O Le Mana Faamalolo o Viiga
Ua faasoa mai e tagata o le Ekalesia ia auala na faamanuiaina ai o latou olaga e viiga a Siona.
Sa Ou Malamalama i Lona Alofa
Sa i ai se taimi i lou olaga na ou sē ese mamao ai mai mataupu faavae na ou iloaina e moni. Ona o lenei mea, sa ou lagona ai lava le le fiafia tele. E ui sa ou talitonu sa aoga le Togiola mo isi tagata, ae i lo’u mafaufau, ua fai lava si ou mamao ese ma e le aoga ia te au. Sa ou manatu, ua ou le agavaa mo le laveaiina.
I se tasi taeao o se Aso Sa, na ou faalogoina ai logo o se lotu Kerisiano na latalata mai, na taina le viiga “Pe Na Faia Sau Tatalo?” (Viiga, nu. 75). Sa tuia lo’u loto i le musika, ma mo le taimi muamua i le tele o masina, na ou lagonaina ai le Agaga. Sa ou tagi ina ua ou iloa sa faaaoga e le Tama Faalelagi lenei viiga ou te lagonaina ai Lona alofa ma iloa ai o le a fesoasoani mai o Ia ia te au.
Sa le faigofie le faagasologa o le salamo, ma e tele taimi na ou lagonaina ai le lotovaivai. Peitai, o lagona na ou maua i le taeao o lena Aso Sa na tumau pea ia te au, ma i le tuanai ai o se taimi, sa ou toe toaga atoatoa ma maua ou faaeega paia i le Malumalu o Dallas Texas.
O le taimi nei pe a ou faalogo i lena viiga, ou te manatua ai lava lena taimi faagaeetia ina ua faaali mai e Le na ou manatu ua faagaloina au ia Lona alofa i se auala sa Ia silafiaina o le a ou taliaina.
Jessica Blakely, Niu Mekisiko, ISA
Sa Matou Valaauliaina le Agaga
Sa ma mananao ma lou toalua e faateleina le agaga i a matou suesuega o tusitusiga paia. Sa matou faalogo ia Elder Gene R. Cook, a o avea ma Fitugafulu, o fautuaina mai le usuina o se viiga a o lei amataina le suesueina o tusitusiga paia, o lea na tonu ai matou te faatinoina lenei fautuaga. E ui lava ina sa fai si mumusu o le ma fanau tama talavou i le manatu lea, ae sa latou malilie lava e faataitai.
O le aso na sosoo ai, sa ou taina ai i le laaupese ni viiga pe tusa ma le 30 minute a o lei oo i le matou taimi faatulagaina o le faitauga tusi. O le mea na tupu, na sosoo ai ma le suia o mea uma mo i matou. O lenei musika na ootia ai lo ma atalii e 13 tausaga (o le sa sili ona tetee i le matou fuafuaga muamua) na oo lava ina manao e usu uma fuaiupu o le viiga, ma na manao ai e usu le sili atu ma le tasi le viiga! O le taimi nei, ua faalagolago lava lenei atalii i viiga pe a ia lagona le lotovaivai pe faaosoosoina foi.
Matou te faaaogaina viiga e le gata mo le suesueina o tusitusiga paia, ae faapea foi i afiafi faaleaiga ma Aso Sa.
Marci Owen, Iuta, ISA
O Le Maliu o Tina
Mo ni nai masina, na fai ifo ai le soifua maloloina o lo’u tina e 86 tausaga, ma sa ou popole o le a le toe umi se taimi matou te mafuta ai ma ia. Sa ma fuafua ma lou toalua ma te malaga i Lille, e 80 maila (130 km) le mamao i le konafesi a le siteki, ae sa ou popole i le tuua toatasi o lou uso e vaai lo maua tina.
Sa ou faatoga atu i le Tama Faalelagi ina ia manuia mea uma a o ma toesea. Na vave lava ona oo mai i le mafaufau ia upu o le viiga “Filemu” (“Matai e, Ua Sou le Vasa,” Viiga, nu. 58), ma na mou ese atu lou popole. Sa ma o i le konafesi ma le lagona toafilemu ma le faamautinoaga na faafofogaina e le Alii au tatalo ma sa tausia lou tina.
Sa lelei lava mea uma a o ma o ese atu.
