia te Ia muamua.”
Sa silafia e Brother ma Sister Harvey e tausia lelei lava i la’ua pe a la naunau e faalogo i uunaiga a le Agaga.
“E pei e tatala mai lava e le Alii ia avanoa … e sili atu le saosaoa nai lo le vave e mafai ona e savali atu ai,” o le tala lea a Sister Harvey. “O se manao ma se loto ua naunau—pau lava lena o le mea e te manaomia.”