I se taimi mulimuli ane, na valaau mai ai lou uso pe mafai ona alu atu lou toalua o Yves, e fesoasoani e sii lou tina i le moega. E lei leva ona taunuu atu o ia i le fale o lou uso, ae maliu loa lou tina.
I le le manao ai e ta’u mai lenei tala i luga o le telefoni, sa valaau mai ai Yves ia te au ma fai mai, ua le to’a lou uso. Sa ia fautua mai e tapena ni nai au meatotino o le a sau e aveatu au.
Sa amata ona tapena lau atoapau ma le manatu atonu o le a ma nonofo ai ma lou uso mo sina taimi e fesoasoani i le tausiga o le ma tina. A o amata ona tapena lau ato, na ou lagonaina sa pei na taitaiina au e le Agaga o le a le manaomia le tapenaina o ni mea. Na ou iloaina ua maliu lou tina. Ae sa ou lagonaina foi le toafilemu, e pei lava na i ai ae ou te lei alu i le konafesi a le siteki.
Na taunuu mai Yves i le fale, ma sa taumafai lava e faamatala mai le mea na tupu. I le faamamaina o lana avega, na ou fai atu ai ia te ia, ua uma ona ou iloa ua alu Tina.
Sa faaauau pea ona lagolagoina au e le malamalama o le talalelei, ma sa mafai ona ou faamafanafana atu i lou uso ao ma faanoanoa mo lo maua tina. E tele taimi ou te tatalo ai mo le toafilemu, ma o taimi taitasi na ou lagonaina ai le faamautinoaga e faapea, sa fesoasoani mai le Tama Faalelagi ma lou Faaola o Iesu Keriso i ou faanoanoaga ma tiga. O lo matou faatuatua ma tatalo na matou iloa ai le mea na tuuina mai e viiga paia: “Filemu.”
Nicole Germe, Pas-de-Calais, Farani
O Le Usuina o Pese Na Faamafanafanaina Ai o Maua Loto
I ni tausaga se tele ua leva, sa ou fuafua ai ou te faaaluina le Po o le Kerisimasi faatasi ma lou aiga, ma sa ou le nofonofo lelei ai lava. E lei leva ona ou auai i le Ekalesia, ma sa faitio lava lo’u aiga i lau tapuaiga fou. Na atili le lelei lea tulaga i le taimi na ou aveina atu ai lo’u tina i le fale o lo’u tinamatua. Sa matuai onā lava lou tina, ma sa faaosoosoina au e muga atu ia te ia. O le fiafia sa masani ona ou lagonaina i le vaitau o aso fiafia sa suia i le faanoanoa. Sa faapea loa ona ou tatalo lemu mo se fesoasoani.
Sa ou kiina le leitio o le taavale i le alaleo lauiloa sa masani ona ou faalogologo i ai, ma le faamoemoe e siitia ai lou agaga. Ae sa uunaia au e tape le leitio ae usu viiga o le Kerisimasi. Sa ou faia, ma sa faapea ona tau toafilemu mai ai lo’u tina—e ui ina sa faateia ai o ia. Sa faapea foi ona pese mai ai ma ia i nisi o pese o le Kerisimasi.
Sa vave lava ona suia ai ou uiga, ma sa faamanatu mai ai ia te au le uiga moni o le Kerisimasi. Ina ua ou mafaufau i le tuuina mai e le Faaola ma le le manatu faapito o Lona soifua mo i tatou, na pei ai ou faafitauli e laiti ma mafai ona taulimaina. Sa ou iloaina sa tele ni faamanuiaga na ou maua i lou olaga faapea ma ni mafuaaga se tele e tatau ai ona ou olioli. Sa ou lagonaina le faamautinoaga sa faatasi mai le Agaga Paia ia te au, ma sa ou talitonu e mafai ona ou tali filemu atu i soo se faitioga ou te maua e uiga i le Ekalesia.
E lei aveesea e le pese ou faafitauli, ae na mafai ai ona ou taulimaina i se agaga lelei—ma o lena mea na faia ai se eseesega tele.
Kimberley Hirschi, Kalefonia, ISA
Sa Sii Ese Atu La’u Avega
I le 1988 sa ou tauivi ai ma la’u pisinisi. Ina ua uma ona ma feutagai ma lau peresitene o le siteki, na tonu loa ia i maua ma lou toalua e faatau atu le pisinisi ae sue se isi galuega. Sa ou mulimuli i le tele o avanoa i le sailiga o se galuega, ae o ia avanoa taitasi na tuua ai i maua ma lou toalua ma le le fiafia, lotonutimomoia, ma aunoa ma se alatupe mautu.
Ina ua tuanai se tausaga, na amata ona utiuti la ma seleni, ma sa ou lagonaina le mamafatu o se avega na foliga mai e le mafai ona amoina. Sa i ai so ma atalii i le misiona ma le isi toaono i le fale, ma sa ou lagonaina ua ou toilalo mo i latou.
I se tasi aso a ou lagonaina le mamafa o lenei avega, sa ou iloaina ai sa ou mafaufau pea lava pea i se fati mo ni nai aso. Sa vave ona ou iloaina o se viiga lea, ma sa faamafanafanaina au e le Agaga, a o ou manatuaina ia upu:
Ia e lotomaualalo ona taitai lea o oe e le Atua,
I ou vaivai uma.
(“Ia e Lotomaualalo,” Viiga, nu. 69)
O le taimi lava lena na pei e sii ese atu la’u avega, ma na ou iloaina ai na silafia e le Tama Faalelagi lo’u tulaga. E ui ina sa ma tauivi ma mea tautupe mo ni nai tausaga, ae sa ou mafanafana i le iloaina o le a Ia taialaina a maua filifiliga pe afai ma te saili e fai Lona finagalo.
Sa matou siitia atu i se isi aai fou ma iu ai ina maua se pisinisi fou. Faatasi ai ma le fesoasoani mai o isi, na mafai ai e lo matou aiga ona faatau se fale, ma manuia le pisinisi.
E ui lava ua aluese atu lena luitau i tulaga tautupe, ae o loo faaauau pea ona ou taumafai e faalogolgo i viiga pe a oo mai i lou mafaufau. Ua ou iloaina e masani ona tali mai le Tama Faalelagi i au talosaga e ala i musika paia.
Warren C. Wassom, Idaho, ISA
E Faapefea Ona Ou Pese?
O tausaga ua leva, na maliu ai lou tina i se faalavelave tau taavale ona o se avetaavale e onā. I lou te’i tele, na ou alu atu ai i le fale o ou matua ma fesoasoani i nai ou tei ma lou tama na manu’a, e fuafua le falelauasiga.
E lei umi ona ou toe foi mai i lou aiga, ae valaauina au o se taitai musika i le Peraimeri. A o ou sauniuni, na pei na taia ou lagona, ma na amata ona ou masalosalo i ou tulaga gafatia. “O se taitai musika i le Peraimeri e tatau ona naunautai ma laumata fiafia,” sa ou mafaufau ifo ai ia te au lava. Sa na o le faanoanoa na ou lagonaina. Sa ou manao e faamalosiau i tamaiti, ae na ou lagonaina o le a ou tuuina i latou i lalo. Sa tiga lou loto i le faanoanoa. Sa ou mafaufau pe faamata ou te toe maua le fiafia—po o le fia pese foi.
O le aso ao lumanai le aso na amata ai ona ou tautua i lou valaauga fou, sa ma auai atu ai ma lou toalua i se sauniga i le malumalu faatasi ma ni uo sa faamauina. A o lei amataina le sauniga, sa valaaulia i matou i le falesa o le malumalu mo se viiga amata, tatalo, ma se saunoaga mai se taitai o le malumalu. A o matou usuina le “E Malu ma Alofa Poloaiga a le Atua” (Viiga, nu. 66), Sa ou matuai gauai atu i upu o le viiga:
Se a e popole ai
Lou manatu i ou vaivai?
Ia vave i lou Tama o i luga
E maua ai le mapusaga.
Sa ou lagonaina sa ou “popole i lo’u vaivai” ma sa ou iloaina ai iina, i totonu o Lona malumalu paia, sa ou maua ai le “mapusaga.” I le fuaiupu e fa na ou faalogoina ai se savali tuusao mo au:
Ua moni o Lona alofa,
E tumau i aso uma;
E lafo lau avega ia te Ia
Ma ou pese fiafia.
I lena lava taimi na ou iloa ai e mafai ona ou faataunuuina soo se valaauga, ma e mafai ona ou lagonaina le olioli, e ui lava ina ou misia lo’u tina. Ma ona sa ou iloa na tauaveina e lo’u Faaola la’u avega, o lea na mafai ai ona ou pese!
Sheri Stratford Erickson, Idaho, ISA